هو الفانتازيا اخيرها 180 كم/ساعه

[amrsabet]

انا واحد زميلى فى الشغل شارى فانتازيا من حوالى 4 شهور وبيحكيلى انه كان مسافر الساحل وكان جايب 180 كم على الخامس وبعدين بص لقى العربية نقلت سادس وفضلت ماشية 180 برده وبعدين لقى العربية سقطت نقلة للخامس تانى ومش عايزه تزود

انا استنتجت انه رجلة تقيلة على البنزين عشان كده العربية بتسقط نقلة كل شوية لانه كابس بنزين وانها كانت محتاجة واحدة واحدة عشان تزود عن 180

السؤال هنا للاعضاء اللى معاهم فانتازيا ياترى هيا بتجيب اكتر من 180 كم بالتكيف ولا من غير وبيكونوا ماشين على D ولا Ds و تيبترونيك

عشان فى اعضاء بيقولوا ان اخرها 205 كم فكنت عايز اعرف السرعة بتتجاب بسهولة ولا لازم تكون فى منزل زى طريق العين السخنه كده

شكرا

[dramir1]

ممكن يكون فيها
speed limiter=there is max speed cant be exceeded

[newcar2011]

انا كنت بسابق اوكتافيا على الصحراوى بالانوس ووصلت 187 ومقدرش يهرب منى كنت لازق فيه بس مش قادر اعديه ولا هوة قادر يهرب

[dado_256]

الكلام ده اكيد مش صح اكيد فى حاجه غلط

[Bumbo]

..........

ممنوع الكتابة بالفرانكو اراب

يرجى مراجعة قوانين المنتدى

م ع 8

[newcar2011]

والله العربيات دى مواتيراها اقل من حجمها ووزنها انا ركبت الباسات 1600 ولم تتخطى حاجز 195 كيلو وبالعافيه

[tam77]

يا جماعة السرعة الزيادة خطر
خاف على حياة ولادك وأهلك

[dr_darsh]

السلام عليكم ورحمة الله وبركاته
مشكلة صاحبك دى بسيطة جدا واضح من كلامك انه كان ماشى على ال d وحضرتك لو رجعت لكتالوج العربية هتلاقى مكتوب انه لايمكن الوصول للسرعة القصوى للسياره وهى على النقلى السادسة أو على ال d
جرب يخليه يسحب على ال s لأنه مافيهوش نقله سادسه او يجيب الفتيس على الوضع اليدوى بس مش يديها النقلة السادسة والعربية هتوصل معاه لحد 195 - 200 تقريبا
طبعا الحرارة الخارجية والتكييف و اتجاه الهواء الخارجى وضبط الكاوتش والبنزين كلها عوامل تؤثر على السرعة القصوى للسيارة
انا عارف ان العربية ثباتها يشجع على السرعة بس ليها مخاطرها المميته وانا بأجرب عربية والدى الأوكتافيا طلعت بيها على الصحراوى وجبت بيها 200 بس فى لحظة واحد كسر عليها وسبحان اللى نجانى أنا و العربية من الحادثة ....
وربنا يبعد عنه الحسد

[amrsabet]

افهم من كده انها بتجيب 205 بسهولة ولا زى الفلوانس مالكيها بيقولوا بعد 180 بيبقى صعب انها تزود عن كده الا لو فى منزل
مع العلم ان كتالوج الفانتازيا فيه السرعة القصوى 184 كم وممكن لو زودنا 20 كم دائما عن اى سرعة معلنة فى كتالوج يبقى فعلا ممكن تجيب 205 كحد اقصى

[AHMED1718]

استمتع بعرييتك ومش هتفرق الكام كيلو دول

انتا لو عايز تجيب 200 فضول باحساسه صدقنى لما تجيبه هتقول وايه احساس ال 220 مالفيرنا بتجيبه اشمعنا انا راكب عربية3 اضعاف تمنها ومش بعرف

اما لو بتجرى علشان تلحق ميعاد مهم بردو مش بتفرق

[AhMeD MeTwAlY]

في ناس الجري بالنسبه ليها متعه (انا واحد منهم)

[superb]

الجرى فيه نشوه و متعه لا تقدر بثمن ... ولكن الخطر خطر لا يمكن تجاهله ..

[tam77]

يا أخوتى الأعزاء أنا جريت كتير جدا بس أكتشفت أن الجرى شر مش متعة الطرق فى مصر مش مهيئة للجرى خالص
أنا لى صديق مات أدام عينى سنة 1997 كنت رايح معاة العاشر من رمضان لجامعته معاة أوبل فكترا موديل 1995 العربية كانت جديدة قلتلو مش هاركب معاك وأروح بعربيتى علشان أرجع بدرى
كان طاير بالعربية طبعا ثبات كبير وقع من فوق كوبرى العاشر من رمضان واحد زنق علية مصدقتش ساعتة أنى كنت هاركب معاة الى يحزن أن كان سنة تخرجة والولد الوحيد أهلة مدمرين لحد دلوقتى
وللعلم صديقى كان محترف أوتو كروس رجاء السرعة الزيادة خطركبير وربنا يحفظنا

[KHALED AYMAN]

النقله السادسه فى العربيه اتعملت عشان تريح الموتور ..مش عشان تجيب سرعه عليه ..
العربيه بتجيب 195 و صعب اوى (مش مستحيل) تجيب 200
وبتجيبها على D عادى بس بتكون دايس بحيث انها متنقلش على السادس
الى حصل لصديقك انه كان بيخف رجله ..فالعربيه تاخد سادس ..ويكبس تانى فتنزل هى للخامس ..
وعموما السرعه القصوى مش هتختلف ما بين d او s او تيبترونيك ..لان فى الاخر الموتور واحد الاوضاع دى فقط للتحكم فى توقيت النقلات ..يعنى مثلا على s العربيه بتنقل متاخر شويه ...ولما تكون مثلا دايس على التانى و تشيل رجلك هتفضل على التانى ..(هتفضل محضره النقله عشان اول ما تدوس تجمع معاك على طول)
لكن على d بتنقل بدرى او متاخر حسب رجلك ...ولما تكون دايس على التانى و تشيل رجلك ..هتبدا هى تاخد نقلات اعلى >>>3 4 5 عشان الار بى ام ينزل .. و الموتور يرتاح ...
الاهم من ده كله ...السرعه ملهاش كبير ..واخطاء الغير فى مصر لا حصر لها ...
ناس كتير هنا شافت عربيتى بعد الحادثه حصلها ايه وانا نجيت من الحادثه باعجوبه ..طبعا بفضل ربنا قبل كل شىء ..
واساسا انا على اقصى تقدير كنت ماشى 120 (كلام فاضى بالنسبه للاوكتافيا)

[amrsabet]

انا بشكرك على ردك بس انا شوفت على اليوتيوب العربية جايبة 200 وفى a5 القديمة جايبة 205 والاثنين كانوا 1.6 mpi
انا اعتقد ان فى مشاركة فيها ان السرعة 203 بتتجاب بالفانتازيا وعلى ما اظن انه كان فى طريق مصر الاسماعيلية بس الحقيقة انا مش فاكر كانت من مين