مقارنة بولو 2001 مع لانسر 99

[أبو_حمزة]

كنت و عدت اخى الشربينى انى اكتب مقارنة مفصلة بين العربيتين لكن الانشغال اخرنى فأرجو منه تقبل اعتذارى
المقارنة بينهم مبنية على تقارب سعر السوق للعربيتين زائد عامل مشترك مهم و هو انى املك الاتنين و الحمد لله لفترة كافية انى اقارن
ارجو ان الكلام يكون مفيد و اليكم المقارنة

[أبو_حمزة]

المقارنة التفصيلية

[OVERLINE]وصف حالة كل من السيارتين:[/OVERLINE]
لانسر: موديل 99 1300 اتوماتيك 167 ألف كم فابريقة بالكامل صيانة كاملة بالتوكيل من أول يوم
بولو: موديل 2001 1000CC 95 ألف كم فابريقة بالكامل صيانة بمركز متخصص خارج التوكيل
كلاهما لا تستخدمان الا قطع غيار اصلية
[OVERLINE]الكماليات الأصلية[/OVERLINE]
لانسر: باور, تكييف, 4 زجاج كهرباء, فتح الشنطة و التانك من الداخل, كنبة قابلة للطى, مخدع خلفى, كاسيت أصلى, 4 سماعات, تحكم فى درجة اضاءى التابلوه, حامل للأكواب.
بولو: باور, تكييف, مساحة زجاج خلفية, تحكم فى درجة اضاءى التابلوه, تحكم فى مستوى الكشافات الامامية, نور شبورة خلفى, مفتاح ايموبلايزر
[OVERLINE]الكماليات الأضافية[/OVERLINE]
لانسر: 2 وحدة رفع زجاج, جهاز انذار, مصابيح شبورة امامى
بولو: كاسيت
[OVERLINE]التعليق والتوجيه (العفشة):[/OVERLINE]
السيارتان مميزتان فى هذه النقطة حيت تتميزان بنظام توجيه محترم يجعل قدرة المناورة عالية بالاضافة لاتزان ملحوظ على السرعات العالية
لكن رغم تميز لانسر فى هذه النقطة الا ان التفوق يسجل لصالح بولو بعفشة انعم و نظام توجيه اكثر سلاسة يجعل بولو اكثر راحة فى المطبات و اكثر ثباتا فى المنحنيات و المناورة اسهل. أما الثبات على السرعات العالية فيصعب حقا ان تقرر ايهما اكثر ثباتا فكلاهما مميز الا ان اثر الرياح العرضية (الشديدة جدا و مع سرعات فوق 130) قد يظهر بشكل طفيف مع البولو و يكاد لا يحس مع لانسر. لكن حتى فى هذه النقطة يصعب تحديد من منهما افضل
جدير بالذكر ان لانسر تستخدم كاوتش بريدجستون يابانى محترم فى حين ان بولو تعانى من كوتش رودستار تعبان. مما يشير الى ان اداء البولو فى هذه النقطة قابل للتحسن بشدة اذا تغيرت الاطارات
[OVERLINE]المحرك (السحب):[/OVERLINE]
يسجل تفوق واضح لصالح لانسر فى هذه النقطة بمحرك اكثر نعومة (صوت هادئ) و قدرة اعلى. لكن فولكس ساعدت بولو ذات المحرك الصغير (50 حصان فقط) باستخدام فتيس Close ratios يجعل استجابة السيارة مثيرة للاعجاب لكن يظل المحرك الصغير نقطة ضعف لعشاق السحب (انا مش منهم و الحمد لله)
[OVERLINE]استهلاك الوقود:[/OVERLINE]
من الاخر بولو بتوفر حوالى 35% عن لانسر فى المتوسط
[OVERLINE]الصيانة:[/OVERLINE]
نقطة تفوق للانسر حيث قطع الغيار اكثر توافرا (أصلى أو مضروب) و سهولة صيانة تجعل الصنايعى المتوسط قادر على التعامل فى حين ان بولو كغيرها من سيارات فولكس تحتاج لفنيين على مستوى عال ومتخصصين فولكس. نقطة اخرى فى صالح لانسر وهى التوكيل سواء من حيث اسعار المصنعيات وقطع الغيار أو المستوى الفنى.
أما عن اسعار قطع الغيار فهى متقاربة فى معظمها مع عمر افتراضى أطول لقطع غيار لانسر الاصلية.
[OVERLINE]الأمن والسلامة:[/OVERLINE]
كلاهما تفتقران للوسائد الهوائية. لكنهما ايضا تتميزان بقدرة مناورة تعين على تفادى المواقف الصعبة (تسبق بولو لانسر فى هذه النقطة) و فرامل قوية مع العلم ان فرامل لانسر اقوى و اكثر استجابة
[OVERLINE]الشكل:[/OVERLINE]
طبعا اذواق لكن حتى فى دى مفيش تفوق مطلق لأى منهما. حيث ان لانسر اجمل فى الشكل الخارجى (لانسر 99 من اجمل السيارات شكلا فيما ارى) الا ان الشكل الداخى من تابلوه و غيره اجمل فى حالة بولو.
[OVERLINE]الصالون:[/OVERLINE]
صالون لانسر اوسع بالذات فى الكنبة الخلفية بالاضافة لان خامات التابلوه و الابواب تعيش اكثر. موضوع فرش الابواب عيب شائع فى بولو مهما كانت عناية صاحبها بها. لكن بولو تتميز بكراسى مريحة اكتر و بفرق مش قليل زائد وضع قيادة مريح اكتر و كمان اضاءة امامية اقوى. ميزة اخرى فى بولو وضع عجلة القيادة مرتفع مما يساهم فى راحة السائق ذو الاقدام الطويلة. ديناميكية الهواء مراعاة فى تصميم بولو بشكل افضل كثيرا لتمكن من فتح جزء من النوافذ دون ان يضايق الهواء المنساب لداخل السيارة الراكب (نكش الشعر أو تعب العين). أما عن اماكن التخزين الداخلية فتتفوق فيها لانسر بشكل مطلق
[OVERLINE]متفرقات:[/OVERLINE]
مساحة التحميل (الشنطة) 240 لتر فى بولو و 430 فى لانسر (طبعا فرق واضح)
صاج بولو اقوى
سرعة لفات الموتور فى لانسر اقل ب1000 عن بولو لنفس السرعة. للتوضيح فان سرعة 120 يقابلها 3000RPM فى لانسر و 4000 فى بولو. هذا يساهم فى نعومة لانسر و يجعل السائق يشعر بالراحة (و لو نفسية على الاقل) عند السير على سرعات عالية بالذات فى السفر.

[bogyman123]

تسلم ايدك على الموضوع لانة شامل تقريبا كل حاجة

[mr_sameh]

ممتااااااااااااااااااااااااااز

[ahmed_gman]

رأى محايد !!!!!!!!!
ولكنى اشتم رأئحة التحيز لصالح الانسر مش عارف ليه هههههههههههههههههههه
عامتآ جزاك الله خيرآ وتسلم ايدك وربنا يستر طريقك ويباركلك فى الاثنين ويكفيك شرهم
حقيقى مقارنة جيدة جدآ

[snakeson2]

تسلم مقارنة جميلة

[original]

الله ينور عليك..

[M.Mostafa80]

فى مثل بيقول القديمه تحلى هههههههههههههههه
بهرج معاك يابو حمزه
بس انا مختلف معاك فى موضوع الثبات فوق سرعه 130
الثبات فى البولو افضل ودا عن تجربه وبدون اى تحيز أطلاقا

[elshrpeny]

بسم الله ما شاء الله
إيه الحلااوه دى يا أستاذ sabbagh دا انت مسبتش حاجه الاا ما قولتها
بس بجد انا متشكر جدا على تعبك ومجهودك دا وعلى تلبية طلبى على قدر المستطاع
ويا سلاااام بقى لو كان عندك كمان واحده اوبل إسترا 2000 او 2001 كانت بقت مقارنه فوق الممتازه
بس دا ميمنعش برده انها مقارنه ممتازه الله يكرمك

[elshrpeny]

بس نسيت أقولك حاجه الانسر فيها مفتاح مشفر ونظام تكنولوجى بالكمبيوتر زى البولو ال 2000 ولا لاء لانى تقريبا على حد علمى اعرف ان مفتاح الانسر مفتاح عادى وكمان مفيهاش مكان لكابل كمبيوتر وتقريبا برده مفيهاش نظام تكنولوجى زى البولو عامتاً
صح ؟

[أبو_حمزة]

بصوا لو نفس الكلام اتحط فى صفحة لانسر ناس هناك هتقول ان فيه تحيز للبولو
المهم ان طول ما كل واحد راضى عن عربيته وشايفها احسن حاجة يبقى نحمد ربنا على نعمة الرضا

بس نسيت أقولك حاجه الانسر فيها مفتاح مشفر ونظام تكنولوجى بالكمبيوتر زى البولو ال 2000 ولا لاء لانى تقريبا على حد علمى اعرف ان مفتاح الانسر مفتاح عادى وكمان مفيهاش مكان لكابل كمبيوتر وتقريبا برده مفيهاش نظام تكنولوجى زى البولو عامتاً
صح ؟

المفتاح المشفر (ايموبلايزر) مو جود فى بولو و غير متوفر فى لانسر
اما عن الكمبيوتر فلانسر فيها لمن ليس بدرجة التطور الموجودة فى بولو و تقريبا لايهتم احد بقراءة معلومات كمبيتر لانسر لان حجم الينات اللى بيوفرها اقل كتير من البولو و على فكرة دى من سمات.العربيات اليابانى (تكنولوجيا اقل = صيانة اسهل)

ويا سلاااام بقى لو كان عندك كمان واحده اوبل إسترا 2000 او 2001 كانت بقت مقارنه فوق الممتازه

معلش لم يسعدنى الحظ بتجربة استرا بس مين عارف

فى مثل بيقول القديمه تحلى هههههههههههههههه
بهرج معاك يابو حمزه
بس انا مختلف معاك فى موضوع الثبات فوق سرعه 130
الثبات فى البولو افضل ودا عن تجربه وبدون اى تحيز أطلاقا

اكيد القديمة تحلى ده حتى من فات قديمه تاه
بس صدقنى ثبات لانسر مش وحش زى ما انت فاكر و يمكن تجربتك كانت فى عربية فيها مشكلة
الثبات بيتأثر جدا بحالة الكوتش و متوقع ان ان شاء الله لما اغير الكوتش بولو تبقى ثباتها افضل (اللى هو اصلا متميز فى الوقت الحاضر)

[elshrpeny]

المفتاح المشفر (ايموبلايزر) مو جود فى بولو و غير متوفر فى لانسر
اما عن الكمبيوتر فلانسر فيها لمن ليس بدرجة التطور الموجودة فى بولو و تقريبا لايهتم احد بقراءة معلومات كمبيتر لانسر لان حجم الينات اللى بيوفرها اقل كتير من البولو و على فكرة دى من سمات.العربيات اليابانى (تكنولوجيا اقل = صيانة اسهل)

انا على فكره كنت شبه متاكد من كدا بس حبيت أتأكد من صاحب العربيه نفسه
وفعلا على رأيك مع ان دى المفروض انها ميزه بس عيبها انها لازم يتكشف عليها كمبيوتر عشان الاعطال انما الانسر زى السكينه فى الحلاوه صيانتها فى السريع

معلش لم يسعدنى الحظ بتجربة استرا بس مين عارف

لا يا باشا ولا يهمك انت كدا كتر خيرك عملت الى عليك وزياده انا بهزر بس
اصل الحكايه انى كنت هدبس بعيد عنك فى استرا 2000 بمحرك 1200 سىسى بس جبت بولو عشان برده الحاله هيه الى حسمت الامر وكنت اما بركبها بتعجبنى فكنت بقى عامل المقارنة الثلاثيه على الاساس دا عشان اعرف مميزاتها إيه الى مكنتش فى البولو الى معايه ولانسر طبعا عشان كان فى ناس كتير جدا بتزن عليه أجيبها وهيه فعلا كانت ولازالت عجبانى بس البولو كنت بفضلها أكتر لانها شبابى أكتر والشكل وكدا يعنى بس

متوقع ان ان شاء الله لما اغير الكوتش بولو تبقى ثباتها افضل (اللى هو اصلا متميز فى الوقت الحاضر)

انا أعتقد يا أستاذ صباغ انك لما إن شاء الله تغير لنوع كوتش محترم زى مثلا بريدجستون الى تقريبا انت مركبه فى الانسر ساعتها هتحس بالفرق الى محمد مصطفى بيقول عليه وزياده كمان

[د.محمود صلاح]

الف شكر على الموضوع المميز , بس كنت بأستفسر عن قوة التكييف في البولو وتأثيره على الموتور أثناء السحب

[أبو_حمزة]

التكييف

التكييف نقطة اغفلتها
اداء كلا السياراتين يتأثر سلبا بشكل واضح عند تشغيل التكييف (السحب بيضعف جدا واستهلاك الوقود يزيد حوالى 10%)
اما عن اداء نظام التبريد نفسه فلانسر تتفوق بمروحة أقوى كثيرا و يزيد اثر قوة المروحة فى الكنبة الخلفية
لكن بيعجبنى فى بولو ان الهواء الخارج من فتحات التكييف بيتم دفقه داخل الكابينة بشكل مشتت وغير مركز عكس لانسر. مما يقلل فرص الاصابة بنزلات البرد نتيجة تركيز الهواء البارد و اصطدامه مباشرة بالوجه و الصدر ويزيد الاحساس بالراحة. نقطة اخرى بتعجبنى جدا فى بولو و هو ان كمبريسور التكييف اكثر نعومة يعنى الاحساس به و هو بيشتغل و يفصل يكاد ينعدم اما لانسر فبتحس بيه جدا لان صوته واضح مع العلم ان الكمبريسور سليم و الحمد لله و لكن هو كده.
يعنى اداء التكييفين متقارب لكن قوة مروحة لانسر بيزيد الاحساس بكفاءة التكييف مع تصميم اكثر اتقانا لفتحات خروج الهواء فى بولو
و كلا التكييفين تقيمهم عندى متوسط. فى ايام الحر الشديد و التعرض لاشعة الشمس يستغرقان 5-15 دقيقة للوصول للاحساس بالراحة حسب الحر و الزحمة و الشمس. ولو العربية مركونة فى الشمس لمدة ممكن التكييف ما يوصلش للتبريد المطلوب. انما بالليل كليهما جيد جدا و بفضل البولو عشان النقط اللى قلتها قبل كده

[M.Mostafa80]

الله ينور عليك يأبو حمزه والله