لكل من يعاني من توكيل فولكس - مش عارف ازاي تاهت عنكو الفكرة ديه

[M!NA]

يا جماعة انا ملاحظ ان الناس كلها بتشتكي من توكيل فولكس علشان التأخير و قطع الغيار اللي مش موجودة و سوء مستوى الخدمة.... الخ

ما كلنا عارفين ان كل حاجة بتمشي بالفلوس....

انا عندي عربية بوينتر من ديسمبر 2006 و عامل بيها لحد دلوقتي 28000 كم و الحمد لله مواجهتش اي صعوبات او مشاكل او قطع غيار مش موجودة مع التوكيل, المسألة كلها عايزالها رشة جريئة....

طب نرش علي مين؟؟ المهندسين اللي برة؟؟ ولا ليهم لازمة ولا حد منهم يعرف يخدمك

خش عالصنايعية علطول و ظبط حد فيهم و هتحس بعدها انك بتتعامل مع توكيل مرسيدس... :)

قطع الغيار اللي ناقصة هتلاقيها بتتخلق من تحت الأرض, و العربية هتلاقيها بتخلص في نص ساعة أو ساعة بالكتير...

هي دي بلدنا... تاهت ازاي بأة عنكو؟ :)

في انتظار ارائكم و ردودكم

[badblood]

مصر عظيمة اوي كده ..........عجبي

[TAG_Turbo0]

انا معنديش فولكس
بس لأ لأ لأ لأ
حضرتك كده بتحرض على الرشوه وده مرفوض
احنا بنحاول نصلح من انفسنا وحضرتك تيجى تقول رشه جريئة
ده برده كلام
انا أكرم لى أصلح العربية فى أى ورشة ولاانى أدفع مليم رشوه لأى حد
مش كده يا جماعه ولا انا غلطان

[limo]

جه اليوم الى اروح فى التوكيل بجانب المبالغ الكبيره الى بدفعها فى الفاتوره ادفع كمان فلوس علشان العربيه تتصلح او تخلص بدرى ؟
انا معنديش فولكس بس لو النظام ماشى جوه بالفلوس اكيد من باب اولى من هكون مستأمنهم على العربيه كلها ولا ايه ؟
انا رأى لو انت التوكيل مش عجبك فى الصيانه ومش مرتبط معاهم بمواعيد صيانه محدده علشان الضمان روح الاى مركز متخصص فى الفولكس او ميكانيكى شغال فى الفولكس ومشهود له بالكفاءه

[M!NA]

يا أستاذ Tag ولا تحريض علي الرشوة ولا حاجة...

المسألة انك متعرفش يعني ايه انك تستغنى عن عربيتك تماما لمدة 4 او 5 شهور, معني ذلك انك لازم يكون عندك عربية تانية تعمل بيها مصالحك و تروح بيها شغلك, و مش كلنا نملك كذا عربية

ثانيا انا كان هدفي مساعدة الاخوة اللي بيعانوا من التوكيل

أما بالنسبة لضمان خدمتهم و ان كونهم مرتشين معناه انهم لا يستأمنوا علي عربياتنا... هقولك ببساطة ان كل شيء بيتم قدام عينك... عشان انتا بتدخل معاهم و هما بيعملولك عربيتك

و عموما يا جماعة.. اسف لو كان اقتراحي ضايقكو او فهمتوه انه تحريض عالرشوة... كان غرضي أساعد

[tot]

بس الدخول للورشة مش سهل كده يعني، انا بعرف ادخل بالرخامة بس غيري كتير مايعرفوش يدخلوا عشان ممنوع اصلا، و بعدين قوللي واحد زى عزت خبير المفرقعات ده الي مافيش باب بيقف قدامه بتاع السمكرة اللي اى يدخله يقوله احجز بعد شهرين ، ده هتديله فلوس ازاى و ياخد كام ، ده بيتعامل على انه صاحب التوكيل

[limo]

يا أستاذ Tag ولا تحريض علي الرشوة ولا حاجة...

المسألة انك متعرفش يعني ايه انك تستغنى عن عربيتك تماما لمدة 4 او 5 شهور, معني ذلك انك لازم يكون عندك عربية تانية تعمل بيها مصالحك و تروح بيها شغلك, و مش كلنا نملك كذا عربية

ثانيا انا كان هدفي مساعدة الاخوة اللي بيعانوا من التوكيل

أما بالنسبة لضمان خدمتهم و ان كونهم مرتشين معناه انهم لا يستأمنوا علي عربياتنا... هقولك ببساطة ان كل شيء بيتم قدام عينك... عشان انتا بتدخل معاهم و هما بيعملولك عربيتك

و عموما يا جماعة.. اسف لو كان اقتراحي ضايقكو او فهمتوه انه تحريض عالرشوة... كان غرضي أساعد

استاذ دريفر انا مش معترض على اقتراحك ولا بهاجمك
بالعكس انت مشكور لانك عايز تساعد الناس
بس الاضمن انك تروح مكان الاصل فيها اتمام الشغل على اكمل وجه مش الاصل عدم اتمام الشغل الا فى فتحت دماغك
ولو انت بره الضمان روح لمركز خدمه كويس اعتقد انه هيكون ارحم ولو اختاجت حاجه منهم ابقى روح اشتريها وخلاص
انا بالنسبه لى معرفش اعمل صيانه لعربيتى فى مكان مكنش مطمئن نفسيا لى 100%

[khela]

انا مش فاهيم يعنى هو التوكيل دة ملهوش صاحب وازاى يرضى بالسمعة دى عن مركز الخدمة بتاعة خصوصا فى ظل المنافسة الشديده بين العربيات وازاى الشركة الام تسمح لتوكيل فى بلد يبقى بالسمعة دى وبعدين كنا بنقول الكلام دة لما كنا قطاع عام ازاى يبقى برضة بيشتغل بالرشاوى والمحسوبية انا معنديش فولكس كنت بفكر اشترى السوران بس بعد الى بسمعة دة طبعا انسوا

[cpt_shawky]

ما كلنا عارفين ان كل حاجة بتمشي بالفلوس....


طب نرش علي مين؟؟ المهندسين اللي برة؟؟ ولا ليهم لازمة ولا حد منهم يعرف يخدمك

خش عالصنايعية علطول و ظبط حد فيهم و هتحس بعدها انك بتتعامل مع توكيل مرسيدس... :)

هي دي بلدنا... تاهت ازاي بأة عنكو؟ :)

في انتظار ارائكم و ردودكم

أكد رسول الله صلى الله عليه وسلم على هذا المعنى فقال: >الراشي والمرتشي والرائش في النار<، قالوا ومن الرائش يا رسول الله؟، قال: >الساعي بينهما بالرشوة<

[tot]

و الله vwdriver كلامه صح و انا جربت و فعلا طريقة صح الصح ، و مش شايف انها رشوة ولا حاجة ، اصل هتعمل ايه يعني

[Islam_galal]

انا عن نفسي بتعامل مع ميكانيكي متخصص فولكس و عنده محل قطع غيار
بصراحى لو اضطريت اتعامل مع توكيل بالشكل ده ابيع العربية احسن و اشوف ماركة تانيه توكيلها محترم
عشان كدة عملت مواضيع لتقييم التوكيلات و مراكز الخدمة لانها شئ مهم جدا عند اختيار السيارة معرفة كفاءة التوكيل

[megane_man]

انا عن نفسي بتعامل مع ميكانيكي متخصص فولكس و عنده محل قطع غيار
بصراحى لو اضطريت اتعامل مع توكيل بالشكل ده ابيع العربية احسن و اشوف ماركة تانيه توكيلها محترم
عشان كدة عملت مواضيع لتقييم التوكيلات و مراكز الخدمة لانها شئ مهم جدا عند اختيار السيارة معرفة كفاءة التوكيل

لو سمحت فين الميكانيكي ده

[ows212]

وهى الناس ليه تشترى فولكس ما دام التوكيل سىء وغالى كده يعنى من قلة العربيات

[tot]

بيشتروها عشان هى عربيات حلوة و تستاهل فلوسها الصراحة ، بس حكاية التوكيل دي مابتتكشفهاش الا بعد ماتكون الفاس وقعت فى الراس

[M!NA]

مش ملاجظين ان كل اللي ردوا مفيهمش حد معاه فولكس الا اتنين بس؟

و اللي معاه بوينتر واحد من الاتنين و لو لاحظتم هتلاقو ان اللي معاه بوينتر متفق معايا في الرأي...
صدفة مش كدا؟؟

أولا قبل استخدام كلام صعب و اتهام واحد بالتحريض علي الرشوة... و حتي توصيله لباب جهنم... من المعروف ان الاعمال بالنيات...
فهل حرضت علي الرشوة بصفة عامة؟ ام في حالة لو معاك عربية بقطع غيار نادرة و توكيل سييء؟؟

ثانيا:
لو كانت العربية جولف او بولو فقطع غيارها و مراكز صيانتها منتشرة في كل مكان... مشكلة البوينتر ان حتي في التوكيل ممكن متلاقيش قطع غيارها الا لو ظبطت حد

يبقا هتعمل ايه ساعتها؟؟ انتا معاك العربية ديه و كل اعتمادك عليها في شغلك و كل تحركاتك.. و وقفت منك عشان حاجة مهمة مش موجودة برة التوكيل, في الحالة ديه فرق بين انك راشي و بين انك في حالة شبه اضطرار لعمل الموضوع ده

طب و ليه وجع القلب ده و ليه من الاول نجيب عربية بالشكل دة؟
عشان البوينتر فعلا عربية تحفة بسعر العربيات الكوري و الصيني و قطع غيارها بتعيش و مش هتحس بفرق كبير بينها و بين البولو و محدش هيأكد الكلام دة الا اللي جربها

عموما... زي ما قلتلكو في البداية انا كان هدفي الأساسي المساعدة لأصحاب العربية ديه عشان انا شفت المعاناه ديه في الأول و لما عرفت السكة حبيت اوريهالكو

شكرا علي كل ردودكم