العربيه سخنت وانا على الطريق وانا واقف دلوقتى

[eltamboly]

السلام عليكم
انا كنت مسافر انهارده والعربيه تمام والحراره تمام
الجو حر قولت اشغل التكييف , شويه ولاقيت الحراره بترفع والعربيه عماله تدى انزار و لمبه مثلث عماله تنور
فروحت واقف ومبطل العربيه لغايه ماشوف فيها ايه ومش عارف اعمل ايه دلوقتى
ياريت حد يقولى ايه اللى خلى العربيه تسخن اول ماشغلت التكييف والصفاره دى ايه
واعمل ايه استنى لما تبرد خالص واشوف الميه ولا اعمل ايه
مع العلم مفيش ميه تحتها خالص العربيه اسكودا a4 2002 اوتوماتيك تكيف تاتش

[mado83]

استنى العربيه تهدا وافتح شوف فيها ميه ولا لا
واتأكد ان المروحه بتشتغل ولا لا

[misho2008]

المراوح مش شغالة اطفى التكييف وامشى بالعربية وبعدين اكشف على المراوح

[eltamboly]

شكرا ياشباب انا استنيت لما بردت ولقيت القربه فاضيه زودتها ودورت الحراره ثابته على النص
بس المراوح مش شغاله
هامشى 5 دقايق كدا وانزل اشوف المراوح تانى
وربنا يستر

[DarkMagician]

كوعة الترموستات اتاكد انها سليمة
مشكلة شهيرة في ال a4 والكوعة بتعمل حوالى
700 في التوكيل

[EngAhmedSayed]

سيادتك
لما تزود مياه زود عند نص القربة بالظبط
علشان لما بتتملى للاخر مبتخليش المياة بتتقلب
و لما تيجى تزود لازم الموتور يكون بارد علشان المياة متقعدش تضرب خارج القربة
وربنا يستر طريقك

[م أحمد]

بعد ما تخلص مشكلتك غير المياه ب cooler

[eltamboly]

شكرا ياباشا انا مليتها للنص علشان تقلب الميه
هيا الحراره اتظبطت كدا ومبتعلاش وانا ماشى بقالى حوالى 50 كيلو وربنا يستر انا اول ماوصل هاروح للمكانيكى بتاعى يكشف على الشجره وش السلندر والتكييف
وربنا يسهلها يارب

[mido102]

الله يكوت في عونك ان شاء الله خير ايه مياه كولر دي اللي هيا مياه حمرا يعني

[Moratoz]

حاجة صغيرة قبل ما تروح للميكانيكي شوف فيوزات المروحة

[Amr_Azab]

حاجة صغيرة قبل ما تروح للميكانيكي شوف فيوزات المروحة

+111
اتأكد من فيوزات المروحة أول حاجة
التبريد عبارة عن هوا و مياه
لما بيحصل عطل في احدهما الدنيا بتتبرجل والموتور لازم يسخن

[mo7a_mo7a]

حاجة صغيرة قبل ما تروح للميكانيكي شوف فيوزات المروحة

100%

اجراء سليم

[eltamboly]

الف شكر ليكو كلكو على المساعده وده المعهود من قسم اسكودا
فعلا طلع فيوز المروحه ضارب وغيرته الحمد لله والمروحه اشتغلت
وهاغير الميه انهارده انشاء الله

شكرا ليكم جميعا ومتحرمش منكم يارب