استفسااااااااااااااااااااااار عاجل جدا

[rompo10]

معروض عليا a5 2006 بس فيها مشكله ان الفتيس ساعات بيفصل وياخد النقله ويرزع وبعد كده عادي ومتغيرلها الزيت بتاع الفتيس عاوز اعرف دلوقتي دا تغير فتيس ولا بلوف وياريت الاسعار بتاعغه الفتيس والفلوف ولو ممكن تتصلح ولا لا بس ياريت بسرعه

[benmatar]

السلام عليكم
المشكلة ممكن تكون محتاجة زيت جديد ومش أي زيت جديد!!! لازم زيت الوكيل الغالي من 400 إلى 600ج.م مع وبالكمية السليمة زي الكتالوج، يعني لو زاد شويه هيخلي التسارع سيء والنقلات أسوأ. مش زي فتيس المانيوال يتملي للآخر!!! والموضوع ممكن يوصل لتغيير بلوف وده مكلف، يعني سعر body valve لفتيس أوكتافيا A5 حوالي 10000 آلاف ج.م (عشرة آلاف) وده غيرته في A5 2005 كانت مشكلتها مقاربة لنفس اللي بتقوله حضرتك.. أنصح حضرتك بما بعد 2005و2006. ويكون الكيلومتر قليل. لأن العيب مش في الفتيس ولكن احنا بنحب نمشي على الفتيس من غير تغيير زيت لأنه مبيشتكيش. المفروض تغيير الزيت بتاع المدرسة الألماني والفرنساوي كل 50 إلى 60 ألف كيلو وإلا البلوف تبوظ، وده برضه حصللي في بيجو 406 والعيب مش زيت، العيب مستخدم بيطنش الصيانات زي حالاتي وبيشرب بعد كده... والدليل إن لو واحد بيغير زيت (زيت الوكيل الأصلي مش موبيل أبو 40ج للكيلو) مش هيلاحظ أي مشكلة وده برضه شيء جربته حتى في الفيرنا الأوتوماتيك بتاعت الحاج لما غيرنا الزيت قبل معاده رجع زي الزيرو، المهم قبل 50ألف كيلو. وبالتوفيق

[gomangy]

كلام سليم 100 100 ولا غبار عليه

[ehab_osman]

وبقول في النهاية ............ أي عربية لم تغير زيت الفتيس علي 60 الف كم لا تشتريها اب

معروض عليا a5 2006 بس فيها مشكله ان الفتيس ساعات بيفصل وياخد النقله ويرزع وبعد كده عادي ومتغيرلها الزيت بتاع الفتيس عاوز اعرف دلوقتي دا تغير فتيس ولا بلوف وياريت الاسعار بتاعغه الفتيس والفلوف ولو ممكن تتصلح ولا لا بس ياريت بسرعه

في مشاركة عاملها زميل اسمة ايمن ...
فيها كل حاجة انت عايزها ........................ دور عليها ، واختصار هو بيقول العيب ده من علبة البلوف ............... وديه غاليه جدا ؟؟؟؟؟؟؟؟؟؟؟؟؟
وبقول في النهاية ............ أي عربية لم تغير زيت الفتيس علي 60 الف كم لا تشتريها ابدا ؟؟؟؟؟؟؟؟؟؟؟؟؟؟
دور علي هذه المشاركة القيمة ؟؟؟؟؟؟؟؟؟؟؟؟؟؟؟؟؟؟؟؟؟؟ وان اححاول اشوفهلك ؟؟؟؟؟؟؟

[rompo10]

شكرا ياجماعه علي الاهتمام انا اتصلت بواحد عنده مركز صيانه وقالي غير بلوف جديده احسن وبلاش فتيس استيراد وقالي البلوف الجديده تمنها 10000 فعلا بس كده انا هاصرف نظر عن العربيه دي انا كنت هادخلها في ال a4 وادفع فرق بعد ما عرفت سعر البلوف قلت لصاحب العربيه هاتاخد عربيتي واخد عربيتك من غير فرق وانا هاصلحها طبعا قالي لا وانا في ال a4 اول مااشترتها تاني يوم غيرت زيت الفتيس بتاعها ب 550 بالفلتر وال a5 فيها كوبلن بايظ كمان سالت عليه قالي 3000 مش عارف دا حقيقي ولا لا

[Youssef.Awad]

نصيحة لوجه الله ابعد عن اى عربية مستعملة وفيها مشاكل
بناقص حتى لو هاتشتريها بتراب الفلوس
راحة البال لا تقدر بتمن

[ehab_osman]

"فيها مشكله فتيس"

مشاركة من الزميل KHALED AYMAN
توضيح بخصوص الفتيس التيبترونيك
رابط المشاركة

السلام عليكم...
فى الفتره الاخيره ..بدأت الناس تخاف من الاوكتافيا ..خصوصا فى المستعمل ..وكله بيقول "فيها مشكله فتيس"
وكلامى بخصوص ال a5 و الفانتازيا ..لان هما نفس الفتيس...
وفى الموضوع ده هحاول اشرح المشكله و ازاى نتلاشى حدوثها ...ولو لا قدر الله حصلت نعمل ايه ؟؟

فى البدايه ..ايه هى المشكله ؟؟

المشكله بتحصل فى جزء معين من الفتيس اسمها البودى فالف ..او عقل الفتيس كما يسميها البعض ..
باختصار هى مجموعه صمامات او بلوف ..بيمر الزيت من خلالها ...(زيت الفتيس) ..

ايه المشكله الى بتحصل ؟

البلوف او الصمامات دى ..بتتسد ..تبدأ العربيه "ترزع" فى النقلات ..

طيب ايه الى بيسد البلوف ؟؟
نتيجه الاحتكاك الميكانيكى بين تروس الفتيس ..بينتج "رايش" من التروس و الاحتكاك ..الرايش ده بيمشى مع الزيت ...ومع كتر الرايش ..بيتراكم على الصمامات دى ..و يسدها ..وهنا تحصل الرزعه او الخبطه فى النقلات ..

طيب ايه ازاى نحافظ على الفتيس ؟؟
الموضوع سهل جدا و بسيط جدا جدا و بيتلخص فى كلمه صغيره ..وهى زيت الفتيس

زى ما قلت قبل كده ..الرايش ده بيمشى فى الزيت ..
يبقى عشان نحافظ على الفتيس ..هنغير زيت الفتيس كل 60 الف كم ..زى ما التوكيل قال ...
وللامان ..نغيره عند 50 الف كم ...
لكن بأى حال من الاحوال ..متعديش ال 60 الف بنفس الزيت
وتغييره فى التوكيل بحوالى 700 جنيه ...(غالى شويه لكن هيوفر عليك مبلغ خزعبلى هتشوفه دلوقت)

طيب ايه الفكره فى اننا نغير الزيت ؟؟
لما بننزل الزيت الى فيها ..بينزل بالرايش الى فيه ..وبكده بتكون فتحت صفحه جديده مع الفتيس

طيب لا قدر الله لو حصل و المشكله دى ظهرت ايه الحل ؟؟
هيكون ادامك اختيارين ...
1-تشترى فتيس كامل استيراد سعره بيتراوح بين ..14 :17 الف ...انت و شطارتك ..لكن غالبا سعره مش هيتجاوز ال 15 ..
2-تشترى علبه بلوف جديده من التوكيل ..ب 11 الف ...ده غير التركيب وغيار الزيت ...

طيب ايه الافضل فيهم ؟
الافضل شراء فتيس كامل ...لان معروف عن الفتيس الاوتوماتيك انه لما بيتفك من بعضه ..مش بيرجع زى ما كان ..ومفيش احسن من "قفله الخواجه" ..فأنت لما تشترى فتيس استيراد ...مش هتفك فيه ولا اى حاجه ..هتركبه فى مكانه و تحط الزيت و تتوكل على الله ...

طيب اضمن منين الفتيس الاستيراد ؟؟
مركز نور الدين شريف ..المركز الوحيد المعتمد من ارتوك اوتو فى اسكندريه ..بيركب قطع غيار استيراد ..عليها ضمان 6 شهور ...وناس فاهمين ..
طبعا فى ناس كتير فاهمين ..لكن الميزه فى المركز ..انه ضمان 6 شهور على اى قطعه استيراد ..
طيب لو مش عاوز حاجه من المركز و هشتريه انا ...
1-الراعى الصالح فى الحرفيين
2-مجدى البيومى
3-ماجد البهى طنطا ..وليه فرع فى اسكندريه
4-الشيخ اسامه الديب طنطا ..سكه المحله

طيب دى كده الجزئيه الخاصه بواحد معاه العربيه و عاوز يحافظ عليها ..او معاه و باظت و عاوز يصلحها ..
الى بيشترى مستعمل بقى ..ياخد باله ازاى ؟؟

عند شراء سياره مستعمله ..
1-يا اما تشترى عربيه عدادها لم يتجاوز ال 60 الف كم ..بحيث ميكونش ميعاد تغيير الزيت جه و صاحبها اهمل ..
2-تشترى عربيه عدادها اكتر من 60 الف كم ..لكن معاها فاتوره تغيير الزيت فى التوكيل او اى مركز معتمد ...
3-تكون شاريها من حد ثقه ..ويكون فعلا غير زيت الفتيس ..المهم تكون تثق فى كلامه ...

طيب اختبر ازاى فتيس العربيه و اعرف انه سليم ؟؟
اختبار الفتيس بيتلخص فى ..ارهاق الفتيس..
اتعبه معاك ..
دووووووووووووووووووووووووس و شيل رجلك فجاه ..
ودوس تانى ..كيك داون ..وهكذا و على سرعات مختلفه ,,بحيث ان الفتيس يفضل فى مرحله تغيير نقلات باستمرار ومتنساش تجرب تمشى على المانيوال موود ..لو فى مشكله فى البودى فالف هتلاقى الفتيس بدأ يعمل "دبه" و هو بينقل ...

المعلومات المذكوره فى الموضوع ..من اجتهادى الشخصى وتجارب شخصيه واقعيه ..ودردشه مع مهندسين فى التوكيل ..ومراكز خدمه ..وبعض الخبراء ومعلومات من المنتدى هنا ...والموضوع بأكمله يحتمل الصواب و الخطأ ..

يا رب يكون الموضوع مفيد ويعجبكو ..

[rompo10]

شكرا يا باشا علي المعلومات

[alawizo]

ده حاجه اسمها عقل فتيس ب 14000 يتم تغيره في التوكيا مباشره ومتلفش كتير