معركتي مع كارتك العبور

[inspiron]

السلام عليكم..أتمني يكون الجميع بخير

- كنت عملت موضوع سابق عن قصة الكوبلن بتاع العربية وإنه الحمدلله تم تغييره والعربية رجعت طبيعية...لحد النهاردة الصبح رايح الشغل..( شغلي في العبور جنب التوكيل علي طول )...وأنا ماشي عديت كارفور العبور بحوالي 500 متر وكنت علي السرعة التالتة..والعربية بتنقل للسرعة الرابعة عملت هبدة جامدة..قولت يمكن دوسة رجلي عملت خلل في النقلة ( بقنع نفسي يعني ) وكملت لقيت الهبدة من الأول للتاني خفيفة...ومن التاني للتالت زادت,,روحت طالع علي التوكيل..قولتلهم علي المشكلة..وربنا ألهمني إني أدخل فيهم شمال علي طول عشان يجوا معايا دوغري..قولتلهم إنتوا لسه مغيرين الكوبلن وفي حاجة في الفتيس باظت منكم.وأنا مش هتعتع من هنا غير لما أعرف الحقيقة فين..وعليت صوتي وقولت هطلع علي حماية المستهلك..هما سمعوا الجملة دي اختفوا وجابولي المسئول الكبير اللي في التوكيل راجل عجوز كده ومحترم..قالي احكيلي في ايه فقولتله بالتفصيل من ساعة ما الكوبلن باظ لحد ما غيرته وحصل اللي حصل الصبح..قالي طيب أنا هعملك حالة استثناء انك تدخل الورشة وتبص علي كل حاجة وهما بيصلحوها..

وبالفعل نزلت الورشة..ارفع يابني العربية..لقيت تسريب زيت من ناحية الفتيس ..
فك يابني المصفحات ومتمدش اديك علي حاجة بعد ما تفكهم..وبقيت اللي اشوفه اكتبه في ورقة.وكشفت بنفسي..لحد ما مسكت اويل سيل زيت الفتيس ببص عليه لقيته مقطوع قطع كأن حد واكله..ومن هنا بدأت المعركة..شتمت في التوكيل وفي طقم العمالة اللي هناك وبهدلت الدنيا وحتي معرفش والله شتمت الراجل الكبير ده ولا لا مكنتش داري بنفسي..الحيوانات ربنا لا يسامحهم.وهما بيغيروا الكوبلن فكوا الاويل سيل واتقطع منهم.يا ريتهم حتي حسوا بغلطهم وركبه واحد جديد..لا دا ركبوا القديم زي ما هو ولصموه..وكله تحت المصفحة بقه مش باين والزبون ياخد القلم علي قفاه بقه.

المهم قولتلهم أنا هطلع من هنا علي حماية المستهلك وهوديكو في ستين داهية..الراجل اترعب وقالي أرجوك متصعدش الموضوع واللي تأمر بيه هنعمله.قولتله العربية ترجع زي ما كانت..قالي هنغير الأويل سيل ونغير الزيت ونطلعها علي التيست تراك وانت مع العامل ولو في أي حاجة مش طبيعية حسيتها هنصلحها..قولتله لا لو في أي حاجة مش طبيعية هجبركم انكوا تغيروا الفتيس علي حسابكم ..

المهم غير الاويل سيل وغير الزيت وطلعنا جربنا انا اللي سايق.حركت عصاية الفتيس من p لـ d ومن d لـ r بشكل سريع والعكس.الحمد لله مفيش حاجة.طلعت بيها بالراحة خليتها تنقل كل النقلات من الأول للـسادس الحمد لله مفيش أي حاجة.
بدأت أحرق علي كل الغيارات لحد 170 الحمد لله كله تمام.وكررت التجربة بالتيبترونيك والسبورت موود وكله الحمدلله فل الفل.

بعد التجربة طلعت حطيتها علي الكمبيوتر والحمد لله مطلعتش أي إيرور..

نصيحة بعد التجربة دي..محدش يتعامل مع الناس دي تاني

[Moratoz]

علشان اويل سيل ببلاش يلبسك في فتيس وطبعا انتا الغلاطان الحمد لله انك اتصرفت ولحق الموضوع وهوا سخن

[شاهين - بنز]

إن شاء الله محصلش حاجة وشكرا على نقل تجربتك ونصيحة إرجعلهم تاني وخد ضمان إستثنائي على الفتيس لإن لاقدر الله ممكن يكون عمره الإفتراضي قل
وأنا كنت بستغرب ليه دير الملاك طابور طويل بالساعات ليه مبيروحوش المراكز المعتمدة الفاضية مع إنها حلوة وشيك
لحد أما إتلسعت وأنا بغير المراية وبرشها في المركز إللي بعد السندباد هو صحيح الموضوع بسيط إنه مراية لكن باينلي أد إيه هما مستهترين وبجحين لأبعد الحدود (كنت غيرتها في مركز معتمد مش فاكر إسمه في جسر السويس في المنطقة الصناعية جرحلي الباب وهو بيغيرها ورشها بلون مختلف عن لونها وكلو ديفوهات رجعتلهم عشان اللون ردو بكل بجاحة مش حيرشوها تاني رحت شاري دماغي وطلعت على المركز إللي عند السندباد ونبهت عليه مية مرة إنه يسنفر المراية قبل مايرشها قالي ماشي وآجي تاني يوم قالقيه مسنفرهاش وكمان المراية متجرحة من كل حتة طبعا بعد خناقة وجعجعة خدوا المراية تاني وظبتوها )
فالخلاصة نصيييحة متتعاملوش غير مع التوكيل إللي في دير الملاك فقط وبلاش المراكز المعتمدة نهائي وصحيح حتتعبوا شوية في الطابور وزحمة الحجز بس تضمنوا نوعا ما إن الشغل حيبقى نضيف

[dolly13]

بما انى ساكنة فى العبور كنت باتعامل معاهم لحد ماحصل موقف برده مش تمام منهم وبطلت التعامل معاهم من 2009
شكرا على الافادة

[S O P H O S]

الحمد الله انك حليت المشكلة بدري ..

[sakr_skoda]

دى حاجة معروفه بداهتا انك لما تغير كبالن داخلية من الأصلح تغغير الأويل سيل ودى مش مكلفى يعنى علشان اتفهة حاجة فى الفتيس يضيعلك الفتيس كله ربنا يهدى....

[Mohamed Bander]

لا حول ولا قوة الا بالله ،، يعنى الضمير انعدم للدرجه دى؟؟ اللى بيشتغل مش حاسس انه ممكن يكلف صاحب العربية الاف الجنيهات ؟؟ كان ممكن بكل بساطه يغيروه ويضيفوه على فاتورة الحساب وانت اكيد مكنتش هتعترض!!

حسبى الله ونعم الوكيل فى معدومى الضمير وشكرا لنقل التجربة.

انا ناوى ان شاء الله هعمل الصيانات فى الفرع الجديد اللى على الدائرى بتاع ارتوك

[osha966]

لا يوجد ضمير بسبب التعليم والحالة الأجتماعية والمادية للصنايعية الذين يعملون فى مراكز الصيانة...وطبعا بسبب غياب المراقبة والمحاسبة... هى دى آفة مصر والله المستعان...

[المنسي]

الحمد لله انك لحقت الموضوع فى الاول ومدخلتش فى فتيس وقصة تانية ربنا يعيننا على مابلانا