عايزين نرتاح من ميكانيكية البيتلز

[smsmxxxxxx]

السلام عليكم
والله يا جماعة الواحد قرف من ميكانيكة البتلز
بينتهزوا ان مش اى حد بيعرف يصلحها

وللأسف اكتر حاجة بيعملوها انه بيشوف مشكلة صغيرة ميقولكش عليها علشان تكبر
وترجعله تانى

ويا سلام لو انتا جديد على البيتلز ومعندكش خبرة فيها هيظبطك احلي تظبيط

انا عن نفسي اول ميكانيكي رحتله قاللي دى بيتغيرلها طقم سرفيس كل شهر حتى لو مشيت بيها كيلو متر واحد علشان يظبطنى فى 60 جنيه كل شهر

وواحد تانى قاللي هتلها بودى كامل ب 4000 جنيه بدل السمكرة ووجع القلب

وواحد تالت بوظلى الفرامل وكان هيودينى فى داهية

علشان كدة انا بحب استشير اخواتى فى المنتدى هنا قبل ما اعمل اى حاجة

وانا نفسي والله نتعاون مع بعض ونعمل على الاقل الحجات السهلة
زى تغيير طقم الكهرباء
ظبط التاكيهات
ظبط الكاربراتير
ظبط الكهرباء (توقيت الاشعال)
شغل الكهرباء البسيط

لان دى اكتر حاجة بتأثر على اداء العربية وبتخلينا نروح كل شوية للميكانيكي
ودا للاسف بسبب شوائب البنزين او قطع الغيار المضروبة زى البوجيهات

الاجانب بيعملوا الحجات دى عادى جدا رجالة وستات كمان والله

صدقونى الحجات الصغيرة دى هتوفر كتير جدا

ونخلي الميكانيكية للحجات الصعبة او اللى فيها خطورة زى الفرامل
او الحجات اللى فيها بهدلة زى غيار الزيت

ايه رأيكم نبتدى واحدة واحدة مع بعض وكل اللى بيعرف يعمل حاجة يقول
او اللي حصلتله مشكلة والميكانيكي حلها وشاف عملها ازاى يقول

ولو احتاجنا اننا نتقابل نتقابل الوقت دا مش هيبقي ضايع على الفاضي لانه هيوفرلك وقت اكتر وفلوس كتير

وبرضه لو فى اكتر من عربية فيها مشكلة مشابهة ممكن نتقابل ونروح لورشة واحدة
ساعتها هننزل فى الفلوس وكمان هنضمن انه يعمل الشغل كويس علشان نبقي زباينه
لانه ممكن يهمل زبون ويقولك بناقص واحد لكن لو رحنا تلاتة او خمسة هيحسبها بطريقة تانية خالص

زى السمكرة الخفيفة مثلا او رش العربية لما يلاقي تلاتة ولا خمسة واقفين ادامه هيخاف يسرق حاجة من العربية


واللى يعرف حاجة ميبخلش ويشرح شرح مفصل علشان المبتدئين
والصور والفيديو بقي سهل الايام دى كلنا موبايلتنا فيها تصوير فيديو
ومنتدانا الجميل دا موجود ويوتيوب علشان الفيديو موجود

ومتقولش ايه تضييع الوقت دا صدقنى الدقيقة اللى هضيعها هتكسب 10 من مشاركات الناس التانية

على العموم فكروا فى الكلام دا وقولولى ردكم واتمنى يكون موافقتكم بمشاركة ايجابية مفيدة للكل


-----------------
اخوكم محمد سالم

[smsmxxxxxx]

حبيت اكون اول المشاركين لانى صاحب الموضوع

المشكلة دى حصلتلي وكان معايا الاولاد وكنا الساعة 2 صبحا

كنت ماشي وفجأة لقيت العربية بطلت ادور وامشي يا دوب تمشي كام متر وتقف وبعد كدة مدارتش

والتنك متأكد ان فيه بنزين اكتر من النصف

المهم الموقف دا كان حصللي قبل كدة وشفت الميكا نيكي حلها ازاى

الحل
المشكلة ممكن تكون من ابرة الكاربراتير
فتفك العمة وتخبط بيد مفك كبير عليها بس يكون الخبط مش بالراحة اوى ولا جامد يبوظ حاجة

وبرضه تفتح وش الاسبراتير وبسن المفك تفتح الابلاتين وتقفله وتحك نقط التلامس بالراحة

وتسيب عمة الكاربراتير مفتوحة وانتا بتعمل الكلام ده لان العربية ممكن تكون شرقت منك وانتا بتحاول تدورها

وبعد ما تخلص تركب العمة وتدور العربية عن طريق ان تدوس بنزين على الاخر وتتنيك دايس
وتدور بأستمرار لحد ما تدور مش تدور وتلاقيها مدارتش تروح دايس بنزين تانى ودور تانى
لاء دور بأستمرار هتلاقيها خدت وقت اطول شوية من العادى
بس مطولش جدا علشان المارش والبطارية

انشاء الله الصبح هصور شوية صور توضح للمبتدأين علشان ميخافوش وهما بيعملوا الكلام دا اول مرة

-------------------
محمد سالم

[gomangy]

مشكووووووووووووووووور يا باشا علي المعلومه وربنا يسترها علي كل
بيتلزاوي
ويستر طريقه

[Hossamelnomrosy]

السلام عليكم إخواتي البيتزلاويه.أخوكم حسام النمرسي لسه بيتزلاوي مفيش بقالي شهرين بس و حبييت أتعرف عليكم كلكم و أشكركم بجد من كل قلبي على الروح الجميله جدآ اللي أنا حاسسها أكتر مني شايفها لإني مش كتيير بدخل نظرآ لظروف شغلي بس بجد مش عايز أقولكم أنتوا بجد مش متخيلين مدى سعادتي كل ما أدخل و أشوف حد مننا في مشكله و مدى السرعه الغير عاديه في الرد أكن كل واحد فينا بيبقى حاسس بأخوه و مدى القلق اللي بيبقى فيه لما بيكون في البتلز حاجه لأن بجد كلنا بحب العربيه ده قوي و ده إلي أنا متأكد منه.عمومآ انا بجد لي الشرف إني أكون واحد من أسرتكم الجميله و ربنا يقدرني إني أساعدتكم.

حابب أسئل سؤال كده و هي مشكله حصلتلي إمبارح و غريبه من نوعها بشهادة الكهربائي حبيت أقولها و برده تفيدوني أعمل أيه فيها بخبرتكم الواسعه
المشكله: جيت أدور العربيه إمبارح ألاقيها تتكتك و متلقوتش.أستنى شويه و أدور تاني برده نفس الكلام مع العلم إن البطاريه زي الفل و كمان الدينمو الوفروض إنه تمام مع العلم إن اللمبه بتاعته كانت بتنور جامد أول مبشغل العربيه و بمجرد أدوس بنزين تقل درجة نورها بس مش بتتطفي خالص و ده برده مشكله عايز رأييكم فيها. المهم زقييت العربيه دارت و كله تمام و بعدين رحت للكهربائي إللي معرفش كويس ولا لأه لأني طبعآ معرفش هو ميين أحسن كهربائي للبيتلز ، قاللي إن المارش و التاكيهات بتاعته زي الفل و إن العيب في الفبره يتاعت الكونتكت و إن لازم أجييب فابره و تكون بسلك بس اللي هو يعرفه إنها مبقتش بتنزل نهائي و إن الحل هو إني أعما زرار يشغلها و عشان أنا مبحبش أغيير من أساس العربيه رفضت مبدئيآ و بلغته إني أحاول أجيبها و حرجعله تاني و ده طبعآ كان بسبب إنكم أول ناس جت على بالي و بناء على اللي أنتو حتقولوه أنا حعمله و جزاكم الله كل خير

[shreef79]

السلام عليكم ورحمة الله وبركاته
انا بشكرك يا محمد سالم على الموضوع ده ويار يت اصحاب الخبرات والناس الكبار بتوع المنتدى يفيدونا في كده (نتعلم مع بعض الحاجات اللى ممكن نعملها بنفسنا في البيتلز) بدل مانروح كل شويه عند الميكانيكيه ويشتغلونا وخاصة قليلي الخبره
اخوكم شريف

[smsmxxxxxx]

اخواتى الاعزاء gomangy و حسام وشريف اهلا بيكم جميعا
واتمنى فعلا اننا نشترك فى اى حاجة اى معلومة ولو صغيرة ياريت تتقال
لان فى ناس معندهاش فكرة اصلا بالعربيات يعنى زيي كدة وابسط معلومة بتبقي حاجة كبيرة اوى


بالنسبة للاخ حسام مشكلتك دى مهمة متهملهاش
لان طالما الكونتاكت بايظ ولما بتدور بتسمع تكتكة فقط
يبقي المارش مش واصله كهرباء مظبوطة وممكن يحصله حاجة فخللي بالك دورها زق احسن

والمشكلة دى لو حلها انك تشغل العربية بمفتاح على ما تحلها يبقي خللي الكهربائي ينفذ

بس قله راجع على الكابلات الواصلة بين الكونتاكت والمارش لان لما بيبقي فى سوء توصيل
فى اى دائرة كهربائية بتسخن الاسلاك وتسيحها وتخلي الترامل تتفحم (اطراف التوصيل)

اما موضوع ان لمبة الدينامو بتنيها منورة فدى كانت عندى نفس المشكلة
هقولك حلها فى المشاركة الجاية

---------------
محمد سالم

[ابوهاشم]

السلام عليكم
استاذ محمد سالم
احييك من كل قلبى على المبادره الجميله دى
وبصراحه انت فكرتنى بايام زمان والمقابلات اللى كنا بنعملها
انا واصدقائى وحبايبى احمد حسن واحمد سالم واحمد الحسينى
وايهاب متولى واحمد رشدى وبالفعل كنا كلنا بنستفاد من بعض
وفكرة اننا نروح كلنا لميكانيكى واحد مع بعض ونبقى عزوه
فعلا ممتازه وكانت بتريحنا جدا والميكانيكيه كانو بيرضونا
بكل الطرق وكنا استقرينا اخيرا على عاطف عبده فرج
من افضل الميكانيكيه اللى اتعاملت معاهم
بالنسبه لموضوع سرفيس العربيه يفضل على الاقل كل 4شهور
وانصحكم جميعا بتركيب اشعال الكترونى يغنيكم نهائيا عن الابلاتين
والكوندنسر وتكلفته حوالى 150جنيه وبيغير اداء العربيه للافضل
وتقريبا مش هتبطل منك تانى
وكده هتبقى محتاج بس لتغيير البوجيهات فقط
اما بالنسبه لابرة الكاربراتير الافضل تغيرها هى ب25 جنيه
لان بعد كده ممكن تبطل منك ومش هينفع معاها خبط تانى
انا كنت مريت بالموضوع ده وقرفنى لحد ماغيرتها
وصدقنى عن تجربه بعد ماغيرت عربيتى ومعايا حاليا
دوجان شاهين كل الميكانيكيه زى بعض وصعب تلاقى واحد امين
ومخلص لعمله ومتمكن فى كل حاجه
واحنا بنجتهد اننا نلاقى احسن الوحشين وربنا يوفقنا
وبرضه بنحاول نجتهد اننا نحل مشاكلنا بنفسنا على قد ما نقدر
واتمنى عن قريب اسمع عن مقابلات جديه لاصحاب وعشاق البيتل
وصدقونى ياجماعه عن تجربه ترابطكم مع بعض ومقابلاتكم دى
هتفيدكم جدا وبالله التوفيق

[smsmxxxxxx]

فى مشكلة حصلتلي قبل كدة هقلهالكم النهاردة
انا كنت بدور العربية بلاقي صوت المارش ضعيف وبيدور بالعافية (بلغة السوق بيعتل)
وطبعا البطارية بتفضي على طول
كنت بدورها من عربية تانية بوصلة وامشي بيها بسرعة عالية وكنت بلاقي لمبة الدينامو برضه
منورة نور ضعيف زى عربيتك يا حسام
رحت لكهربائي سيارات عادى شحن البطارية وكشف على شحن الدينامو لقاه تمام
وبعد ثلاثة ايام لقيت البطارية فضيت

رحت لكهربائي تخصص بيتلز بس ممتاز
غير لمبة بيان الدينامو وفك الكتاوت بتاعة الدينامو وظبطها
قاللي كانت معلقة
واخد 15 جنيه بس طلعت روحه علشان يفم مسامير الكتاوت فأديته 20 جنيه
وبعدها الحمد لله العربية بقي شحنها اخر تمام واللمبة مبتنورش غير لما الموتور بيكون بارد
لانه مبيكونش اخد سرعته العادية فى اول التشغيل

الكهربائي دا محترم فعلا ومشهور جدا الناس بتجيله من كل حتة
هو اسمه محمود
موبايله 0123768020
مكانه فى الطالبية هرم جنب مصنع سيد للادوية عند فندق اوروبا فى شارع الهرم

--------------
محمد سالم

[caution]اللون الأحمر مخصص للمشاركات الإدارية فقط
القوانين العامه الواجب اتباعها لجميع الاخوه أعضاء المنتدى
مشرف الأوروبى 2 [/caution]

[smsmxxxxxx]

اخى واستاذى الكبير هاشم اشكرك على تشجيعنا واهتمامك بمواضيع البيتلز رغم انك غيرت للشاهين
بس برضه لسة فى توقيعك صورتك مع العربية البيتلز الاولى لك

وفعلا انا استفادت كتير جدا منك ومن مشاركاتك انتا وباقي الاخوة البيتلزاوية الكبار

وبالنسبة لموضوع تغيير الابرة دة كويس انك قلتهولى وقلت تكلفته

لانى فعلا كدة هغيرها احسن لانها علقت اكتر من مرة على فترات متباعدة

ربنا يبارك لك

---------------
اخوك محمد سالم

[ramremo]

سؤال بسيط بعد اذنكم ياشباب : هو يعنى ايه طقم سرفيس وده بيبقى فى البيتلز بس ولا فى كل العربيات ( معلش اصلى بتلزاوى جديد )؟؟؟

[smsmxxxxxx]

احنا بنقول سرفيس على الصيانة الدورية للعربية اللي بتتعمل كالاتى

تغيير طقم الكهرباء ويتتكون من
البوجيهات
الابلتين
الكوندنسر

وظبط موتور السيارة عن طريق الاتي
الكشف وظبط التاكيهات
تنظيف الكاربراتير وظبطه
تنظيف وظبط الاسبراتير (توقيت الاشعال)

الكشف على زيت الفرامل
رجلشة الفرامل
ودول بيتعملوا كل ثلاثة شهور (معلومة مؤكدة من حبيبنا هاشم)

تشحيم الدنجل
الكشف على زيت الفتيس وتزويده
تغيير زيت الموتور ودا بيتغير حسب نوع الزيت اللى بتستخدمه واخواتنا هنا فى المنتدى عاملين موضوع جامد عن الزيت فىه كل التفاصيل

وطبعا الحجات اللى بتعملها على طول زى
الكشف على مياه البطارية وتزويده لو البطارية سائلة
الكشف وتزويد الكاوتشات وظبطها على الضغط المناسب للبيتلز
ملاحظة اى تسريب زيت تحت العربية

دى الحجات اللى عارفها ياريت لو فى حد عارف اكتر يقول

-----------
محمد سالم

[أحمد سالم]

اطلع على الموضوع ده
ممكن تلاقى فيه معلومات كثير مفيده

http://www.nilemotors.net/Nile/46290-a.html

[gomangy]

مشكوووووور والله يعطيك الف عافيه

وبارك الله فيك

[ahit]

السلام عليكم ورحمة الله وبركاته

بفضل الله تعالى ربنا قدرنى على تعلم التالى :
1- تغيير بوجيهات
2- فك الإسبراتير بالكامل و تنظيفه و تركيبه ثانياً مع الأبلتين و الكوندينسر.
3- ظبط الكهرباء و توقيت الإشعال.
4- فك الكربراتير بالكامل و تنظيفه و إعاده تركيبه.
5- تغيير الزيت مع فك مصفاة الزيت و تنظيفها و تركيبها.
6- تغيير سير الدينامو.
7- تظبيط تقسيمة الكهرباء.
8- فك و تركيب الإشعال الإلكترونى.

و إن شاء الله نتقابل قريب كلنا و نتعلم من بعض و نفيد بعضنا لوجه الله تعالى.

لكن أعزرونى الفترة دى لأن نفسيتى تعبانه جداً بسبب رحيل أبى العزيز ( أسأل الله العظيم رب العرش العظيم أن يرحمه رحمة واسعه و أن يدخله فسيح جناته و أن يدخل الجنه مع النبيين و الصديقين و الشهداء ... اللهم آمين )

[ابوهاشم]

ربنا يرحمه ويجعله من اهل الجنه
اللهم ارحم امواتنا واموات المسلمين جميعا