مشكلة في فانتازيا 2011

[MoodyMooner]

الأخوة الأعضاء المحترميين وخاصة مالكي الفانتزيا

الحقيقة أخويا الكبير عندة مشكلة فى عربيته الفانتازيا و هيا موديل 2011 وعامل بيها حوالي 20000 كم والمشكلة هيا أنها بتصدر صوت زنه داخل العربية مشابه لصوت زنة كاسيت شغال ومفيهوش شريط و الزنة دي كأنها خارجه من السماعات
والزنة دي مش بتظهر إلا لما العربية تعمل مشوار طويل يعني أبتدأ من أكثر من ساعة سواقة والصوت بيبقى عالي وملحوظ

جرب يقفل الكاسيت وما زال الصوت مستمر
جرب يقفل التكييف وما زال الصوت مستمر

فتحنا الكبوت الصوت ده ما لوش أى إثر من الكابوت مش باين فقط غير من داخل العربية

في صيانة ال 20000 بلغهم في التوكيل و ماعرفوش يلاقوا الصوت ده ومش عارفيين مصدرة فبالتالي ما عرفوش يعملوا حاجة

وطبعاً هو متعكنن جداً بسبب الصوت الغريب ده و العربية لسة جديدة

سؤالي إلى الأخوة الأعضاء مالكي السيارة لو حد عندة نفس المشكلة يعني لو هيا مشكلة عامة

ولو حد يعرف ده صوت أيه و أيه العلاج

ولكم جزيل الشكر مقدماً

[amerelshazly]

صوت الزنه ده موجود عندي وبعد حيره اكتشفت انها طرمبة البنزين .....وهتسمع الصوت لما تقرب من الكوتش الوراني وتنزل بودنك تسمع الصوت هتلاقيه واضح اوي والعربيه دايره .....وكمان ممكن تسمعه والعربية مش دايره لو انت كنت قالفلها وفتحتها بالريموت وتفتح باب السائق تلاقي الصوت ده طلع لان مع فتح باب السائق الطرمبه بتحضر بنزين في الوقت ده..

[KHALED AYMAN]

بس المفروض ان الطرمبه صوتها ميكونش مسموع لو العربيه ماشيه !

[hishoo_85]

ارجو انك تتاكد من العيب كويس وشوف توكيل غمرة وان شاء الله بسيطة

[amroebraheem]

الاخ مودى منير الزنة دى كانت عندى وكان ميعاد الصيانة قرب فكلمت المهندس خالد اسماعيل بالتليفون وقالى متقلقش منها وانت جاى الصيانة هعملهالك.والحمد لله غيرلى فلتر البنزين لقيت الزنة راحت تماما وقالى ان الفلتر ده فيه منظم من الداخل وهو اللى بيعمل الزنة دى وكانت معلومة ممتازة بالنسبة لى.وعلى فكرة هى زى صفارة مش زنة.
ارجوا الافادة
والسلام عليكم ورحمة الله وبركاته

[MoodyMooner]

الأخوة الأعضاء المحترميين:

أولاً: أعتذار واجب عن تأخري في الرد غصب عني لظروف سفري خارج مصر.

ثانياً : شكر واجب لكل من أفادني برأيه في المشكلة والتي تلخصت أن الصوت موجود فعلاً في بعض سيارات الفانتازيا وسببه أما طرمبة البزين أو فلتر البنزين

وسوف أقوم أن شاء الله بأبلاغ اخي عن هذه الأسباب ووأبلاغها لمهندس الصيانة في التوكيل لعمل اللازم لأنهاء المشكلة.

ولكم جزيل الشكر مرة أخري على ابداء الرأى والنصيحه.

[wawamoha]

الاخ مودى منير الزنة دى كانت عندى وكان ميعاد الصيانة قرب فكلمت المهندس خالد اسماعيل بالتليفون وقالى متقلقش منها وانت جاى الصيانة هعملهالك.والحمد لله غيرلى فلتر البنزين لقيت الزنة راحت تماما وقالى ان الفلتر ده فيه منظم من الداخل وهو اللى بيعمل الزنة دى وكانت معلومة ممتازة بالنسبة لى.وعلى فكرة هى زى صفارة مش زنة.
ارجوا الافادة
والسلام عليكم ورحمة الله وبركاته

+111111
انا كمان مؤيد انك توريها لخالد اسماعيل
ربنا يباركله في امانته ... و ابقى طمنا