فكرة وإستطلاع رأي

[inspiron]

في فكرة مشعشعة في دماغي ومحتار أنفذها بقلب جامد ولا بلاش منها.
بالنسبة للفانتازيا هي دلوقتي عاملة 114000 كم وبسم الله ما شاء الله لسه بحالتها.

بس مش عارف ليه عندي رغبة في إني أخوض تجربة عمل tuning ليها .. بحيث يركب عليها المحرك ده

Golf 5 R32 Acceleration BRUTAL Launch control - YouTube

بس إيه اللي محتاج يتغير في العربية عشان يركب الوحش ده.يعني أكيد في حاجات تتغير في العفشة والكهربة..وهل ده يعيب العربية في شئ !! ومين من المتخصصين اللي ممكن ينفذوا الجريمة دي :D

[Ahmed_Adham]

وده تيون ولا تسقيط موتور؟

[inspiron]

وده تيون ولا تسقيط موتور؟

الاتنين مع بعض..يعني بخلاف تسقيط الموتور يتعملها tune

[medo2811]

بص يا باشا هو الموتور جبار طبعا بس اي عربية بيتشال موتورها الاصلي و يتسقطلها موتور قيمتها بتقل من وجه نظري المتواضعة :)

[aw2100]

للاسف فى مصر حكاية تسقيط المواتير ده بيقلل من قيمة العربية فلو مش بتفكر فى بيعها اية المانع ظبط ياباشا براحتك بس نصيحتى تشوف ميكانيكى يكون متخصص فى تسقيط المواتير ويكون عنده كهربائى علشان تعديلات الكونترول للموتور والفتيس كمان هو فية ميكانيكى وكهربائى فى الأسكندرية تخصص فى تسقيط وتعديل مواتير الالمانى بس غالى قوى بس انا شايف الأفضل انك تشترى العربية اللى راكب فيها الموتور ده لو الموديل موجود فى السوق المصرى وتسيب الاوكتافيا على حالتها وربنا يقويك !!

[Moratoz]

انا مش مع الفكرة دي لأن الطرق عندنا ما يستحملش المواتير دي وبعدين هتلاقي مشاكل كبيرة في الصيانه وقطع الغيار مش هتلاقيها بسهوله غير طبعا سعر أعاده البيع مش هيكون في صالح عربيه ملعوب فيها عن عربيه معروف اولها من آخرها وقطع غيارها
اما لو مصصم فممكن تبعت رساله خاصه تلي فورمولا تور اعتقد امه عنده دراسه بمكان ومتطلبات هذا التعديل

[Ahm662]

مش صعب كتعديل بس ده موتور مفترى (247hp 320n.m 250km/h limited) كتير قوى على بلدنا المحروسة غير انه ها يحتاج تعديلات كتير فرامل و عفشة وضفيرة وكنترول وجنوط بالكاوتش (مش بعيد يكون اكبر من ال18 كمان ) غير الاستهلاك الشديد للبنزين "v6"وتوافر قطع الغيار و التكلفة اللى ممكن تعدى 50.000 ثمن التعديل ............................حسبة بسيطة عربية ممكن تجيب 150 و 50 تعديلات بعد التعديل اكيد ها تخسر فى اعادة البيع لان مش ها تلاقى حد يقدر الشغل المعمول فى العربية .................نصيحة كمان علشان اكيد صدعت منى a7 هاى لاين واستنى الخليجى احسن حتى لو اغلى من الوكيل ما فيش مشاكل واحنا كفاية قوى على المحروسة بلدنا 1.4tsi ..........والقرار

[elferekiko]

انا لسه قيللك في موضوع تاني ان مشاركاتك بتعجبني :) طبعا دا موتور فاجر جدا جدا بس الناس مش فاهمة ان في نوعين من السواقين في مصر في ناس بتسوق عشان تمشي جنب الحيط توصل العيال المدرسة وتجيب الخضار والعيش وتعمل زيارات عائلية :) ودول تلاقيهم يقولولك ما تلعبش ف العربية وسعر اعادة البيع وقطع الغيار والكلام دا وطبعا عقلية المستهلك المصري مختلفة عن عقليه المستهلك ف اي بلد ف العالم
ولكن في نوعية تانية من السواقين اللى بيسوقوا عشان المزاج والمتعة والاستمتاع بالسيارة كتحفة فنية ومواصفات متفوقة لو انت من النوع دا من السائقين ممكن تتوكل على اللله وتعملها لان العربية دي حتكون الوحيدة في مصر بالمواصفات الجبارة دي وبصراحة كقيمة (وليس كسعر والفرق بينهم كبيييير) حتبقى عربية هايلة وقيادتها ممتعة بس ما تعدلهاش وتبيعها خليها لمزاجك الخاص

طبعا دي عايزة واحد صنايعي درجة اولى ولازم يتغير مع الموتور العفشة والكونترول ويمكن الفتيس كمان واهم شئ الفرامل لازم تكون اقوى وفي الحالة دي انصحك بلاش تسترخص ولا تبخل عليها باي تكلفة انا شفت عربيات جولف وبيمرز معمول فيها شغل ابن حرام الصراحة بس ماعرفش مين متخصص ف الحاجات دي عموما الحرفيين مليانة مواتير زي دا حتى بيعملولك افراج جمركي عشان ترخصها على انها 1600 ومواضيع كبيرة كدا
البديل التاني لو عايز تريح نفسك من وجع الدماغ وشغل الصنايعية انا مرة قابلت مهندس معاه a5 موتور 2000 وغلبت اعرف منه جابها منين مكانش عايز يقول قعدت ادردش مرة مع السواق بتاعه قاللى انه اشتراها من مزاد كانت عاملاه سفارة دولة اجنبية طبعا دول بيدخلوا العربيات من غير جمارك واقل حاجة عندهم 2000 ومعظمهم حتى 3000 واكتر حاول تتابع موضوع مزادات السفارات دا يمكن تعرف تستلقط حاجة كويسة انا مرة من سنتين عترت ف باسات 2005 الشكل القديم وهمية بموتور 1800 تربو تبع سفارة اليونان بس اتضح ان دخول المزادات دي صعب جدا لان في تجار محتكرينه
ايا كان اختيارك بالتوفيق ان شاء الله

[eleanor]

هو طبعا تعديل جامد جدا بس انا مستحرمه فى الفانتازيا مش تقليل من قدرها بس حرام العربيه نضيفه ولو ميكانيكى عمل غلطه هاتخسر كتير فحرام
انت ممكن تشترى عربيه وتعمل عليها تعديل وتبقى عربيه لمزاجك الخاص زى e36 لو بتحب البى ام او مرسيدس زلموكه ودى بيركب لها مواتير لحد5000 سى سى وهاتبقى راكب حاجه محترمه وشيك ولو حد فكر بس يعمل حاجه معاك انت هاتعمل معاه الصح ومش هايشوفك تانى
وربنا يباركلك فى عربيتك ان شاء الله

[deeda]

tb mat5aleek fe el 2000 turbo bta3 el octavia RS mwgod 3nd el ra3y fe el 7erafeyeen b 27000 bel ftes DSG aked msh hayeb2a me7tag el ta3delat el raheba bta3et el r32