بيتل موديل 65

[abdallh_magdy]

السلام عليكم

شباب البيتل - انا بقالى فتره بدور على عربيه تكون فى مستوى امكانياتى " ميزانيه ضعيفه جدا" وبدور على كونتاكت ومصراوى ووقعت على عربيه بيتل كحلى موديل 65 .
انا عارف ان الموديل قديم شويه بس انا امكانياتى متجيبش اكتر من كده
العربيه معروضه على 8000 جم وانا لسه حروح اشوفها .
تنصحونى بأيه وانا بفحصها وايه اللى اراجعه
علما بانى مشوايرى مش كبيره .
كبيرى اتحرك بيها مره او اثنين فى الاسبوع مشاوير صغير ه+ لو مره فاتتنى عبية الشغل "مشوار لذيذ على الاوتوستراد - من 15 مايو حتى وسط البلد + مشوار المعادى وده مش كتير (1،2 ) كل شهر وان كان مره للسفر او اثنين كل سنه .
انا عارف ان البيتل من العربيات المعمره اللى ميهمش فيها الموديل على عكس معظم السيارات .
فتنصحونى بأيه اراجعه علما بأن ميزانية السياره لدى حوالى 10000جم والباقى ححتاجه لمراجعة السياره وتوضيبها .
السياره ملك راجل كبير فى السن وده مشجعنى اوى اشوفها .ارجو الرد سريعا لأننى احتمال اتفرج عليها غدا .
ساعدوووونى حتى انضم لنادى العظماء "ملاك البيتلز بالمنتدى الافضل للسيارات بمصر"

والف شكر ليكم
اخوكم : عبدالله

[ramremo]

من رأيى انك تروح تشوفها وياريت لو تاخد معاك ميكانيكى يكون ثقه -- واهم حاجه تبص عليها الرقبه فى العربيه من قدام +الشاسيه نفسه من تحت ويجى بعد كده الفعوصات والخبطات(ان وجدت) على الجسم الخارجى ... وربنا يوفقك وطبعا صلاة استخاره قبل كل شىء -- ونتشرف بحضرتك مالك جديد من ملاك المعشوقه البيتلز

[Porsche911TT]

السلام عليكم ورحمة الله وبركاته

فعلاً كلام ramremo صح, ضروري تاخد ميكانيكي معاك.

في واحد صاحبي اشتراها من حوالي 4 اشهر كده بعد لما رجحتهالو عن السيات, برضة نفس الموديل بس خدها بسته ونص, وبصراحه العربية كانت مكنتها كويسة لكن الصاج كان مقشر من قدام و مخبوط من عند الرفارف كالعاده, وعلى فكره مش أي ميكانيكي بيفهم في العربية دي, لكن في حالة انك هاتروح لوحدك اتأكد من شوية حجات مبدأياً قبل لما تاخدها لميكانيكي:


اسمع صوت المكنة ان مايكونش فيها صوت تخبيط لو في صوت تخبيط اخلع لأن ده دليل ان المكنة خفيفة يعني مهرية من جوه.
اتأكد ان الفتيس بينقل كويس من غير خشونه.
اياك والصدأ.
حاول تبص تحت العربية من قدام تشوف الدنجل سليم او حتى معوج ولا لأ, هو شكلة عمودين حديد فوق بعض ماسك فيه العجل.
زود بنزين وسيب فجأة لو لاحظت عدم اسقرار في صوت الموتور وانت مش مزود ليه احتمالات كتير منها الكهربا بايظة او الكاربرتر مش نضيف.
لو العربية بتضرب مدافع من الشكمان وانت ماشي او واقف غالباً عايزة طقم كهربا.
اتأكد ان المكنة مش متلتة يعني ماشية بتلاتة سلندر او اقل من اصل اربعة, والمكنة دايرة تخلع كبل من الكوندسر واحد واحد وتحطه تاني ماعدا الكبل اللي في النص, لو شلت كبل و ملاحظتش فرق في صوت المكنة يعني في سلندر طاير او ممكن يكون عيب كهربا


وأهم من ده كله يكون الموتور ألماني غير كده زي البرازيلي او المكسيكي مش مفضل, وربنا يبارك فيها ويكفيك شرها.

[amo400]

http://www.nilemotors.net/Nile/150515-a.html

[Porsche911TT]

ألماني ولا برازيلي ياجميل؟؟

[ahit]

الله ينور عليك يا بورش
كلام أساتذه بجد
جزاك الله خيراً

و كلام رام ريمو 100% سليم و خاصة فى صلاة الإستخارة
بارك الله فيكم
و ربنا يوفق صاحب الموضوع فى عربية سليمة و بسعر متهاود

[Porsche911TT]

الله ينور عليك يا بورش
كلام أساتذه بجد
جزاك الله خيراً

وإياكم ياجميل الله يخليك

[Porsche911TT]

معلش انا قصدت الاسبراتير طبعاً مش الكوندنسر في أول مشاركه :)