سعر البولو 98

[Ahmad]

السلام عليكم,

معروض علي بولو موديل 1998 سعة 1000 سي سي. بها تكييف و كاسيت. أعتقد التكييف أصلي بس متركب.
السيارة ماشية 75,000 كم. فابريقة بره وجوه و حالتها ممتازة.

يا تري عربية بالحالة دي ممكن يكون ثمنها كام؟؟

شكرا
أحمد

[Islam_galal]

و عليكم السلام
أنا معي بولو موديل 1999 سعه 1000 سي سي بها تكييف و كاسيت أصلي بحالة ممتازة ماشية 97000 كم ، اشتريتها بـ 42500 جنيه

[Atef Saleh]

الاسعار المذكوره معقوله جدا و توكل على الله يا استاذ احمد و الف مبروك يا استاذ اسلام.................و شكرا

[Islam_galal]

جزاك الله خيرا يا استاذ عاطف

[د.اشرف هنداوى]

بولو 1000 cc ايه اخبارها : قوتها ع الطريق و التكييف هل بيقلل من قوه الموتور و هل ف السفر كويسه و لا ضعيفه ع الطريق

هي احسن و لا 1300
شكرا للرد

[معاذ الشرباصى]

بولو 1000 cc ايه اخبارها : قوتها ع الطريق و التكييف هل بيقلل من قوه الموتور و هل ف السفر كويسه و لا ضعيفه ع الطريق

انا معايا الفاضية خالص من غير اى كماليات, هى العربية والدى جابها و هى زيرو سنة 99, و عاملة دلوقت 195 الف ما شاء الله من غير اى مشاكل حقيقية تقابلنا, هى حاجات بس عمرها افتراضى بيخلص و بتتغير

لكن فيها مزايا كتير صاج قوى جدا, ثبات اكتر من ممتاز, عربية سواقتها سلسة جدا, استهلاك منخفض للبنزين, موتور تسارعه جيد بالنسبة ل 1000 سى سى

يعيبها العفشة الناشفة, ضيق الصالون نوعا ما, قطع الغيار غالية شوية, التابلوه فيه عيب شوفتوا فى معظم العربيات من الموديل ده و حصل عندى ان زرار الانتظار بيفك من مكانه

ده اللى فاكره دلوقت, بس الصراحة العربية فى المجمل ممتازة, و انا متمسك بيها و حتى لما بفكر اغير بفكر اجيب الموديل اللى بعد كده, شكله اجمد و انا مرتبط بيها فعلا

بس اهم حاجة حافظ عليها كويس و اعمل صيانة اول باول و هى مش هتعمل معاك اى موقف بايخ ان شاء الله


التكييف اكيدبيأثر على السحب بتاع ال 1000 سىسى, ده غير انه ضعيف شوية, يعنى مش فى قوة اليابانى او الكورى.

بالنسبة تستحمل السفر اه هى تستحمل

هي احسن و لا 1300

انا مرة سألت الميكانيكى, قالى موتور ال 1300 اقدم من الالف, و كان بيقول لنها مش انجكشين, بس ياريت حضرتك تتأكد من لمعلومة دى, علشان انا لم يتسنى لى التأكد منها

و تحت امر حضرتك فى اى استفسار

[د.اشرف هنداوى]

عايز هشترى بولو في حدود 50000 - فىه حد من المشاركين الاعزاء بيبيع او يعرف حد بيبيع؟

ليا سؤال كمان - لحد كم كيلو متر العربيه المستعمله الوهحد ممكن يشتريها و ما تتعبوش - 50000 كم مثلا ب\كتر من كده يبقى مش مستب

شكرا مقدما للرد :?: :D

[معاذ الشرباصى]

لحد كم كيلو متر العربيه المستعمله الوهحد ممكن يشتريها و ما تتعبوش

الكيلومتر مش مقياس بقدر حالة الموتور, و العربية عامة

يعنى ممكن تكون العربية عاملة مسافة عالية, لكن حالة الموتور ممتازة, و الهيكل بتاع العربية و اجزائها عامة

المقياس الوحيد هو حالة العربية, لأن للاسف فى عربيات بيبقى ملعوب فى عداداتها

[ahmadelkholy]

السلام عليكم اكيد البولو هتسافر انا معايا جولف 1 وبسافر بيها هههههههههه
ربنا يوفقك وتشترى الى نفسك فيه

[M.Mostafa80]

هى معروضه عليك بكام

[original]

السعر حسب اللى بيبيع يعنى ممكن من 38 لحد 42 ألف والكيلومتر مش مقياس لأنك ضرورى تكشف على العربية بالكمبيوتر قبل ماتشتريها..

[M.Mostafa80]

مش بالكمبيوتر بس
فى حاجات تانيه مش هينفع يكشف عليها بالكمبيوتر زى العفشه وأذا كانت رشه ولالأ حاله الفتيس وخلى بالك قوى من موضوع الفتيس دا

[original]

مش بالكمبيوتر بس
فى حاجات تانيه مش هينفع يكشف عليها بالكمبيوتر زى العفشه وأذا كانت رشه ولالأ حاله الفتيس وخلى بالك قوى من موضوع الفتيس دا

اه الفتيس عندك حق أنا شاريها ببلية بايظة فى الفتيس بس لسه مغيرتوش.. عملت بيه 30000 بس لسه بفكر...

[M.Mostafa80]

بردو أنت كمان عندك نفس المشكله الى عندى أنا خايف أفوكو وأعملها انا الى عندى بليه الدرك

[Ahmad]

مش بالكمبيوتر بس
فى حاجات تانيه مش هينفع يكشف عليها بالكمبيوتر زى العفشه وأذا كانت رشه ولالأ حاله الفتيس وخلى بالك قوى من موضوع الفتيس دا

و الحاجات دي بنكشف عليها ازاي؟