حرارة زيت الفتيس والنتشه..

[snakeson2]

السلام عليكم ..
عندي مشكله ارجوا من الساده إعطاء خبراتهم فيها .
انا شاري العربيه فيها عيب انها بتنتش والتوكيل قال بدي فالف ، المهم الي انا شاري منه العربيه قال انه غير زيت في التوكيل ، تقريبا من لما اشتريتها مواجهتش مشكله النتش الا مرات معدوده ، اعتقد اغلبها والتكييف مش شغال . طول مالتكييف شغال الفتيس مبنتش خالص ، ولو بطلتوا بتظهر ، ولو مشيت وضع مانوال مبيحصلش نتش خالص .
هل المشكله في البادي فالف ولا درجه حراره زيت الفتيس لما بتعلي ؟ مع العلم ان صاحب العربيه لما باعهالي خصم تمن الفتيس جديد ..
أغير زيت تاني ؟
هل أغير زيت في التوكيل ولا بره ؟
مافيش اي اخطاء عال كمبيوتر .
هل فيه جزء مسؤل عن تبريد زيت الفتيس هوا الي فيه مشكله ؟
ارجوا ألمساعده
العربيه ماشيه ٩٥ الف والفتيس ست سرعات ستبترونك اودي اي ثري . موديل ٢٠٠٧

[Moratoz]

مشكله الفتيس ان النتشه دي بتبدي تظهر مع زيادة الأجهاد علي الفتيس وسخونته وبالتالي نتيجه وجود شوائب بالزيت ورايش الفتيس بينش وفي المراحل اللاحقة بيرزع سواء عند الصعوج بغيار الفتيس الي النقله الثالث ألأكقر شيوعا او عند تخفيض السرعات من النقله الأعلي الي الثالثه .
ولو لسه مفيش ترزيع ممكن حضرتك تبتدي تعمل غسيل للبدي فلف وتغبر ففلتر الزيت امع تغيير الزيت لزيت تجربه ( فيبي او etg ) وتشوف لو الموضوع اتحل يبقي تروح وتغير الزيت تاني بعد 5000 ك للزيت الأصلي أن أمكن

[snakeson2]

شكرًا لسرعه الرد ، هوا مافيش رزع خالص ، طيب هوا مين افضل حد بيعمل غسيل عقل ! وهل تغييره افضل واجيبه من عند مين ولا من بره؟
انا سالت واحد قال الغسيل مالهوش لازمه !! وقال حرام تفتح الفتيس ! مش هيرجع زي الاول !
وهل حضرتك شايف اروح التوكيل واعمل مشكله ؟
الي محيرني ان النتشه مبتظهرش خالص مع التكييف ..

[الكنج الذهبى]

السلام عليكم
اولا اذا كان هناك مشكله فى البالف فهى يجب ان تكون فى المانوال والاوتوماتك
لأن فى كلى الامرين فان السلونايت واحد والسلونايت ده هو الجهاز الصغير الكهربى الى موجود داخل علبه البلوف وهو الى بيضخ الزيت داخل خانه الغيار
الغسيل وهو خسيل الفتيس بزيت رخيص مش الزيت الأصلى وافضل زيت موبل 320 وده موجود فى اى محطه موبل بسعر 55 للتر حتحط 4.5 لتر زيت وتنزله كمان 800 ك كده وتشوف
اذا قلت النتشه يبقى عيب رايش هو الى بيسد السلونايت ومبيضخش الزيت بالقدر الكافى للنقل مما يؤدى لحدوث النتشه
اما لو النتشه لسه مستمره فممكن ان يكون المشكله فى طرمبه الزيت وهى مشكله لا تظهر على الكمبيوتر وده لان الطرمبه بتكون شغاله بس ضعيفه وده برده بيؤدى الى عدم وصول الزيت بشكل سليم الى علبه البلوف

انا بتكلم عن مشكله شخصيه ليه
وعاوز اقلق على حاجه متوصلش الفتيس لحاله الرزع ...... يعنى لو متمشيش بيها لغايه متصلحها يكون افضل

[snakeson2]

شكرًا لتجاوبك في الموضوع ، ممكن حضرتك تقولي اعراض مشكله طرمبه الزيت ايه ؟
وهل فيه جزء مخصوص لتبريده ! دوره تبريد مثلا ، هل من الممكن انه يكون فيها مشكله بتخلي الفتيس من غير مشاكل طول مالتكيف شغال ؟

[الكنج الذهبى]

اعراض مشكله الطرومبه هو عدم وصول الزيت بشكل سليم داخل علبه البلوف مما يؤدى الى نتشه ثم رزع
وده سبب من ضمن اسباب لنفس العرض
يعنى مش شرط يكون الى عندك ضعف طرمبه الزيت ولكن حطها من ضمن الاحتمالات
وبالنسبه لدوره التبريد الفتيس فهى عباره عن مبرد فتيس وبيقع بالجانب الايمن على الفتيس
وهو اسطوانى الشكل ويقوم الزيت بالمرور من خلاله فى الوقت الذى يمرر ميه من قربه الماء منه
الامر الذى يؤدى لتبريد المياه للزيت
اى ان فى العربيه الاوكتافيا يشترك تبريد الموتور وتبريد الفتيس من قربه المياه
وفى اسوأ ظروف تلف المبرد فان المبرد يدخل الزيت على الماء وهو ما يعرف مهنياً ( بتطحين القربه)
اى ان المياه تشبه الطحينه وذلك لوصول زيت الفتيس الى قربه المياه
تبريد الفتيس ليس له علاقه بالتكيف من قريب او بعيد
طيب واحتياطا اذا كنت تشك فى سخونه الزيت فعندما تسمع النتشه انظر الى قربه المياه فاذا وجتها شديده السخونه وسخونتها غير طبيعيه فان الزيت يكون ساخن
النتشه بعيده كل البعد عن حراره الزيت فالنتشه هى ان الزيت لم يضخ بشكل جيد وهو من عده عوامل
تلف احد السلونيت داخل علبه البلوف
وجود مشاكل فى طرومبه الزيت
وجود شوائب تمن سريان الزيت بشكل سليم
فهى كلها عوامل تبين عدم سريان الزيت بشكل سليم فيمتنع الزيت عن السريان لأحد الاسباب ثم يدخل مره واحده نتيجه الضغط وهو ما يؤدى الى حدوث نتشه

[snakeson2]

شكرًا علي الشرح الوافي ، ان شاء الله هروح التوكيل واكشف .. طيب اذا كانت المشكله في البادي فالف هل يتم إصلاحه ام شراء جديد ؟
احد الأصدقاء قالي فيه واحد في الحرفين اسمه الشيخ احمد بيعمل طقم إصلاح ب٣٠٠٠ جنيه ومعاه ضمان ٦٠الف كيلو .
هل فعلا ده حل ولا مجرد حل موضعي وبترجع المشكله تاني ؟
انا خائف من موضوع فتح الفتيس ده

[الكنج الذهبى]

لا شكر على واجب
بص حضرتك انت ممكن تروح التوكيل وسيقوم بالكشف على الفتيس ( مش كشف كمبيوتر بس ) عشان فيه مشاكل لا تظهر على الكمبيوتر مثل ضعف الطرمبه مثلا فهى تعمل ولذلك الكمبيوتر لم يسجلها كعطل
انت تشرح الى بيحصل معاك بالظبط وهما يكشفى على علبه البلوف (البادى فالف)
ممكن يطلع العيب من سلونيت معين وبكده ممكن يغيروه وهو تمنه بره من 350 إلى 500 انما فى التوكيل معرفش الصراحه
وبالنسبه لطقم اصلاح البادى فالف فأنا أنصح لو فيه اكثر من سلونيت غير سليم فأنا انصحك بتغير علبه البلوف كلها وهى تمنها فى الحرفين من 4000 إلى 6000 فممكن اذا كان اكثر من سلونيت فاسد فان العيب من فيش الكهرباء وشبكه السلوك من البادى نفسه وفى هذه الحاله فان تغيير العلبه كلها افضل حتى لا تتكرر المشكله.
أما عن سؤالك ان هذه حل موضوعى ولا لا فحب اطمنك انه حل سليم جدا شرط ضمان قطع الغيار نفسها
وعن فتح الفتيس فحب اطمنك انه لن يفتح وده لأن علبه البلوف بعد كرتيره زيت الفتيس بالظبط اى انه اذا فتح الكرتيره سيجدها أما الفتيس نفسه من كلتشات وورق لن يأتى ناحيته
بس اهم حاجه متتأخرش فى التصليح عشان الفتيس ميتأسرش ويتلف لا قدر الله
وبالتوفيق ان شاء الله
ملحوظه جميع الاسعار الوارده اسعار قطع غيار استعمال خارج وليست جديده

[snakeson2]

تسلم ياكنج علي اهتمامك وتجاوبك مع المشكله ، ان شاء الله هكتب لك النتيجة بعد الكشف

[snakeson2]

تم حل المشكله بعد معاناه ١٤ساعه في الحرفيين .. ان شاء الله هعمل موضوع بالتجربة عشان الأعضاء يستفيدوا

[الكنج الذهبى]

طب الحمد لله .......
مستنين الموضوع إن شاء الله

[m07mad]

تم حل المشكله بعد معاناه ١٤ساعه في الحرفيين .. ان شاء الله هعمل موضوع بالتجربة عشان الأعضاء يستفيدوا

يا ريت

[Omar30020]

تم حل المشكله بعد معاناه ١٤ساعه في الحرفيين .. ان شاء الله هعمل موضوع بالتجربة عشان الأعضاء يستفيدوا

ممكن نشرحلنا عملت ايه عشان عندى نفس المشكلة و صفحتها فين