تقريرى الشامل عن عربيتى اوكتافيا a5 بالتفصيل ..

[modiabbas]

بسم الله الرحمن الرحيم

العربيه معايا من شهر 2 - 2009

بقالها حوالى 3 سنين الا كام شهر معايا

و ده تقرير منى عن العربيه ديه بكل حياديه

و ان شاء الله اقدر افيد اى حد بيفكر يشتريها

التقرير عندنا هيتضمن

1- قبل ما اشترى كنت بقارن بأنواع عربيات ايه
2- احساس اول مره اركبها
3- الشكل الخارجى
4- العربيه من الداخل
5- الثبات
6- اداء الموتور
7- الفرامل
8- توكيل العربيه ( ارتوك اوتو ) و قطع الغيار !
9- تقييم العربيه

هنبدأ على بركه الله بأول موضوع و هو
1- قبل ما اشترى الاوكتافيا كنت بقارن بين انواع عربيات ايه :

مبدأيا كان معانا مرسيدس 200 1982 و ديه كانت 2000CC
و كانت وحش كاسر بمعنى الكلمه سواء عزم و قوه و ثبات و فرامل ...

فا اتباعت و قررنا نخش حياه الزيرو

و طبعا كان اللى منتشر على الساحه الوقت ده التويوتا الكورولا الشكل الجديد
و الانسر الشارك و الهيونداى الانترا الشكل بتاع موديل 2009

و مكنش فى بالنا نوع اسكودا ده خالص

المهم عشان مطولش عليكوا شكل اللانسر الشارك جذبنى جدا بالذات الهاى لاين منها

كانت لون نبيتى و جنوط 16 و زجاج فاميه و عتب و سبويلر و طبعا شكلها يجذب الواحد جدا

المهم دخلنا معرض انا و والدى فا والدى شافها و عجبه شكلها جدا

فا بالصدفه صاحب المعرض بيقوله كنت راكب عربيه ايه

قاله مرسيدس 1982

قاله كنت المانى و جى تشترى لانسر !!
مع كامل الاحترام لللانسر
( طبعا انا مش بقلل من اى نوع عربيه )

المهم صاحب المعرض قاله انا هوريك عربيه و اركبها و احكم انت

المهم شاورله على الاوكتافيا و والدى ركبها و عجبته جدا جداا و حاس بالفخامه اللى فيها

و فعلا اخترها

و تم شراء الفئه (B) ستيبترونك

ديه جنوط 16 و كاسيت Mp3 بشاشه و مثبت سرعه و تكيف ديجيتال و 2 ثلاجه ...

و كان سعرها 165.000 من المصريه للسيارات و تم الشراء .....

هنيجى لتانى نقطه و هى :

2- احساس اول مره اركبها

طبعا اول ركوبه بيكون ليها طعم تانى عن اى ركوبه للعربيه فى وقت تانى

كان احساس رائع بالفخامه و الهدوء و ريحه الفابريكه فى الصالون تحفه

و اكيد كل واحد اشترى زيرو ايا كان نوع العربيه بيحس بالاحساس بتاع
التغيير ده ..

3- الشكل الخارجى :

طبعا الشكل الخارجى ده بيكون اذواق و انا عاجبنى جدا حاسس ان العربيه مرسومه من
رسام محترف ... تصميم انسيابى جدا بالذات عند النظر على جانب السياره بتحس
بابداع فى التصميم و انسيابيه عاليه جدا



Uploaded with ImageShack.us


و طبعا شكل الشبكه من الامام مع الفوانيس يجعلك تشعر بنظره شرسه ممتزجه مع الوقار
من العربيه .... و هى اذواق قد يختلف البعض معى ..
لكن لولا اختلاف الاذواق لا بارت السلع ..



Uploaded with ImageShack.us

4- العربيه من الداخل

العربيه من الداخل مريحه بالنسبه لى جدا و لكن لى تعليق بسيط على صوت تزييق خفيف
من الجانب الايمن فى الخلف تشعر به عند اغلاق النوافذ و الكاسيت
والمشى فى طريق مكسر و سئ ... و لكن غير محسوس بالمره
الا لو ركزت معاه جداا !!
العربيه مريحه جدا و واسعه حيث المسافه بين قدم الراكب الخلفى و الكرسى الامامى
كبيره جدا و مريحه و الكراسى الاماميه مريحه جدا
نيجى بقى نتكلم عن شنطه العربيه فهى بحر بمعنى الكلمه
مساحتها كبيره جدا جدا جدا ! و فى امكانيه فتحه الشنطه على الكنبه لتحصل على مساحه اكبر
بحس شنطتها عامله زى العربيه النص نقل كبيره جدا من الخلف
و الاعجب ان مساحه الشنطه الكبيره لن تؤثر على مساحه الصالون نهائيا .. !

اما عن التكيف فنجد الكثير من الناس و لكن ليس الجميع يشتكون منه و لكنه والله مش بقدر
اعليه عن درجتين من اربع درجات
و بالاضافه الى ان السياره مزوده بمخارج تكيف للكنبه الخلفيه
و مخارج تكيف اسفل كل كرسى

5- الثبات

طبعا لا جدال فى الحديث على ثبات العربيات الالمانى عموما حيث تتميز
العربيه بقاعده عجلات خلفيه كبيره مما يجعلها ثابته جدا
بالاضافه الى العديد من انظمه الامان مثل EBD
و ASR و هو مانع التزحلق للسياره
حيث عند وجود اى رمال بالطريق يتم توزيع عزم السياره على الاربع عجلات
و يمنع السياره من التزحلق ..و وجود طبعا نظام فرامل ممتاز مزود بى ABS
و هو غنى عن التعريف طبعا ... و السياره فى الملفات ثابته جدا
و لها قدره كبيره على المناوره على السرعات العاليه دون الشعور بأى خطر ..

6- اداء الموتور

مزوده الاوكتافيا بموتور سعه 1600CC
بقوه 102 حصان عند 6500 RPM
و عزم 148 نيوتن عند 3700 RPM

و تسارع من 0-100 فى 12.5 ثانيه ده للاوتوماتك و عن تجربه و ده فيديو للتسارع بس كنت مركب فلتر اسبورت و الموتور كان لسه مش متفتح اوى دلوقتى الاداء اقوى و الفيديو بادئ من الثانيه 2

28022010048.mp4 - YouTube


و هلاقى ردود تقول انها فى الكاتالوج مكتوب 14.2 ثانيه

هيكون الرد ان الكاتالوج بيحط ارقام لاسوأ الظروف المناخيه و ظروف الطريق

و سرعه قصوى 210 للاوتوماتك و عن تجربه ايضا و اعرف ناس كتير جابوها
بيها

فى حين ان فى الكاتالوج مكتوب 195 و ده فى اسوأ الظروف برضه

و العربيه مزوده بى ناقل 6 غيارات ستيبترونك

و هو مما يجعل استهلاك البنزين قليل ليس كما يقول الكثير انها غوول بنزين حيث ان
الاستهلاك على كمبيوتر العربيه مع تثبيت السرعه على 100 كان 4.5 لتر لكل 100 كم
و ديه صوره تأكد كلامى من عربيتى على الصحراوى



Uploaded with ImageShack.us


7- الفرامل

طبعا برضه اداء الفرامل اداء قمه فى الامتياز و اداء الفرامل قمه فى القوه
و ديه تجربتى فى الفرامل من على سرعه 180 على الدائرى

كنت ماشى 180 على الدائرى و قدامى على الحاره بتعتى عربيه فيرنا قدامى بمسافه قليله جدا

حوالى 70 او 80 متر و فجأه العربيه الفيرنا بتعوم و ماشيه على عجلتين

لم افكر لحظه فى اى شئ غير الضغط على الفرامل بأقصى قوه حتى لا تحدث الكارثه

و والله فى لحظات و اقل من 4 ثوانى كانت العربيه متوقفه تماماااا من دون الخروج عن الحاره
اللى كنت فيها او اى تعويم و ده بفضل ربنا ثم بفضل نظام الفرامل الممتاز للغايه فى العربيه ..


8- توكيل العربيه ( ارتوك اوتو ) و قطع الغيار !

هنتكلم على التوكيل انا عملت الى حد الان 3 صيانات فى التوكيل
و هى 10.000 و 20.000 و 30.000

فى صيانه ال 10.000 وصلت باب التوكيل فى التاسعه صباحا
و كنت خارج من التوكيل فى الساعه العاشره و النصف لانه كان مجرد تغيير
زيت للسياره و فلاتر

فى صيانه ال 20.000 اسضا كانت نفس المده او اكثر بى نصف الساعه

اما فى صيانه ال 30.000 وصلت التوكيل الساعه التاسعه صباحا و خرجت
فى الرابعه عصرا و ذلك لان الشغل كان كثير جدا
و كان تغيير تيل فرامل للعربيه كلها و 2 طنبوره فى الخلف و تغيير زيت و فلتر زيت
و تنظيف فلتر تكييف و تربيط عفشه
و لكن فى الفتره ديه كنت فى الاستراحه المكيفه المزوده بى اجهزه كمبيوتر و انترنت عالى السرعه
و لم اشعر بالوقت و فى اخر ساعتين طلبت ان ادخل لاشاهد العمل الذى يتم بالسياره
و تم السماح لى بالدخول كزائر !

تقيمى للتوكيل جيد جدا و لم اتعرض لى اى مشاكل معه منذ ان تعاملت معه
و لن افكر فى التعامل مع غيره

اما عن اسعا قطع الغيار
أجد الكثير يتحدثون عن ان اسعار قطع الغيار مرتفعه و لكنها كسياره المانيه تابعه
لمجموعه فولكس واجن
فأن الاسعار معقوله جدا
ازاى فانوس المانى فى التوكيل بى 900 جنيه بس
و رفرف بالقواعد بتاعته بى 700 جنيه بس

و عند تغيير التيل و الطنابير فى التوكيل كانت الاسعار كالاتى

طقم تيل فرامل امامى ( 2 تيل امامى ) : 355 جنيه
طقم تيل فرامل خلفى ( 2 تيل خلفى ) : 350 جنيه
طنابير فرامل خلفيه ( 2 طنابير خلفى): 650 جنيه
فلتر هواء : 107 جنيه
فلتر زيت : 44 جنيه
منظف رشاشات : 24 جنيه
منظف محرك : 25 جنيه
فلتر تكيف : 90 جنيه
و طبعا الاسعار ديه كعربيه المانى بالنسبالى مريحه جدا


9- تقييم العربيه
العربيه كأجمالى سياره جميله جدا جدا و مريحه جدا و ملائمه لاجواء مصر و طرق مصر
حيث انها مرتفعه نسبيه و لا تحك فى اى مطب حتى لو الكنبه بها 3 اشخاص
و هذا احد مميزات السياره ... و موتورها جميل نسبيا نظرا لوزنها المرتفع جداا

و فى النهايه اتمنى ان اكون افدتكم و اعلم انى اطلت عليكم جداا
و لكن هذا كل ما اعرفه عن الاوكتافيا فى خلال الثلاث سنوات السابقه
و اتمنى ان يكون كل شئ واضح للجميع
و اى استفسار انا جاهز ...

[Haitham10]

والله عاجز عن الشكر لتقريرك المثير والمجهود الشخصي المبذول فيه
وطبعا هي وجهات نظر وفي ناس هتتفق معاك وانا منهم
وكان نفسي اشوف تقرير زي كدة عن الاوكتافيا بصراحة

[atef_5005]

بجد تقرير اكتر من ممتاز

[gomangy]

بجد تقرير ممتاز ربنا يباركلك في العربيه ويديك خيرها ويكفيك شرها

[HISHAM80]

ربنا يباركلك فيها تقرير ممتاز تسلم ايدك

[modiabbas]

والله عاجز عن الشكر لتقريرك المثير والمجهود الشخصي المبذول فيه
وطبعا هي وجهات نظر وفي ناس هتتفق معاك وانا منهم
وكان نفسي اشوف تقرير زي كدة عن الاوكتافيا بصراحة

يا باشا انا تحت امركوا فى اى حاجه و انا فى الخدمه ...

بجد تقرير اكتر من ممتاز

شكرا يا فندم

بجد تقرير ممتاز ربنا يباركلك في العربيه ويديك خيرها ويكفيك شرها

امين يا رب شكرا

ربنا يباركلك فيها تقرير ممتاز تسلم ايدك

شكرا يا فندم ...

[rompo10]

تقرير ممتاز بجد جدا ربنا يباركلك

[Mahmode]

تقرير ممتاز وشكرا جزيلا

[modiabbas]

تقرير ممتاز بجد جدا ربنا يباركلك

شكرا يا باشا

تقرير ممتاز وشكرا جزيلا

العفو يا باشا انا فى الخدمه

[Diaby]

تقرير ممتاز وربنا يباركلك فيها يا رب بس ناقصه شوية صور من جوة ويكمل :)

[modiabbas]

تقرير ممتاز وربنا يباركلك فيها يا رب بس ناقصه شوية صور من جوة ويكمل :)

ههههههه قريب ان شاء الله هى بس حاليا عايزه تاخد دوش من جوه :b4_033:

[modiabbas]

حاجه حلوه 132 زائر و 10 ردود منهم 5 منى .... شكرا على تحطيم المعنويات

[AhMeD MeTwAlY]

الاسعار دي بجد ولي بتهزر؟؟؟
لان تيل الفرامل الينترا 2010 بنفس السعر تقريبا

[modiabbas]

الاسعار دي بجد ولي بتهزر؟؟؟
لان تيل الفرامل الينترا 2010 بنفس السعر تقريبا

الاسعار ديه من الفاتوره يا فندم

[AhMeD MeTwAlY]

انت كده كبرتها في دماغي اكتر انا كنت بفكر في النترا عشان قطع الغيار وبما ان انا مش بستخدم عربيات غير داخل المدينه ونادر لما بستخدمها كمان