مساعدة في قطع غيار البيونتر 2006

[egman]

السلام عليكم ورحمة الله وبركاته

شباب انا كنت عايز اعرف الحاجات ده سعرها كام جديدة لو في منها جديدة او استيراد واجبيبها منين :

العربية هى بيونتر 2006 :

1- كابوت .

2- رفرف يمين .

3- فانوس يمين امامي .

4- اكصدام امامي .

5- الطوربيدو بتاعه المساحات الامامية .

6- البريبريز بتاع العربية الامامي .

تحياتي للجميع ،،

[egman]

فى انتظار الرد يا شباب

[eraser]

هتلافى ان شاء الله فى شارع دمشق او التوفيقية بس لازم تلف لاول وبعد كدا تجيب احسن حاجة تلاقيها
و لو عايز اسامى وارقام محلات انا تحت امرك

[egman]

الله يخليك ويكرمك يا رب ويبارك فيك .
بص بقى حضرتك نتيجة لف ابن خالتى لانها عربيته :

كابوت اصلي 2550 جنية .

رفرف تايواني 400 جنية .

اكصدام تايواني 550 جنية .

فانوس تايوانى 260 جنية .

والكلام ده بعد لف اكتر من اسبوعين على الحاجات ده ، بصراحه تغور العربية الى بالمنظر ده حاجتها تقريبا كده كده كده تقدر تقول وبقلب جامد مش موجودة بمعنى الكلمة الحاجات ده مش اول ما دخل المحل عندك كذا يقوله اه لا ده حوارات وعربون ويوصي حد ويجي فى الميعاد وياخد العربون تانى لانه ما لقاش واشتغالات .

وللأمانة يا رجالة فى واحد اسمه ظاظا فى الحرفيين تقريبا متخصص فى الانواع الفقر ده جول وبراتى وبيونتير لما راحله قاله موجود عنده وطبعا حادثه بس ممكن يتسمكر بكام قاله 1500 وده كان اول واحد يروح يسال لما الراجل ما لقاش عند حد تانى الحاجة رجعله تانى تخيلوا يكون رده اية :

طلما انت لفيت ومالقتش حاجة عند حد زي ما قلتلك وجيتلى تانى قاله يبقى تمنه الجديد 2000 جنية طبعا ابن خالتى قاله حاجات كتييير جميله جدا واشارات وايحاءات مش هقدر اقول عليها وقله لو همشي بيها من غير كبوت مش هاخده من عندك ، اه على فكرة لما ابن خالتى طلب ان يشوف الكبوت الاول الراجل كان رده لأ يا بيه اشتري الاول وابقى شوفه !!!!!!!!!!!!! .

كلم التوكيل لقاه هناك عندهم 2600 جنية فرح جدا بس شرطوا عليه انا لتركيب بتاعه لازم يبقى عندهم هما مش بيطلعوا الكبوت لوحده طيب اوكى كام يا سيدى بعد التركيب 3200 جنية ، قفل السكه فى وشهم .

فحقيقي اى كانت العربية ده كويسة فى اى حاجة تغور فى ستين الف داهيه على الذل والمرار بتاعها فى التدوير على الصاج خاصا اننا فى مصر وبنمشي فى شوارعها الجميلة الى يعنى العربية ما هتخلص من الخبطات والتريحات والحاجات الى حضراتكم عارفينها ده .

تحياتى للجميع ، ونصيحه منى يا شباب الى معاه العربية ما يمشيش بيها فى الشارع علشان لو اتخبطت هيزعل زعل جامد اوى اوى اوى اوى ، وربنا يستر طريقنا كلنا ويحمينا من الحوادث .