##حادث سكودا اوكتافيا A5...تجربة شخصية!##

[NaderNabil]

الموضوع ده يا جماعة مكانش ليا نفس انزله علي المنتدي...بس حسيت انه هاييكون له افادة كبيرة للأعضاء و للباحثين عن سيارة في هذه الفئة.
----------------------------------------------------------
الحادثة ديه حصلت لوالدي في 25 نوفمبر 2007...يعني من 9 شهور بالظبط....

اللي حصل كالأتي:

كعادة والدي..بينزل كل يوم من بيتنا بحلوان الساعة 7 صباحا متجه الي المطار....و انا كنت هانزل بعديه بنص ساعة عشان كان عندي امتحان في أول محاضرة في اليوم ده...بس طبعا كنت نايم وقت ما هو نزل....

الساعة 7:15 ألاقي الموبايل بيرن( و دي كانت أول مره أسيب الموبايل مفتوح و انا نايم!!!!) افتكرته في الأول المنبة بس اكتشفت ان الفايبريشن بتاعه مختلف....رديت لاقيت والدي بيقوللي الحقني عملت حادثة جامده تعالاللي بسرعة...انت فين؟؟؟؟ قاللي في اليو ترن بتاع مدخل حلوان....طبعا اللي بيجوا حلوان عارفين كمية الحوادث اللي بتحصل في اليو ترن ده...بس انا توقع ان الحادثة بسيطة لأن والدي من النوع اللي بيهول المواضيع...فا كنت رايح علي أساس باب محكوك..رفرف...كده يعني:)

قمت من السرير مفزوع طبعا و ماشوفتش بلبس ايه حتي...و اكتشفت بعدها باليل اني كنت لابس شرابين غير بعض:bigear:...و نزل بالعماص علي عنيا و شعري كان منكوش اخر حاجة

مشيت بالعربية لحد قبل الدخلي بتاعة الأوتوستراد لاقيت الطريق واقف تماما...قلت أكيد مش هاستني كل ده....قمت ركنتها علي جنب و اخدتها مشي....

أول ما قربت من المكان قلبي انقبض...بس في نفس الوقت ارتحت لان والدي كان واقف علي رجله و بيتكلم في الموبايل و مافهوش حاجة الحمد لله....عارفين لما الواحد يبقي رايح علي أساس يشوف حاجة يروح يلاقيها حاجة تانية خالص؟؟أهو انا كنت كده...لاقيت سيارتنا حبيبتي مدايقة قوي:(.....و في وضع غريب في وسط الاوتوستراد!! كان واقف جنبها اتنين امناء شرطة و عمالين يطلبوا العميد عشان يجي بس كان في حادثة تانية:(

ايه اللي حصل بقي؟؟؟

والدي كان واقف في اليوترن مستني العربيات اللي جاية في الاتجاه المعاكس انها تخلص...و مش مطلع بوز عربيته ولا حاجة....و الدنيا بيس خالص و حتي كان باصص الناحية التانية عشان شايف ان العربيات لسه جاية كتير فا هاتخد وقت....

فجأه و بدون أي مقدمات....صدمة عنيفة في الجانب الايمن من السيارة أطاحت بالسيارة بزاوية 180 درجة....

اللي خبط والدي...سيارة نقل مرسيدس محملة بقطع كيرة من الحجارة البيضاء التي لولا ستر ربنا و رحمته كان ممكن بسهولة من فعل الصدمة تنط و تنزل علي عربية والدي...(الحمد لله)....مش كده و بس...النقل كملت بسرعتها المجنونة لتصدم تريللا أخري محملة بشكائر الأسمنت و كان أيضا من الممكن جدا ان ينحشر والدي ما بينهم(الحمد لله)


شرح الحادث:




العربية و هي بتلف كانت مائلة علي العجلتين الشمال فقط...لأنها اترفعت من الجنب اليمين...و في السكة حكت في جين 2 بس كانت بسيطة و صاحبها مشي علطول

اليكم صور الحادث:




النقل المتهور (و تظهر الحجارة البيضاء في الخلف)...و المكان اللي جه في عربية والدي هو الجزء الأسود الصغير في مقدمة النقل...باقي التدمير ده من التريلا التانية





واخدين بالكم من سلاح الشاسية باين ازاي من تحت الصاج


الجنب الشمال...العفشة و الجنط (بقي بيضاوي) في الناحية دي كلها اتغيرت....و المفارقة ان الناحية التانية العفشة مجرلهاش حاجة


المنظر ده يوضح الرمية اللي العربية اترمتها 180 درجة! و شايفيين كمية الأسمن اللي وقعت من التريللا التانية؟؟؟(حوالي 14 شكارة)


ده بعد ما نقلنا العربية...الحمد لله كانت بتتحرك و الموتور مافهوش حاجة ...المشكلة كانت في العفشة بس




لا مش هيه نفس النقل:)...واحدة تانية:)


و ده و هيه محمولة علي الونش متجهه الي التوكيل


المفارقة المضحكة ان و احنا واقفين مستنين الونش حصلت حادثتين في نفس المكان:)...بس الأضرار كانت أقل و انتهت بخناقتين و كله راح لحاله...

مش هاخوض في تفاصيل المحضر و القسم...احنا كنا عايزيين المحضر بس عشان التأمين....

و طلعنا بالعربية علي التوكيل...
استلموا العربية مننا و رئيس ورشة السمكرة قال مش أقل من شهر عشان تخلص....احنا مكانش هاممنا المدة المهم ترجع زي الاول تاني....

عرفوا طبعا ان متامن عليها...و ده مصدر رزق ليهم:)..عملوا المقايسة المبدأيه....كام يا عم الحج؟؟؟؟43,000 جنيه ....و انا مالي هو انا اللي هادفع؟؟؟طبعا جه مهندس التأمين شخرمهم....و طبعا كان فيه استهبال علني يعني...من ضمنه تغيير التكييف بالكامل:) كل ده عشان كان فيه تسريب فريون...و حاجات كتير بقي تشل من ديه...

المهم...العرية خلصت في شهر و اسبوع الظبط...بس و هما شغالين فيها زرجينة خبطت في الزجاج الأمامي و عملت نقرة صغيرة جدا في حتة ماتشوفهاش(تحت التوربيدو)... واحنا اصلا ماشوفنهوش بس المهندس هو اللي تفضل مشكورا باخبارنا...قالولنا الزجاج علي حسابنا بس هو مش موجود حاليا و ممكن تستلمواالعربية دلوقتي و تركبوه بعدين...والدي محبش يعمل كده خصوصا انه كان اتعود خلاص علي المواصلات فا مبقتش فارقة...فا سبنها و قعدت 3 أسابيع تانية لحد ما ركبوا الزجاج....

العربية بعد التصليح بأمانة مافيش أثر لأي حاجة...ولا الهوا...مهندس السمكرة قالنا لو العربية دي جاتلي يكشف عليها مش هاعرف غير من الملف...مع ان كان فيه عوجة بسيطة في الشاسية من قدام....بس اتعدل علي الجهاز...و فعلا الحمد لله قعدنا اسبوع نجرب فيها مكانش فيها أي مشاكل و طلعنا بيها علي العين السخنة نجرب و هيه هيه ننفس العربية و علي السرعات العالية

جه وقت الحساب...!!!!!!

الفاتورة الكليه بالمصنعيات و ضريبة المبيعات: 14,170 جنيه مصري...

بعض قطع الغيار المنتقاه (لان اللسته طويلة جدا)

السمكرة:

رفرف أمامي يمين 524
اكصدام امامي 750
كبود 1400
فانوس أمامي 650
فانوس شبورة 140
سلاح شاسية يمين 300

الميكانيكا و العفشة:

مقص شمال 800
بلية عجل شمال 700
شمعدان شمال 1050
بارة دركسيون350
2 مساعد امامي 1420
بيض مقص شمال 230
جنط عجل 850

(قطع الغيار السابقة جزء فقط مما تم يغييره نظرا لكثرة الاشياء و صغرها)

اجمالي المصنعيات: 2,750

اجمالي قطع الغيار 10,132

ضريبة المبيعات 1,288

المجموع 14,170


دفعنا احنا طبع و ودينا الفاتورة لشركة التأمين و الحمد لله اخدنا الشيك بعدها بشهر تقريبا مخصوم منه 10% نسبة الاهلاك...
_______________________________________________

أرجو ان الموضوع يكون أظهر بعد النقاط الغير واضحة بالنسبة للسيارة و قطع غيارها...و اتمني انكم تكونوا شوفتم مدي صلابة هذه السيارة و قدرتها علي التحمل...

و في النهاية باصلي لربنا انه يحفظكم و يحفظ طريقكم من المفاجات و التهور و اللامبلاه اللي حوالينا في الشارع!!

[mohamed2002]

حمد الله علي سلامة والدك دي اهم حاجة ,بس الاكصدام واضح انة سليم اتغير لية ؟

[egyfantom]

حمداً لله على سلامة والدك

[Islam_galal]

الحمد لله علي سلامة والدك

[theking2690]

حمد الله على سلامة والدك و مشكور على الموضوع المفيد ده يا نادر ولو ان ديه مش حاجه جديده عليك

[tamim]

الف حمد لله على سلامة والدك وانت
والحمد لله العربية رجعت زى ما كانت

[macman]

الحمد لله علي سلامة والدك و ربنا يكفيك شر الطريق

[Ramy.Gamal]

الف حمدلله على سلامه الوالد
بس فعلا الاكصدام وفوانيس الشبورة سليمه اتغيروا ليه؟

[MTAK]

حمدا لله على سلامة الوالد
و حسبنا الله و نعم الوكيل فى كل لم يهتم بأمر الناس التانية و مسبب لنا كل الهم و النكد ده

[Mohamed-Saoud]

حمد لله على سلامة الوالد أولا
و ثانيا واضح أن النقل يدوبك لمس العربية بتاعتكوا زي لمسه الفراشة كده :) و ده من فضل ربنا و الا كان الموقف أصعب.

[mohamed ibiza]

الف سلامة للوالد يا نادر بجد بجد بجد زعلت اوي و معلش قدرها و نصيبها ربنا ياخد بتوع النقل و امثالهم والله اضايقت جدا عشان العربية حرام يعني اللي بيحصل ده بس معلش المهم انكوا بخير يا ريت تحطلنا صورة بعد التوضيب

[hamedo0]

الحمد لله علي سلامة والدك

[king_de_egypt]

ربنا يسترها عليك و على والدك والحمد الله انها جت على قد كدا احمد ربنا

[hazem_khidr]

حمد الله علي السلامه لوالدك يا نادر
الحمد لله انها جات علي قد كده
الاوكتافيا من العربيات القليله اللي بحترم متانتها جدا من يوم ما طلعت
و الديل ان لحد انهارده قليل اوي لما تلاقي اوكتافيا متهانه حتي من موديلات 98
بالنسبه لقطع الغيار اسعارها معقوله اوي
لكن العفشه اسعارها مبالغ فيها

[ENG\AHMED]

اولا: حمد الله على السلامة وربنا يحفظهالكوا ان شاء الله
ثانيا: لو دى اسعار التوكيل يبقى مينفعش غير اقول تحيا منصور :(
انت عقدتنى :d