اخر افتكاسة ..... ارتوك هرب بره مصر يا جدعاان

[Mahmoud Nagieb]

ازيكم يا شباب

كنت النهاردة رايح اتفرج على الفانتازيا ... فلاقيت معرض اسمهegy motors ولاقيت فانتازيا 2012 واقفة .... قولت ادخل ابص ... ركبتها لاقيت فتيس dsg فبقوله ده وكيل يا باشا ؟ .... قالى لا ده خليجى هاى لاين ب 199
قولتله يعنى انا اشترى عربية ب 200 والاقى فتيسها باظ منى على 30 الف كيلو ؟ ... قالى ياباشا ماهو انت مقدامكش غيرها ... مفيش توكيل دلوقتى خلاص اصل ارتوك هرب بره البلد علشان صاحبها كان بيتاجر فى السلاح مع مبارك

طبعا انا كان معايا الحاج ... واصلا انا غلبت علشان اقنعه بالفانتازيا يروح يتفرج عليها ... لاقيت الحاج وشه قلب كده وقاللى يعنى انت جاى تفرجنى على عربية ملهاش توكيل

انا قولت يا واد فوت علشان متمسكش فى خناق الراجل ده ... ورحت ماشى انا والحاج ... وطول الطريق بقى بحاول اصلح اللى الراجل بوظه اللى يخرب بيته

ده احنا عندنا شوية ناس بتوع مبيعات عاوزين الحرق والله

[AhMeD MeTwAlY]

بجد انا لو مكانك كنت قولتله هات دليل علي كلامك

[Mahmoud Nagieb]

دليل ايه بس ... ده ناس فنانة فى التحوير واللف والدوران وانا مش هدخل نفسى فى متاهة مع واحد بتاع مبيعات ... اصلا معلومة خطيرة زى ده انا مخدهاش من بوق واحد بتاع مبيعات ... انا اروح وادور واوصل للمعلومة من ناس ثقة

[dramir1]

متابع باهتمام

[M.Elwan]

هو شفيق جبر كان من رجال النظام السابق وهو فعلا مظهرش خالص بقاله سنة ومفيش تأكيد او نفى للمعلومة دى حتى الان وموضوع انه ممكن يكون بره مصر ده شىء مش مستبعد خصوصا ان رجال اعمال كتير خرجو ولسه مرجعوش
بس بغض النظر عن شخصة هل فى حالة غيابة عن مصر التوكيل حيقفل ؟ اكيد لأ
الا لو هرب يبقى ده موضوع تانى

[mahamedaraby]

يافندم ده ممكن يطلعلك ابوه تاجر سلاح علشان يبعلك العربيه

[inspiron]

ده رقم التوكيل 0224844926
إديه للحاج
بالمناسبة أنا كنت لسه عندهم قريب بعمل صيانة الـ 30 ألف.
بس الله يرضي عليك.بعد ما تثبت للحاج إن الوكيل موجود ومفيش حاجة إتغيرت تروح المعرض ده تاني وتمسك الواد ده ووو............مش هكمل بدل ما أتوقف..بس عاوزين نسمع إن في عضو معانا هنا غير نوع إنسان في البطاقة الشخصية بتاعته
حاجة تحرق الدم

[RedBull_30]

طب خلاصة الموضوع دلوقت والاهم من موجود التوكيل هو : الاوكتافيا 2012 هتنزل ب جير بوكس dsg ؟

هي المانيا ما وصلتش عندها المعلومة لسة ولا ايه!!
ولا يا ترى فعلا بعد موديلات 2009 في الفولكس العيب اللي كان متواجد اتصلح وبشكل ده ال dsg هيتعمم في كل سيارات فولكس؟؟
انا مش ضد الجير بوكس ده بس احب ما اسمعش عن عطل حصل بسببه

[MASERATI]

السلام عليكم و رحمة الله و بركاته

تصدق أنه منطق برضه, يعنى أنت تقوم واخد ال200 ألف جنيه مصرى فقط لا غير فى ايدك و تقوم رايح شارى العربية الخليجى أم فتيس هيبوظ و تمشى, من غير ماتفتح بقك و لا تقول و لا كلمة و تبوس ايدك شعر و دقن, و ده فى سبيل أن المعرض يبيع, منطق و لا أحلى فعلا.

ايه يا أخى, أنت ماعندكش لا رحمة و لا شفقة و لا قلب, ايه ؟؟؟؟؟؟؟؟؟؟!!!!!!!!!!, يعنى عشان أنت خايف لا فتيس العربية أم 200 ألف جنيه يبوظ و العربية لسه عليها اللزق الأبيض بتاع المصنع, تقوم ماتشتريش العربية؟؟؟؟؟ و المعرض حاله يقف !!!!!!!

أما أنت أمرك غريب فعلا يا أخى.

و الله, أنا لو بخبز ال200 ألف جنيه دول فى الفرن بتاع بيتنا, كان بقه ليهم معزة عندى برضه !!!!!!!!!!!!!!!

[dr_medoo]

بصراحه كل يوم الواحد بيكتشف ان المصريين دول استاذه فى الفتى والكدب
وده كله علشان ايه علشان يبيع وبس ومش مهم البنى ادم الى هيدفع ال199 الف
بس بصراحه عاجبنى الاحترام بتاع صاحب المعرض 199 بس يعنى مش 200 هو مش هيسرقك

[M.Elwan]

فى نقطتين ياريت نتناقش فيهم
اولا نقطة ضمان العربيات الخليجى

النقطة دى مهمة جدا لان سوق الخليجى فى مصر كبير جدا وشغال بقاله سنين وفى معارض وشركات كحتركة كتير بتدى ضمان حقيقى وموثوق فيها
يعنى مش عشان معرض غير جيد يتسبب فى الاساءة لكل تجارة السيارات الخليجى فى مصر

النقطة التانية هى السيارة نفسها
هل فعلا فيه مشكلة فى الفتيس الdsg ؟ وهل المشكلة دى لو موجودة بالفعل.. لا يمكن اصلاحها وتسلتزم تغيير الفتيس بالكامل ؟

هل المشكلة دى منتشرة فى كل العربيات المزودة بالفتيس ده زى الجيتا والباسات والسيات ولا المشكلة دى فى الاوكتافيا بس؟

[KHALED AYMAN]

الفتيس ده هيخلى العربيه تفشل فشل رهيب فى مصر

[Mahmoud Nagieb]

والله يا جماعة انا قصدى من الموضوع مش ان الفيتيس كويس ولا لاه ولا بذم فى الخليجى وبقول انه وحش .... بس انا بتكلم على فئة معينة من بتوع المبيعات فعلا عاوزة الحرق ..... كل همه انك تنفعه وتشترى البضاعة بغض النظر انه ضاحك ومحور عليك ... اهم حاجة ان الزبون يلبس

تانى حاجة انا اللى اعرفه ان الفانتازيا الوكيل 2012 فتيسها زى ماهو ال 6 سرعات وال dsg مش بينزل غير فى بعض نسخ الخليجى

كمان انا ايه اللى يخلينى اشترى عربية خليجى بفتيس ناس كتير اوى بتشتكى منه ومغيراه فى التوكيل واروح اشترى ضمان من بره وادفع عليه فلوس كمان ؟؟

انا شايف ان اصلا مفيش كماليات زيادة فى الخليجى ... ده انا اسمع ان عربيات الوكيل فيها تصفيح من تحت وارتفاعها اعلى وفيها مساحة على الزجاج الخلفى

[KHALED AYMAN]

الخليجى جنط 17 الوكيل لا ..
الخليجى ارتفاعها اقل من الوكيل و فى المقابل ثباتها اعلى من بتاع الوكيل
الخليجى فيها سينسور بارك امامى الوكيل لا ..
الوكيل الهاى لاين فيها ابنوس الخليجى لا
الوكيل الهاى لاين الفرش جلد بالكامل الخليجى نص الكرسى فقط جلد

[IronHead]

الخليجى جنط 17 الوكيل لا ..
الخليجى ارتفاعها اقل من الوكيل و فى المقابل ثباتها اعلى من بتاع الوكيل
الخليجى فيها سينسور بارك امامى الوكيل لا ..
الوكيل الهاى لاين فيها ابنوس الخليجى لا
الوكيل الهاى لاين الفرش جلد بالكامل الخليجى نص الكرسى فقط جلد

كل دة مستهلش انك تجازف وتجيب dsg من غير ضمان