اول صيانه للبولو

[Mahmoudyoussif]

زي ما اعضاء المنتدى الله يبارك لهم وقفوا جنبي في موضوع شراء السياره

الي الميكانيكي و خلافه النهارده عملت اول صيانه للعربيه بعد ما اشتريتها واليكم التالي :

رحت الصبح لمحمد سمير لقيت صنايعي عنده قالي النهارده نص يوم وقالي العربيه تجبهالي التلات وتبات وكلام من ده كتير

و انا مش فاضي اتكلت على الله و رحت للميكانيكي اللي كنا بنعمل عنده البيتلز من 30 سنه اول ما اشتريناها

هو غير للبولو وجولف وباسات وبقى بيشتغل في الجديد طبعا خدت قياسات العداد ساعتها و كان عامل بالظبط


123290 كم رحتله على الساعه 11 الصبح كان عنده حوالي 5 جولف 2 و اتنين ابيزا و واحده باسات و احده بورا

طبعا فكرته بالعربيه القديمه عشان يشتغل في الجديده بضمير سلمت عليه وافتكرني الراجل قالي عايز

تعمل فيها ايه قلتله الفرامل واطيه و الكهربا عايزه تتزبط قالي ماليش دعوه بالكهربا ممكن تعملها في الحرفين

المهم جبتلها الحاجات اللازمه عشان طقم السيرفيس كالتالي

طقم بوجيهات NGK تلاته شعله : 55 جنيه

فلتر هوا (مش فاكر نوعه تقريبا Conteinal حاجه زي كده ب : 40

طقم تيل فرامل ريمسا : 110

فلتر بنزين 65 جنيه

سير كاتينه : 60

بالاضافه لحاجات انا طلبتها زي منضف الانجكشن ب 25 جنيه

مساحه خلفيه ب 15 جنيه صيني عشان الشكل مش اكتر واتنين لتر بنزين لزوم الشغل

و خرط الطمبوره بتاعت الفرامل الخلفي مش عارف ليه بس واضح انها كانت مهمه ب 60 جنيه بالتيل


وحديديتين ربط بيهم حاجه في الكاوتش ب 2.5 وابتدا الشغل مبدئيا الفرامل التيل القديم كان رايح في داهيه


متاكل فتحت اغير البوجيهات لقيت البوجيهات القديمه منتهيه و كانت شعله واحده نضفت الانجكشن وغيرت السير


والفرامل اتخرطت و ركب اللي قدام عبال لما الخلفي اتركب و اهم حاجه ال ار بي ام كان بعلا و بيوطا عندي لوحده

فالميكانيكي اتك على خرطوم كده كان منفس لقا الا ار بي ام اتزبط قام لاحمه بالولاعه

الاغرب من دا كله انها ما كانت ماشيه من غير فلتر هوا الراجل استغرب بس ركبه المهم المشكله

اللي كانت شاغلاني الفتيس نقلاته سهله بمعني انه ممكن تجيب المارشدير بسرعه من غير سوسته


فك الغطا بتاعه وركبلي زي زور للفتيس و اتزيط شويه و قال انتا محتاج عصايه فتيس عشان تتزبط تماما



بس هتاخد وقت لانه هيحل الفتيس و الدبرياج قلتله واطي شويه قالي مش مشكله دلوقتي عشان هوا محتاج كده



اسطوانه وديسك تقريبا فما تفتحش على نفسك و واحده واحده الحمد لله العربيه خلصت على الساعه 6 المغرب

قلت اساله على الكهربائي للامانه هوا مكانش عايز يوديني للكهربائي اللي جنبه و قالي روح لواحد

في الحرفيين فشافني مستعجل روحت لواحد الله يسماحه بقى غيرت دراعات اشاره ومساحات للعربيه و المفروض

انه زبط كهربا العربيه بس مشكله النور رجعت تاني الف الدركسيون او مطب النور يطفي ناوي ارجعله تاني عشان

اشفي غليلي منه نسيت اقلكوا الدراعين مساحات و اشاره عاملين 160 جنيه استيراد خد مصنعيه 50 جنيه على ايه مش


عارف شكلي اضحك عليا لكني مش هاسكتله بس اللي منسيني شويه موضوع الكهربا ان العربيه فاقت تماما


الحمد لله والفرامل بقت فله والراجل الميكانيكي الصراحه شغله نضيف خد مني 120 جنيه ورضيت الصنايعيه


والحمد لله الار بي ام اتزبط والسحب بقا عال و دوران اعربيه بقى اسرع وصوت العربيه هدي على الاخر


لسه بس هاغير زيت وفلتر زيت بس طالب منكوا طلب زيت يكون مجرب للبولو وكهربائي نضيـــــــــــــــــــــــف


ركزوا على نضيـــــــــــــف دي عشان انا اتعذبت معلش انا نسيت اكتب موديلات بعض الحاجات هنا بس اول ما اجيب


العلب من العربيه هاجيبهالكم واكتبهالكم بس عشان انا من الصبح ما نمتش و اعذروني على الاطاله و لو في حاجات نسيت


اعملها قولولي برده عشان كله بالمره وقلت دي حاجه صغيره اقدر افيد بيها لو بجزء بسيط هنا للمنتدى و اي سؤال هرد على قد خبرتي


البسيطه والله الموفق و الي اللقاء في تجارب اخري ان شاء الله

[Eng_Moh.Dewair]

الف مبروك وربنا يباركلك فيها

[Mahmoudyoussif]

الحمد لله التفليسه كملت النهارده

روحت غيرتزيت شيل اكس 5 ب 107 +فلتر زيت + مصاريف تركيب

130 جنيه بس بسم الله ما شاء الله العربيه بقت فله

لسه بتاع لانسر متخيط النهارده على سبيل التجربه بس

[wael_mega]

رينا يباركلك فيها ويديك خيرها ويكفيك شرها خالى بالك البولو شقية ماتخليش العربية تجننك ان هى بتحب الجرى وخالى بالك

[Mahmoudyoussif]

فعلا بتحب الجري و دا اللي مخوفني منها بس بترفع راسي الصراحه

[mohamedmmm2]

الموتور ال 1300 بتاع البولو جميل فعلا وسحبه ممتاز.. ربنا يباركلك فيها
بس المفروض بعد كدة تجيب بوجيهات 1 شمعه بس ال 3 شمعه دى مش لل 1300 خالص.. والمرة الجايه ان شاء الله بقى تبقى تجيب بوجيهات ليزر اراديوم ngk هى ب 150 جنيه بس بجد جميله

[ashoub]

الف مبروك يباشا وعايز كهربائى صح فى الحرفيين اسمه مهندس رشاد بصراحه يستاهل لقب مهندس واكتر هوه فى بلوك 8 والورشه اسمها كهربائى الكربه بس هو بيجى الورشه الساعه 12 بليل وده المشكله هتسهر شويه

[Mahmoudyoussif]

الف مبروك يباشا وعايز كهربائى صح فى الحرفيين اسمه مهندس رشاد بصراحه يستاهل لقب مهندس واكتر هوه فى بلوك 8 والورشه اسمها كهربائى الكربه بس هو بيجى الورشه الساعه 12 بليل وده المشكله هتسهر شويه

انا جنب الحرفيين يا باشا لو تقدر توصفهولي بالظبط

[look344]

الف مبروك يباشا وعايز كهربائى صح فى الحرفيين اسمه مهندس رشاد بصراحه يستاهل لقب مهندس واكتر هوه فى بلوك 8 والورشه اسمها كهربائى الكربه بس هو بيجى الورشه الساعه 12 بليل وده المشكله هتسهر شويه

+11111111111111111111 1 ومن هنا لبكرة :)
كانت عندى مشكلة فى ساعة الزيت للبولو وجربت مش ساعة لا ساعات بمختلف القياسات وحورات عملتها
ورحتلوا جابلى الساعة الاصلية " لونها ابيض " من عندوا مستعملة واول ما ركبت خلصت المشكلة

وكشف على الحرارة والموتور والانجكشن و نسبة خلط البنزين والهواء بالكمبيوتر عنده ولو زعلان من عربيتك فى اى حاجة قولوا عليها .. وهتلاقى الحل البسيط عنده ان شاء الله

وان شاء الله خير :)

[look344]

على فكرة كمان مش عارف عاوز اقولك ليه :)
كنت مرة رحت كشفت على العربية بالكمبيوتر عند واحد فى اخر فيصل
اول ما ركب الفيشة على الاب بتاعه قالى " الكمبيوتر عندك مش بتاع العربية ولازم تغير"
بكام يا عم قالى الكنترول بالضفيرة بطقم الدوارة بالتركيب بالف
قلتلو شكرا ويا فكيك

وبعد كدا عند رشاد - قالى ان الكمبيوتر فيه مشكلة ( بالبلدى زى كوبرى بين الدوائر علشان مش بيقرا من السوكت بتاعه ) بس تتحل
وعمل حاجة ( مش عاوز اقولها :) ) المهم الكمبيوتر قرا عادى جدا وجاب رسالة الصيانة service insp وشالها وظبط كل حاجة
ولما ربنا يسهل ابقا اغير بس الكمبيوتر شغال وتمام التمام لانه بيقرآ ويكتب

بص رشاد ده اكتر واحد شفته فاهم فى البولو بالذات

[look344]

و اهم حاجه ال ار بي ام كان بعلا و بيوطا عندي لوحده

فالميكانيكي اتك على خرطوم كده كان منفس لقا الا ار بي ام اتزبط قام لاحمه بالولاعه

الخرطوم ده تحت علبة فلتر الهواء مباشرة
ومع الضغط هيطلع تانى ( عن تجربة )
سيبك من الميكانيكى وهات كوليه وقرط على الخرطوم فى مكانه افضل - وخلى معاك شوية كويلهات وافايز احتياطى للطوارىء

[dodda]

معلش كنت عاوزة اعرف البولو اللى معاك دى موديل كام عشان انا عاوزة اجيب بولو 2011 بس محدش مشجعنى الكل بيقول متستاهلش تمنها وقطع غيار غالية وكدة فبماانها معاك ممكن تقولى ايه رايك فيها وايه مشاكلها وهل تمنها فيها ولا زيادة وموضوع قطع الغيار ده واعادة البيع

[mohamedmmm2]

البولو الجديدة جميله جدا وكل حاجه (انا معايا بولو 2009 ) بس سعرها عالى شويه.. انا رايى بسعرها ممكن تجيب ابيزا احسن وهى اصلا نفس الموتور والشاسيه والفتيس والحجم (الموتور ال 1400) والابيزا ال 1600 تقريبا بسعر البولو ال 1400..
الفرق فى الشكل بس مش فى الامكانيات او الجودة.. طبعا الابيزا تكسب..

[Mahmoudyoussif]

+11111111111111111111 1 ومن هنا لبكرة :)
كانت عندى مشكلة فى ساعة الزيت للبولو وجربت مش ساعة لا ساعات بمختلف القياسات وحورات عملتها
ورحتلوا جابلى الساعة الاصلية " لونها ابيض " من عندوا مستعملة واول ما ركبت خلصت المشكلة

وكشف على الحرارة والموتور والانجكشن و نسبة خلط البنزين والهواء بالكمبيوتر عنده ولو زعلان من عربيتك فى اى حاجة قولوا عليها .. وهتلاقى الحل البسيط عنده ان شاء الله

وان شاء الله خير :)

انا رايحله النهارده اقضي السهره معاه ان شاء الله عشان العربيه مش عايزه كهربائي

دي عايزه كشاف نور بس في حاجه تانيه مش عاجباني الصهد جوه العربيه عالي اوي

وبعدين الار بي ام عليه عفريت مره يكون تحت الواحد بشويه و مره يكون لازق تحت لما بجري شويه بالعربيه

بيتزبط تاني اعتقد ان دي وساخه بنزين مش اكتر و اللي عندي معلومه تانيه يقول

[Mahmoudyoussif]

معلش كنت عاوزة اعرف البولو اللى معاك دى موديل كام عشان انا عاوزة اجيب بولو 2011 بس محدش مشجعنى الكل بيقول متستاهلش تمنها وقطع غيار غالية وكدة فبماانها معاك ممكن تقولى ايه رايك فيها وايه مشاكلها وهل تمنها فيها ولا زيادة وموضوع قطع الغيار ده واعادة البيع

البولو اللي معايا 95 معلش احنا علابه على قدنا ربنا يكرمنا