ساعدوني اعمل ايه

[adelmagdy]

يا جماعة انا كنت بقالي من ساعة ما قولتوا ان الحاج محمد علي بتاع البيتلز ده كويس وانا بروحله وبعمل السرفيس عنده وانا اصلا العربية ما بتتحركش علشان معايا عربية تانية المهم من شهر قولت ابيع وكنت عارض العربية علي 15000 واول زبون جه قالي ماشي بس نروح عند الميكانيكي قولتلو ماشي روحنا للميكانيكي قالنا عايزة طقم شنبر والبيعة ممشيتش رجعت لعمرو قولتلو حصل كذا كذا قاللي تعالي دور العربية دورت قاللي انت شايف دخنة بيضا قولتله لا قالي يبقي عايزة طقم شنبر ازاي؟ بعديها بكام يوم جالي واحد تاني المهم اتفقنا علي 14000 وقالي نروح للميكانيكي بالرغم من الناس قالولي ماتروحش بعربيتك لحد اللي عايز يشتري يجيب ميكانيكي معاه وبالرغم من كده قولتلو تعالي روحنا لعزب قاللي الماكينة عايزة سبيكة كرنك سيبته ومشيت المهم بعديها باسبوع كلمني واحد قعد يقوللي حخلص ب10000 طبعا قولتلوا سيبني افكر وانا الصراحة ما بحبش اكسف حد فانا قولت اققفل معاه علشان ما يتصلش تاني المهم بعد اتصالات كتير وانا انفضله قالي 13000 دول اللي هاقدر عليهم وانت زي اخويا قولتلو برضه سيبني افكر المهم تاني يوم كلمتوا قولتلو اوك قالي ماشي بس تروح للميكانيكي بتاعي قولتلو تجيب الميكانيكي بتاعك واهلا وسهلا بيك المهم اتفقنا علي معاد لاقيته جاي بطوله المهم اديتله المفتاح دور العربية وبعدين قاللي اكبس بنزين وبعدين ركب مشي بالعربية متر قدام و متر ورا نزل قاللي اوك انا عايز اخلص كل حاجه بكره قولتله ماشي بس العربية عايزة تيل واللي قبليك كان هيدفع 14000 وكنت هاعمله التيل علي حسابي بس في حالتك ده انا حادفع التيل وانت تدفع المصنعية قالي تمام وبالفعل اتصلت بعمرو قاللي التيل 50 جنيه والمصنعية 40 كلمته قولتلة المصنعية 40 قالي ياه كتير اوي قولتلو ما تقلقش انا هاكلم عمرو علي المصنعية وبالفعل تاني يوم الصبح صحيت نزلت المرور جبتله شهادة المخالفات وكلمته قاللي نتقابل عند الحاج محمد قولت اوك روحت عقبال ماحاج محمد فتح وفطر وابتدي يشتغل في العربية طبعا الواد قعد يسئلو العربية كويسة الحاج يقوللو كويسة المهم كلمت الدليل علشان اعرف الشهر العقاري بيقفل امتي قالولي 4 المهم قولتلو الشهر العقاري بيقفل 4 والساعة 2:30 نلحق نروح عقبال ما لحاج يخلص التيل قاللي اوك روحنا وانا الصراحة اول مرة ابيع عربية روحنا الشهر العقاري قالي اعملي بيع بتوكيل قولتلوا ليه مس حتسجل فالي معيش فلوس تسجيل قولتلو ماشي روحنا وخلصنا التوكيل في العقاري من غير ما اعمل غقد ابتدائي مانا جديد بقي رجعنا والحاج محمد علي كان عايز 70 طلعت 50 وهوه طلع 20 ومافسش يدوبك طلعنا علشان يوصلني عند العربية قاللي ممكن تملالي بنزين اصلي ماعيش فلوس استغربت الصراحة قولتلوا ماشي المهم وصلني عند عربيتي اديتو الكوريك والطفاية المهم تاني يوم كلمني يا باشا العربية عايزة موتور قولتلو الميكانيكي اللي روحتلو بيشتغلك بالرغم ان الحج محمد علي قالو اللي بيتكلم في العربية دي كتير بما معناه ان اسهل حاجة عند ميكانيكية الفولكس انو يقول عمرة المهم قولتلو بعد اذنك روح لميكانيكي تاني المهم غاب اسبوع وكلمني قاللي الميكانيكي بتاعك هو كمان قاللي العربية عايزة عمرة قولتلو طيب انا حاكلم عمرو وفعلا كلمت عمرو قاللي لا مجاليش قولتلو طيب يا عمرو انت برضه ادري بعربيتي العربية عايزة عمرة؟ قاللي يا عم بلاش الناس تشتغلك عربيتك كويسة لا في ترزيع ولا دخنة بيضا المهم بعديها الواد كلمني وقاللي انا واخد منك العربية ماتحركتش بيها من ساعة ما اخدتها وكده مينفعش وانت كده غشتني قولتله علي فكره انا كلمت عمرو وقاللي انت ماروحتلوش توه في الكلام يا عم في ميت واحد زي عمرو المهم قالي انا عمي في شرطة قولتلو ياسلام عزو عايز تزصلها لشرطة نوصلها للشرطة فطبعا ملاقاش رجا في الموضوع ده قاللي طب انت قدامك حل من التنين يا ترجعلي 1000 حنيه يا اما ارجعلك العربية قلتلو لو رجعت العربية هيبقي في شرط جزائي كبير علشان انت خلاص خلصت في العقاري وانا شايف الشرط الجزائي مش هيبق اققل من 3000 علشان العربية معاك اسبوع المهم قعد يجر ناعم وساهم معايا بالف جنيه المهم احرجني قولتلو طيب انا ممكن اديك 500 جنيه بص اصبر علي كام يوم مش عارف اديله الفلوس ولا ايه انا شاكك في موضوع العمرة ده والعربية لم تستخدم وكانت ماشية وطبعا كل الناس بتقوللي ولا تعبره

[smsmxxxxxx]

واضح من كلامك انك انسان عنده ضمير
لان لو كنت وحش كنت طنشت الراجل ومكتبتش موضوع من اصله هنا

علشان تضمن البركة في فلوسك روح لميكانيكي ماتعاملتش معاه قبل كدة ويكون ثقة
انا برشحلك عاطف عبده فرج
عند جراج اثر النبي
تليفونه 0101467431
واحكيله القصة بالظبط

و شوف رأيه وشوف هتتكلف كام واتفق مع الشارى على نسبة تدفعها

حتى لو هتدفع 1000 جنيه زى ما هو عاوز مش مشكلة علشان ربنا يباركلك في فلوسك وفي عربيتك التانية


ويمكن عمرو ومحمد على عارفين ان فيها مشكلة بس في مبادئها والعربية شغالة كويس
بس طالما طمنك في الاول مش ممكن يغير كلامه علشان ميبقاش الميكانيكية التانيين بيفهموا اكتر


-----------
محمد سالم

[hosamsief]

من المفترض ان الشاري بيعاين العربية معاينه نافيه للجهاله قبل ما يشتريها اصلا و لازم يجيب ميكانيكى من طرفة يشوفها علشان يكون مطمن لكن لو هو جازف و اشترى علطول يبقى خلاص فى العرف القانونى مالوش حاجه عندك خالص --- انما انت لو شاكك فى حاجه بينك و بين نفسك و عارف ان العربية فيها مشكلة يبقى حرام كلنا ماشيين على طريق و ممكن تساهم معاه تفضلا منك بص كان لازم الامور تبقى واضحه من البداية يعنى يجيب مكانيكى من عندة و لو قاله حلوة يبقى خلاص مجبش تبقى مشكلته هو ان شالله يكون فيها موتور غساله -- بس الاقرب للتقوي انك لو فيها مشكله فعلا توضحهاله علشان تبعد عن حرمانية الغش و ربنا يوفقك

[ahit]

وائل باشا
ربنا يصبرك و يعينك على الراجل ده
و أنا مع كلام محمد سالم و حسام سيف

[hugan]

الواد ده شايفك اخلاقك عاليه قوي
وهو شخصيه تييت
علشان كده هو عايز يعمل عليك اي مصلحه
لو هو شاري العربيه دي من السوق
كانو ضربوه بال------------
لو هو عايز يرجع البيعه يدفع 1000
ده المتعارف عليه في بيع وشراء السيارات في مصر

[wawamoha]

الواد ده شايفك اخلاقك عاليه قوي
وهو شخصيه تييت
علشان كده هو عايز يعمل عليك اي مصلحه
لو هو شاري العربيه دي من السوق
كانو ضربوه بال------------
لو هو عايز يرجع البيعه يدفع 1000
ده المتعارف عليه في بيع وشراء السيارات في مصر

+11111

هو بيع العربيات بقى فيه لكلك
بس لو عاوز تخلص ضميرك بس و من غير ما تحس انه مبرشت عليك او فارض عليك الحل ده سيب له 500 جنيه لو عاطف عبده فرج قال هيا عاوزه حاجه
و لو ما عجبوش يبق ما فيش غير انه يخسر 1000 جنيه و يرجعلك العربيه

ربنا مع الحق

[adelmagdy]

انا قابلته واديتله 500 جنيه و ربنا اكيد هيعوضني لو هو كداب

[wawamoha]

انا قابلته واديتله 500 جنيه و ربنا اكيد هيعوضني لو هو كداب

عداك العيب و ذمتك بريئة منه باذن الله