طريقه تغيير زيت الفتيس المانوال االايه 4 بالصور , موضوع حصري

[فادى محمد]

السلام عليكم ورحمه الله وبركاته..
امبارح عملت شويه صيانه في عربيه اخويا الايه 4 هحكيلكوا عليهم , المهم صورت لكم شغل تغيير زيت الفتيس ..
-كان مطلوب لقمه الانكيه او مفتاح الانكيه 17 مل لقيته ب30ج جديد وانا اكبر مقاس معايا 10 مل .. جبت مسمار الانكيه طويل راسه مقاس 17 وتنيته بالدق عليه ليصبح زاويه90 د . هحط راسه في الطبه وطرف المسمار التاني اركب فيه ماسوره علشان تبقي يد افك واعزم بيها . وده شكله..

-هنقول باسم الله ونرفع العربيه من ناحيه الشمال (امام السائق) وممكن نحمل العربيه علي اي رافعه للامان ( انا عامل تحميله خشب) هنفك الفرده الشمال
ونفك المصفحه وهي بتتفك عن طريق 2 مسمار مقاس 16 ملي اماميين و2 مشقبيه
خلفيه بنحرر المصفحه منهم
- لو بصيت من فجوه العجله ع الفتيس من الخلف هتلاقي مسمار الطبه (طبه المليء) اللي هنملي منها الزيت بعد ما ننزله من طبه التفريغ . ده مكان طبه المليء

-طبه التفريغ تحت طبه المليء بس من تحت الفتيس ( للاسف ماعرفتش اصورها) هي نفس الشكل برده وسهل ملاحظتها ..
-هنفكها بالمسمار اللي عملناه او اي الانكيه 17 ونستقبل الزيت القديم في وعاء ( انا قصيت ازازه ميه كبيره) ونسيب الزيت ينزل وعلشان نساعده هنفك طبه المليء علشان ازاحه الهواء


-بعد مالزيت القديم ينزل كله هنقفل الطبه اللي تحت ( التفريغ) وهنجيب قمع بلاستيك وخرطوم عادي 1متر ونلبسهم في بعض ونحط طرف الخرطوم في طبه المليء ونبدا نحط الزيت الجديد
الفتيس هياخد 2 لتر بالضبط انا جبت زيت تروس موبيل لزوجه 80-90 .بعد المليء ومع اول ملاحظه ان الزيت الزياده بدا ينزل من الطبه بنقفلها علطول
دي صوره الطبه وهي مفتوحه

ودي الطبه واحنا بنقفلها

طبعا الزيت القديم منظره عجيب !! شحم اسود
-بقيه الشغل للاسف ماتصورش ماكنتش عارف امسك الموبايل بالسيفتي اللي في ايدي بس هحكيلكوا عليه..
- غيرت اويل سايل عصايه الغيارات ( عندنا في الاوبل بنسميها العقربه) ولازم تكون عارف مقاسه قبل ماتفكه علشان تشتريه بالضبط . انا قيسته بالبوكليز .. الinner بتاعه كان 18 والخارجي 16 تقريبا. مجموعه الغيارات واصله في العمود اللي هنغير له الاويل سايل بصاموله 13 مل من الخلف هنفكها ونرجع المجموعه للخلف
مع ملاحظه استقامه العمود ( علشان النقلات ماتخلفش)
مفك رفيع وعوجت طرف الاويل سايل وبدات احطه عليها وانتش لبره لغايه ماتفك ( بصراحه متعب جددددا) بعد كده نظفت المكان بالبنزين ونشفته وركبت الاويل سايل الجديد لغايه ما بيت في مكانه بالضبط . رجعت مجموعه الغيارات وركبت الصاموله . وكده تمام..

- كان في مشكله في عداد السرعه ( بيهيس ) ولقيت ان ترس السرعه الحساس اللي عليه الهاوسينج بتاعه مكسور !! الترس ده مكانه اعلي الفتيس تحت مجموعه الغيارات .
فكيته بالانكيه نجمه ( مسمار واحد بس) وفكيت فيشه الحساس وخرجت الترس بره الفتيس .
نظفته كويس ولحمته بالامير ( هو عباره عن فبر) وركبته والدنيا ظبطت الحمد لله..
يارب الموضوع يعجبكم .. تقبلوا تحياتي

[omaranes77]

مشكور يا باشا علي المجهود الرائع دة

[akmm]

تجربه ممتازه ........... وشكرا لتعبك .

[master-007]

انا اسمع ان زيت الفتيس المانوال مابيتغيرش

[Karim Ibiza]

ماشاء الله ولا قوة الا بالله
الباشا خلص عربيات الأوبل ودخل على الأسكودا :)

[فادى محمد]

مشكور يا باشا علي المجهود الرائع دة

الشكر لله ياباشا..

تجربه ممتازه ........... وشكرا لتعبك .

ده من زوقك..

انا اسمع ان زيت الفتيس المانوال
مابيتغيرش

بيتغير لانه زي اي زيت بيتعرض للاحتراق وبيفقد خواصه وبيبقي مليان شوائب معدنيه
حضرتك لو شفت منظر الزيت واعتقد باين في الصور هتعرف ان تغييره واجب كل 60 الف كم
والعربيه فعلا عامله 62 الف كم بالضبط..

ماشاء الله ولا قوة الا بالله
الباشا خلص عربيات الأوبل ودخل على الأسكودا :)

كيمو .حبيب قلبي...
تسلم ياباشا..

[J A G U A R]

تقرير ممتاز .. وشكرا على المجهود

[Moratoz]

ما شاء الله دائماً يا فادي بك مواضيعك مميزه دائماً
تحياتي

[mo7a_mo7a]

تجربه ممتازه

[طارق _عبد السلام]

رااااااااااااائع يافادى بك
ماشاء الله

[amr elsisi]

بسم الله ماشاء الله
شغل علي مية بيضاء
ربنا يبارك ويرزقكم خيرها ويكفيكم شرها
موضوع تغير الزيت انا بعاني مع بعض الاصدقاء والاغلبية تقول لايتغير
بس الصح طبعا اخي الكريم هوا التغيير

[MaaM]

الله ينور عليك ياريس ربنا يباركلك يا فادي ، بس مش من المفترض انك حصري للأوبل !
وجامدة حكاية المسمار ديه ، يعجبني أوي الناس اللي تشغل دماغها وتتعامل

وبالمناسبة طالما اخوك معاه اسكودا ، ايه اخبارها مقارنة بالفيكترا ، يعني لو فضيت في أي وقت كدا ابقى اعملنا مقارنة

[فادى محمد]

الله ينور عليك ياريس ربنا يباركلك يا فادي ، بس مش من المفترض انك حصري للأوبل !
وجامدة حكاية المسمار ديه ، يعجبني أوي الناس اللي تشغل دماغها وتتعامل

وبالمناسبة طالما اخوك معاه اسكودا ، ايه اخبارها مقارنة بالفيكترا ، يعني لو فضيت في أي وقت كدا ابقى اعملنا مقارنة

ربنا يكرمك يا محمود..
انت عارف ان اخوك غاوي
دعبسه مابتفرقش معايا بقي
الماركات
- تسارع الاوكتافيا احسن بالرغم من ان الموتورين سنجل كام .
-طبعا الاوكتافيا اوسع وبالذات الشنطه !
-استهلاك البنزين واحد تقريبا .
-الاوكتفيا تكييفها كويس جدا بس مروحه البلاور عندها هبل
سريعه جدا وصوتها عالي
-سعر اعاده البيع لصالح الاوكتافيا
-الفيكترا فرامل احسن كتير
-العفشه لصالح الفيكترا . انعم كتير جدا . تحس في الايه 4 انك راكب ربع نقل.
هي ماشاء الله قويه بس مش مريحه .
تكنولوجيا الموتور في الفيكترا اقل من الايه4 ولذلك الاعطال قليله , انما في الايه 4
الدنيا كبيره قوي رشاشات وحساسات من كل صنف ونوع.
-في حاجات ماعجبتنيش في الايه 4 . ان جزء كبير من شجره الميه فيها معدن , طبعا
بتضرب صدا . ليه مش خراطيم مش عارف؟ - مكان فلتر التكييف سيء جدا وبيدخل ميه
للدواسه الداخليه - العفشه الخلفيه تحس انها مختصره جدا ( ملمومه) - الداشبوارد فقير
العزل في الفيكترا احسن كتير من الايه 4 . دي مجرد افكار من خلال تجربتي للعربيتين
وتقبلوا تحياتي واحترامي...

[EngAhmedSayed]

بص انا مش عجيبنى فى الحوار كله غير موضوع المسمار المتنى اللى بتعمله الانكية فكرة جميلة جداااا
هما دول المصريين
اللى رشو الهوا دوكو و قبل ما يرشو الهوا سحبوه ه ه ه ه سكينة معجون
بالتوفيق ان شاء الله

و تقرير ممتاز

[بيشوى_رمزى]

برنسسسسسسسسسسسسسسسسسسسسسسسسسسسسسسسسسسسسسسسسسسسسسسس سسسسسسسسسسسسسسسسسسسسسسسسسسسسسسسسسسسسسسسسسسسسسسسسسس سسسسسسسسسسسسسسسسسسسسسسسسسس

تسلم ايدك و دماغك يا فادى باشا :)