موضوع مفصل عن مشكلة موتور الاوكتافيا a4 و تغييره

[forti]

بسم الله الرحمن الرحيم

فى البداية انا الحمد لله خلصت امتحانات و اسف على عدم تواجدى الفترة الى فاتت بسبب الامتحانات
ندخل فى الموضوع بقى هقولكم قصة العربية معايا من الاول
العربية اوكتافيا a4 موديل 1998
جبناها من بورسعيد علشان والدى عنده اعاقه فى رجله الشمال و الكلام ده من اربع سنين و نص تقريبا
اول ما جت العربية عملنلها الصيانة و تغيير السيور و الكلام ده
بس للاسف مع الصيانة دى اكتشفنا مشكله فى الموتور ان بيبقى فى طحينه على غطاء الزيت ساعتها قالوا يمكن عايزة موتور !! لكن بعدين قالوا لا هى محتاجه جوان وش سلندر يتغير بس
المهم اتعمل الجوان الاول
العربية قعدت حبة حلوين كده ماشية تمام
لكن مع الوقت العربية بدأت تتلت و الغطاء بتاع الزيت بقى يجيب طحينة بردو طبعا الكلام الى انا بقوله ده مش المفروض يحصل فى عربية محترمة زى الاوكتافيا
المهم كشفوا بردوا و قالوا العربية عايزة جوان وش تانى و جوان غطاء تكيهات الكلام ده بعد حوالى 3 سنين من ساعة ماجبناها
و ده كان الجوان التانى قعد فترة بردو و رجعت ريما لعادتها القديمة
* كل الفترة دى كنا بنتعامل مع مهندس هانى فى جسر السويس
بعدين بقى غيرنا لاستاذ احمد زاهر فى المعادى بدون تفاصيل يعنى

نرجع للجوان التانى الى باظ ده .. روحنا لاحمد زاهر و قلتله على تنبيه مهم ان العربية غيرنلها جوان وش السلندر مرتين قبل كده و ان هما فى الاول كانوا بيقولوا العربية احتمال تحتاج موتور
سيبنالوا العربية كشف عليها و المفاجاة انو قال عايزة جوان وش سلندر بس تالت مرة و مش موتور !!!!
و بالفعل عمل الجوان لتالت مرة و لكن للاسف المرة دى العربية مكملتش 200 كيلو و ظهرت العيوب تانى

هنا بقا قولنا لحد كده مش هينفع !!!
ودينا العربية بمعرفة حد من قرايبنا لواحد اسمه محمود فى شارع جسر السويس
و هو بقى كشف و كده و مع الملاحظات السابقة قال كده بقى موتور

المهم غيرنا و لكن مش الموتور كله .. غيرنا بلوك و وش استراد من الحرفيين على اساسا ان المشكله بالاساس فيهم عملوا 4500 جنيه
التفاصيل بتاعة الموتور حسب ما قريبى قالنا انه موتور موديلات بعد 2000 و لكن انا مش متأكد هل هو فعلا كده ولا نفس الموتور القديم خصوصا انه مش الموتور كله ده الوش و البلوك بس
عاما مكنتش فارقة معانا لان اصلا الموتور القديم 99 حصان و التانى 101 زى ما انا عرضت فى موضوع سابق
الموتور اتاخد من نص كامل بتاع عربية و خدنا منها بردو حاجات تانيه كانت عايزة تتغير زى طقم الدبرياج و المارش
و العربية دى كانت عاملة 80000 كيلو
حطينا زيت الف كيلو بس عشان ينضف الموتور و فى الفتره دى العربية بردو مكنتش معانا لكن مع قريبى و طبعا كان فرق اداء ملحوظ خصوصا تغيير طفم الدبرياج كمان
المارش بـ 200 جنيه
طقم الدبرياج بـ 500 جنيه
كولر موتور بـ 200 جنيه
و المصنعيه بتاعة الموتور بالحاجات دى 900 جنيه
عملنا كشف كبس موتور فى البنزينة و طلع 75% و قالوا الرقم ده كويس و احب اعرف رأيكوا بردو .. الكشف كان بـ 60 جنيه
عملنا الصيانة بتاعة السيور
سير كاتينة بـ 120 جنيه
سير دينمو بـ 140 جنيه
بلية شداد دينمو بـ 80 جنيه
مياه g12 و مياه مقطرة بـ 65 جنيه
بوجيهات بـ 90 جنيه
زيت 3000 كيلو 150 جنيه
و مصنعيه 200 جنيه

هنا بقى جت العربية و جربتها و الحمد لله بسم الله ما شاء الله السحب جميل و مع المشاوير المياه الحمرا زى ما هيا فى القربة
و مفيش الكلام بتاع الطحينة ( ربنا يجعل كلامنا خفيف ) هههههههههههه
الحمد لله فعلا بجد مش عايز اقولكوا العربية قبل كده كانت قرفانا قد ايه لما كل شويه المياه تنقص و الطحينة بتاعة الغطاء و التتليت
الحمد لله
ورق الموتور بقى احنا بناخد منه صورة و هو بيتبعت للمرور و مع التجديد ان شاء الله نثبته بفى فى الرخصة

فى النهاية عايز اقول ان الموتور المفروض الناس بتشكر فى الالمانى و يقعد 200000 و اكتر عادى و الى حصل معانا ده اكيد مشكله فردية و لحد دلوقتى مش عارف سبب الى حصل خلاه كده .. الموتور القديم كانت العربية 158000 و قعد معانا لحد 183000 كيلو خلال اربع سنين و نصف و طبعا المشكله كانت فيه من الاول ..

[Moratoz]

حمد لله علي السلامي وموقف ان شاء الله وانا كان فعلا نفسي اعرف تجربتك مع تغير الموتور كانت إيه لأن فعلا مش من السهوله انه مواتير الأوكتافيا يبقي فيها مشكله انا ركبت اربع عربيات a4 خلال فترة قصيرة ولا مرة كان في الموتور مشكله
الحمد لله ان المشكله اتحلت

[AhMeD MeTwAlY]

لحد دلؤقتي الاوكتافيا مفيش مشاكل فيها والحاله الي حصلت فعلا معاك فرديه
ربنا يبارك ليك في العربيه ويكفيك شرها

[forti]

حمد لله علي السلامي وموقف ان شاء الله وانا كان فعلا نفسي اعرف تجربتك مع تغير الموتور كانت إيه لأن فعلا مش من السهوله انه مواتير الأوكتافيا يبقي فيها مشكله انا ركبت اربع عربيات a4 خلال فترة قصيرة ولا مرة كان في الموتور مشكله
الحمد لله ان المشكله اتحلت

الحمد لله ما هى فعلا عمى كان مستغرب جدا من كل ده خصوصا انه كان معاه جيتا و عارف الالمانى فين و فين لما تفتح الكبوت

[forti]

لحد دلؤقتي الاوكتافيا مفيش مشاكل فيها والحاله الي حصلت فعلا معاك فرديه
ربنا يبارك ليك في العربيه ويكفيك شرها

اللهم امين يا رب ..

[mohammedabdallh]

الحمد لله خير والف مبروك عليك يا كبير

[forti]

الحمد لله خير والف مبروك عليك يا كبير

الحمد لله تسلم يا كبير على مرورك على الموضوع

[mohamedbook]

باشا لية مجبتش الموتور بمواد التغذية عشان لو احتجت حاجة يكون عندك استبن
والفرق معتقدش كتير يعني كان هيفرق 2000ج بالكتير
يعين هيكون عندك دينموا استبن وعندك بيقة المواد من خرطيم وخلافة وكمان كنت هتاخد ضفيرة كمان
وحضرتك لما جبت الموتور جبتة علي البركة كده وخلاص ولا انت جبتة علي التجربة لمده اسبوع ولو فية حاجة كان ممكن يرجعلك البلوكة ويديك واحده تاني
واخبار الزيت معاك ايه بينقص ولا زي ماهو

[mo7a_mo7a]

انا قريت في اكتر من مكان مشاكل مشابهة تتراوح بين تلف الجوان او البلوك او الصبابات او جلب الصبابات او الموتور بالكامل وكلها لعربيات a4 خاصة بالمعاقين وواضح ان ركنتها في المنطقة الحرة هي السبب ومش لازم ننسى ان العربيات دي بتبقي جاية في بعض الاحيان (وليس كلها) من مقابر السيارات وممكن يكون فيها عيب جسيم زي عيوب الموتور مثلا وده سبب اتلافها وفي احيان اخرى المستورد بيسترخص ويجيب سيارات معيوبة اصلا بسعر متدني
واحنا في مصر عندنا شبه (تقديس) للاستعمال الاوروبي بنفتكر انهم بيشيلوا العربيات في علبة قطيفة ... ابدا ابدا الفرق بين مصر واوروبا المرور وكفاءة الطرق في المقام الاول والعوامل الجوية ثانيا
وبمناسبة العوامل الجوية : السيارات المصممة بالمواصفات الاوروبية للجو البارد مبتمشيش عندنا كويس وبيبقي في بينها وبين مواصفات المناطق الحارة اختلافات كتيييييييييير مثلا زي نوع البلاستيكات المستخدمة - الدهان - الكاوتش دورة تبريد السيارة - وحتي خرطة وش السلندر احيانا في بعض الموديلات
علشان كده لازم نخلي بالنا اوي قبل ما نشتري حجات زي دي


تحياتي

[mesho_kimi]

انا مستغرب انك مستغرب اني الماتور فوت على فكرة المواتير الالماني في الإعتماديه والعمر الأفتراضي اقل من اي مصنع مواتير اخر شوف كمية الجولف والبولو والاكوتافيات اللي مغيره ماتور واللي مكنته بتوصل لل 180 الف من غير ما يعمل شغل في المكنه ده إذا ما كانش سقط غيرها بيكون محظوظ

[forti]

باشا لية مجبتش الموتور بمواد التغذية عشان لو احتجت حاجة يكون عندك استبن
والفرق معتقدش كتير يعني كان هيفرق 2000ج بالكتير
يعين هيكون عندك دينموا استبن وعندك بيقة المواد من خرطيم وخلافة وكمان كنت هتاخد ضفيرة كمان
وحضرتك لما جبت الموتور جبتة علي البركة كده وخلاص ولا انت جبتة علي التجربة لمده اسبوع ولو فية حاجة كان ممكن يرجعلك البلوكة ويديك واحده تاني
واخبار الزيت معاك ايه بينقص ولا زي ماهو

و الله انا مليش خبرة فى الموضوع يعنى و عمى كان متولى الموضوع كله .. و فى حاجات تانيه خدناها من الموتور زى كوعة مياه بالثرموستات و خرطوم مياه سفلى و قربة بس انا مكتبتهاش .. بعدين مش كل الحاجات دى موجودة استيراد عادى

[forti]

باشا لية مجبتش الموتور بمواد التغذية عشان لو احتجت حاجة يكون عندك استبن
والفرق معتقدش كتير يعني كان هيفرق 2000ج بالكتير
يعين هيكون عندك دينموا استبن وعندك بيقة المواد من خرطيم وخلافة وكمان كنت هتاخد ضفيرة كمان
وحضرتك لما جبت الموتور جبتة علي البركة كده وخلاص ولا انت جبتة علي التجربة لمده اسبوع ولو فية حاجة كان ممكن يرجعلك البلوكة ويديك واحده تاني
واخبار الزيت معاك ايه بينقص ولا زي ماهو

مجبتوش على البركة بعدين مانا كاتب كبس الموتور طلع 75% هل ده وحش ؟
الزيت لسه هتابعه انا لسه العربية ممشتش بيها كتير

[forti]

انا قريت في اكتر من مكان مشاكل مشابهة تتراوح بين تلف الجوان او البلوك او الصبابات او جلب الصبابات او الموتور بالكامل وكلها لعربيات a4 خاصة بالمعاقين وواضح ان ركنتها في المنطقة الحرة هي السبب ومش لازم ننسى ان العربيات دي بتبقي جاية في بعض الاحيان (وليس كلها) من مقابر السيارات وممكن يكون فيها عيب جسيم زي عيوب الموتور مثلا وده سبب اتلافها وفي احيان اخرى المستورد بيسترخص ويجيب سيارات معيوبة اصلا بسعر متدني
واحنا في مصر عندنا شبه (تقديس) للاستعمال الاوروبي بنفتكر انهم بيشيلوا العربيات في علبة قطيفة ... ابدا ابدا الفرق بين مصر واوروبا المرور وكفاءة الطرق في المقام الاول والعوامل الجوية ثانيا
وبمناسبة العوامل الجوية : السيارات المصممة بالمواصفات الاوروبية للجو البارد مبتمشيش عندنا كويس وبيبقي في بينها وبين مواصفات المناطق الحارة اختلافات كتيييييييييير مثلا زي نوع البلاستيكات المستخدمة - الدهان - الكاوتش دورة تبريد السيارة - وحتي خرطة وش السلندر احيانا في بعض الموديلات
علشان كده لازم نخلي بالنا اوي قبل ما نشتري حجات زي دي


تحياتي

تحياتى لحضرتك و مرورك و اتفق معاك اوى فى موضوع الركنة .. اما موضوع السيارات الاوربية الفكرة ان العربيات دى بتبقى معفيه من الجمارك فى حالة زى والدى مش اكتر لكن لو علينا هنجيب زيرو من الاول مش فكرة مقدس العربيات الى جاية من برة .. بس اختلف معاك فى نقطة المواصفات الاوربية يعنى بمعنى هل الاوكتافيا الى بتنزل مصر مختلفه عن الى بتنزل المانيا فى الدهان و نوعية البلاستيك و دورة التبريد الى اخره .. اظن لا و مع ذلك العربيات دى هنا زى الفل
بشهادة الناس هنا فى القسم و تحياتى مرة تانيه لمشاركتك

[forti]

انا مستغرب انك مستغرب اني الماتور فوت على فكرة المواتير الالماني في الإعتماديه والعمر الأفتراضي اقل من اي مصنع مواتير اخر شوف كمية الجولف والبولو والاكوتافيات اللي مغيره ماتور واللي مكنته بتوصل لل 180 الف من غير ما يعمل شغل في المكنه ده إذا ما كانش سقط غيرها بيكون محظوظ

اولا شكرا لمرورك بس انا الى اعرفه الى كتبته فوق انا المواتير دى معمرة .. و يا ريت الناس الى مشاركة تفيدنا اكتر فى دى عن تجربتها الشخصية

[mahmoudysf]

الف مبروك على الماتور الجديد
احنا عملنا شغل في ماتور عربية اختي استيراد بور سعيد وهي عاملة 50 الف كيلو بس
بس كلو اجمع ان العربية دي اتركنت فترة وعلى فكرة احنا عملنا عمرة مغيرناش الموتور