skoda yeti

[mostafa3000]

الاخوة الكرام النهاردة قريت اعلان العربية الاسكودا اليتي الجديدة في اخبار السيارات
وطبعا ان بقالي فترة بفكر اغير قلت مبدهاش ونزلت علي التوكيل في المقطم
الانطباع الاولي شكل العربية تحس انة صغيرة بس المساحات الداخلية معقولة والشنطة برضة واسعة وطبعا عالية عن الارض
العيوب من وجهة نظري
1- شكل العربية غريب شوية
2- موتور 1400 تي اس اي يعني بنزين 95
3- العربية حجمها صغير
العربية 3 فئات الفئة الاولي ودي سعرها 175000 وعليها عرض لمدة محدودة ب 158000
وطبعا تعتبر فاضية طاسات وفرش من جوة عبيط
الفئة التانية جنوط وزينون وحساسات ودي ب 186000
اما السقف البانوراما فدة بينزل في الهاي لاين وب 214000
العربية طبعا مانيوال 6 سرعات
بصراحة بعد ما كنت ناوي احجزها نفسي قفلت وبدات افكر في الداستر

[mostafa3000]

وحدوووووووووووووة

[startrace]

بلاش الدستر و خصوصا ان فى فرق كبير بينهم لو اليتى عجباك تبقى احسن بس هى لسة منتشرة فى الشوارع و منعرفش ليها عيوب و لا لأ بس عموما الاسكودا عربية ممتازة و اكيد احسن من الداستر بكتيييييييييير جدا
الداستر من جوة نسخة من اللوجان نفس التبلوة و نفس الفرش و الكماليات و 3 نجوم فى اختبار التصادم
خليك فى اليتى و لو خايف منها يبقى شوف قشقاى او جوك

[freewill]

بالضبط كدا فى فرق كبير بين اليتى والداستر
أبسط حاجة فرق الخامات والتقفيل

لو عاوز تقارنها مع عربيات تانية من نفس فئتها فممكن تقارنها بالسبورتاج أو القاشقاى (الجوك بعيدة شوية عنهم من وجهة نظرى خصوصا فى الحجم)

وفى رأى اليتى تكسب بكتير

أولا الموتور بتاعها أحسن كتير يعنى مثلا

بيدى هورس باور اعلى 123 على 5000 لفة
والتسارع بتاعها احسن يعنى بتوصل 100 كم فى 10.5 ثانية
وكمان أقصى سرعة 115 كم/س

وكل دا على موتور 1400 سى سى مش 1600 زى السبورتاج والقاشقاى


تانى حاجة انا ملاحظ ان اليتى خاماتها هايله وافضل بكتير وكمان تقفيل أوروبى محترم (حتى فى اقل فئة فيها)

اما بالنسبة للسقف البانوراما فطبيعى انه يكون اوبشن ومش موجود فى أول فئة ودى حاجة بديهية كل الشركات بتعملها - اننا ندفع تمن أى أوبشن زيادة


اه صحيح الموتور ال tsi بيشتغل ببنزين 90 أو 92 عادى ودا مكتوب فى الكتالوج بتاع العربية نفسه
هوا مكتوب فيه بنزين 91/95 وإن الاوكتين الاقل بيقلل من اداء الموتور ودا شى طبيعى لكن مش بيأثر على كفائة أو عمر الموتور - وبردو دا مكتوب فى كتالوج العربية

[szaalouk]

يا شباب الراجل بيقول نازله مانيوال
يعني التوكيل هرب من مشكله ال dsg و قرر ينزل مانيوال و يريح دماغه .
و بصراحه زحمتنا مش بتاعه مانيوال خالص و ربنا يوفق الجميع .

رأيي الشخصي توكل علي الله في النييسان قاشقاي..... عربيه مواصفات يابانيه و تصنع في مصنع نيسان انجلترا يعني جوده اوروبيه من الآخر و عربيه ابعادها معقوله جدا كصالون و شنطة و ارتفاع عن الأرض .
هي رسميا ب 175000 بس للي حايحجز و ينتظر من 3 الي 4 أشهر لكن لو مستعجل تنزل تشوفلك موزع و تشتريها بأوفر برايس .

تقبل مروري

[mezo73]

يا شباب الراجل بيقول نازله مانيوال
يعني التوكيل هرب من مشكله ال dsg و قرر ينزل مانيوال و يريح دماغه .
و بصراحه زحمتنا مش بتاعه مانيوال خالص و ربنا يوفق الجميع .

رأيي الشخصي توكل علي الله في النييسان قاشقاي..... عربيه مواصفات يابانيه و تصنع في مصنع نيسان انجلترا يعني جوده اوروبيه من الآخر و عربيه ابعادها معقوله جدا كصالون و شنطة و ارتفاع عن الأرض .
هي رسميا ب 175000 بس للي حايحجز و ينتظر من 3 الي 4 أشهر لكن لو مستعجل تنزل تشوفلك موزع و تشتريها بأوفر برايس .

تقبل مروري

انا متفق تماما مع معاك والقشقاي خاماتها جيدة جدا وواسعة من الداخل وهي افضل من الاسبورتاتدج لان الكيا خامتها سيئة جدا
يبقي المفاضلة للاوتو يبقي القشقاي بدون منافس الي الان

[mostafa3000]

شكرا لكل الاخوة اللي شاركو برايهم
بصراحة الواحد محتار جدا وشكلي هستني لما اشوف اليتي هتبيع وتنتشر والا هتبقي زي الرومستر كدة