مقارنة ما بين سكودا فليشيا و فيات اونو و كيا برايد

[goodwave]

السلام عليكم
انا عضو جديد وسمعت عن موقعكم من خلال كونتكت كارز. احب اولا ان اسجل اعجابي بالموقع و بالمواضيع المطروحة. وفقكم الله لمزيد من النجاح.
انا معايا حوالي 33000 الف جنيه وبفكر اشتري عربيه مستعمله ومحتار بين السكودا فليشيا و الفيات اونووالكيا برايد و احب اسمع راي اهل الخبره خصوصا ان
خبرتي قليله في مجال السواقه تنحصر في سيارة والدي هيونداي اكسل منذ سنتين قبل ما اتجوز.

في اختيار تاني بيلح عليا وهو شراء جديد في حدود 60000-65000 واقسط؟؟؟؟ هل ممكن اشتري اسبرانزا بالتقسيط؟؟؟

برجاء الافادة و الاستفاضة في الشرح و شكرا

goodwave
"If you have not tried, You have not lived

[Nader]

بس بالنسبة للنعومة:
1- اونو مفيهاش بور ستيرينج بس الدركسيون بتعها تتعامل معاة باللمس
2- برايد "" "" "" "" "" معقول
3-فليشيا "" "" "" "" "" تقيل جداً هتجاهد علشان تركن

بالنسبة للشكل -شخصي-
1 فليشيا
2 اونو
3 برايد


قطع الغيار وتوافرها
1 الاونو والبرايد زي بعض
2 الفليشيا مش سهل قوي انك تلاقي قطع غيارها عند اي حد

اسعار قطع الغيار الارخص فالاغلى

1- برايد
2- اونو
3- فليشيا

بالنسبة للتقسيط فانا اعتقد ان الاسبرنزا مفيش منها تقسيط دلوقتي ولو فية ياريت حد تانى يفدنا" بس انت لية مفكرتش فاللانوس والفيرنا 1500cc"

"بصراحة انا لا احب التقسيط انت كدة تقريباً هتدفع ضعف تمن العربية حرام يعني"

[M_ElSabaa]

مفيش احسن من الزيرو. اريح و احسن حاجة وتريح نفسك على الاقل من زيارة الميكانيكى 3 سنوات وتبقى اسمك راكب عربية جديدة موديل السنة بس انت لو هتفرق معاك فلوس التقسيط يبقى احسن ما تورطش نفسك مع التقسيط وهات عربية من المعروضين عليك ورأى :
الاونو :

• سهلة الصيانة والتصليح عند اى ميكانيكى مع توافر قطع الغير و رخصها ايضا
  مريحة جدا فى السواقة مع توفيرها فى البنزين
  صالون مساحته معقولة جدا على حجم العربية
  احتفاظها بسعر البيع

• الكيا برايد:
  غالبا السعر ده هيجيبلك البرايد الهاتش باك
  العربية كل الناس بتشكر فيها جدا
  مشكلة التوكيل الازلية لسه مش باين هيحصل فيها ايه على الرغم من ان فى ناس بتقول ان الوكيل بتاع نصير عنده قطع غيار وكل حاجة موجودة
  العربية واسعة جدا من الداخل
  موفرة فى البنزين
  سعرها بعد البيع زى الاونو

• الفيليشيا
  انا مش من مشجعى الفيليشيا خالص
  وهنا فى مقارنة بين ال128 و الفيليشيا و النتيجة كانت لل128 ! المقارنة

وفى الاول والاخر الرأى ليك طبعا الاستخارة و توكل على الله

[Karim_Monir]

الفليشيا ابعد عنها تماما قطع غيار غالية علي الفاضي وخشنة جدا وموتور وفتيش خشنيني جدا
ومش هاتاخد منهاوسع ولا حاجة زي مانت متخيل
لدرجة ان سبعاوي بيقول علي موتورها زي ال 128 علي ما اعتقد
وانت طالع من اكسيل-والاكسيل ناعمة لانها كانت معاي وغيارتها قريبة وموترها ناعم
يبقي قدامك في اونو وبرايد
انا كنت في نفس الحيرة دي من اسبوعين لما جيت اشتري عربية اروح بيها شغلي كل يوم
روحت ركبت الاونو بتاعت ابن خالي وهو جايبها استيراد خاص (معوقين) من ايطاليا موديل 93 حالة ممتازة
سوقتها حلوة بس لما سوقت البرايد عجبتني اكتر وقررت اجيبها
البرايد ثبات اكتر(جيبت بيها لحد 150) موتور 1100 سي سي بيستهلك بنزين قليل جدا غير الاونو 1300
صالون واسع جدا جدا-اوسع من الاكسيل واوسع من الريو ال2006 بتاعتي
قطع غيارها رخيصة جدا جدا وتوفرة قوي في التوفيقية وشارع دمش والمستعمل عزبة شلبي والحرفيين
فانوس امامي ب 80 جنية اشارة ب 20
فانوس خلفي 55
زوج كبالن الماني ب 285 جنية
مساعدين 160 جنية
سير كاتينة 40 جنية
سير دينامو 10 جنية
فاتر بنزين 15 جنية
كل الاسعار دي لقطع غيار اصلية
واهم حاجة الحالة العامة الجسم الخارجي-والصالون بيبين مدي استهلاك السيارة-
واهم حاجة في البرايد العفشة عشان لو اتلعب فيها غلط بتبوظ
ربنا يوفقك
كريم منير

[Nader]

البرايد ثبات اكتر(جيبت بيها لحد 150) موتور 1100 سي سي بيستهلك بنزين قليل جدا غير الاونو 1300

الاونو 1000 cc بس احد 2002 تقريباً الاونو فاير الجديدة الـ1300 cc

[Nader]

القليشيا هي الـ 1300cc

[goodwave]

شكرا عاى التعاون

و الله انا منبهر بكترة الاراء و المشاركه وبجد جزاكم الله خير على النصيحه علشان انا حاسس انها من القلب.
على العموم انا قررت اخليني في المستعمل دلوقتي علشان التقسيط حيقطم وسطي
ولو حد عنده عربيه حلوه في حدود امكابياتي ياريت يدلني
وشكرا

goodwave

If you have not tried, you have not lived

[MOHAMED ABD EL SHAFY]

الفليشيا سيارة معقولة وقطع غيارها رخصت فى الاونة الاخيرة بنسبة 15% بالمقابل الفيات كله زاد حوالى 10% يعنى فجوة السعر فى قطع الغيار قلت
بالمقابل عن تجربة شخصية لل 128 والفليشيا (GLX) قطع غيار الفيات صحيح انها رخيصة ولكن غير معمرة بالمرة اما الفليشيا فهتلاقى قطع غيارها (المانى) حط تحتها خط يعنى صحيح غاليه شوية (مثل الهونداى تقريبا) بس معمرة اكثر من الهونداى والفيات بكتيير
ان طبيعة سولقتى دايما بمشى كل يوم فى مدقات وكنت كل 3 اسبيع او اقل تقريبا اروح اسحب كرسى جنب الميكانيكى اشرب الشاى واعمل شوية مكالمات على المحمول واستنى يجى 2 او 3 ساعات علشان يربطلى العفشة ويظبط السيارة ودايما موضوع الزوايا بيكون مشكلة مع كام مطب كدا
لكن لما ركبي الفليشيا والحمد لله بعد 6 شهور متتالية مشفتش الميكانيكى و عديت عليه فقط عشان يغيير سيير التكييف ويعمل CHECK على الغفشة
وكانت عنيا عليه وهوا طالع من تحت العربية وايدى على قلبى قلت بقى هيقولى هاتلى كذا وكذا وكذا ولكنى لقيته بيقولى العفشة 100 100 وملفش فيها صامولة واحدة على العلم انى مبهدها كل يوم فى المدقات
بس خلى بالك من حاجة مهمة جدا ناس كتييير اوى ميعرفوهاش فى الفليشيا الا وهى الفرق بين ال السيارات ال LX وال GLX ودى حروف مكتوبة على الشنطة ورا على اليمين ال GLX موتورها 70 حصان اقوى بكتيير من ال LX التى لا تتعدى 60 حصان ودا عرفته بعد بحث تقنى فى فنيات السيارة من مواقع اوربية
يعنى لو هتشترى فليشيا اوعى تجييب ال LX وجيها GLX
حاجة تانية مهمة جدا انك تتاكد ان مروحة الريداتيير ليها قميص ولو ملهاش واضطريت تشترى مش مشكلى ممكن تركبة بحواى 150 جنية بالمروحةوحاجة لذيذه الناس بتعملها ممكن يتركب ليها مروحة اضافية على وش الريداتيير الخارجة (مروحة تبيريد اضافية ) وسمكها رفيع وبكدا انسى ان مؤشر الحاراة يتعدى ال 70 فى الشتاء او 90 فى الصييف وخصوصا لو استخدمت مياة خضراء.
تحتفظ بمياه التبريد لفترة طويله جدا عن ال 128
العربية سرعتها ممكن تجييب 150 بسهولة والثبات بتاعها ممتااااااز على العلم ال 128 حاولت وموت نفسى انى اجييب 130 ومعرفتش ابدا
عن تجربة لفيت ملف صعب على طريق الاسكندرية الزراعى قبل طوبى قها ( الملف دا معروف بخطورته ) على سرعة 120 بالخطا ومحسيتش باى حاجة وكانى ماشى على ال80
مميزاتها عن ال 128
1- سيارة اسرع
2-ثبات اعلى
3- مكوناتها احدث بكتيير
4- التقفيل للصالون والكراسى والابواب اكثر من رائع
5- تابلوه شيك وانيق
6- عفشة متينة جدا
7- قطع غيار معمرة جدا (المانى)
8- متوافر فيها تكييف ( انسى انك تلاقى 128 تعرف تركب فيها تكييف)
9- السيارة مجهزة ب سنتر لوك
10- كشتافات شبورة وضباب خلفية وسخان زجاج خلفى (مكونات اساسية)
11- نصف قطر الدوران اقل بكتيير اوى من ال 128

العيوب
1- قطع غيار اغلى من ال 128
2- ثقيله شوية فى اعادة البيع[/b][/size][/size][/b]

[h_hezzah]

تصحيح بسيط بس عن قدرة المونور.

ماتخدش باللى مكتوب فى المواقع الاوروبية. انا كنت جايب فيليشيا زيرو سنة 97 ودرست الفروق بينهم.
ال GL و GLX يفرقوا هنا فقط فى الكماليات.
الGLX كان فيها فرش قطيفة بدل القماش، كونسول تحت الكاسيت، الكنبة الخلفيه جزئين، وسنتر لوك اصلى
ده الفرق اللى بينهم على الاقل لغاية موديل 98 (اللى قبل وش الاوكتافيا)
فى اوروبا والدول المتقدمة كان كل المواتير انجكشن وفيها محفز لتقليل العادم
قدرات 40KW و50KW اللى هى 54 و 68 حصان
واليفرقوا عن بعض فى البخاخات ووش السلندر.

http://www.skoda-felicia.net/felicia/technik/motoren_skoda_felicia.php

اموتور اللى نزل مصر كان هو نفسه ال 54 حصان بس بكربراتير مش انجكشن ومافيش محفز عادم مما يقلل مقاومة العادم والقدرة للموتور ده 58 حصان!

اللى اعرفه ان فى اواخر الموديلات بقى فيه منها انجكشن فى مصر، بس ماعرفش بالضبط من اى موديل تم التغيير، بس هى بتبان على الموتور اول ماتفتح الكابوت تلاقى االcover البلاستيك الشيك مكتوب عليه MPI او SPI

وهى عربية زى ما محمد عبدالشافى قال قطع غيارها معمرة جدا. ولو عايز انواع ارخص حاتلاقى قطع غيار تركى وايطالى وما شابه وبتكون ارخض
بس طبعا مااتشتكيش لما كل شوية تغيرها.

[goodwave]

شكرا لك

شكرا لك جدا يا استاد عبد الشافي على المعلومات الرائعة واله ردك اثلج صدري علشان انا كنت ميال جدا للسكودا بس الاخوة كتير خوفوني.
كمان انا ساكن في العجمي ومش حاقلك اد ايه في مطبات و تكسير و بلاوي وانا عاوز عربيه تستحمل
كنت احب انك انت او احد ملاك السكودا فليشيا تجيب لي على بعض او كل اللسئله التاليه ولكم ج\يل الشكر
1- عربيتك موديل كام؟
2- تفتكر ممكن الاقي فليشيا موديل 96 او 97 او 98 بحاله جيده في حدود سعر كام؟
3- لو انت او حد من الاخوة بيبيع سكودا بحالة حلوة ياريت يدلني؟
4- الناس بتقول السكودا دي زي الادا و خشنه قوي و صاجها بيصدي بسرعه ايه رايك؟

وشكرا

goodwave
"If you have not tried, you have not lived

[goodwave]

برجاء التعليق

شكرا لك ايضا يا استاد حازم و برجاء التعليق على رسالتي الاخيره .
وشكرا

goodwave
"If you have not tried, you have not lived

[hazem_khidr]

ما تفكر في السويفت عربيه معقوله و تمنها في حدود 36 الف بس لو حتجيب تجيب الياباني اللي هيا موديل 94 و 93 فقط بعد كده كله مصري لحد 2000 انا معايا واحده و مريحاني جدا و موتورها حلو جدا جدا انا كنت من المحله و روحت اسكندريه و طلعت من اسكندريه علي القاهره صحرواي و كنت ماشي 140 و العربيه ما شاء الله ثابته و معقوله مش ثبات الماني طبعا بس معقوله و الRBM ما زادش عن 3200 لفه و بعد ما وصلت القاهره رجعت المحله تاني يعني عملت 700 كيلو في يوم و نص و العربيه موديل 93 و ما زعلتنيش الحمد لله في حاجه و تكييفها كويس و مريحه في السواقه عموما فكر و شوف بس حاله نضيفه

[h_hezzah]

الفليشيا الخشونة اللى فيها فقط من صوت الموتور! وده لأنه فيه كتينة جنزير بدل السير. وده بيخلى صوت الموتور خشن ، بس ميزته انه ماتخافش انه ممكن يتقطع منك لو نسيت تغيره كل فترة. وطبعا معروف ان سير الكتينة لو اتقطع حاتفتح عليك فتحة تصليح موتور محترمة! وفيه عيب كمان هو تقل الدركسيون. وده يخليها عربية لا ينصح بيها للاناث. هى طبعا مش بتقل اللادا بس الى حد ما مش خفيفة. انا معايا كانت مش فارقة بس نظرا لأنها كانت فى اخر ايامها مراتى هى اللى بتستخدمها وكانت دائمة الشكوى من تقل الدركسيون.

ببساطة كده هى عربية يعتمد عليها واعطالها بسيطة وثابتة جدا بس مش متدلعة. وممكن تجرب تسوقها من اى حد تعرفه وتجربها وتشوف هل دى تمشى معاك ولا لأ.

[goodwave]

مش مقتنع بالسويفت

شكرا على الردود بس انا بصراحه مش ميال للسويفت علشان شكلها صغير وكمان موديلات 94 حيكون طاع عينها. بس انا ا\ا امكني حاحاول اجرب سواقة السكودا
وشكرا

goodwave

Birds With a feather flock together

[cool_modi]

اخي العزيز السلام عليكم ورحمه الله وبركاته..
انا واللهي بالصدفه اشتركت في المنتدي علشان شوفت موضوعك في البحث بص انا هقول لحضرتك حاجه انا كمان لسه مشتري عربيتي السكودا كنت محتار بينها و بين الاونو و الفيات بونتو و جه النصيب في عربيه 97 فابريكه بره و جوه وكانت مرفوعه فاقنعوني انها لقطه وطبعا انا لسه متعلم السواقه من كام شهر فاكيد اول عربيه دي بتبقي اول خبره للواحد يعني انا اشتريتها و هي علي فكره عربيه كويسه اوي بس عيبها انها نوعا ما تقيله شويه بس علي الطريق لما بتجيب بيها سرعات بجد بتكون ثابته اوي وسحبها كويس جدا بس طبعا هي مبتجمعشي بسرعه يعني لازم تدي لكل غيار سرعته المطلوبه و المشكله اللي بواجهها كتير ان الركنه فيها بتكون ثقيله بس عادي مش اوي واللهي وبالنسبه لقطع اغيار لا صدقني متوفره جدا انا لما جبت عربيتي كانت مرفوعه فتره طويله و انا تقؤيبا غيرت فيها كل حاجه من اول البطاريه لحد طرمبه الميه صدقني قطع الغيار الالماني معمره وكويسه كفايه انك بتعمل حاجه مره فيها مش هتكررها غير بعد كتير و وهي صدقني عربيه كويسه .وعلي فكره مفيش حاجه اسمها ال128 احسن اكيد لا الالماني الماني و دي حاجه معروفه انها خارجه من مصانع فولكس يبقي ازاي ال128 احسن و بعدين حضرتك اي عربيه في لدنيا لما بتتظبط بتكون كويسه اوي و خفيفه . انا جربتها واللهي و استحملتني جدا يعني عارف حضرتك دي اول سنه شغل ليا في مصر للطيران و عايز اغيرها و فكرت في العربيات الي ممكن اجيبها تبع الشغل الي هي الاسبرانزا و الدايو و الفيرنا وفعلا رحت فرع المصريه ولما هناك عرفوا ان انا عندي اسكودا و ناوي اجيب فرنا هناك سالوني عملت بيها حوادث قبل كده قولتلهم ايوه سالوني ازاي كنت مره واقف علي الكورنيش و عربيع نصف نقل خبطني بس الحمد لله ربنا ستر وسالوني صلحتها بكام بقي 70 جنيه واللهي عند سمكري غالي كمان قالولي احمد ربنا بقي علشان الفرنا دي لو ضربتها بايدك هتتعور . :D فثقل العربيه واتزانها عيبه و ميزه واللهي في نفس الوقت بس بترجع من انسان للتاني طبعا. وكمان الاسبرانزا سمعتها مش اوي و خايفين منها الناس اوي علشان صيني بس انا واللهي لما بشوفها بحس انها قيمه و كمان بيقولوا موتور لانسر بس فيها مشاكل كتير اوي وسعرها رخيص ومش هتستحمل هنا في مصر . فطبعا خايف اقسطها متطلعش كويسه بعدين و اصرف عليها جامد و بعد كده العربيات ترخص فاروح انا فيها بقي :D زز السكودا واللهي كويسه و الكيا انا مركبتهاش خالص بس اسمع انها كويسه اوي اوي اما الاونو بقي فمنصحكش لانها عربيه ستات و اقتصاديه في البنزين و قطع غيار فيات اه رخيصه بس هي مش عربيه مهمات صعبه و خفيفه اوي لعبه يعني و مبتستحملش و انا انصحك اركب يا سكودا يا فولكس بولو موديل 95 لحد 99. وكمان علي فكره في مشكله في السكودا انها تقيله في بيعها انا مش عارف اوصل للسعر الي اشتريتها بيه لما فكرت ابيعها قلت الف او الفين .يا رب اكون قدرت افيدك انا اسف علي الرغي الكتير بس واللهي انا كنت محتار زيك كده علشان كده حبيت اوصلك العربيه عامله ازاي بامانه هي عربيه كويسه انا لحد الوقتي مش عارف لما ابيعها ممكن اجيب ايه يستحمل زيها كده وادعولي يا جماعه ربنا يهديني واعرف اختار بقي. سلاام عليكم احمد يوسف