محتار وعاوز ايكم فى الفابيا قبل ما اشترى

[م /محمدفاروق]

السلام عليكم ورحمة الله وبركاته
اهلا وسهلا بالفبياويه
والله انا محتار ما بين هيونداى i10 وسكودا فابيا
ومش عارف اعمل ايه
وبدور على مواقع البيع علشان الاقى حاجه منهم تكون حاله فوق ال 80% ومش عارف
خصوصا ودى اول مره اشترى عربيه ومحدش بيفيدنى - فياريت الاقى حد عنده ضمير ترشحوهولى وييجى معايا وانا بشترى ولو بمقابل مالى
ايه رايكم وانا مش مستعجل
وشكرا ليكم مقدما - وعاوز رايكم
شكرا لكم

[EngAhmedSayed]

حضرتك اول شىء لابد من عمل مقارنة بين السيارتين فى القسم المختص
لانى هيكون التحيز هنا فى قسم سكودا للفابيا فا مش هتكون المقارنة عادلة
و عند الاستقرار على نوع العربية احنا تحت امرك

و هقول مقارنة بسيطة كدة من واقع خبرتى
الاعتمادية الفابيا
متانة صاج الفابيا
اعادة البيع الهيونداى
اسعار قطع الغيار الهيونداى
صالون و جودة الخامات الفابيا
بس حضرتك مقولتش سنة الصنع
و نصيحة لو ربنا كرمك بالفابيا خليك فى الموتور 1400 سى سى

بالتوفيق ان شاء الله

[م /محمدفاروق]

كلام حضرتك انا فاهمه بس انا بحب السكودا فعلا عربيه تستحق الاحترام - المشكله عاوز حد يكون موجود معايا وانا بشترى ينورلى الطريق - وشكرا لمروك وردك المنور

[aw2100]

طالما اول عربية انصحك بلاش الفابيا بسبب قلة قطع غيارها ومحتاجة ميكانيكى متخصص
أشترى جولف او ابيزا او سكودا فليشيا قطع غيار متوفرة وعربيات معروفة عند الميكانيكية وطبعا الألمانى عفشة قوية وثبات رهيب وصاج مصفح وافضل من الكورى و 1000 مبروك على العربية الجديدة !!

[Amr_Azab]

الموضوع بيكون علي حسب متطلبات حضرتك
لو عايز عربية ركوبة ومتعة سواقة وثبات واتزان علي الطريق يبقي الفابيا وتستحمل غلو قطع الغيار والصيانة
ولو متفرقش معاك وعاوز حاجة تقضي بيها مشاويرك وخلاص يبقي هات الـ i10 وحتريحك في اسعر قطع الغيار والصيانة

يعني من الآخر بتحب السواقة وغاوي يبقي فابيا
العربية بالنسبالك مجرد وسيلة انتقال مش اكتر يبقي i10

[م /محمدفاروق]

استاذ aw2100
استاذ Amr_Azab
انا متشكر جدا لردكم الكريم ان شاء الله هتوكل على الله واجيب i10
ياريت رايكم عن الاسعار وانا لقيت فى كونتكات كارز عربيه 2008 مغيره رفرف امامى ومحتاج يترش على 40 الف
ايه رايكم فى السعر والحاله دلا وبيقولى فبريكه دواخل وخوارج