عاجل جداً يا شباب .. نازل أشتري a5 بكرة من السوق و في مشكلة

[Abd El Latif]

صباح الخير عليكوا

أنا كنت بقالي فترة كبيرة بأدور في أفضل عربية في فئتي السعرية و الحمد لله إستقريت ع الأوكتافيا

و نازل يكرة الصبح إن شاء الله أجيب واحدة علشان أسافر مع العائلة بيها نزور قرايبنا و كده

كل سنة و أنتوا طيبين

المشكلة دلوقتي إني مش عارف مركز صيانة كويس يكون فاتح بكرة علشان متخوف من مشاكل الفتيس

أنا معايا حوالي 110 ~ 115 .. و برضه كنت عاوز أعرف آرائكم و نصائح ما قبل الشراء

و المبلغ ده يجيبلي a5 موديل كام

أنا عاوزها إليجانس ( الهاي لاين )

بس أهم ئي دلوقتي لو حد يعرف يدلني على ورشة محترمة بكرة تطمني علشان ده مبلغ مش قليل

و مش عاوز يتضحك عليا

شكرا مقدماً

[hardmind_doc]

نصيحة بلاش الاستعجال وبلاش السوق .. بس ان كان ولا بد خد معاك حد فاهم اوى علشان السوق فيه محترفين النصب كلهم
وبالنسبة للكشف بنزينة كالتكس اللى ف اول عباس بتدى فكرة مبدئية عن حالة العفشة والميكانيكا
وان شاء الله ربنا يوفقك

[Abd El Latif]

ماهو للأسف أنا مستعجل

بس الحمد لله مش هأتدلق يعني .. أنا مش لاقي الفلوس في الأرض

المشكلة إن مش هيبقى معايا حد

أنا هأبص كنظرة مبدئية كده بس و لو عجبتني هاخدها على ورشة متخصصة يشوفوها

و لو تمام هأخلص

المشكلة في الورشة المتخصصة دي بقى

[طارق _عبد السلام]

على مهلك ودور بتأنى .. وحاول تشترى من ركيب وخلى التاجر اخر حاجه المبلغ يجيب 2006 هاى لاين

وربنا يدلك على الخير

[Abd El Latif]

طيب لو حاجة موديل 2008 ؟؟

هاي لاين

أتكلم في كام ؟

طبعاً تكون حالة كويسة

و أنا فعلاً هأتفادى التجار .. منظرهم بيبقى باين و كلامهم ملزق من كتر السكر :d

[blazer]

بلاش تشترى دلوقتى خالص,, مفيش حد هيبيع عربيه نضيفه ليله العيد هتلاقى كل الى معاه عربيه شمال وعاوز يخلص منها نازل السوق بيدور على واحد عاوز يعيد بعربيه جديده

لو محتاج عربيه ضرورى أجر عربيه بالفين جنيه ولا حاجه

[Abd El Latif]

بلاش تشترى دلوقتى خالص,, مفيش حد هيبيع عربيه نضيفه ليله العيد هتلاقى كل الى معاه عربيه شمال وعاوز يخلص منها نازل السوق بيدور على واحد عاوز يعيد بعربيه جديده

لو محتاج عربيه ضرورى أجر عربيه بالفين جنيه ولا حاجه

كلام موزون .. بس أهه أنا مش هأخسر حاجة لما أبص

لعل و عسى

و لو ملقتش مش هأجيب

أنا فعلاً مزنوق بس لو في حاجة معجبتنيش

يفتح الله

ماله القطر :)

المبلغ يجيب 2006 هاى لاين

هو أنا كنت سمعت إن 2005-6-7 فيهم مشاكل في الفتيس فكنت منمر على 2008 صراحة

ولا أنت شايف إيه ؟

[طارق _عبد السلام]

2008 هاى لاين من 125 بتوصل 130 للحالات الشاذه

[طارق _عبد السلام]

مفيش حاجه اسمها مشكله فتيس كلهم فتيس واحد اهمال الصيانه بيدمر انضف فتيس

المشكله كانت كمبروسور الهواء بس فى 2005 و 2006 وبيضرب بردوا سوء استخدام

[Abd El Latif]

لا أنا كده تهت

المشكلة اللي كنت أعرفها حوار الـ dsg

و الفالفات اللي بتبوظ الفتيس إذا ما إتعالجتش

و أعرف إن المشكلة دي إتعالجت في 2008 و علشان كده كنت منمر على الموديل ده

صححلي معلوماتي بقى زي ما لخبطها بقى :)

أنا كده إتوترت

[طارق _عبد السلام]

مفيش dsg فى الايه فايف

حتى 2013 ونزل من 2013 دفعه دى اس جى وكانت فئه واحده بس

يعنى من 2005 الى 2013 فتيس ستيب ترونيك بيتعمل له صيانه تغيير زيت وفلتر كل 60 الف كيلو ولو معملش الصيانه بينتش وبيجيب عقل فتيس مع الاهمال الشديد وبيتصلح بردوا دلوقتى عادى

[Abd El Latif]

مفيش dsg فى الايه فايف

حتى 2013 ونزل من 2013 دفعه دى اس جى وكانت فئه واحده بس

يعنى من 2005 الى 2013 فتيس ستيب ترونيك بيتعمل له صيانه تغيير زيت وفلتر كل 60 الف كيلو ولو معملش الصيانه بينتش وبيجيب عقل فتيس مع الاهمال الشديد وبيتصلح بردوا دلوقتى عادى

طمنتني

شكراً ليك جداً يا فندم

هل ممكن حضرتك ـ لو عارف ـ تدلني على ورشة حلوة تطلعلي تقرير مفصل

لأني قريت هنا شكاوي كتير من التوكيل

كنت فاكر إسم ورشة في صقر قريش بس الإسم مش في بالي دلوقتي فمش عارف أجيب الأرقام

[Mamoud salah H]

بنزينة كالتكس خلف السراج موول بتكشف بالتفصييل وتقرير مكتوب بحالة العربية والفتيس وكل حاجة

[طارق _عبد السلام]

كنت اتمنى اخدمك بس انا مش من القاهره

ان شاء الله الاخوه بمجرد مايشوفوا موضوعك محدش هيتأخر فى النصيحه السليمه

وبالتوفيق ان شاء الله

[Abd El Latif]

شكراً يا شباب

إدعولنا بالستر و القوامة

علشان بكرة صيام فوق كل ده