اول مرة فولكس

[essam275]

السلام عليكم و رحمة الله
ايه رايكم كل واحد راكب فولكس او ركب فولكس قبل كدة يخش يحكى عن اول مرة و ايه كان احساسه و هو سايق عربية مش شايف رفارفها بس حاسس بيها و يمكن يكون دة السر اللى بيخلينا نحبها للدرجة دى انك مش بتشوف حدود العربية لازم تحس بيها و هابدا انا
كان لية واحد صاحبى عنده واحدة 1300 موديل 66 المهم ربنا كرمه بسفرية بعد فترة قصيرة من شراء السيارة و بحكم صداقتنا كنت تقريبا انا متولى كل مصالحه فى مصر خاصة ان والده سنه كبير و مش بيسوق فبدات انى اقضى ليهم مشاوير بيها و اهى فرصة العربية تتحرك لان هو ما كنش رافعها وبدات انا اتلكك و اخترع اى حاجة علشان العربية تفضل معايا اطول فترة ممكنة
(فى حاجة مهمة سواقة الفولكس احساس تانى خالص غير انك تقعد جنب حد سايق)
وهنا بدات اعراض اصابتى بفيروس v1w1

1 قمة الفرحة لما والده يقولى تعالى نروح للدكتور مثلا او نخلص حاجة فى اى مصلحة.
2 اخترع اى حاجة علشان العربية تفضل معايا مثلا انى سمعت صوت مش مطمنى و لازم اروح بيها للميكانيكى او العفشجى اهى اى فكرة شيطانية و السلام.
3 قمة الزعل و انا برجع العربية للجراج بعد استنفاذ كل الحيل الشرعية و الشيطانية

صدقونى كنت بلغى اى مشوار اى كانت اهميته لو جتلى فرصة انى اركبها وهنا اكتشفت انى مصاب بالفيروس v1w1 وقررت ان العربية دى تبقى بتاعتى و فى اول اجازة لصاحبى قلتله انا هاشترى العربية دى و اتفقنا وبقيت بتاعتى لكم ان تتخيلوا انى قعدت اول يومين من غير نوم زرت ناس بقالى مدة مشفتهاش علشان مشوارهم بعيد كان كل همى انى اسوق اطول فترة ممكنة وبس
من الاخر الفولكس ادمان يعنى الاول تجرب و بعدين متقدرش تبطل لانى بعد سنة من بيع السيارة بسبب انى محتاج حاجة اكبر علشان بقى عندى 4 اولاد مش مقتنع باى عربية تانية لغاية ما اشتغلت نفسى وقلت استنى شوية واجيب زيرو بس غالبا هتكون فولكس وحتى الان مش قادر اشفى منها على الرغم انى حتى الصور مسحتها من الجهاز بس هيهات
اسف على الاطالة و ياريت كل واحد يخش يقول تجربته مع (اول مرة فولكس)

[TeMoON]

انا اول مره اسوق عربية فى حياتى وكان عندى 15 سنة كانت جولف 2 موديل 90 وبصراحة كانت عربية اكتر من رائعة ومن يومها وانا ادمنت حاجة اسمها فولكس واجن ولما اخويا اشترى بورا فعلا انا اتعلقت بشركة فولكس وعربيتها جدا لاقصى الدرجات لان العربية دى فعلا كانت اكتر من رائعة وتحفة وادركت فعلا وفهمت يعنى اية فولكس واجن ولما قرر ولدى انة يشتريلى عربية سنة 2002 اول حاجة قولتهالو جولف 3 ومش عاوز غير جولف 3
يقولى شفتلك اوبل فيكترا اقولة لا
يقولى انا كان ادامى دايو جوليت قولتلو لا
وعربيات تانية انا مش فاكرها ولما زهق منى اشترى بيجو 206 والمفروض انها كانت ليا والعربية جات وماكنتش عجبانى واقنعت نفسى بيها وبردو ما حبيتهاش والعربية نفسها ما ارتاحتش معايا وكأننا اعداء والحمد لله خلصت من 206 ب بيجو 406 وكانت فعلا عربية اكتر من محترمة واكتر من رائعة لكن حلم الفولكس كان فى دماغى من كل وقت لتانى والحمد لله دلوقتى معايا عربيتى الجيتا وبحمد الله عليها لانها فعلا عربية الحمد لله اكتر من تحفة وفعلا انا عرفت يعنى اية سيارات المانى والى يجرب فولكس ويعرفها فعلا يعرف اد اية الشركة دى اسطوره فى سياراتها الاكثر من رائعة عشان كدا انا مقتنع انة لا يوجد افضل من الصناعة الالمانية فى صناعة المحركات والسيارات والماكينات لان فعلا الناس دول ما وصلوش للى هما فية دا من فراغ والى مش مصدق كلامى يجرب يسوق عربية فولكس او عربية المانى بعيد عن opel