تحذير من سيد عبده

[ra3d]

يا جماعة انا من فترة كنت بدور علي ميكانيكي عنده ضمير .... كذا واحد نصحني بسيد عبدة المهم روحت و هو رجل كويس و عنده ضمير بس للاسف الصنيعية عنده اي كلام اول مرة كان واد بتاع 15-19 سنة كدة و هو بيركب اويل سيا الفتيس كسر حاجة فيه و لما سيد جه نزل و شاف كدة قالو غيارها

تاني مرة كنت بغير اسطوانة و ديسك عشان السحب قل اوي و الدبرياج تقيل اوي المهم 2 صنيعية اشتغلو فيها و في اقل من سعتين خلصوا كل حاجة بس و هما بيرفعو المتور عشان يفوكوا كسرو قاعدة المتور و قالولي هيا اصلا مكسورة و ممكن تمشي عادي بها المهم مشيت بها بس حسيت ان المتور حيوقع و في خبط جامد .... رجعتلو قالي القاعدة اكييييد .. قولتله انا قبل ما اجيلك مكنش في كدا ... قالي عشان الاسطوانة و الديسك السحب زاد فاعشان كدة بتحس اكتر .... المهم روحت لميكانيكي مجهول في الحرفيين غيرت عنده القاعدة .. و للأسف الصوت لسة موجود ... راح رافع العربية و نزل تحتها لقا شداد المتور اللي ماسك المتور و الفتيس مفكوك و شوفته بعيني و المهم قولت للصنيعي الي عند سيد ربط كويس احسن اموت و زنبي يبقا في رقابتك .. قالي خليها علي الله و للسف ولا ربط ولا حاجة ...........

و دول هما تجاربي مع سيد عبدة ..هو رجل محترم و بيفهم بس الصنيعية مفيش ضمير ... و القطع الغيار الي بيجبها غالية

[windofchange]

معاك وانا كنت بتعامل معاه وسيبته ... وبتعامل مع ميكانيكي فالحرفيين حافظ مش فاهم للاسف لكن عنده ضمير بس عايز اقلك الاهمال صفة مشتركة بين الصنايعية ومش هعمم لكن هما مش بيخافوا من حساب في الاخرة +مفيش عقوبات من الحكومة لو حصل حاجة في عربيتك او فيك فانت لو لقيت ميكانيكي بيعامل ربنا ومتعلم وعند ضمير وفاهم يبقي قشطة جدااا ")

[ra3d]

ولله انا تعبت مفيش حد عنده ضمير خالص حسبنا الله و نعم الوكيل

[lanos2004]

كلهم هذا الرجل الميكانيكى الى بتعامل معاه وانا بغير قاعدة الفتيس مربطهاش وكل شويه اسمع صوت خبط نزلت ابص تحت العربيه لقيت صموله فكرت ووقعت والتانيه على اخرسنتين والفتيس يقع
طبعا طلعت العدة والكوريك وربطتها بنفسى
دة غير انه لسه مبوظ ليا طقم سلوك بوجيهات اصلى 225 جنيه علشان بيبص على حاجه خلى الصبى ينتشهم وراحوا فى داهيه
كل الميكانيكه هذا الرجل

[ra3d]

اااااه كلوهم بينتشو اسلاك البوجيهات و يقتعوها و انا الطقم ب 300 عشان كدة بغيرهم بنفسي

[أحمد جودة]

حسبي الله ونعم الوكيل فى كل واحد بيهمل فى شغله

ونصيحة اقف على ايد الصنايعي واتأكد بنفسك من كل حاجة

[hossam_elwani]

كلنا هذا الرجل

[ra3d]

ولله كنت واقف علي اديهم بس ماشفتش القاعدة الي تحت دي :)

[abedo900]

سيد عبده

سيد عبده اخد فى رجلاش الفرامل الخلفية 50 جنية ايه رئيكم اسعاره بقت مولعه انا لو روحت التوكيل هياخد نفس السعر

[ghost_hamdi]

طيب مين شاطر وفاهم ؟

[waelgaber]

السلام عليكم اخى الكريم لو انتا بتدور على ميكانيكي كويس انا منزل موضوع عن واحد اسمه الاسطى محمود صابر فى المهندسين ده راجل جامد اوى وفاهم جدا فى قسم سكودا هو فى شارع خان يونس امام المدرسة

[sasa28]

بسم الله الرحمن الرحيم
سيدي الفاضل مع احترامي لكلام سعدتك
انا بقالي من ٢٠٠٦ مع الراجل ده
و في صله صداقه بيني وبينه
فا بشكل ما شهادتي مجروحه فيه بس هاستغل شهادتك انه راجل بيفهم و عنده ضمير
اعرفك بيه ده راجل خريج جامعه يعني مش بليه و بقي اسطي
مثقف و متعلم و مدرك لنقطتين ان الزبون غالبا علي حق و ان الالمان مش احسن مننا
و الknow how لو مش عندك مش هاتنجح في الميكانيكا
و بالتالي كل مشكله عنده ليها اعراض و هي بتوصله للعيب في العربيه بجانب استخدام الكمبيوتر
طب اعرف منين انه شاطر و كويس
لما يكون العيب خبيث و اعراضه متداخله و بالاخص في العربيات الحديثه
و ساعتها بيخش مع الصنايعي اللي شغال في كل حاجه
المشكله في تلات عربيات البولو ٩٩ و الجولف ٣ و ٢ و الابيزا ٩٩
العربيات دي بتبقي مع ناس ما بترحش تعمل سرفيس
بطريقه منتظمه و الاغلب الاعم بيظهر فيها عيوب كتير مره واحده
و البيشتغل فيهاالصنايعيه الصغيرين
و هنا المشكله ان الورشه بتبقي زحمه و في سبع تمن عربيات مفتوحين و كله مستعجل
فا كل صنايعي بينده يا عم سيد يا عم سيد يا عم سيد
و ساعات من ضغط الشغل حد بيقع و ده وارد
فا غلطه سيد عبده ان هو اعتمد علي صنايعي ما عندوش ضمير
و ما راجعش الشغل
الصنايعيه عنده اشكال و الوان و علي مر السنين شوفت العجب عنده
و هاديلك الخلاصه
في و احد اسمه بكري و واحد اسمه سيد سلوم وواحد اسمه شريف
اول ما تخش اسال عليهم بالاخص لو عربيتك حديثه فوق الالفين
ولو هاتعمل حاجه خفيفه عيل اسمه حماده او عيل صغير خالص اسمه انبوبه عنده حوالي ١٢ سنه بس كويس الاتنين دول هم كل عشر دقايق بيروحوله يقولولو عملو ايه في العربيه
النقطه التانيه انا كنت اتكلمت معاه فيها قبل كده
ان الزبون بيمشي و ما يجيش من الصنايعيه
اقلي الزبون غلطان لان الزبون جيه و عمل شغل و حاسب و مشي
و العيب ظهر تاني يبقي يجيلي علي طول و يقولي حصل كذا وكذا من فلان
و يبقي انا عرفت ان الصنايعي ده مش تمام فا هارجع و اتاكد بنفسي
لكن الزبون بيمشي و مش بيجي طب هو دفع فلوسي و ماخدش حقه من المكان من ناحيه الصنعه
الخلاصه اي حد ممكن يغلط و ما اتيتم من العلم الا قليلا
فا اي حد يحصله حاجه زي كده يروح لصاحب الورشه و لو ما اخدلوش حقه يبقي هنا الكلام
و هو علي ايدي ياما دفع فلوس بسبب غلاطات صنايعيه
مرايه اتكسرت و فانوس و سيور و خراطيم و الخ
بالنسبه للسيد الفاضل صاحب الموضوع روح لبكري و اعمل عنده اي حاجه من غير ما تبص وراه
و بالنسبه للساده الاعضاء
روحوا للورش اللي تعجبكم بس المهم انه يكون بيفهم في الفولكس مش عيل واشتري الجهاز يبقي اسطي واسلمله رقبتي
والصنايعيه الوحشه بتضر المكان. فعلاهه

بالنسبه للمصنعيات انا مش هاينفع اقول غير ان الموضوع نسبي بحت و دي نقطه مهمه ان سعات الانسان بيبقي ميزان الفلوس عنده مختلف عن غيره بس اعتقد ان سيد عبده مش طماع و الا مغلواني عكس ناس تانيه كتير الطمع بينقط من عنيهم
بدون ذكر اسامي ورش عشان عدم التجريح و هو كمان بيقبل التفاهم في السعر

اسف للاطاله بس كان عندي احساس بظلم من عنوان الموضوع
و اكرر شديد احترامي لصاحب الموضوع و للاعضاء

[minicooper20]

هو انتو قصدقو على سيد عبدو ال جسر السويس على ناصيه شارع سنان

[فنان]

سيد عبده ووليد هاوزر قرايب وبتاع قطع الغيار اللى بيجيبوا منه عند التجنيد قريبهم ايضا ومن الآخر كده كلهم شلة حرامية ونصابين عينى عينك والصنايعية عندهم فاهمين الكلام ده كويس علشان كدة بيسرقوا الزبون وهم مطمئنين وبيعملوا عمولات رهيبة من قطع الغيار القديمة والجديدة دول عصابة يابا حسبى الله ونعم الوكيل فيهم اللهم انتقم منهم فى هذه الايام المفترجة

[S O P H O S]

فعلا اهم شئ تلاقي حد بيشتغل بأمانة وفاهم