أوكتافيا a5 في مواجهة منافسيها

[Ahmed15]

بعد رحله بحث طويلة عن السيارة المناسبة اخترت أوكتافيا A5 ... لماذا ؟

مميزات A5

• متانة ، تحتاجها كثيرا مع زيادة الازدحام و توتر قائدي السيارات
• فخامة ، تعطيك ابتهاج و راحة نفسية و ثقة في الاختيار
• جودة ، تزيد من اعتمادية السيارة و تقلل وقت و تكاليف الصيانة
• اتساع ، خاصة للاستخدامات العائلية و الرحلات و راحة مرافقيك
• شنطة عملية جدا ، حيث تتسع ل 560 لتر مع فتحة واسعة لسهولة التعامل مع المحتويات
• عفشه قوية: ضرورة بيئية في بلادنا
• قطع غيار ، متوفرة جدا في كل مكان و بأسعار معقولة بالنسبة لهذه الفئة
• انتشار: معظم الناس يبحث عن الانتشار كعلامة للجودة و توافر قطع الغيار و سهولة البيع و القليل يفضل السيارة النادرة ليكون متميزا و لكن الثمن غالي و لا أحبذ أن يتميز الانسان بأشياء تشترى
• اعادة البيع ، سهل نوعا و بأقل خسارة
• كماليات ، جميلة

العيوب

• التسارع ، ليس قوي و لكنه معقول و السبب الأول يرجع الى استجابة الدواسة الالكترونية. و على اي حال التسارع يعتبر مقبولا.
• لم استطع تحديد كفائة التكييف حتى الآن نظرا لأن الجو ليس بالحرارة الكافية بعد. (ليس عيبا حتى الآن)

الأخت الصغرى
بالطبع أقصد ال A4 و قد اشتريتها مستعملة اوتوماتيك لفترة لحين نزول الشكل الجديد من A5 و كانت سيارة ممتازة شجعتني أكثر على خطوة A5

• ال 4 قطع غيارها ارخص و تسارعها أفضل و ال 5 اوسع (الكنبة الخلفية) و أفخم داخليا و خارجيا.
• فتيس ال 4 كان أربع نقلات فقط مما يعني 3000 لفه تقريبا عند سرعة 100 بينما في ال 5 تكفيها 2500 لفه فقط عند نفس السرعة 100
• فتيس ال 5 steptronic و الذي يمكنك من النقل المانيوال مع الاوتوماتيك و هي ميزة جيدة برغم قلة استخدامها.
• فتيس ال 4 حدث به عيب في النقل من 2 الى 3 و تسبب هذا مع نزول اسعار السيارات في خسارة عند البيع و لولا هذين السببين كان من الممكن ان تباع بمكسب.
• العيب السابق مكرر في العديد من السيارات ال 4

ال A5 و الجيتا
الجيتا أجمل من الداخل قليلا و لكن

• الجيتا أقل ارتفاعا عن الأرض
• قطع غيار الجيتا أغلى
• شنطة ال A5 أفضل بكثير
• ال A5 أكثر وقارا و أنسب للعائلة بينما الجيتا تناسب شاب غير متزوج

ال A5 و الباسات
الباسات أوسع و أفخم و لكن

• الباسات أقل ارتفاعا عن الأرض
• قطع غيار الباسات أغلى كثيرا
• برغم أن شنطة الباسات ليست ضغيرة الا أن شنطة ال A5 لا تزال الأفضل لاتساع فتحة الشنطة في A5
• الباسات صعبة في اعادة البيع و تخسر كثيرا

ال A5 و الفيكترا
ال فيكترا أوسع من الداخل و لكن

• قطع غيار أغلى
• شكل انتهى بل الفيكترا كلها انتهت و في انتظار ال insegnia
• شكل التابلوه صمم وظيفيا و لم يراجع جماليا (مفاتيع متجاورة مثل السنترالات القديمة)

و الأهم من كل ذلك الفتيس ال EasyTtronic و الذي يجب التعامل معه بطرية خاصة و الا فلن تكون مسرورا بما يحدث.

و في النهاية
في رأيي ، اذا اشتريت A5 فلن تغيرها ال لأسباب مالية

• مشكلة مالية فتبيع ال A5 و تشتري 28 أو عجلة أو مواصلات (ربنا يستر علينا كلنا)
• فلوس زيادة و لكن كتير حتى تستطيع شراء مرسيدس E class و يكون لديك ما يكفي لصيانتها.

فهل أنا محق ؟

[Fadi Ezzat]

ممكن نقول محق

[elgabry1977]

عقبالي لما اركبها يا راب اصل اخوكم دايخ علي واحده 2007 او 2008 نضيفه بسعر معقول

[midnightman_74]

الاوكتافيا احسن عربية فى الفئة السعرية بتاعتها

[Sameh]

كلام جميل

[egypt_dr]

يا رب ارزقني اياها وارزقها كل واحد نفسه فيها وبارك لكل من معه هذه السيارة

[marawansabry]

لول .. والله موضوع لذيذ .. الله ينور .. بس خلي بالك بتوع اوبل ولا فولكس لو شفوك ميش هيسبوك بالساهل .. وربنا يستر عليك .. بس بجد هي عربية ممتازة وانا مقتنع بيها جدا .. والواحد بيتبسط لما يلاقي كلام مشجع ذي كلامك دة

[for_ever]

شكرا علي الموضوع الجميل

[asdy97]

السلام عليكم


شكرا على المجهود الرائع دة

و احب اضيف ان الاوكتافيا اخدت احسن عربية في انجلترا من استطلاع مجله ذا صن

http://www.nilemotors.net/Nile/showthread.php?t=76076

[Ahmed15]

ممكن نقول محق

شكرا يا فادي

عقبالي لما اركبها يا راب اصل اخوكم دايخ علي واحده 2007 او 2008 نضيفه بسعر معقول

آمين ، لو عرفت عن حد بيبيعها هقولك

الاوكتافيا احسن عربية فى الفئة السعرية بتاعتها

توقيعك جميل و مناسب للمنتديات

يا رب ارزقني اياها وارزقها كل واحد نفسه فيها وبارك لكل من معه هذه السيارة

آمين آمين آمين
و أحسن منها ان شاء الله

خلي بالك بتوع اوبل ولا فولكس لو شفوك ميش هيسبوك بالساهل

ربنا يستر :)

و احب اضيف ان الاوكتافيا اخدت احسن عربية في انجلترا من استطلاع مجله ذا صن

خبر جديد بالنسبة لى و مفرح و يزيد من ثقتي بها

شكرا سامح و for_ever و الجميع

[mohamed_hamdi]

جميل جدا طريقة كلامك عن الأوكتافيا 5 و لكن وصلي احساس ان كل مشتري السيارات الأخرى في نفس الفئة أخطئوا بعدم شرائها و ده مش حقيقي للآتي من وجهة نظري الشخصية للآتي :

1- حضرتك لم تذكر شيء عن العفشة الناشفة جدا و المجهدة في السفريات بشهادة الملاك. و طبعا معروف السبب هو تعويض الخلوص الأرضي المرتفع للسيارة لتوفير عنصر الثبات في الملفات و السرعات.

2- عزل الصوت مع السرعات غير جيد و ده معروف عنها.

3- العيب الشهير الخاص بالكبوت و اهتزاز الصاج مع السرعات بعد فترة من الاستخدام.

الأوكتافيا طبعا سيارة جيدة جدا لمصر و لكن ليست بالمثالية اللي حضرتك مصر عليها و الا كانت فولكس ماباعتش ولا عربية جيتا خالص و لا الفيكترا عرفت تقنع الناس بشرائها رغم توقف انتاجها و الفتيس الايزي ترونيك.

نقطة المركز الأول في المبيعات بانجلترا مردود عليها بحجم المبيعات شبه الزيرو في السوق الأمريكي أكبر سوق سيارات في العالم يا باشا.

أخيرا الخلاف في الرأي لا يفسد للود و الاحترام المتبادل قضية.

تقبل تحياتي و احترامي للموضوع الجميل.

محمد

[Ahmed15]

و لكن وصلي احساس ان كل مشتري السيارات الأخرى في نفس الفئة أخطئوا بعدم شرائها و ده مش حقيقي

بالطبع ليسوا مخطئين.

في حاجة سهل نتفق عليها و هي انه لا توجد السيارة الملاك التي كلها مميزات و ليس بها عيب
و من مقارنتي الأوكتافيا مع سيارات أخرى ستجد أنني ذكرت أن الأخرى أفضل في كذا و الأوكتافيا أفضل في كذا و الاختيار يكون حسب أولويات كل شخص.

على سبيل المثال
* أنا استطعت التغاضي عن عيب ضعف التسارع في ال 5 لكن لا أستطيع تقبل سيارة ضعيفة أو قريبة من الأرض.
* اهتميت جدا بتوافر قطع الغيار لأني أملك سيارة واحدة يصعب انتظار مدة حتى أجد قطعة غيار بينما هناك شخص آخر لديه سيارة بديلة و لديه من يرسله عدة مرات حتى يجد القطعة المطلوبة و هو يستخدم السيارة الثانية.

و لكن ما أنا مقتنع به أن العناصر التي تهمني تتفق مع الغالبية و هذا هو الذي جعل عدد السيارات الأوكتافيا أكثر من الفكترا أو الباسات مثلا.

مش كده واللا ايه :)

[SOBKY]

انا استمتعت بقراءة التوبيك ... بس اعذروني . انا سايب مصر من زمن. و بانزل اجازات بس .. و ركبت الاوكتافيا اللـ a4 زيرو و مستعمل. و اعجبت بيها.
عندي سؤال ,, هل محرك الـ a4 هو نفس محرك الـa5 و لا فيه فرق .. و لو فيه فرق يا ترى ايه ؟؟؟
و لا هو الفرق بينهم فخامة و اوبشنز بس ؟؟؟
وشكرا جزيلا مقدما.

[Sameh]

انا استمتعت بقراءة التوبيك ... بس اعذروني . انا سايب مصر من زمن. و بانزل اجازات بس .. و ركبت الاوكتافيا اللـ a4 زيرو و مستعمل. و اعجبت بيها.
عندي سؤال ,, هل محرك الـ a4 هو نفس محرك الـa5 و لا فيه فرق .. و لو فيه فرق يا ترى ايه ؟؟؟
و لا هو الفرق بينهم فخامة و اوبشنز بس ؟؟؟
وشكرا جزيلا مقدما.

لو المحرك اللى إنت جربته برا 1600 يبقا هو هو
الإتنين لهم نفس المحرك كامة واحدة 8 صباب 102 حصان
الفرق مش فخامة وأوبشنز بس ، إنما ال a5 مبنية على شاسيه مختلف تماما وأفضل بكتير من شاسيه ال a4 ، نفس الشاسيه بتاع جيتا وجولف ومعروف عنه الثبات العالى

[boodimania]

فين السيفيك

اذا كنا هنتكلم على نفس الفئات السعرية..
فعندنا منافس قوى و محترم و جذاب..الا و هو أعلى فئة من السيفيك ..VTI
دي فيها كل حاجة..و لو زودنالها الكاسيت الجديد اللي بيتباع كأوبشن ..هانبقى قدام تحفة..
تحفة فى الأداء ..و تحفة فى التصميم الداخلى ..و في نظم الأمان(ABS-EBD-VSA-6 Air Bags-Side supported Beams) ..و توكيل محترم (رسمى) و توكيل مش رسمى مستنيك فى بورسعيد.. ناهيك بقى عن عالم الأختيارات اللي قدامك...لو كنت شاب ..و عايز تطلعها من الشكل الشبه وقور لعربية سبور ..تشد أى حد ماشى فى الشارع انه يبص عليها...