هي A4 2007 Auto الخليجي مفيهاش لمبة check engine ?

[mgelgel]

كنت عملت موضوع قبل كده بسال فيه عن الاوكتافيا A4 2007 Auto الخليجي
كان فيه ظروف و اجلنا الموضوع و بعدين كلمنا الراجل تاني و اتفقنا نروح مركز الزراني في سيدي بشر للكشف علي السيارة
اولا الفني وصل السكانر و بعدين لقي عطل واحد و قالنا العربية فيها حساس كرنك بايظ

الكود كالاتي
X431 DIAG Report

Total codes 001
CODE001 : 00515 Hall sender-G40 No signal

العربية خليجي و فيها شاشة معلومات كبيرة منتصف العدادات
سالت الفني ليه العطل مش متسجل قاللي مش عارف و انا مسحته لكن رجع تاني
و الغريب مفيش لمبة check engine في التابلوه سالته يمكن اللمبة محروقة فصاحب العربية قاللي لا شاشة الاعطال هي اللي بتوضح اي عيب .. طب ليه مش ظاهر مش عارف؟؟؟؟؟؟
برجاء المساعدة هل الخليجي 2007 مفيهاش لمبة التشك و هل لو حساس الكرنك ده بايظ او يمكن يكون مفصول لان No signal والفني قال تمنه 340 جنيه ؟؟؟ هل بياثر في حاجة لان احنا مشينا بالعربية و محسناش باي حاجة و النتقلات سلسة و عادية
ثانيا الراجل كمل كشف و قلنا العربية رشة نظافة ماعدا السقف بس سليمة مفيهاش حوادث و محتاجة جلبة مقص شمال و لاحظنا تسريب زيت اسفل الموتور بس مش باين منين عشان الكساحة اللي تحت مش مبينة حاجة واخد الفني 100 جنيه قيمة الكشف
المهم كملنا الكلام والراجل كان طالب 105 الف جنيه و وصلنا 102 الف بالعافية
العربية حالتها كويسة جدا جدا فيها جنوط اصلية و تكييف تاتش و ماشية 37000 كم بس والرخصة فيها سنة . ايه رايكم عموما اسف للاطالة

[mo3tazanas]

ايوة الخليجى مفهاش لمبة التشيك انجن
بالنسبة للسعر انا رايى ان انت دافع 102 الف يبقى اركب العربية مفعاش الهوا لا جلبة مقص ولا زيت بيسرب ولا حساس بايظ ولا اى حاجة الكلام دة مسموح لما يكون السعر فى التمنينات او اوائل التسعين انما 105 كتير وكمان فيها شغل انا رايي بلاش
دى كمان رشة وب102 الف لا كتير قوى طبعا

[mgelgel]

اولا شكرا لاهتمام حضرتك
بالنسبة لجلبة المقص و الكود اللي طالع فده مش ماثر خالص انا جربت العربية و مشيت بيها رايح جاي مفيش حاجة والتسريب ده الميكانيكي بيقول انه من جوان الكارتيرة بس لسه هتاكد منه
وبصراحة احنا بقالنا اكتر من شهرين بنلف و الحالات اللي شوفناها بتكون مش قد كده و العداد كتير فوق 100 الف كم وامبارح سالنا في معرض في سموحة لقيت واحدة 2007 بدون جنوط و ماشية 114 الف كم والحالة العامة اقل من دي و طالب 105 برضه
انا محتار جدا وعارف ان راي حضرتك صح ان السعر غالي بس المشكلة ان المستعمل كله زاد قوي الفترة الاخيرة

[mo3tazanas]

هو لاسف فعلا مفيش عربيات نضيفة فى السوق والنضيف ضارب فى السعر بس لو دة بقى امر واقع موضوع الاسعار يبقى امرك للة وانت بتقول انك بقالك شهرين بتدور ومش لاقى
بالنسبة لتسريب الزيت لو هو من كارتيرة الزيت تبقى سهلة مع العلم انة كدة اكيد مغير كارتيرة او حلها نتيجة خابطة من تحت وما اتربططش كويس بس بسيطة
بالنسبة للحساس هى هاتمشى معاك عادى بس هيقطع مرة واحدة فجاة بحيث انك هتجى تدور العربية مش هتدور
وربنا يوفق الى الخير

[mo3tazanas]

بالمناسبة انا لسة شايف عربية 2008 اتو بردو مش عايز اقولك عاملة ازاى مشرحة مخلفات حروب والفبر من جوة مكسر بتاع الصالون حتى فبر باب السائق مكسور ازاى مش عارف تحس ان مش بنى ادم اللى كان بيركب العربية حاجة معفنة وطبعا جيت افتح الكبوت كنت هااتاية من الارف قمت قافل تانى بقولة بكام قالى نهائى 85 الف وهى عايزة حوالى 25 الف مصاريف علشان تنضف