استفسارات عن البولو

[a7madSalem]

السلام عليكم ورحمة الله وبركاته
العبد لله قدامة عربية بولو99 - cc1000 جاية عن طريق معرفة بس أدى هتبقى أول عربية ليا وسمعت كلام كتير مقلقنى فقلت أتقل عليكو شوية
-ناس كتير بتقول لى اوعى تجيب ألمانى فى الأول هتقرفك ..قضيها 128ولاشاهين
-هل فعلا العربية مكلفة جدا فى الصيانة وقطع الغيار أنا معنديش مشكلة ان قطع الغيار تكون غالية بس تمنها فيها ومعمرة المهم ميكونش غلا على الفاضى
- هل فعلا الصنايعية اللى بيشتغلو فيها قليلين وعاملين دكاترة والفيزيتا بكذا..أنا ساكن فى الهرم لو ده هيفرق
- العربية اللى قدامى فاضية مفيهاش كماليات خاص وده مش مشكلة عندى .. المشكلة بس فى الباور هل البولو من غير بور هتبقى تقيلة ولا ناعمة
- هل العربية ال 1000 سى سى دى تشيل أربع أو خمس أفراد بالغين وتسافر بيهم ولا هتكح منى

معلش طولت عليكو استحملونى ..أفيدونا يرحمكم الله

[M.Mostafa80]

العربية لو حالة حلوة أتكل علي الله

[a7madSalem]

العربية لو حالة حلوة أتكل علي الله

ربنا يجزيك خير على ردك .. بس لو تتعب معايا شوية وتطمنى على رزمة الأسئلة اللى بتجرى ورا بعض فى دماغى اللى راصصهم فوق دول يبقى كتر ألف خيرك
انت من الناس اللى كان نفسى انهم يردوا على موضوعى لأنى بأثق فى رأيك فى البولو جدا لأنا قريت لك مواضيع وعجبانى جدا

[a7madSalem]

فين البولوية ياجماعة ؟ .. ده أنا قلت هأجيب المستخبى لما أسأل هنا !!

[Mahmode]

أنا كان معايا بولو مو2000 1000سي سي. و هيا ممتعة في سواقتها بس أولا غيرتلها قطع غيار كتير. كل شوية حاجة تبوظ. مرة مروحة الريديتير. مرة الريديتير نفسه مرة طلمبة البنزين...الخ. وطبعا قطع غيارها مش رخيصة يعني أي قطعها بتتكلم في كام ورقة بـ100. بس القطعة اللي بتتغير بتعيش. بس طبعا بصفة عامة أنا كنت مخنوق من الموضوع ده وشايف إنها فاتحة بقها كل شوية عاوزة حاجة. على عكس اللانسر الكرستالة مع أخويا مو99 قافلة بقها تماما هما بنزين وزيت وتمشي زي الفل. كل فين وفين ما تحتاج تغيرلها حاجة. دا بالنسبة للإعتمادية. بالنسبة للسي سي هوا الـ1000سي سي تمشي العربية كويس وسرعات عالية وركب فيها اللي إنتا عاوزه بس تسارع في الضياع حتى لو لوحدك في العربية. يعني تنسى موضوع إنك تشد مع حد أو تطلع أول واحد في إشارة. وطبعا العربية بترعش مع التكييف.

ده غير ان شنطتها ضيقة جدا وصالونها صغير.

دي ملاحظاتي والقرار ليك.

[Mahmode]

أنا مخدتش بالي من الأسئلة. آدي الردود من واقع تجربتي:

-ناس كتير بتقول لى اوعى تجيب ألمانى فى الأول هتقرفك ..قضيها 128ولاشاهين
هيا فعلا حتقرفك في قطع الغيار اللي بتبوظ كل شوية

-هل فعلا العربية مكلفة جدا فى الصيانة وقطع الغيار أنا معنديش مشكلة ان قطع الغيار تكون غالية بس
تمنها فيها ومعمرة المهم ميكونش غلا على الفاضى
قطع الغيار مكلفة بس مش لدرجة جدا يعني (راديتير 650جنية, موبينة 450جنيه, طلمبة البنزين تقريبا 300جنيه...الخ) كل قطعها بتتكلم في كام مياية

- هل فعلا الصنايعية اللى بيشتغلو فيها قليلين وعاملين دكاترة والفيزيتا بكذا..أنا ساكن فى الهرم لو ده هيفرق
ده صحيح وأنا كنت مكبر دماغي وباتعامل مع ميكانيكي عادي وطبعا بيبقى مش قد كدة

- العربية اللى قدامى فاضية مفيهاش كماليات خاص وده مش مشكلة عندى .. المشكلة بس فى الباور هل البولو من غير بور هتبقى تقيلة ولا ناعمة
أنا شايف ان الباور مهم جدا. العربية من غير باور بتبقى رخمة أوي في الركن.


- هل العربية ال 1000 سى سى دى تشيل أربع أو خمس أفراد بالغين وتسافر بيهم ولا هتكح منى
هيا تشيل بس طبعا 4 - 5 بالغين كتير عليها برضه ومش متأكد تحك ولا لأ بس أظن تحك

[a7madSalem]

أنا مخدتش بالي من الأسئلة. آدي الردود من واقع تجربتي:

-ناس كتير بتقول لى اوعى تجيب ألمانى فى الأول هتقرفك ..قضيها 128ولاشاهين
هيا فعلا حتقرفك في قطع الغيار اللي بتبوظ كل شوية

-هل فعلا العربية مكلفة جدا فى الصيانة وقطع الغيار أنا معنديش مشكلة ان قطع الغيار تكون غالية بس
تمنها فيها ومعمرة المهم ميكونش غلا على الفاضى
قطع الغيار مكلفة بس مش لدرجة جدا يعني (راديتير 650جنية, موبينة 450جنيه, طلمبة البنزين تقريبا 300جنيه...الخ) كل قطعها بتتكلم في كام مياية

- هل فعلا الصنايعية اللى بيشتغلو فيها قليلين وعاملين دكاترة والفيزيتا بكذا..أنا ساكن فى الهرم لو ده هيفرق
ده صحيح وأنا كنت مكبر دماغي وباتعامل مع ميكانيكي عادي وطبعا بيبقى مش قد كدة

- العربية اللى قدامى فاضية مفيهاش كماليات خاص وده مش مشكلة عندى .. المشكلة بس فى الباور هل البولو من غير بور هتبقى تقيلة ولا ناعمة
أنا شايف ان الباور مهم جدا. العربية من غير باور بتبقى رخمة أوي في الركن.


- هل العربية ال 1000 سى سى دى تشيل أربع أو خمس أفراد بالغين وتسافر بيهم ولا هتكح منى
هيا تشيل بس طبعا 4 - 5 بالغين كتير عليها برضه ومش متأكد تحك ولا لأ بس أظن تحك

مش عارف أقولك ايه والله .. ربنا يجزيك خير

[alzelafy]

هى عربيه و لا كلمه تمام فى كل حاجه و متخافش منها و امان جدا على الطريق و قطع الغيار مش غاليه بالدرجه اللى تخوفك منها بس العربيه محتاجه واحد يكون فاهملها عشان التكنولوجى عاليه فيها شويه مش اى ميكانيكى يظبطها و مش اى كهربائى يحط ايدو فيها عشان ممكن يبهدلك الدنيه و موضوع الشنطه رخم جدا ..... خليك فى حاجه يابانى فى الاول و بعد كدة لما تفهم الميكانيكا غير ل المانى