دبرياج بيتلز

[beetleMOSH]

السلام عليكم ...
ازيكم يا اخوانى من يومين كدة ركبت العربيه و دورت و كله تمام دست ديبرياج و هادى الاولانى لقيت صوت الموتور على كدة سنه برفع دبرياج و بدوس بنزين بقة و هاتوكل على الله
الاقى العربيه كلها بتترج كده و كانها مش عارفه تطلع و فى خشونه كده شويه ف صوت الموتور المهم يعنى فى حاجه مش مظبوطه ... الغريب بقى ان الموضوع دة بيحصل كتير بس احيانا مش بيحصل بس قليل يعن ... مش عارف ده كدة ايه طقم دبرياج ولا الدبرياج عايز يترجلش ولا ايه

[sakr84]

بص ياباشا انا الموضوع ده كان عندى بالظبط ومكنتش عارف ده من ايه وكنت كل ما اجى ادى نقله وادوس بنزين العربيه تترج ومتسحبش وده فى اول كل نقله وكنت فاكر انه حاجه فى الدبرياج او الفتيس المهم طلعت مشكله هايفه جدا الكهربا عندى كانت واطيه خالص بس بصراحه معرفش وطيت من ايه رغم انها كانت مظبوطه روحت لواحد ميكانيكى جمبى لانى كسلت اروح لحد من بتوع الفلوكس يعنى عاطف عبده اللى فى اثر النبى او الحاج محمد على بتاع جسر السويس فشوف كده موضوع الكهربا ممكن تكون واطيه وفى حاجه تانيه ممكن تكون سبب الموضوع ده شوف البوجيهات ممكن يكون فيها حاجه تبرجل العربيه كلها وانصحك تروح لعاطف عبده فرج اللى فى اثر النبى علشان متروحش لحد يعكلك الدنيا بس لما تروحله متقلوش انك شاكك فى الدبرياج انت تقوله باللى حاسس بيه فى العربيه وهو هيركب العربيه وهيحس بيها وان شاء الله تطلع حاجه بسيطه

[sakr84]

عايز اضيف لمعلوماتك كمان انك لو بترجع لورا ولاقيت العربيه عماله تقطع وتترج جامد ده هيكون بنسبه كبيره كهربا واطيه

[beetleMOSH]

مشكور صقر باشا على الرد ... بس موضوع الرجه ده فى الاول و ف التانى شويه ... ومش موجود و انا برجع بالعربيه ... بس معتقدش انه كهربا .. لان ساعات بدى الاولانى و اطلع تطلع عادى مع انها كانت لسه بتترج .. و بعديها برضه تطلع اولانى تلاقهيا بتترج ... و انا ان شاء الله هانزل اروح للحاج محمد على لانه الاقرب .. و ان شاء الله اقولكوا ايه السبب ......مكشوووووووورر:b4_007:

[sakr84]

صدقنى كان نفس الاوصاف اللى انت بتقولها دى هى اللى كانت بتحصل عندى ولاقيتها كهربا وكمان كان عندى بوجيه عايز يتغير واحيانا كانت تترج واحيانا لا فى الغالب ان شاء الله تطلع ظبط كهربا وبس رغم انى برده كنت متخيل انها حاجه كبيره وعايز اعرف منك حاجه مهمه اوى هو الحاج محمد على دلوقتى اللى بيكون موجود فى الورشه ولا ابنه عمرو ياريت لما تروح تبقى تقولنا عملت ايه وهل الحج محمد على بيروح الورشه ولا مبيروحش

[ramremo]

على فكره يا استاذ تامر العربيه عندى كويسه فى الغيارات العاديه بس لما برجع لورا بتقطع منى هل ده ممكن يكون من الكهربا بردو ولا حاجه تانى --- انا بحاول لما برجع ورا اسندلها بالدبرياج علشان متقطعش وبردو مفيش فايده ---- ايه الحل ؟؟

[DIDO_EL_DIDO]

موضوع الرجه ده فى الاول و ف التانى شويه ... ومش موجود و انا برجع بالعربيه

اضافة الي كلام اخوي العزيز صقر
1- اذا كانت الرجة شديدة في الاول فقط ولا تظهر في باقي الغيرات مع ثقل في باقي الغيرات
تكون البلية بتاعت الدبرياج تحتاج الي تغير( لا اتذكر السعر ولكن اقل من 50 جنيه) ويمكن تزيتها بوضعها في الزيت الساخن.
2- يستحسن الكشف علي الديسك(150 جنيه استيراد حالة الفبريكة) والاسطوانة(100جنيه) اذ يمكن ان يسبب احدهما نفس الاعراض مع اختلافات بسيطة
3- من اهم مظاهر تلف بلية الدبرياج هو عدم انتظام الرجة سابقة الذكريعني تحصل مرتين ومرة لا
4- لمعرفة اذا كان العيب من الكهرباء او لا يمكن ملاحظة صوت الماتور اذا كان بيرتل او غير منتظم (يستحسن مرجعة طقم الكهرباء قبل تنزيل الماتور او الكشف عن طقم الدبرياج)
5- يستحسن مرجعة حالة الفتيس هل هو سهل الحركة ام ثقيل وانت بتنقل هل يصدر صوت يدل علي عدم التعشيق للغيار (مرجعة سلك الدبرياج(20جنيه) وفبرة الفتيس(25)جنيه )
والله اعلم
وفي انتظار باقي الردود ليستفيد الجميع
تحياتي لكل البتلزوية
سلام

[DIDO_EL_DIDO]

و الحاج محمد على دلوقتى اللى بيكون موجود فى الورشه ولا ابنه عمرو ياريت لما تروح تبقى تقولنا عملت ايه وهل الحج محمد على بيروح الورشه ولا مبيروحش

اخر مرة كنت عند الحاج محمد من 3 اسابيع وعرفت انه تعرض لوعكة صحية بس قام منها الحمد لله ورجع ينزل الشغل تاني بانتظام في الورشة .
اتمني ان ربنا يديلة الصحة مش عشان العربية ولا حاجة
لا عشان هو راجل طيب وامين ويستهل كل خير

[beetleMOSH]

مشكورين يا اخوانى على الرد و الاهتمام ...
و انا رحت للحاج محمد على و علالى الدبرياج شويه و قالى ان ده الديسك تعب ... وقالى سايس العربيه فالطلعه لحد ما تعمل الديسك .... المهم مشيت من عندة و الفتيس بقى جميل ( كان فى عضه فاغيارات قبل كدة ) و بنقل بسهوله ... عملت كام مشوار .. و اذ فاجأتنننن كدة و انا بهدى على مطب و بدوس دبرياج اجيب التانى ... الاقى صوت غريب و دوواسه الديبرياج خفيفه ... و ادوس عليه اسمع صوت شخلله و حاجات غريبه .. طبعا مفيش ديبرياج و مفيش غيارات طبعا بقيت ارزع اولانى و تانى عشان اعرف اروح ... طبعا الناس متستناش على حد و قله ذوق و كان يوم عصيب .. معرفش بقى ده كدة سلك اتقطع ولا ديسك انتهى ولا اسطوانه ... الحمد لله على كل حاجه ... و ان شاء الله اقولكوا على الاخبار اول ب اول .. و معلش طولت عليكو و دوشتكوا بس بجد مخنوق اوى بس الحمد لله على كل شىء

[sakr84]

على فكره يا استاذ تامر العربيه عندى كويسه فى الغيارات العاديه بس لما برجع لورا بتقطع منى هل ده ممكن يكون من الكهربا بردو ولا حاجه تانى --- انا بحاول لما برجع ورا اسندلها بالدبرياج علشان متقطعش وبردو مفيش فايده ---- ايه الحل ؟؟

على حد تجربتى المحدوده الموضوع ده عندى كان كهربا واطيه وعايز اقولك كمان لما كانت الكهربا واطيه عندى كنت لما اجى اسخن العربيه الصبح ادوس بنزين ولما انزل انضف العربيه ورجلى تتشال من على البنزين القيها تفضل دايره شويه وتقعد تطلع صوت لغايه لما تقطع اقوم ادخل العربيه وادور تانى كل ده راح بعد الكهربا ما اتظبطت

[ramyheshmat]

مشكلة كهرباء ولا سخان

على حد تجربتى المحدوده الموضوع ده عندى كان كهربا واطيه وعايز اقولك كمان لما كانت الكهربا واطيه عندى كنت لما اجى اسخن العربيه الصبح ادوس بنزين ولما انزل انضف العربيه ورجلى تتشال من على البنزين القيها تفضل دايره شويه وتقعد تطلع صوت لغايه لما تقطع اقوم ادخل العربيه وادور تانى كل ده راح بعد الكهربا ما اتظبطت

على فكرة فيه سخان في الموتور ويمكن يكون مش مظبوط عشان كده لما ترفع رجلك من البنزين العربية بتبطل والسخان مهمته عند التسخين هو بدل ما تدوس بنزين هو بيقوم بالوظيفة دية لحد ما العربية تسخن كويس وبيكون الصوت عالى عند البداية و بيفصل بعد كده لما تدوس دوسة بنزين خفيفة وتلاقي صوت العربية بقا طبيعي

والأخ اللى عنده مشكلة الديسك أنا مريت بالمشكلة دية قبل كده ولما فكيت الموتور عشان أشوف الديسك لاقيت البلية اللي فيه انكسرت وهي اللى عملت الدوشة والصوت العالي ده وللأسف كسرت ريش الديسك والرعشة اللى في بداية الطلعة دية اكيد ديسك أو يمكن الجراب بتاع الدبرياج يا ريت تراجعهم كويس

[ahit]

ريح دماغك و هات ديسك و إسطوانه و بليه إستيراد نمرة واحد
و لو الميزانية تسمح هاتهم جديد أفضل بس المهم نفس الماركة
و راجع بالمرة على حالة سلك الدبرياج

[beetleMOSH]

مشكورييين اخوانى ... انا لسه معملتش حاجه فالعربيه و راكنها بجد تعبت منها و من مصاريفها ... سألت على الديسك الاسطوانه جدااد 550 جنيه
و البليه ب 85 ..طبعا ده لسه المصنعيه و عندى كام حاجه كماااان عايزين يتعملوا ... يعنى ميزانيه 1000 جنيه كده .. يلله الحمد الله
بس هو فعلا انا اعتقد ان السبب الاساسى هو موضوع البليه ده ... و ربنا يقدم اللى فيه الخير ... اسف على الاطاله
تقبلوا تحياتى

[beetleMOSH]

تم اصلاح السياره اخيرا الحمد لله عند الحاج محمد على و ابنه عمرو محمد على
و بعد الكشف على السياره اتضح ان السبب فى كل البهدله دى ان ال ( فورررش)بتاع البليه كان مقطوم و بالتالى طبعا مفيش حاجه بتحرك الديسك و الاسطوانه
و الحمد لله الديسك و الاسطوانه طلعوا سلام و زى الفل
و البليه كمان و كلوا كان تمام الحمد لله و تم تغيير الفورش و الحمد لله زوزه رجعت تانى لحياتها الطبيعيه
و مشكورين اخوانى على تبادل المعلومات و و النصائح
تقبلوا تحياتى