مشكلة في مروحة سكودا اوكتافيا a5

[abohalmos]

انا معايا اوكتافيا a5 موديل ٢٠٠٨ و لما بنزل من العربية بعد مشوار و لا حاجة .. بأسمع صوت المروحة دايرة بعد ما ابطل العربية و بتفضل حوالي ٥ دقايق .. و صوتها بيبقي عامل زي صفارة فية زنة و مؤشر السخونة ما بيعديش المنتصف ابدا .. و قلقان من صوت المروحة ده و مش عارف ده طبيعي و لا ايه ؟؟؟وواحد صديقي قاللي دي البلية بتاعة المروحة و محتاجة تتغير و الا المروحة هاتبوظ و العربية تسخن و كده
يا تري صوت الصفارة او الزنة بتاعة المروحة جاي منين و يتحل ازاي لاني في قنا و معرفش حد اروحله هنا
و كل عام و انتم بخير

[SAMEH_FOUAD]

هية دية فعلا بتكون بلية المروحة , بس مالهاش دعوة بالتأثير على كفاءة التبريد ,بس غيرها عشان الموضوع مايتطورش اكتر من كدة , لان ممكن البلية تقفش وساعتها هتلاقى المروحة توقفت فجأة عن العمل

[أحمد جودة]

غالبة بالفعل بلية المروحة محتاجة تشحيم ويفضل تغيير

[abohalmos]

جديد الموضوع اني كلمت حد كان شغال في توكيل سكودا و حاليا عامل ورشة لوحده و قاللي انه فعلا دي المروحة بس العربية فيها مروحتين واحدة كبيرة وواحدة صغيرة و المروحة بتاعة سكودا a5 مابتتشحمش و لو فيها مشكلة بتتغير علي طول ..حد يعرف سعر المروحة دي كام اذا كان التوكيل او الاصلي و لكم خالص الشكر

[madridy1001]

كانت عندي نفس مشكلتك وركنت العربيه 4 ايام لغايه ما لقيت المروحه وجبتها...وهي كانت المروحه الصغيره الي علي الشمال وانته واقف اامام السياره...المهم هي بتتباع ب 275 جنيه وانا اشتريتها من اسيوط من عند واحد اسمه محمود تويوتا وليه فرع في سوهاج والراجل ده اسعاره كويسه جدا....تحياتي