بطاريه بيتلز

[beetleMOSH]

ازيكم يا اخوانى البيتلزاويه
الحمد لله و بعد عناء
نويت ان شاء الله اصلح العربيه

المهم العربيه عايزه بطاريه
و مش عارف اجيبلها ايه
55 ولا 70
البطاريه القديمه كانت 70
و قعدت بتاع سنه و نص من غير ولا مره صيانه
يعنى جبت البطاريه و حطيتها و اشتريت دماغى

المهم انا مركب 2 جى
و هما دول اللى عاملينلى القلق
خايف اجيب 55 و تطلع صغيره و الاقيها كل شويه يتفضى
و مش عارف اجيب 70 تانى
ولا هايبقى حمل على الدينامو
لانى الاول مكنتش اعرف موضوع انه الدينامو بيبقى متظبط على البطاريه

اعمل ايه بقى ؟

و طبعا البطاريه سايله احسن ... صح ؟

مستنى ردودكوا بقى

[smsmxxxxxx]

اخبارك ايه يا باشا

بالنسبة لنوع البطارية سائلة او جافة فطبعا خد السائلة لانها انسب للشحن الغير منتظم للعربيات القديمة

دا غير انها ارخص لان البطاريات سعرها عالي اوى الايام دى


اما اختيارك 55 او 70 امبير
فطبعا انتا بالنسبالك 70 افضل لانك هتشغل كاسيت مع نور عالى او كاسيت والعربية واقفة فترات طويلة

ومتقلقش على الدينامو هو كدة كدة بيشحن البطارية اول بأول بنسبة معينة مبيستناش لما البطارية تفضي وبعد كدة يشحنها

وطبعا الغش التجارى اللى فى كل حاجة يخليك تتأكد ان البطارية ال 70 عمرها ما هتدى كفائة ال 70
هتديلك كفاءة ال 55 او اكتر شوية

ودليل ان الكلام صح ان ال 70 عاشت معاك سنة ونصف
ودا الرينج اللى المفروض تغير فيه البطارية علشان تبقي ماشي مطمن


-------------------
محمد سالم

[beetleMOSH]

استاذ محمد سالم

اخبار حضرتك ايه

انا تمام الحمد لله
والله انا قلت برضه كده ان الدينامو بيشحن على طول
بس فاس قالتلى لا و بتاع و انت فاهم بقى الناس لما تستلم ودن واحد
و انا كدا كدا اللى فى دماغى انه دينامو يعنى هو شغلته يشحن
حطيت عليه بقى 55 70 90
هو بيشحن
و فى نفس الوقت بيدى كهربا برضه للعربيه
يعنى الحمل مش على البطاريه لوحدها
الا بس عند الدواره
ده اللى اعرفه
انما ميين بقى
اكلان الدماغ

طيب يبقى كده ان شاء الله 70 سايله طبعا عشان الفلوووس هههههههه

يا ترى فى نوع معين
انا اللى كانت عندى دى كانت دلتا و شايف انها ادت يعنى
سنه و نص من غير كشف حتى على البطاريه
و شايه 2 جى ام و انا اصلا من النوع اللى بسيب الكاسيت شغال و العربيه مبطله

ف فى حاجه افضل او نوع كويس يعنى ؟
طولت عليك معلش :)

[sakr84]

الكلوريد الناس كلها بتشكر فيها وطبعا اهم حاجه انها تكون سايله انا لسه جايب ال 70 امبير وتمنها 390 من غير البطاريه القديمه ولو هياخد القديمه هتدفع 340 جنيه بس انا اخدتها منه ب 300 والكلام ده لسه من اسبوع بس اهم حاجه اوعى تجيب الجافه وعلى العموم انا كان عندى 55 امبير وكانت شغاله عادى زيها زى ال 70 مش شايف بينهم اى فرق
توكيل كلوريد فى شارع البحر الاعظم بس انا كنت جايب البطاريه من واحد موزع فى شارع الهرم

[beetleMOSH]

اوباااازززز
340
البطاريات غليت ولا ايه ؟
طيب الفرق ايه بقى بين ال70 و ال 55 ؟
طالما مفيش اى فرق
او يمكن عشان حضرتك استخدامك طبيعى للبطاريه ف مش حاسس بفرق ؟!
مش عارف

عايز اعرف ايه الفرق فعلا عشان لو مفيش فرق
يبقى اجيب ال55 اوفر
اما لو الفرق ف حدود 50 جنيه يبقى هاجيب ال 70 و خلاص
و زياده الخير خيرين

و الف شكر يا اشتاذ تامر

[semam]

انا كنت جايب ال 55 امبير النسر فارتا من شهرين تقريبا ب 245 جنية سائلة واخد القديمة كانت كلوريد 55 سائلة برضة وقعدت معايا سنة تقريبا

من وجهة نظرى خليك فى ال 55 امبير السائلة زى ما تفضل اخى محمد وقال علشان الشحن عندنا مش منتظم يبقى خليك فى السائلة

[sakr84]

يا جماعه البطاريات غليت جدا جدا جدا من حوالى اقل من شهر وانا جبت البطاريه بتاعتى دى الاسبوع اللى فات
عايز اوضحلك ان الفرق بين ال 55 وال 70 امبير حوالى 30 أو 40 جنيه يعنى مش كتير

[beetleMOSH]

انا عملت موضوع تانى فى قسم الكهربا و ردول عليا كالاتى

http://www.nilemotors.net/Nile/190427-55-70-a.html

و فعلا لو الفرق مش كبير يبقى اخلينى فى ال70 و خلاص
و اهو برضه عشان تقدر تقوم العربيه كويس فى الشتا ده

[ahit]

السلام عليكم ورحمة الله وبركاته

توكل على الله و هات ال 70 امبير أفضل و الجافة أفضل لو الدينامو سليم طبعاً لأنك هاتريح دماغك من قرف الكشف و الميه و خلافه.
أفضل الأنواع حالياً الفارتا الألمانى و الديلكو السعودى.

[beetleMOSH]

ما انا استقريت خلاص ان شاء الله على ال 70
و فى خلال ايام ان شاء الله انزل اشتريها

بس الديلكو فى منها سايله ؟

[sakr84]

فى ناس شككت فى الديلكو خليك فى الكلوريد وريح دماغك زى الموبيلات النوكيا كده هو ده اللى الشعب كله ماشى عليه
بس لو هتجيب الديلكو ابحث اكتر او اعمل موضوع عن رأى الناس اذا ماكنش فيه على المنتدى فى قسم الكهربا

[ahit]

السلام عليكم

لو الدينامو شحنه سليم خليك فى الجافة أفضل
الفارتا الألمانى ممتازة و عن تجربة لكن غالية عن الباقى لكن ممكن تشتغل معاك سنتين مستريح ( أنا عندى الفارتا الألمانى و 45 أمبير !!!! و بفضل الله تعالى زى الفل و شغالة بقالها فترة كبيرة لكن ضعيفة بالنسبالك و يفضل ال 55 أو ال70 أمبير )
الديلكو ممتازة بردو و أبو هاشم لسه شاريها قريب

اعمل سيرش فى المنتدى عن الديلكو و الفارتا الألمانى و هاتلاقى مواضيع كتير بتتكلم عن مميزاتهم و عيوبهم

[beetleMOSH]

الف الف الف شكر ليكوا
و ربنا يجازيكوا خير ان شاء الله
هدور فى المنتدى او اعرف كده ايه الكويس
و ان شاء الله ابقى اوافيكوا بالاخبار

تحياااااااتيييي :)

[beetleMOSH]

طيب هو سؤال
هى الفارتا هى النسر ؟

و لو امكن ممكن تردوا على اى حاجه فى موضوعى اللى محدش راضى يعبرنى فيه ؟!
و انا دورت فى المنتدى و برضه موصلتش لحاجه

http://www.nilemotors.net/Nile/190990-a.html

[ahit]

فيه نوعين
الفارتا الألمانى و توكيلها آخر شارع فيصل
و النسر فارتا ( مانصحكش بيها )