بوينتر 2004 عيوبها ومميزاتها؟؟

[eliaho_betsory]

السلام عليكم ورحمة الله وبركاته
ازيكوا يا شباب
انا معروض عليا عربية بوينتر موديل 2004 1000 سى سى كاملة مانيوال
بس انا ماعرفش عنها اى حاجة
قطع غيارها وعيوبها
وبالذات قطع غيراها
هى معروضة عليا ب 34 الف جنية
يا شباب الخبرة فيدونى هل العربية دى كويسة وهل قطع غيارها متوفرة؟؟
وهل السعر كده كويس ولا ؟؟؟
وشكرا

[eliaho_betsory]

ايه يا رجالة
هو محدش يعرف حاجة عن العربية دى ولا ايه
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

[unknown2020]

سمعت والله أعلم ان قطع غيارها غير متوفرة حتى في التوكيل

ليس متأكد من هذا الكلام :)

[maryano]

بصراحه وحد صحبي معاها بوينتر 2005 1600 سي سي هي عربيه كويسه معمرة و بتستحمل واي بس بقالو 3 اشهر دايخ علي طرمبه بنزين مش موجودة في التوكيل و يقلولو احتمال مش صعب يجبوهااا و مهندس هناك نصحو يبعها علاشان قطع غيرهاا مش موجودة

[minicooper20]

بلاش بوينتر
و باراتى اسال مجرب

[ahmedalian]

أنا معايا العربية دي من سنة 2004 واللي اقدر اقوله هو التالي:
بالنسبة لقطع الغيار كانت في الأول قليلة وغالية لما كان التوكيل (أوتوموتيف) هو الوحيد اللي متحكم فيها، دلوقتي الأمور بسيطة وأنا بخلي الميكانيكي يجيبها معاه من مصر الجديدة لما يكون عنده أي مشوار.

المميزات:
1. العربية حمالة أسية فعلا، وأصيلة زي ما بيقولوا، يعني تسندك وتستحمل.
2. مشاكلها في الكهربا تكاد تكون زيرو، في خلال 6 سنين اتحرق فيوزين.
3.استهلاكها في البنزين في الطوالي ممتاز جدا
4. العربية فيها وحدة رفع بتقفلها مع الإنذار بحيث تقفل نفسها بنفسها وتقفل الإزاز - مريحة يعني.
5. قطع الغيار حتى لو غالية فعلا بتقعد كتير.
6. عفشتها ممتازة

العيوب:
1. تكييف مالوش أي لازمة في الحر الشديد .. يعني تخدم معاك لما مايكونش الحر شديد أوي غير كده تفتح الشباك أكرم لك.
2. البنزين رغم انها حنينة فعلا فيه .. يعني انا رحت مطروح بنص خزان = 28 لتر تقريبا، إلا إن كتر الأوف والأون فعلا بيخلص البنزين بسرعة غريبة.
3. لازم تعرف المالك بتاعها غير زيت الفتيس وللا لأ، وغيره في التوكيل وللا برة التوكيل، ولو كان غيره برة التوكيل اعرف نوعه لأنه لازم يكون خفيف جدا، أي زيت تقيل بيبوظ فتيسها.
4. سحبها ضعيف طبعا لأنها ألف سي سي

في المجمل عربية تستاهل طبعا التمن ده بس تكون حالتها كويسة.

[ahmedalian]

أنا قصدي انك تستاهل إنك تقتنيها، لكن مش عارف، بيتهيألي لو فابريكة وعاملة كيلو متر اقل من 90 الف بشوية مثلا يبقى المفروض السعر يقل شوية.