اغيثوناااااااااا

[tarekrik]

السلام عليكم و رحمه الله و بركاته
انا عندي سيارة a4 المياه بتنقص جامد بعد 20 كيلو
1- رحت لميكانيكي وقال لازم نغير كوعة وش السلندر وغيرتها ونفس النتيجه
2- رحت لواحد تاني قال لي في ثقب بالبوابة رحت لحمته و نفس النتيجة
3- رحت لواحد تالت قال لي ممكن نلغي السخن بتاع التكيف علشان هو اللي عامل مشكله ولاغاه ونفس النتيجة
بالله عليكم اغيثوني لحسن انا زهت من العربية و الماكينكيه والمصاريف الكتيرة
ارجوكم الافادة
واسف علي الاطاله

[hamo81]

رأيي يا باشا توصل للتوكيل يكشف عليها بالكمبيوتر ويقولك فيها إيه بالظبط وشوف التكلفة بكام ولو لقيتها غالية شوف بره التوكيل هتكلف قد إيه
المهم إنك تعرف المشكلة فين بالظبط أحسن من العذاب بتاع الصنايعية وكل واحد بفتواه

[tareksakr]

الحل بسيط حضرتك هتروح لصنايعي او ورشة متخصصة في الرادياتير هيكبس دورة التبريد وهيقولك التسريب منين
ولو ما تعرفش حد انا اعرف واحد ممتاز جدا في العجوزة لو احتجت قوللي واديلك رقمه

[omaranes77]

براحة بس يا باشا
حضرتك لو بتحط مياة عادية يبقي الخؤاطيم اتاكلت وبتسرب
حضرتك روح للمهندس خالد في الحي العاشر مهندس كان في التوكيل راجل فاهم اوي ومحترم روحلوا وهيجبلك من الاخر

[ahmed salah90]

لازم تكبس دوره التبريد

[tarekrik]

الف شكر لاهتمامكم
بجد انتم اعضاء اتشرفت بمعرفتكم

[tarekrik]

الحل بسيط حضرتك هتروح لصنايعي او ورشة متخصصة في الرادياتير هيكبس دورة التبريد وهيقولك التسريب منين
ولو ما تعرفش حد انا اعرف واحد ممتاز جدا في العجوزة لو احتجت قوللي واديلك رقمه

ممكن رقم التليفون و العنوان

[ayman2]

براحة بس يا باشا
حضرتك لو بتحط مياة عادية يبقي الخؤاطيم اتاكلت وبتسرب
حضرتك روح للمهندس خالد في الحي العاشر مهندس كان في التوكيل راجل فاهم اوي ومحترم روحلوا وهيجبلك من الاخر

+1
حى الواحه - مدينه نصر وده انسب الحلول

[aminyassien]

عندك المهندس خالد فى الحى العاشر و ده بيتقى ربنا فى شغله
و عندك محمد اصلان فى الحى السابع و ده الصنايعيه اللى عنده فاهمين كويس جدا
انا عن نفسي بتعامل معاهم و نفسيا مستريح لشغلهم

[mahmoudysf]

الحل بسيط حضرتك هتروح لصنايعي او ورشة متخصصة في الرادياتير هيكبس دورة التبريد وهيقولك التسريب منين
ولو ما تعرفش حد انا اعرف واحد ممتاز جدا في العجوزة لو احتجت قوللي واديلك رقمه

ممكن عنوانه يا باشا....وهل هو بتاع رادياتير ولا ميكانيكي..
لان عندي نفس المشكلة....والعجوزة قريبة مني.

[tarekrik]

انا رحت التوكيل مركز الاقصي بالمعادي و ضغط المياه و كشف علي دورة المياه و قال لي ان الريداتير فيه ثقوب و لازم يتغير وسعرة بالضريبة و المصنعية 1500 جنيه والكشف علي العربية بسعر 130 جنيه فطلبت من المهندس انه يقفل العربية و هارجعلو مرة تانية و رحت صقر قريش و غيرت الريداتير بأخر استيراد حالة ممتازة بالتركيب 700 جنيه والميكانيكي وهو بيقفل السيارة وجد عك جامد في تقفيل العربية وعدم تركيب الخراطيم في مكانها وظبط السيارة وقال لي الصنايعية اللي في التوكيل مش كويسيين

[RAMY.ALI]

تابع مستوى المياة الفترة القادمة علشان تتاكد ان مفيش تسريب وبفضل تغير الى مياة حمراء من نوع نضيف g12 بعد التاكد ان مفيش تسريب علشان تحمى مبرددات الماتور والفتيس مع انى كنت افضل ريداتير جديد لان الحاجات الاستراد بيبقى فيها نسبة صدا كبيرة