عملت حادثة و محتاج نصيحتكم

[TMenshawy]

السلام عليكم,
الحمد لله خبط فى واحد واقف على الشمال فى الدائرى. الخسائر: الشبكه الفضى الى عليها العلامه, الشبكه التحتانيه, الاكصدام اطبق جامد والكبوت فى حته ضغيره اتنت. العربيه فانتازيا 2012.

انا مأمن الحمد لله بس محتاج نصيحتكم عن أفضل مكان لعمل السمكرة والدوكو. أنا طبعا عايز شغل نضيف وسرعة علشان انا ساكن فى التجمع والمعيشه مستحيلة من غير عربيه.

ايه نظام التوكيل فى جودة الشغل والسرعة؟ و ايه نظام مركز الاقصى؟ فى حد تانى كويس؟

الحاجات الى فوق دى تاخد وقت اد ايه فى تصليحها بالتقريب.


مستنى نصايحكم وخبرتكم. شكرا.

[Moratoz]

هات الشبكه والأكصدام ورش الأكصدام فقط مش هياخد يوم عند الراجل لو مش فارق معاك استعدال الكبوت الآن وبعدين لما يبقي عندك وقت استعدل الكبوت

[aldesha989]

والله شوف انا ما اعرفش بصراحه التأمين شغلها عامل ازاى وخصوصآ انتا ما قولتش مكان انتا مأمن فين
بس بالنسبة للاكصدام انتا ممكن تغيره وتكسب وقت وكمان الكبوت مدام خبطه بسيطه ومع الاكصدام والشبك مش هيأخد يوم لو صنايعى محترم وفاهم شغله

وربنا يديك خيرها ويكيفيك شرها والحمد لله انها جت على قد كده

[S O P H O S]

قدر الله وما شاء فعل
المهم انك بخير ..

[EngAhmedSayed]

كان من الافضل تنزل صور للموضوع علشان الافاده تكون كامله
و الحمد لله انى هى جت فى العربيه مش فى البنى ادم
حمدلله على السلامه و سلامة قلى خبطه

[MohamedGobran]

أنا هنقل لحضرتك تجربتى ..... انا فى شهر 4 2011 العربيه اتخبطت منى برضو على الدائرى واحد الله يسامحه غشيم أخد غرزه غلط و عربيته لفت ووقفت ادامى بالعرض ... انا يا دوب فاديته على اد ما أدر بس قدر الله و ما شاء فعل و دخلت فيه و كانت الخساير كالاتى
- الاكصدام اتقطع منه حته
- فوج يمين
- فانوس يمين (زينون)
- رفرف يمين
*مفيش اى حاجه حصلت فى شاسيه العربيه نهائى

هو الصراحه الاكصدام القطع كان ممكن يتصلح و الرفرف كان ممكن يتسمكر بس قولت تروح التوكيل و هو إلى هيظبط كل حاجه و انا كنت مأمن مع الشرق للتأمين وانا عملت المحضر عادى جدا علشان التأمين و كلمتهم و بلغت إنى عملت حادثه و عملت المحضر و اتفقوا معايا بعدها ب 4 ايام أودى العربيه التوكيل و هياقبلنى مندوب هناك من الشركه علشان المقايسه بتاعتهم دى , المهم انا بعت السواق بالعربيه و راح هو و عملوا المقايسه و كل حاجه تمام و قالولى هتستلم العربيه كمان 12 يوم و فعلا ده إلى حصل اليوم 13 كان معايا العربيه فيبقى كده (4 ايام انتظار التأمين + التصليح 12 يوم = 16 يوم )

بالنسبه للى حصل و الشغل إلى تم فهو كالاتى

-تم تغير الرفرف كله (و ادانى القديم)
- تم تغير الاكصطدام
- تم تغير الفانوس والفوج اليمين

مستوى الشغل

- التقفيل مظبوط بالظبط و مفيش اى فروقات بين الفانوس او الرفرف والاكصدام
- فرق اللون مكنش موجود فى الرفرف خالص لكن الاكصدام لونه فاتح شويه بسيطه

ملحوظه مهمه

- فى المحضر أكتب كل حاجه والله لو مسمار واقع اكتبه علشان إلى حصل معايا ان القربه بتاعه المسحات اتشرخت و انا طبعت مقولتش فى المحضر انها حصل فيها حاجه على اساس ان المهندس بتاع التوكيل يقولهم فى التأمين ايه حصل لكن لما استلمت العربيه لاقيتها لسه مشروخه و غيرتها على حسابى


و أنا تحت امر حضرتك فى كل حاجه

[Moratoz]

الله يبارك لك علي نقل التجربه

[المنسي]

قدر الله وماشاء فعل ومن الافضل ان التوكيل اللى يشتغل فيها مهما كانت درجة اتقان الصنايعى اللى خارج التوكيل وشوف مع شركة التأمين ايه اللى هيتم وفى الاول والاخر الف حمد لله على سلامتك

[أحمد جودة]

قدر الله وما شاء فعل

أنا كمان لسة خارج من نفس التجربة والله يكون فى عونك واخواتنا فى المنتدي ردودهم هتفيدك كتير
وانا أرجح الرجوع لتتوكيل أضمن من أى صنايعي مهما كان درجة إتقانه

مرة تانية الحمد لله على كل شيئ وربنا يستر طريقك وطريقنا وكل المسلمين

تقبل تحياتي

[TMenshawy]

أنا هنقل لحضرتك تجربتى ..... انا فى شهر 4 2011 العربيه اتخبطت منى برضو على الدائرى واحد الله يسامحه غشيم أخد غرزه غلط و عربيته لفت ووقفت ادامى بالعرض ... انا يا دوب فاديته على اد ما أدر بس قدر الله و ما شاء فعل و دخلت فيه و كانت الخساير كالاتى
- الاكصدام اتقطع منه حته
- فوج يمين
- فانوس يمين (زينون)
- رفرف يمين
*مفيش اى حاجه حصلت فى شاسيه العربيه نهائى

هو الصراحه الاكصدام القطع كان ممكن يتصلح و الرفرف كان ممكن يتسمكر بس قولت تروح التوكيل و هو إلى هيظبط كل حاجه و انا كنت مأمن مع الشرق للتأمين وانا عملت المحضر عادى جدا علشان التأمين و كلمتهم و بلغت إنى عملت حادثه و عملت المحضر و اتفقوا معايا بعدها ب 4 ايام أودى العربيه التوكيل و هياقبلنى مندوب هناك من الشركه علشان المقايسه بتاعتهم دى , المهم انا بعت السواق بالعربيه و راح هو و عملوا المقايسه و كل حاجه تمام و قالولى هتستلم العربيه كمان 12 يوم و فعلا ده إلى حصل اليوم 13 كان معايا العربيه فيبقى كده (4 ايام انتظار التأمين + التصليح 12 يوم = 16 يوم )

بالنسبه للى حصل و الشغل إلى تم فهو كالاتى

-تم تغير الرفرف كله (و ادانى القديم)
- تم تغير الاكصطدام
- تم تغير الفانوس والفوج اليمين

مستوى الشغل

- التقفيل مظبوط بالظبط و مفيش اى فروقات بين الفانوس او الرفرف والاكصدام
- فرق اللون مكنش موجود فى الرفرف خالص لكن الاكصدام لونه فاتح شويه بسيطه

ملحوظه مهمه

- فى المحضر أكتب كل حاجه والله لو مسمار واقع اكتبه علشان إلى حصل معايا ان القربه بتاعه المسحات اتشرخت و انا طبعت مقولتش فى المحضر انها حصل فيها حاجه على اساس ان المهندس بتاع التوكيل يقولهم فى التأمين ايه حصل لكن لما استلمت العربيه لاقيتها لسه مشروخه و غيرتها على حسابى


و أنا تحت امر حضرتك فى كل حاجه

متشكر جدا لاهتمامك وشرحك المفصل. انا بس عندى كام استفسار:

1) مينفعش الاكصدام والرفرف الجداد يبقى لونهم لون العربيه على طول؟ ولا بيجو ابيض ويترشوا, أنا لون عربيتى فيرانى.
2) ايه اخبار جودة الرش... هل البويه فرقعت فى الاكصدام او الرفرف مع الوقت؟
3) هل 12 يوم المده العادية؟ أصل أنا حاسس انها طويله أوى يعنى الموضوع كله ممكن يتلم فى 3 أيام!