مساعدة بخصوص فابيا 2002

[pilot544]

يجماعه انا عايز اشتري فابيا 2002 بس مش عارف ايه عيوبها وخيف من حوار السخونية ده
فيريت اللي عندو خبرة سابقة مع العربية يساعدني بخبرته واكون شاكر جدا

[egyptiandiver]

حضرتك من البروفيل بتاعك عندك فيرنا و 128 يعني منتشرين جداً و سهلين في قطع غيارهم و الفنيين إلي فاهمين في تصليحهم متوفرين... أنا رأيي الشخصي إن حضرتك تدور على عربية للشراء يتوفر فيها نفس النقاط المهمة المذكورة فوق، السبب إن قلبك و جيبك ميوجعكشي من أول القطع للصنايعية و أخيراً في سعر إعادة البيع. ربنا يعمل لحضرتك الافضل

[Eng_Mostafa_89]

هى عربية كويسة بصراحة كثبات وتسارع
بس عيبها قطع غيارها قليلة شوية وغالية شوية خاصة الموتور ال 3 سيلندر ال1200 سي سي
وكمان لازم تتعامل مع حد بتاع اسكودا

[ehab78]

بسم الله الرحمن الرحيم
انا كان معايا العربية سكودا فابيا موديل 2002 موتور 1400cc ولسه بايعها من حوالي شهر ونص بعد ماقعدت معايا 3 سنوات ونص
مبدئيا العربية محترمة جدا 00صاج محمل جدا-هيكل قوي رفارف امامية وخلفية قوية تتحمل الصدمات
عفشة ممتازة بجد زي اي عربية الماني قوية جدا معمرة جدا متماسكة بشكل خرافي
موتور جيد جدا وعزمه ممتاز على السرعات المنخفضة والمطالع والتحميل
الكماليات000مش هقدر افيدك لان عربيتي كانت فاضية وده من الاسباب اللي عجلت ببيعها
نيجي للعيوب
الوسع الداخلي000ضيقة يعني مش مناسبة لعيلة كثيرة الافراد خاصة لو هاتش باك علشان الشنطة صغيرة ولو اني بصراحة كنت بركب في خمس اوست افراد مع الشنط كمان بس دي بتكون طوارئ وطبعا زنقة رهيبة
صوت الموتور00عالي شويه والموتور نفسه خشن مش زي الياباني
الحرارة000طول ما العربية متظبطة وانت ايدك فيها باستمرار مفيش حاجة اسمها العربية سخنت والكلام ده
على فكرة مؤشر الحرارة لما العربية تمشي عادي بيكون في النص زي معظم الالماني فماتتخضيش
بس انا حصل معايا خطأ مني اني مشيت مشوار طويل وغطا القربة مفتوح فالعربية سخنت جدا وسينسور الحرارة ضرب ورحت غيرته في التوكيل بس العربية للاسف من بعديها سخنت كذا مرة وانا بعتها قبل ما اظبط الموضوع ده000لكن اخبرت المشتري
قطع الغيار---غالية بس موجودة في المحلات المتخصصة سكودا وطبعا في التوكيل بس غالية جدا
بالمناسبة 00قطع الغيار الخارجية زي الرفارف والمرايات والابواب كلها قليلة جدا وغالبا مش موجودة حتى في التوكيل وبتروح تدور عليها عند بتوع الاستيراد(ده لو لقيتها)
على فكرة برضو من اهم عيوبها ان مش هتلاقي فنيين كتير يعرفوا يشتغلوا فيها سواء ميكانيكي كهربائي عغشجي لانها بامانة رخمة جدا في شغلها علشان كده كنت بعمل كل حاجة في التوكيل حتى غيار الزيت
عموما هي عربية ممتازة عيبها الوحيد عدم انتشارها مما يعني قلة قطع الغيار وغلوها وعدم فهم الصنايعية لها لعدم مرورها عليهم مما يعني سعر اعادة بيع في الارض
بالتوفيق باذن الله فيها اوفي غيرها وتحت امرك في اي استفسار

[Amr_Azab]

يجماعه انا عايز اشتري فابيا 2002 بس مش عارف ايه عيوبها وخيف من حوار السخونية ده
فيريت اللي عندو خبرة سابقة مع العربية يساعدني بخبرته واكون شاكر جدا

بص يا باشا انا معاية فابيا 2002 بقالها سنة ونص
مميزات العربية :
1-عفشة ناعمة جدا وقوية جدا تستحمل الشوارع المصرية يعني انا في خلال السنة والنص دول معملتش فيها اي حاجة غير تربيط بس مع العلم اني بروح بيها الشغل كل يوم يعني 60 كم يومي وبمشي في طرق مكسرة فانا ابصم بالعشرة بالنسبة للعفشة
2-الموتور صوته هادي جدا جدا واواقات كتير مش بعرف ان العربية دايرة غير من الار بي ام (عزل ممتاز جدا) وبالنسبة للسحب فهو بطيء شوية في البداية بس بعد كده بيبقي كويس وده نتيجة لتقل وزن العربية
3- أتزان وثبات العربية فوق الممتاز وده طبعا نتيجة لوزن العربية كما ذكرت والعفشة والتعليق اللي فوق الممتازين
4- أستهلاك البنزين كويس اوي وده حيبقي علي حسب العربية 1000 ولا 1400 سي سي
5- الصالون كويس اوي بالنسبة لعربية هاتش باك وغير منتا بتبقي متخيل لما تشوف العربية من برا (يعني انا اشرتي 5 أفراد وبنركب فيها كلنا مرتاحين جدا) هي الشنطة بس اللي ممكن صغيرة شوية وده بالنسبة للهاتش باك
6- بالنسبة لشكل فهو جميل جدا سواء من بره او من جوه من شكل العدادات والتابلوه وخصوصا الهاتش بالك عجباني اكتر بصراحة ودي طبعا أزواق
العيوب :
هو عيب واحد بس وهو موضوع قطع الغيار بس علي فكرة الموضوع مش صعب اوي يعني الحاجة اللي مش بتلاقيها جديدة بتلاقيها مستعملة و انا الحمدلله حتي الان مفيش حاجة احتاجتها وملقتهاش وبالنسبة للآسعار فدي أمثلة :
بيضة عجلةامامية يمين 50 جنيه تركي والايطالي 80 جنيه والالماني 100 جنيه
- كاوتش كبالن 35 جنيه ماليزي و 30 تركي
- كوبلن كامل بالكاوتش والابازين الماني اصلي استعمال بضمان سنة 100 جنيه
- فلتر هواء أصلي 70 جنيه
- طرمبة بنزين جديدة الماني اصلي بدون عوامة 250 جنيه
- جوز فوانيس امامية 500 جنيه تايواني وأصلي ب 900 جنيه
-تيل فرامل أمامي أصلي 380 جنيه وفي نوع بـ 280 جنيه ونوع أخر بـ 175 جنيه ونوع اخر بـ 140 جنيه
-قواعد موتور تتراوح من 500 الي 550 جنيه جديدة أصلي

تقريبا انا كده شرحت كل حاجة في العربية واتمني اكون افدتك وكرأي شخصي لو حضرتك مش بتغير كل شوية عربية يعني ميهمكش اوي موضوع اعادة البيع فانا انصجك بيها جدا لانها فعلا عربية رائعة وسواقتها ممتعة جدا ومندمتش ابدا اني جبتها وربنا يوفققك للي فيه الخير ليك ان شاء الله

[ahmedtail00]

انا معي فابيا 2002 موتور 1000 4سلندر صوتها عالي وسحبها ضعيف والدينامو بيفصل لوحده وانا علي الطريق

[Amr_Azab]

انا معي فابيا 2002 موتور 1000 4سلندر صوتها عالي وسحبها ضعيف والدينامو بيفصل لوحده وانا علي الطريق

اعمل اللي قولتلك عليه في الرسالة الخاصة
والموضوع ده حتلاقيه أتحل ان شاء الله