استفسار عن الرابيد سيدان

[Ahmedzafer]

سلام عليكم
أنا بفكر اشتري الرابير سيدان اليجانس بس مش مستريح مع قصة ان مافيش usb ولا aux ، كنت عايز اعرف ممكن اشغل أغاني عن طريق البلوتوث و لا ايه و لو ماينفعش ايه هي البدائل لسماع أغاني

[eng_amg]

هو أكيد لازم وحتما ولابد تلاقي بدائل...
بس هو دا فعلا إلي مخليك متردد فيها وحيخليك تاخد قرار؟

[M.Elwan]

سلام عليكم
أنا بفكر اشتري الرابير سيدان اليجانس بس مش مستريح مع قصة ان مافيش usb ولا aux ، كنت عايز اعرف ممكن اشغل أغاني عن طريق البلوتوث و لا ايه و لو ماينفعش ايه هي البدائل لسماع أغاني

لو فيها بلوتوث يبقي اكيد ينفع bluetooth audio stream
بس اتاكد ان فيها بلوتوث

لو مفيهاش ممكن تشوف التوليدو الهاي اللاين اعتقد ان فيها
لان حرام تدفع ١٦٠ الف في عربيه وتبقي مضايق وانتا راكبها مش عارف تشغل حاجه تسمعها ولا توصل تليفونك

[Ahmedzafer]

هي فيها بلوتوث بس للمكالمات فقط أنا سألت النهاردة في الوكيل و قالي كده فعلا حاجة غريبة جدا .. المشكلة ان العربية عاجبني جدا بس موضوع الكاسيت بيفرق معايا .. و بالنسبة للسيات اعتقد السكودا أحسن بكتير

[M.Elwan]

هي فيها بلوتوث بس للمكالمات فقط أنا سألت النهاردة في الوكيل و قالي كده فعلا حاجة غريبة جدا .. المشكلة ان العربية عاجبني جدا بس موضوع الكاسيت بيفرق معايا .. و بالنسبة للسيات اعتقد السكودا أحسن بكتير

دي محتاج تسال حد من ملاكها احتمال يكون ليها تعديل عشان وصله aux او usb

بالنسبه للمقارنه بينها وبين التوليدو فدي اصعب مقارنه حتلاقيها علي النت محدش وصل انهو احسن من التانيه نظرا لان العربيتين مشتركين في كل حاجه تقريبا ولو ان اخر review قريته قايلين ان فيه تخفيض نزل علي التوليدو وسعرها الجديد اداها ميزه تنافسيه علي الرابيد
عن نفسي بفضل شكل interior بتاع الرابيد عن التوليدو
وبفضل مقدمه الرابيد شكلها قريب من الاوكتافيا جدا
ومن الخلف رايي ان ظهر التوليدو شكله ااحدث من ظهر الرابيد والفوانيس الخلفيه للتوليدو شكلها مختلف

[goyamasta]

بالنسبة لموضوع التوليدو و الرابيد خلينى اقولك المفيد و الخلاصة و القرار ليك فى الاخر.

العربيتين نفس المكنة و نفس الفتيس و الشكل متقارب جدااااا من الجنب لكن مختلفين من الامام و الخلف. موضوع الشكل ده ازواق بصراحة بس التوليدو شكلها رياضى اكتر و ضهرها احلى بكتير من الرابيد. خلاف كدة انوار التابلوه فى التوليدو احمر فيديلك احساس رياضى اكتر من الاخضر فى الرابيد. و فى الاخر ديه مسألة ازواق زى ما قلت

بالنسبة للتصنيع, الاتنين خارجين من نفس المصنع فى سلوفاكيا. فالعربيتين المانى تشيكى

بالنسبة للوسع و الصالون, العربيتين زى بعض بالضبط و الشنطة 550 لتر فى الاتنين ماعدا الرابيد السبيس باك شنطتها 410 لتر و صالونها اضيق شوية عن السيدان

بالنسبة للكماليات بقى, الرابيد للأسف بتنزل بعوامل امان على حسب الفئة. يعنى الفئة الاولى فيها 1 ايرباج بس و التانية فيها 2 و نفس الكلام فى السبيس باك. و الموضوع ده مؤثر جدااا خصوصا فى السبيس باك الفئة الاولى اللى بينقصها عوامل امان كتيير جداً مش موجودة غير فى الفئة التانية و التالتة. لكن التوليدو عوامل الامان فيها ثابتة فى جمييييع الفئات. يعنى جبت فئة اولى زى الهاى لاين بالضبط. بالاضافة ان التوليدو العربية الوحيدة فى فئتها اللى بتنزل ب 4 ايرباج و فيها ASR فى كل الفئات.
نقطة كمان الرابيد فئة اولى بتنزل من غير طارة مالتى. لكن توليدو الطارة المالتى معاك فى كل الفئات

بالنسبة للجنوط, الرابيد بتنزل بجنط 15 بس و ده بداية من الفئة التانية و انت طالع. التوليدو معاك جنط 16 او 17 على حسب الفئة. و جنط ال 16 فى التوليدو شكله مقارب للى موجود فى الاوكتافيا

بالنسبة بقى للسعر التوليدو بعد العرض ارخص من الرابيد 10 الاف جنيه. تخيل بقى!! يعنى كماليات اكتر و امان اكتر و سعر ارخص.

العيب الوحيد فى التوليدو هو عدم الانتشار مقابل الرابيد. بس اعتقادى الشخصى ان التوليدو بقى ليها جمهور الحمد لله دلوقتى عن زمان و الناس عرفتها اكتر و هيكون فيه كلام تانى السنة الجاية ان شاء الله

لو حضرتك حابب تعرف اكتر عن التوليدو و الرابيد انصحك بالانضمام للجروبات بتاعتهم على ال facebook و ده اسم جروب توليدو SEAT TOLEDO Owners-EGY

اتمنى اكون افدت حضرتك و ربنا ييسرلك اللى فيه خير :)

[goyamasta]

بخصوص ال AUX و ال USB و ال Bluetooth فى التوليدو فئة اولى و تانية فيها AUX فقط.. ال USB و ال Bluetooth موجودين فى الهاى لاين فقط.. الهاى لاين فى التوليدو حالياً بعض العرض ب 153 الف و بتنزل بتكييف تاتش و ازاز فاميه و حنوط 16. و ال Bluetooth بيشتغل مكالمات و اغانى و كل حاجة

[Ahmedzafer]

بصراحة انا ابديت اقتنع بالسيات روحت النهاردة اشوفها سألت في معرض في القطامية اسمه محمد زكي عندو سيات بس بيقول التوليدو مسحوبة من السوق و هتنزل في أخر أغسطس موديل ٢٠١٦ و مش عارف أسعارها هتبقي ايه .. و شوفت هناك الليون عربية ممتازة جدا بفكر فيها بردو ب ١٦٥ الف و فيها حاجات كتيرة و منتشرة عن التوليدو جدا

[goyamasta]

بصراحة انا ابديت اقتنع بالسيات روحت النهاردة اشوفها سألت في معرض في القطامية اسمه محمد زكي عندو سيات بس بيقول التوليدو مسحوبة من السوق و هتنزل في أخر أغسطس موديل ٢٠١٦ و مش عارف أسعارها هتبقي ايه .. و شوفت هناك الليون عربية ممتازة جدا بفكر فيها بردو ب ١٦٥ الف و فيها حاجات كتيرة و منتشرة عن التوليدو جدا

الليون من العربيات المحترمة القليلة فى السوق. بس احب احذرك من حاجتين مهمين. اولاً فتيس الليون dsg و فيه ناس ظهر معاها مشاكل منه و هو غير أمن بالمرة و غير مناسب لظروف طرق مصر اللى بيغلب عليها الحر و الزحمة. يعنى من الاخر لو هتمشى كتير جوة المدينة هتحتاج تتعامل معاه بحرص شديد. ثانياً الليون فيها تربو و محتاجة بنزين 95 علشان تحافظ على عمر الموتور. ميزة التوليدو انها فتيس عادى تيب ترونيك 6 نقلات و بنزين 92 و شكل قريب جدا من الليون

[Ahmedzafer]

بس أنا سمعت ان مشاكل الفتيس انتهت من ٢٠١٢ و البنزين انا شفت علي التانك مكتوب ٩٢

[atef_5005]

بس أنا سمعت ان مشاكل الفتيس انتهت من ٢٠١٢ و البنزين انا شفت علي التانك مكتوب ٩٢

اللنزين عادي 92 تشتغل لكن الفتيس مشاكله لم تنتهي في اكتر من عربيه جابت فتيس و موديل 2014 منهم العضو inspiron باسات تربو الجديده

[atef_5005]

http://www.nilemotors.net/Nile/466223-dsg.html

[atef_5005]

و الافضل تجيب فنتازيا 2013 كسر زيرو عداد 25 او 30 الف افضل بكتير من كل العربيات دي
اتا عارف ان الزيرو حاجه تانيه بس فعلا لو لقيت الفنتازيا 2013 كسر زيرو كانها زيرو بظبط و عد بقي الاوبشنز و الثبات و البرستيج

[Ahmedzafer]

انا صعب جدا اجيب غير الزيرو يا ريت لو في عربيات تاني في حدود ١٧٠ و تكون ألماني .. التوليدو جميلة بس مش موجودة حاليا في البلد كلها و قطع غيار هتكون صعبة جدا

[M.Elwan]

انا صعب جدا اجيب غير الزيرو يا ريت لو في عربيات تاني في حدود ١٧٠ و تكون ألماني .. التوليدو جميلة بس مش موجودة حاليا في البلد كلها و قطع غيار هتكون صعبة جدا

انا مش فاهم توكيل كيان بيعمل ايه .. العربيه الوحيده عنده اللي عليها طلب اختفت من السوق
ممكن تعلي شويه وتشوف الاوبل استرا لو بتدور علي الماني هي المفروض دلوقتي بقت ب١٧٦