استفسار عن الاوكتافيا a4

[wael_power]

شباب الاسكودا كنت عايز استفسار عن شويه حاجات عن الاوكتافيا A4 بعد بحث حبيت اقارن بينها وبين الانسر مع اني متأكد ان االاوكتافيا افضل بس عايز رأيكم في بعض النقط

اولا عن اداء العربية في السحب والاستقرار علي الطريق والفرامل والعفشة (ناشفةاو..او....
قطع الغيار وتوافرها ومستوي اسعارها بالتقريب معقول ولا غالية ، بما انى دايو قديم كانت قطع الغيار في السوبر ماركت
وهل يجب الصيانة في التوكيل ولا في مراكز متخصصة او فنيين معروفين بالنسبة لكم ومتخصصين ؟
سحب البنزين لكل 100كم تقريبا كام؟
التكييف واداء العربية معاه؟
والاهم هل في مشكلة في الاوتوماتيك ولا يفضل اجيب منوال علشان انا بقلق من المستعمل الاوتوماتيك ولا فتيس الاوكتافيا A4 مافيش مشكله من الاوتوماتيك المستعمل لو سليم ؟
فين الاماكن المضمونة اللي ممكن اكشف علي العربية قبل مااشتريها
وهل في اوتوماتيك 2009 علشان بلاحظ انه كله منوال؟
وهل في فرق كبير مابين 2007 و2008 و2009 ولا كلهم زي بعض ؟

انا عارف اني طولت عليكم ويارب ماكنش ضيف تقيل عليكم.
زميلكم من قسم الدايو
م/وائل حسن

[Ahm662]

السلام عليكم .......غير ان ما فيش مجال للمقارنة بس (شوف أنا ركبت الاثنين لانسر (الشكل الجديد٢٠١١.شارك.) وفانتازيا ٢٠١١ فرق السماء من الأرض من حيث كل حاجة بس الa4 علي حد علمي فيها كمبيوتر فلازم صيانة تكون نضيفة (يفضل داخل التوكيل)لأن الإسكودا عربيات حساسة جدا ومحتاجة اهتمام كبير واللي بيركب عربية زي دي لازم يتابع معاها أول بأول (ده الفيفوريت حجي عايز اخلي صيانتها في التوكيل انضف من عك الميكانيكية )

[wael_power]

شكر لردك
انا واثق ان الاوكتافيا a4افضل بكتيير من الانسر او الكرولا بس كنت عايز اجمع معلومات عنها قبل الشراء ومعرفه عيوبها هل هي معقولة ولا اكبر من اللازم علشان ماتفجئش بعيب كبير لا يحتمل

[mezo73]

شباب الاسكودا كنت عايز استفسار عن شويه حاجات عن الاوكتافيا A4 بعد بحث حبيت اقارن بينها وبين الانسر مع اني متأكد ان االاوكتافيا افضل بس عايز رأيكم في بعض النقط

اولا عن اداء العربية في السحب والاستقرار علي الطريق والفرامل والعفشة (ناشفةاو..او....
قطع الغيار وتوافرها ومستوي اسعارها بالتقريب معقول ولا غالية ، بما انى دايو قديم كانت قطع الغيار في السوبر ماركت
وهل يجب الصيانة في التوكيل ولا في مراكز متخصصة او فنيين معروفين بالنسبة لكم ومتخصصين ؟
سحب البنزين لكل 100كم تقريبا كام؟
التكييف واداء العربية معاه؟
والاهم هل في مشكلة في الاوتوماتيك ولا يفضل اجيب منوال علشان انا بقلق من المستعمل الاوتوماتيك ولا فتيس الاوكتافيا A4 مافيش مشكله من الاوتوماتيك المستعمل لو سليم ؟
فين الاماكن المضمونة اللي ممكن اكشف علي العربية قبل مااشتريها
وهل في اوتوماتيك 2009 علشان بلاحظ انه كله منوال؟
وهل في فرق كبير مابين 2007 و2008 و2009 ولا كلهم زي بعض ؟

انا عارف اني طولت عليكم ويارب ماكنش ضيف تقيل عليكم.
زميلكم من قسم الدايو
م/وائل حسن

هاحاول اجاوبك علي استفساراتك ان شاء الله
اداء العربية ممتازجدا انا بتكلم عن المانيول زي عربيتي السحب ممتاز وعلي الطريق ثبات ولا كلمة والعفشة ناشفة شوية بس بطعم رياضي والفرامل حدث ولا حرج طرية جدا بس في نفس الوقت جامدة جدا
قطع الغيار متوفرة بس غالية شوية
بالنسبة للصيانة يفضل التوكيل بس عن نفسي عندي الميكانيكي بتاعي وبيشتغل فيها يعني لازم ميكانيكي محترم جدا
البنزين متوسط بين داخل المدينة وخارجها 7.5 لتر لكل 100 كيلو
التكييف كويس جدا بس الياباني اشد والتكييف مع سحب العربية بالنسبة للمانيوال ممتاز للاوتماتك معرفش
بالنسبة للمنيوال والاوتماتك انا فضلت المانيوال علشان موضوع مشاكل الفتيس لو عاوز اوتوماتك لازم ماتكونش عملت 60 الف كيلو او تجيب عربية صيانتها بالتوكيل وبالفواتير
الاماكن اللي ممكن تكشف علي العربية فيها التوكيل او حد تكون تثق فية وبيشتغل في العربيات الجديدة انا عن نفسي ماروحتش التوكيل
الفروق في الموديلات من 98 الي 2000 دة الشكل القديم بتبلوة مختلف تماما
من 2001 الي2007 زي بعضة مافيش فرق
من 2008 الي 2009 بيزيد مثبت السرعة وفرش جلد فقط
2009 كلها مانيوال
وفي عربيات خليجي بتلاقي فيها حجات شاذة عن الوكيل زي التكييف التاتش
ولية واحد صاحبي معاة عربية جاية من سويسرا بسخانات للمقاعد و6 ايرباج ومن غير مصفحة و من غير المساحة الخلفية
الوكيل بمصفحة اسفل الموتور
يارب اكون عرفت اجاوبك علي تساؤلتك وهاقولك حاجة لما ان شاء الله تجيبها مش هاتندم اطلاقا
ولو في اي استفسار انا تحت امرك ولو عاوز تاخد لفة ماعنديش مانع لو انت قريب من مصر الجديدة
واخير تقبل مروري اخي الكريم
محمد حمزه

Uploaded with ImageShack.us

[wael_power]

شكرا يا استاز كريم علي اهتمامك وردك
وبالنسبةة للاماكن اللي ممكن اكشف فيها انا سمعت عن مهندس اسمه خالد في الحي العاشر م نصر هل ده من الناس المحترمين وفاهمين كويس ولا في حد تاني افضل
وبالنسبة للجنوط الاسبور الاصليه بتبقي نازلة مع الاوتوماتيك بس ولا في منوال بجنوط اصليه وهل المنوال او الاوتوماتيك بتبقي فئات (بيز, فول اوبشن , وهاي لاين ... ؟
وبالنسبة للاوتوماتيك انا لسه محتار وعايز تجارب من حد يكون معاه اوتوماتيك ومدي الاعتمادية عليه
وياريت لو معاك الكتالوج بتاعها سوفت كوبي ترفعه علي المنتدي لو امكن
وجزاك الله خير

[dramr40]

مجملا مافيش كلام اكتر من اللى السادة الزملاء قالوه

بس نصيحه .... توكل على الله وخد الاوكتافيا ولن تندم ان شاء الله


اه اضافة صغيرة .... الأوكتافيا تعنى الأمان ....................... سايق وانت متطمن ومش فى بالك حاجه لاقدر الله ممكن تحصل .... متطمن على نفسك وعلى اولادك ..... وافتكر دى اهم من اى امكانيات او كماليات او قطع غيار

[wael_power]

شكرا لأهتمامك
وفعلا انا شايف لحد دلوقتى انها الافضل
بس كل الحكايه محتار مابين اوتوماتيك ومنوال
انا عايز اوتوماتيك وفي ناس بتقلقنى منه
والمنوال هاحس انى راكب لانوس تاني
ولذلك انا عايز تجارب الاعضاء ونصايحهم في موضوع اوتوماتيك ده

[ahmedfarou2]

انا كنت زيك بالظبط كده يا وائل بس الحمد لله رسيت علي الاوكتافيا a4 فعلا من رئيي الشخصي عربيه محترمه جدااا
فيها مضمون السياره الجيده صاج قوي جداا و ده ملاحظ و عفشه قويه و موتور جيد يعني المضمون مش شويه انوار في الطبلو و خلاص زي سيارات كتير
بس للاسف كل ملاقي حاله ممتازه اسمع سعر غريب جداااا لدرجه اني مش عارف السعر العادل يبقي كام
لو حد يعرف سعر المانولالحاله الممتازهموديلات 2006 و 2007 و 2008 يعمل كام
و معني الكيلو متر القليل في الاوكتافيا حوالي كام يتقال كيلو متر قليل او ميتخافش منها

[dramr40]

شكرا لأهتمامك
وفعلا انا شايف لحد دلوقتى انها الافضل
بس كل الحكايه محتار مابين اوتوماتيك ومنوال
انا عايز اوتوماتيك وفي ناس بتقلقنى منه
والمنوال هاحس انى راكب لانوس تاني
ولذلك انا عايز تجارب الاعضاء ونصايحهم في موضوع اوتوماتيك ده

انا بردو كنت راكب لانوس :b4_444: وكنت وانا ناوى ع التغيير قلت استحاله اركب مانيوال تانى

المهم وانا بدور على سيارة مناسبه للشراء لئيت سيارتى الحاليه
مانيوال بردوا

لاشك ان الاوتوماتك ممتاز ورفاهيه رائعه خصوصة داخل المدينة .... بس الحمد لله انا ماحسيتش انى اخطأت فى المانيوال ... بالعكس دا انا بستنى اى مشوار عشان بكون مستمتع وانا سايقها الحمد لله ... غير اللانوس خالص طبعا

الحمد لله اختيار كان موفق وربنا يوفقك للقرار الصواب ...


نسيت اقولك بالنسبة لنقطة الامان اللى قولتلك عليها قبل كدا ... العربية جيبت بيها 190 على طريق اسكندريه وما شاء الله ثبات فوق الوهم ( طبعا كان للتجربة مش اكتر )

النقطة الوحيده السلبيه منها بعد حوالى 4 شهور استعمال هيا صوت الموتور عند 130 كيلو فما فوق ... بيكون مزعج شوية لو ركزت معاه ... غير كده الحمد لله كله تمام

[wael_power]

ربنا يباركلك فيها
هو الموتور يعتبر كويس لحد كام الف في الاوكتافيا 4
لان ساعات بلاقي موديل 2008 وماشية كتير 160الف كم وسعرها معقول
والاقي 2006 ماشية قليل في حدود 70 الف كم وسعرها اعلي من 2008 !!
طبعا 2008 موديل عالي بس الكم عالي برده فهل ده فيه ضرر علي كفاءة الموتور والسيارة ككل ؟ وهل الافضل الكم القليل طبعا مع الحاله العامة للعربية بغد النظر عن موديل السنه؟

[amrelsaqqa]

متابع باهتمام