مشكله فى البطارية

[wael abbas]

انا عربيتى سكودا فليشيا 96 فيها بطارية جافة 70 امبير مركبها من سنة تقريبا ابتدت تنام منى من شهر ونص او شهرين كده المهم رحت للكهربائى قالى المشكلة فى الدينمو المهم فكلى الدينمو وغيرت الملف بتاعه ومقاومات ولحامات فى قاعدة السيلكونات ومشيت كويس بعدها بفترة نامت منى تانى ومشيت بالزق ورحت لكهربائى تانى قالى الدينمو مش بيشحن كويس والبطارية نوعها مش كويس (البطارية تركى) المهم فك الدينمو وقالى اللحامات اللى فيه مش كويسة ولحمها تانى وحطلى البطارية على الشاحن ومشيت كويس لمدة 10 ايام وعملتها معايا تانى قمت رايح لواحد بتاع بطاريات وشحنهالى وقالى الدينمو بيشحن كويس (قالى بيشحن 12.5 الى 13) المهم رحت للمحل اللى اشتريت منه البطاريه وكشف عليها وعلى الدينمو قالى الاتنين تمام وللاسف عملتها معايا تانى ولاحظت انها دايما بتنام منى لما بشغل النور العالى والتسجيل ياريت لو حد عنده خبرة او يعرف كهربائى كويس يقولى اعمل ايه
انا اسف جدا على انى طولت عليكم

[طارق _عبد السلام]

المشكله دى قابلتنى فى الجافه فعلا وهى لسه فى الضمان
المشكله انها بتعملها فى الحر وليس فى البرد
ورحت للبائع اخدها وشحنها عندوا وسابها 3ايام اختبار وقالى كل حاجه سليمه
ومن الردود على فى الموضوع نا س كتير اكدوا لى ان ده بيحصل مع السخونيه العاليه والاوكتافيا فيها حافظ للبطاريه يعنى علبه للبطاريه
وفيه موضوع مش عارف معمول هنا فى المنتدى ولا لا بيحكى عن عمل قميص عازل للبطاريه الجافه
وممكن بردوا عندك تسريب كهرباء يعنى عندك حاجه عمله ماس

[aw2100]

العيب دة من الدينامو وفى حالتين انة بيشحن ضعيف ودة بيبان مع النور العالى و اى تحميل علية لان وظيفة الدينامو هو انه بيتحمل اى استهلاك للكهرباء ويثبت الفولت للبطارية بمعنى ان البطارية بتبقى للدوارة فقط والدينامو بيشحن البطارية فى كل الحالات ولو الدينامو بيشحن شحن عالى ودة بياثر على البطاريات الجافة جدا لانة بينشف المية فيها علشان كدة العربيات الشغالة جامد مانصحش حد يركب بطاريات جافة ونصيحتى انك تجيب دينامو كامل استعمال بالكتاوت المانى اصلى ودة يحل مشكلتك لاان اللعب فى الدينامو مابيضبطش الشحن