رايح اكشف يوم السبت على الفنتازيا .افيدونى

[KABOKY_2010]

انا رايح اكشف على الفنتازيا ان شاء الله يوم السبت فى مركز الاقصى الى هو معتمد اولا هقولك مواصفات وسعر العربية : موديل 2011 فاريقة برة وجواة ومفيهاش خربوش الحمد لله لونها رمادى اول فئة وعاملة 52500 كيلة وهتخلص على 162500
انا بقى هروح وهدفع حوالى 500 جنية مع ان الحاج بيقولى بلاش ووفرهم للترخيص لان العربية كانت عاملة صيانة ال 50000 من شهر 6 بس انا عايز اطمن بنفسى وكدة اية بقى المفروض اعملة هناك واقولة فى التوكيل واخلى بالى من اية وانا بستلم العربية عايز مش اسيب مسمار واحد من غير ما اشوفة فى العربية واشوف حوار الفتيس الى هو valve body عشان فى واحد قلقنى من الموضوع بتاعة جدا جدا عايزكم بقى تفيدونى بكل حاجة اعملها فى المركز وانا بكشف واية الحاجة الى لو شفتها ابعد او اخلى بالى والتكييفات والحساسات كل الحاجات دى
ثانيا اعمل اية بقى لما اروح الشهر العقارى بالفلوس يوم الاحد ان شاء الله واحدة واحدة كدة لانى اول مرة اشترى مستعمل بصراحة
اسف لو طولت عليكم

[NaderNabil]

طالما هاتوديها الاقصى يبقى ماتقلقش...هما هايكشفوا على كل حاجة في العربية كشف شامل كامل....
و عموماً ماتقلقش... الكيلومتر ده مش عالي في الاوكتافيا و مش هايبقى فيها حاجة ان شاء الله طالما متواظب على صيانتها
انت بس اعمل حسابك في صيانة ال ٦٠٠٠٠ علشان قربت...و طقم كاوتش لو كان صاحبها لسه مغيروش...حسبة ٧٠٠٠ جنيه كده
و مبروك مقدماً

[KABOKY_2010]

انت تعرف مركز الاقصى يا نادر ولا معندكش خلفية واية الى ابوص علية وانا بستلم من الراجل واية الى هعملة فى الشهر العقارى

[fadi2011]

?????????????

[NaderNabil]

انا كنت بعمل صيانات الأوكتافيا في الأقصى من أول ال ٧٠٠٠٠ لحد ال١٢٠٠٠٠ ...كانوا كويسين و مايفرقوش حاجة عن التوكيل...بس ساعتها مكانش المركز الجديد بتاع القطامية فتح...لأني كنت هافضل اروحله علشان مافيش فرق في الأسعار ...مشكلتي كانت المسافة و مكان توكيل غمرة

بالنسبة لعملية الشراء...انا هاقولك بالظبط لأني لسه بايع العربية من اسبوع:
١- تطمن من كشف الأقصى و بعد ماتخلص تاخد المهندس على جنب و خليه يكلمك عن العربية و لو فيه شغل او عيوب و خد بنصيحته...بس خد بالك ساعات بيبقوا أوفر علشان يعملوا شغل و خلاص
٢- اتطمن ان كل الكتالوجات و العدة بتاعتها و لو امكن فواتير الصيانات القديمة و المفتاح الثاني موجودين
٣- توكلت على الله و هاتخلص في العربية....هاتدي للراجل فلوسه في أي مكان تختاروه بس يكون مأمون و بعيد عن عيون الناس و تمضوا عقد ابتدائي بيتباع في اي مكتبة....او تنزلوا علطول على الشهر العقاري التابع لمحل سكنه لو اليوم سمح بكده علشان تعمل عقد بيع سيارة و تنقل ملكية علطول
٤- نقل الملكية هاتروحوا انتوا الاتنين ببطايقكم و اصل الرخصة و هما في المكنب هايقولولكم تعملوا ايه بالظبط...التكلفة هاتكون حوالي ١٨٠٠ جنيه انت اللي بتدفعها... على فكرة ممكن هو يعملك العقد من غير حضورك لو انت مش فاضي تروح بصورة بطاقتك
٥- ماتنساش تاخد شهادة المخالفات من المالك و مايكونش مر على تاريخها ١٥ يوم

بعد كده بقى بتقى تعمل إجراءات نقل الملكية في المرور بتاعك و بتاعه عادي مش هتيبقى فيهم مشكلة ان شاء الله
بالتوفيق

[KABOKY_2010]

شكرا جدا يا استاذ نادر على نصحيتك الغالية وان شاء الله بكرة لما اجى هبقى اقولك عملت اية بالضبط وان شاء الله خير

[Moratoz]

متنساش تبص علي الاستبن والكوريك في الشنطه وتجرب تشغيل التكيف وعلي فكرة التكيف يا بيبقي شغال او مش شغال مفيش حاجه اسمها عايز شحن واحنا في عز الصيف وتتأكد من الرخصة وصاحب العربيه والصيانات الخاصه بالسيارة وزي ما استاذ نادر قال كده كده اعمل حسابك علي صيانه ٦٠٠٠٠ ك ن شاء الله.
ولو العرييه عايزه حاجه في العفشه حاول تنزل من امنها لو عرفت وأمكن ذلك وطبعا هتبقي عاوزه تغير كاوتش ومتنساس تتأكد من الحساسات وحاله الفتيس
وربنا يكرمك ان شاء الله

[طارق _عبد السلام]

الاخوه افادوك فى موضوع كشف التوكيل
وانت رايح حاول تاكل مطبين تلاته كده وشوف ظروف العفشه ايه
وركز فى وانت راكب هتحس بنقلات العربيه ولا لا
ومن جهه التسجيل هو بالظبط 1560 مصروفات العقد المسجل
لو هتنقل ملكيه على طول فى ظرف شهر امضى مشترى
ولو عايز تمشى بالمتبقى برخصتها ماتمضيش مشترى يعنى هو هيبع لك بعقد مسجل وانت متوقعش وموظف الشهر العقارى عارف
هتدفع فلوسك بالكامل فى الشهر العقارى وانت بتاخد العقد المسجل ويكون صاحب العربيه جايب لك شهاده مخالفات جديده
ومبروك مقدما

[طارق _عبد السلام]

ولعلمك صاحب العربيه لو موافق ومطمن لذهابكم للتوكيل يبقى واثق ان عربيته نضيفه فعلا

[KABOKY_2010]

انا اساسا مش ناوى اسوق العربية الا بعد ما اكشف والكشف فى التةكيل هيبين ظروف العفشة صح ولا اية وبصراحة انا خايف اسوقها حاسس انها طويلة وعريضة وكمان مش بفهم فى نظام التيبترونك يعنى ازاى امشيها مانيوال وازاى العكس كدة يعنى

[طارق _عبد السلام]

هيا اوتو عادى جدا هتجيبها على d وتمشى عادى
ولو عايز تعفرتها وتشد وسحب يعجبك هات الفتيس على s

ولو عايز تشغلها مانيوال هتلاقى علامه زائد وناقص هتجيب العصايه ناحيه العلامه وهتدوس بنزين وتنقل كل سحبه للامام فى العصايه هتزود غيار وكل سحبه للخلف هتقلل غيار وهيبان فى العدادات انت ماشى على اى سرعه

[KABOKY_2010]

متشكر جدا يا استاذ طارق

[KABOKY_2010]

روحت النهاردة عند الاقصى وكشفت الحمد لله وهكتب الحاجات ال علها كومنتات والى اتقالى من المهندس
اداء المحرك :80%
كبس المحرك :cly(1:10 &2:9 &3:9&4:10)
الفتيس :لم يظهر بة عيب اثناء التجربة
الاطارات والجنوط :الاطارات غير جيدة وعايزة تتغير وقالى ان هو دة المعدل الطبيعى بتاعها على صيانى ال 60000
المساحات :يلزم تغير ريشة مساحة خلفية
الزجاج الكهربائى :يلزم تغير موتور زجاج باب امامى يمين .المهندس بيقولى بيعلق ودة فى معظم الفنتازيا بس انا جربتة كذا مرة مشوفتش كدة
التقرير النهائى الى هو اخر ورقة
ورشة الميكانيكا
يلزم عمل الصيانة +يلزم تغير تيل الفرامل الامامى +يطنابير+تيل فرامل خلفى مع الصاينة القادمة
ورشة الكهرباء
يلزم تغير موتور زجاج امامى يمين (دة الى انا ذكرتة فوق من شوية ) +ريشة مساحة خلفى +تنظيف بلاور(مش عارف اية دة )+فلتر تكييف+تنظيف المارش
كل الحاجات دى قالولى تتعمل فى صيانة ال 60000 لان دى الصيانة الى بتعمل الشغل دة كلة عايز اعرف رايكم ورايك يا استاذ طارق ومستنى الردود وشكرا

[طارق _عبد السلام]

التقرير بيقول العربيه تمام ومذكرتش حاله الدهان للعربيه
حكايه الباب اليمين دى سيبك منها لما يبقى يعطل كان زميلنا الاستاذ احمد عمل له ترس وشغال عنده ممتاز
ومن ناحيه التقرير كل ده بيتعمل فى صيانه 60 الف فعلا

نقول مبروك

[KABOKY_2010]

الدهان جيدا جدا ومفيهاش اى خربوش نهائى عشان دة مقولتش حاجة عنة انما حضرتك مقولتش اى كومنت خالص على كبس الماتور يهمنى رايك جدا جد لان المخوضوع دة قالقنى بشدة