سؤال لأهل الخبره عن الباسات

[bikabiko2020]

يا جماعه انا كنت عايز اسأل سؤال

انا كنت عايز اشتري عربيه باسات موديل 99/2000 وقعدت اشوف عنها كل حاجه وادور وكده ...

وبعد كده لقيت عربيه باسات بس موديل 97 وصاحبها بيقول انه جايبها من المانيا في 2009 والعربيه عامله حوالي 110000 كم ومش متهانه على كلام صاحبها ..

السؤال بقاا ؟؟ هل هناك فرق بين الباسات 97 - 99 - 2000 وغن كان في فروق ماهي ؟؟

والسؤال التاني بقاا ؟؟ أنهي الأحسن في الموديلات دي علماً بأن ال97 موتور 1800 تربو تيب ترونيك والباقي 1600 منوال

اعمل ايه وأركز على أيه ومتوسط الأسعار ايه وعلشان التوضيح اكتر هكتبلكو مواصفات العربيات اللي انا مركز عليهم

باسات موديل 1999 من اول يد عامله 195000 كم وفبريكه بدون دهان من الخارج او الداخل وجنوط بدون فتحة سقف منوال مطلوب فيها 70000 جنيه قابل للتفاوض

باسات موديل 2000 عامله حوالي 150000 كم فيها دهان خارجي بدون جنوط وبدون أكسسوارات مطلوب فيها 70000 جنيه نهاااائي

باسات موديل 97 عامله 109000 كم من المانيا تقريبا كانت جايه معوقين وتم فك الحظر من 2009 موتور 1800 تربو وفتيس تب ترونك ومطلوب فيها 75000 جنيه ولسه معرفش ايه نظام السعر مع صاحبها


ارجووكم افيدوني
وانا عارف ان هو ده المكان الصح اللي هلاقي فيه إجابه على التساؤلات دي

[bikabiko2020]

ايه يا جمااااعه انا مش مصدق ان مفيش حد مش قادر يفدني في الموضوع ده

[bikabiko2020]

شكرا على الإفاده

[benmatar]

يا جماعه انا كنت عايز اسأل سؤال

انا كنت عايز اشتري عربيه باسات موديل 99/2000 وقعدت اشوف عنها كل حاجه وادور وكده ...
من أحسن الاختيارات إنك تركب باسات من 97 وحتى 2000 عربية محترمة بكل المقاييس مع اشتراط انتقاء الحالة الجيدة جداااا. وممكن تلاقي بإذن الله

وبعد كده لقيت عربيه باسات بس موديل 97 وصاحبها بيقول انه جايبها من المانيا في 2009 والعربيه عامله حوالي 110000 كم ومش متهانه على كلام صاحبها ..
كلام غريب شوية إنها 97 وهو منزلها مصر 2009 إلا في حالتين لا ثالث لهما... إما إنه مشتريها زيرو في ألمانيا من سنة 97 وفاتورة الشراء بإسمه ونزلها مصر 2009، واكيد الفاتورة معاه ومفيش حاجة إسمها مفيش فاتورة تثبت إنه جايبها من الزيرو. والحالة التانية إنها كانت نازلة بورسعيد منطقة حرة (لوحات معدنية منطقة حرة لأهل بورسعيد) ومش هينفع يحولها ملاكي علطول كده، أو إنها نزلت بورسعيد تجهيز معاقين (الموتور لازم ميزيدش عن 1600) وبرضه الملكية ميقدرش يتصرف فيها إلا بعد 5 سنين من امتلاك الشخص المستخدم لها (المعاق) وتكون مجهزة بجهاز مساعد للقيادة.
بصراحة كل الحالات صعبة وغريبة مع وضع الموديل والطراز والظروف المحيطة في الحسبان.

السؤال بقاا ؟؟ هل هناك فرق بين الباسات 97 - 99 - 2000 وغن كان في فروق ماهي ؟؟
نفس الشاسيه والصالون. بس الموتور معاك من 1600- 1800- 2000 سي سي 4 سلندر بنزين وعندك ديزل(مش في مصر بس في أوروبا) وعند 2400 و2500 سي سي 6 سلندر برضه برة مصر، والموتور ده ممكن يكون غريب طالما كانت مستوردة،و لا ينصح بشرائها بتاتا لعدم وجود أي قطع غيار للمواتير دي، حتى الاستيراد، مين يستورد موتور باسات 6 سلندر؟؟ دول بيهربو من المواتير 2000سي سي.
وبالنسبة للكماليات فإن أغلبها كاملة سواء المانيوال أو الأوتو، برضه مع مراعاة إن عربيات أوروبا كتير منها مش مكيف.

والسؤال التاني بقاا ؟؟ أنهي الأحسن في الموديلات دي علماً بأن ال97 موتور 1800 تربو تيب ترونيك والباقي 1600 منوال
بلاش مواتير تدوخ على قطع لها ومحدش يعرف يصلحها.

اعمل ايه وأركز على أيه ومتوسط الأسعار ايه وعلشان التوضيح اكتر هكتبلكو مواصفات العربيات اللي انا مركز عليهم
أنصحك تدور على حاجة عادية زي الموجودين في مصر سواء وكيل أو خليجي بس موتور 1600 (عشان البنزين كمان والأيام اللي جاية...!) وانتقاء الحالة الجيدة، والعربية بصفة عامة محترمة جدا وقطع الغيار موجودة وأسعارها مناسبة، ولو ركبتها مش هتغيرها.

باسات موديل 1999 من اول يد عامله 195000 كم وفبريكه بدون دهان من الخارج او الداخل وجنوط بدون فتحة سقف منوال مطلوب فيها 70000 جنيه قابل للتفاوض
كويسة جدا مع التأكد من الحالة وإنها فابريقة بالكامل ده مكسب في حد ذاته

باسات موديل 2000 عامله حوالي 150000 كم فيها دهان خارجي بدون جنوط وبدون أكسسوارات مطلوب فيها 70000 جنيه نهاااائي
برضه كويسة بس الفابريقة بالكامل بيشدني أكتر لأن له مدلولات على طبيعة الاستخدام

باسات موديل 97 عامله 109000 كم من المانيا تقريبا كانت جايه معوقين وتم فك الحظر من 2009 موتور 1800 تربو وفتيس تب ترونك ومطلوب فيها 75000 جنيه ولسه معرفش ايه نظام السعر مع صاحبها
خليك في الطبيعي

ارجووكم افيدوني
وانا عارف ان هو ده المكان الصح اللي هلاقي فيه إجابه على التساؤلات دي

شوف وتحت أمرك أي معلومة أقدر أمدك بها

[bikabiko2020]

شوف وتحت أمرك أي معلومة أقدر أمدك بها

بجد انا متشكر جدا لحضرتك ومعلوماتك افادتني كتير فعلا .. بس للأسف انا كنت منزل الموضوع ده من فتره وكنت عايز اجيب العربيه في الفتره دي ولما ملاقيتش حد رد عليا فصرفت نظر عن موضوع الباسات وانا دلوقتي اشتريت اسبرنزا a516 موديل 2011 كسر زيرو

وبجد انا متشكر جدا لحضرتك ولإهتمامك

[benmatar]

العفو ييافندم ومبروك عليك العربية