هل تنصحونى ب a4 مستعملة

[zaza73]

السلام عليكم
دية أول مشاركة لى فى هذا المنتدى. عندى عربية لانوس ون 99 اشترتها فى 2009 مستعملة أتعلم فيها السواقة لكن لظروف الانفلات الأمنى مغيرتهاش لدلوقتى. بأفكر أغيرها حاليا و مع ارتفاع الأسعار رجعت للمستعمل.
الاختيار دلوقتى بين OCTAVIA A4 موديل 2007 عاملة 75000 جنية أو Lancer 2007

فية ناس خوفتنى من A4 على ما أذكر تحديدا ليميت كنترول و قالوا ان سعره غالى جدا فما رأيكم دام فضلكم

[Moratoz]

بص الحمد لله العربيع مفهاش مشاكل كنترول وطبعا اللانسر عًربيه حلوة فأركب العربيتين وسوقهم واجلس فيهم وشوف أني فيهم هترتاح فيها اكثر العربيتين من العربيات الاعتماديه

[aboomar22]

لانسر 2007 مش علشان الاوكتافيا وحشة لا بالعكس عربية جميلة جدا ومحترمة وثابتة وعزلها ممتاز متسمعش صوتها جوه الصالون لكن قطع غيار اغلى ومش اى حد بيعرف يشتغل فيها عايزة تتعامل مع مراكز مش ورش لكن اللانسر كمان عربية كويسة قطع غيارها فى كل مكان هتلاقى استيراد وجديد حتى الجديد درجات كل الورش يتشتغل فيها اعادة بيعها ممتاز يعنى هى المناسبة لمصر اكتر

[mo3tazanas]

بص انا ركبت العربيتين وها اقولك على شعورى
اولا الانسر ناعمة جدا تكيف ممتاز الوسع من الداخل زى بعض تقريبا ما عدا شنطة الاوكتفيا اكبر طبعا
ثانيا الاوكتفيا اتقل فى السحب عفشة قوية جدا ومش عارف لية لما بسوق الاوكتفيا بيبقى قلبى جامد وانا سايق وبحس بقوة وانا سايقها مع العلم الانسر التجميع بتعها اسرع

[abou-yahia]

الافضليه للاتوماتيك من وجهه نظري لو لانسر توكل علي الله
الاوكتافيا تقيله شويه علي الاتوماتيك
رايي متجبش غير مانيول
وطبيعه الاستخدام
لو فيه سفر كتير يكون الافضليه للاوكتافيا
وشكرا

[Mostafa.Mahran]

الاوكتافيا اقوى و اثبت و اللانسر انعم

[magedkahla]

مع احترامي للانسر هي عربية كويسة جدا ومسمعتش عليها عيوب لو الشكل القديم بس بردو الالماني حاجة تانية خالص قطع غيارها طبعا اغلى من اللانسر بس معمرة اكتر وموضوع المكانيكي متقلقش فيه كذا واحد شغال فيهم كويس

[zaza73]

شكرا لكم جميعا أعتقد ان تجربة a4 بعد هذه النصائح سوف تكون تجربة شيقة. بس بخصوص السعر هل هو مناسب 75000 و اية أهم حاجات احاول أرعيها عند الشراء

[abou-yahia]

شكرا لكم جميعا أعتقد ان تجربة a4 بعد هذه النصائح سوف تكون تجربة شيقة. بس بخصوص السعر هل هو مناسب 75000 و اية أهم حاجات احاول أرعيها عند الشراء

حضرتك مقولتش ظروف العربيه

ماشيه قد ايه

مانيول او اتوماتيك

الكماليات اللي فيها

حالتها

[zaza73]

السيارة اوتوماتيك و رشة جنبين عاملة 100000 كم

[mo3tazanas]

موديل كام؟

[Moratoz]

انا شايف لو باقي حاله العربيه كويسه من صالون وماتور وفتيس وعفشه وباقي الصاج اعتقد ان السعر مناسب جداً وكمان انتا لسه هحاول تنزل في السعر

[inspiron]

امتلكت والملك لله وحده أوكتافيا a4 98 هاي لاين منوال.وكان معاها لانسر بومه 2008 كاملة أوتوماتيك.

بصفة عامة العربيتين كويسين..لكن لو هنقول مقارنة

أوكتافيا :-

- موتور 1600 سي سي SR بقوة 102 حصان ( net ) عزم دوران 148 نيوتن.
- فرامل abs وفي بعض الموديلات نازلة بـ ASR
- تكييف ممتاز ( كان بيتلج العربية وهو علي 2 )
- خامات صالون ملهاش حل في الجودة.
- شنطة بحر
- صاج قوي قوي قوي قوي
- 4 زجاج كهربة مع وحدات رفع - 2 إيرباج - سنتر لوك - طارة متحركة - مرايات جانبية كهربة أسفيريك مع سخانات - سخانات كراسي - كمبيوتر رحلات كامل للعربية - Adjustable headlight beams - مقابض الأبواب نيكل.
- عفشة فاجرة من هنا للسنة الجاية.
- عزل جيد جداً
- قطع غيار معمرة ومتوفرة وفي متناول اليد ومراكز صيانتها منتشرة علي مجال واسع.

لانسر :-
- موتور 1600 سي سي 122 حصان ( Gross ) و 105 حصان ( Net )
- فرامل ABS مش في كل الموديلات.
- تكييف ممتاز غني عن التعريف.
- خامات صالون ممتازة ولكن مش بمستوي الأوكتافيا طبعاً.
- شنطة عادية مش كبيرة ومش صغيرة أوي
- صاج رايح في داهية بيكش من مية الغسيل.
- 4 زجاج كهربة - 2 إيرباج ( مش في كل الموديلات وممكن تبقي من غير كمان )- سنتر لوك - طارة متحركة - مرايات جانبية كهربة فقط - مقابض الأبواب نيكل ( مش في كل الموديلات )
- عفشة خدمة شاقة مناسبة للطرق المصري ولكن تبدأ تعيط بعد 100 ألف كيلو.
- عزل العربية ( فاشل ) كأن الموتور قاعد علي الكرسي اللي جنبك.وهو داير متسمعهوش أوي..وإنت ماشي بالذات لو بتحرق ..أجارك الله.
- قطع غيار معمرة ومتوفرة وفي متناول اليد ومراكز صيانتها منتشرة علي مجال واسع.

-------------------------

تجميع اللانسر من 0 حتي 150 جامد حشدددددددددددد...بعد الـ 150 وكبيرها في الظروف العادية 180

ده تسارع لـعربية منوال

https://www.youtube.com/watch?v=VdeoWINIOmw

وده تسارع الأوتوماتيك cvt

https://www.youtube.com/watch?v=pm054msmpTo

تجميع الأوكتافيا من 0 حتي 100 مش بطال ومُرضي بس مش بقوة اللانسر..بعد الـ 100..زي الحلاوة لحد 200

ده تسارع المنوال

https://www.youtube.com/watch?v=gsQEtnc4bYU

مش لاقي تسارع الأوتوماتيك

[zaza73]

اليوم فحصت السيارة و كانت مناسبة على الأقل ظاهريا لكن فية شئ قلقنى و هو ان العداد عامل 220000 كم مش 100000 زى ما قالوا لى

أنا صرفت نظر عن المشروع دة مؤقتا شكرا لكرمكم و وقتكم