الحمد لله انكتبلي عمر جديد

[Amr_Azab]

طبعا الجواب باين من عنوانه
حصلت معاية النهارده مشكلة كبيرة جدا ومش حبالغ لو قولت انها كان ممكن تقلب لكارثة لولا ستر ربنا الحمدلله

الموضوع كالتالي :-

انا رايح الشغل الصبح لا بيه ولا عليا وكل حاجة تمام في العربية الحمدلله لاني من عادتي اني قبل مطلع كل يوم الصبح ابص علي مياه التبريد والزيت والكاوتش والف لفة كده عامة علي العربية
فخدت لفتي وكله تمام التمام وتوكلت علي الله

بعد 50 كم تقريبا وفي منطقة زحمة فوجأت ان العربية راحت مبطله واحاول اني ادورها مفيش
( صوت مارش لكن مبتلقطش)
فتحت الكابوت ونزلت عشان اشوف في ايه
فوجأت ان الارض تحت العربية كلها غرقانة بنزين ولستر ربنا اني مكنتش مولع سيجارة لاني مدخن
روحت جايب مياه كتير وغرقت الارض عشان اي حد معدي جمب العربية ممكن يبقي مولع سيجارة ولا يرمي سيجارة ولا حاجة وطبعا نبهت الناس كلها اللي بتعدي جمبي

جبت العربية طبعا علي جمب بعد عناء ورفعتها ومشيت ورا دورة البنزين واحده واحده

الحل الآول : الخرطوم اللي واصل لفلتر البنزين بس لاقيته راكب وتمام

الحل الثاني : مشيت ورا خرطوم البنزين بعد مطلع من الفلتر بس لاقيته محمي جوا جراب حديد في اسفل العربية وماشي جواه وتحت الجراب في تصفيح العفشة
( فيبر مقوي مغطي أرضية العربية بالكامل لحماية العفشة من الخبط او المياه )
فمستحيل يكون اتقطع من مطب او اي حتكاك

الحل الثالث : الجزء الواصل من الخرطوم الي الرداخ والرشاشات وهنا لاقيت المشكلة
الرداخ بيجيب بنزين كويس وبيدخ ممتاز

يبقي المشكلة في الخرطوم اللي واصل بين الرداخ والرشاشات
وفعلا لاقيت الكلبس اللي راكب في الخرطوم ده علي الرداخ ضعف ومبقاش محكم وبالتالي بيهرب بنزين والبنزين بينزل ويفضل ماشي علي الخرطوم في المجري بتاعته ويروح نازل علي التصفيح وينزل منه لتحت العربية
واللي يجي يبص يلاقي العربية بتنقط من تحت بنزين فيفتكر العيب من تحت زي مفتكرت انا الاول
وده شكل الكلبس ابن اللذينه


المدخل الكبير اللي عنده الرقم 7.89 ده اللي بيركب في الرداخ ومن جوه في كلبس بيقفل كويس علي سن الرداخ والكلبس اللي جوه ده هو اللي ضعف كما في الصورة



فا الحل المؤقت طبعا اللي عملته عشان أقدر اتحرك اني قطعت الخرطوم من عند نهاية كوعة الكلبس لانه محكم جدا مع الخرطوم ووصلت الخرطوم مباشرة للرداخ بكلبس عادي ونفس الكلام ناحية الرشاشات

النتيجة بقي :-
اول حاجة بسم الله الرحمن الرحيم وروحت مدور العربية
الحمدلله العربية راحت دايرة زي الفل
المفاجاة بقي :-
ان انا كنت بشتكي من فترة ان أوقات عداد الآر بي أم بيلعب شوية وأوقات يروح نازل للآخر والعربية تبطل ودوخت علي العيب ده معرفتش اوصل لحاجة
بس بعد اللي حصل النهاردة ولما لاغيت الكلبس ووصلت الخرطوم مباشرة المشكلة دي أتحلت والآر بي ام بقي ثابت وصوت الدوارة بقي أفضل و من سنة بسيطة العربية بتدور والسحب برده بقي أفضل

فانا حبيت انقل التجربة حتي يستفاد الجميع لو حصل مع حد موقف مماثل
ولاني لاحظت ان في ناس كتير بتشتكي من موضوع الآر بي ام ده
ويبقي عامل صيانة ومنضف البوابة وكله تمام
وأول رد يبقي عند الميكانيكي طبعا غيرلي البوابة ( يسمع كلمة أر بي ام يقولك بوابة علطول )

وأرجع وأقول الحمدلله علي كل شيء وستر ربنا مع الواحد

[amr011111]

الحمدلله ورب ضارة نافعه
الموضوع ده خلاك تحل مشاكل تانيه

[Amr_Azab]

الحمدلله ورب ضارة نافعه
الموضوع ده خلاك تحل مشاكل تانيه

الحمدلله علي كل شيء وفعلا رب ضارة نافعة
الموضوع ده خلاني حليت مشكلة كنت دايخ فيها ومحدش كان عارف سببها أيه

[tameraast]

ربنا يباركلك انت بتحب تشتغل بايدك :)

[Amr_Azab]

ربنا يباركلك انت بتحب تشتغل بايدك :)

ربنا يخليك يا باشا
وفعلا انا بحب جدا اني اشتغل في العربية بأيدي
لان محدش حيخاف عي عربيتك زيك اكيد

[S O P H O S]

الحمد الله علي كل شئ
ربنا ستر

[Mohamed_Hamid]

الحمد لله الذى نجاك

[Ahmed Amin]

الحمدلله أنها جات سليمة, وفعلاً كل اللي يسمع RPM مش مظبوط بيفكر في البوابة الأول,
بس لو البوابة بعد ما تتنضف وتتظبط ال RPM فضل يلعب هيكون عندك Vacuum leak أو تهريب بنزين زي اللي حصلك.

[المنسي]

الحمد لله انها جت على قد كده

[Amr_Azab]

الحمدلله فعلا
بتبقي حاجات بسيطة جدا بس ممكن تعمل كارثة لولا ستر ربنا
شكرا ليكوا جميعا

[hilal]

حمدا لله على سلامتك
وشكرا على نقل المشكلة والحل وبالصور

[Amr_Azab]

الحمدلله أنها جات سليمة, وفعلاً كل اللي يسمع rpm مش مظبوط بيفكر في البوابة الأول,
بس لو البوابة بعد ما تتنضف وتتظبط ال rpm فضل يلعب هيكون عندك vacuum leak أو تهريب بنزين زي اللي حصلك.

+111
بالظبط كده بس المشكلة بتبقي في تحديد التسريب ده منين بقي
يعني انا مثلا لما جيت امشي ورا الموضوع اضطريت أحل التصفيح اللي تحت بالكامل وبعد محليته لاقيت خرطومين البنزين ماشين في مسار معمولهم مخصوص جوا شاسيه العربية نفسه
فالخراطيم محمية جدا جدا ولو لقدر الله حصل بطريقة ما واتقطع حتبقي مشكلة كبيرة والحل الوحيد ليها حيبقي بتدكيك السلك

[Amr_Azab]

حمدا لله على سلامتك
وشكرا على نقل المشكلة والحل وبالصور

الله يسلمك
ولازم كلنا ننقل تجاربنا عشان نتعلم من بعض ونستفيد

[Moratoz]

ستر ربنا هو اهم شيئ فالحمد لله لأن فعلا كان ممكن تقلب بكارسه

[طارق _عبد السلام]

الحمد لله قدر الله ماشاء فعل
فعلا الله ستير