جولف 4 ولا بولو كلاسيك

[windows9x]

معروض عليا بولو 2001 كلاسيك (سيدان) فابريكه بره وجوه على 48 الف و جولف 1400 4 رشه بره وحالتها نضيفه على 65 الف .. لو مكانى تختار ايه؟

[saddam]

صديقي المواطن
سبحان الله جاري تحت بيتي عارض عربيته جولف 2000 نظيفة فضي ب 64 ألف وفيه بنت معرفهاش في نفس شارعنا عارضه بولو بيضه تعبانه ب 24 ألف ومحدش راضي يشتريها وأنا مسترخص فلوسها ولو أنا بعترف بالبولو كنت دفغتلها 19 ألف وأسمكرها وأرشها ب 6 آلاف على أعلى مستوى وأرجعها زيرو
وهذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال

[windows9x]

اللى معروضه عليا بولو سيدان، وانا محتار الصراحه!

انت ايه رأيك فى البولو السيدان دى عامه؟ انا مش بشوفها كتير اصلاً

[tito32]

خد الجولف لان الفرق مش كتير فى الفلوس لكن الجولف اقوى من البولو وكمان الجولف موديل اعلى وده رأى وبالتوفيق لحضرتك

[windows9x]

طب ممكن اكشف عليها فين سمكره؟ عندى سمكرى احسن ولا القلم بتاع البنزينه ده؟

[windows9x]

يا رجاله انا شفت العربيه الجولف امبارح وحالتها كالتالى:

1- جولف 2000 1400
2- لون زيتى ميتالك
3- رشه بره ومفيهاش اى خبطه
4- الماتور فيه حوالى 65%
5- العفشه والطنابير والبارات والتلت بليات (معرفش دول ايه الصراحه) متغيريين من 3 شهور
6- كاوتش بريدج ستون من 3 شهور
7- الاير باج مش شغاله والميكانيكى بيقولى مديا ايرور وممكن تكون حاجه بسيطه او صعبه!
8- الميكانيكى بيقولى العربيه بشكل عام حلوه

الراجل عايز فيها 65 ومش راضى ينزل مليم

ممكن حد يقولى رأيه ايه؟ بسرعه عشان الراجل مستنى ردى

افيدونى افادكم الله

[elokle]

الجولف فئه اعلي من البولو بالاضافه انها شكلا من وجهه نظري افضل + كمالياتها وتظبيتها اسهل واحلي + يعيبها فقط ان موتورها 1400 .
يعني شويه وهتلاقيك عاوز تكبر الموتور . نصيحه لو ملكش طولت بال مع الميكانيكي اصبر وشوف حاجه 1600 او اكبر وده حسب اسلوب سواقتك

[windows9x]

انا مش عايز اصرف فيها اساساً، العربيه دى لعائله صغيره يعنى انا ومراتى وبنتى وبنسافر فى الاجازات البلد مش اكتر .. فا ايه رأيك فى ال 1400 فى الحاله دى؟

وايه رأيك فى السعر كمان؟

[omaranes77]

اعتقد سعر الجولف كتير شوف حاجة موديل اعلي ويكون المكنة 1.6sr عشان تستمتع بالعربية وكدة

[elokle]

واضح من كلامك انك مش بتاع جري وحركات فبالتالي اعتقد 1400 لو حالته كويسه مش هيفرق معاك واعتقد هيجيب معاك لحد 150 كم\ساعه بس خليك في الجولف واكشف عليها كويس

[windows9x]

اعتقد سعر الجولف كتير شوف حاجة موديل اعلي ويكون المكنة 1.6sr عشان تستمتع بالعربية وكدة

أنا شوفت على كونتاكت كارز ولاقيت ان اسعارها من 65 ل 80 حسب الحاله .. وخايف اقفش على الراجل ملقيش عربيه بالحاله دى والسعر ده خاصة ان المرايات كهربا و كده :)

[windows9x]

سؤال كمان معلش، لو أستقريت على اى عربيه منهم، المفروض استلم منه ايه؟ كام مفتاح مثلا؟ ومفاتيح الجولف 4 والبولو بيبقوا كام واحد؟ ولو فى واحد ناقص يضر بحاجه؟

[S O P H O S]

الجولف بس خلي بالك من الماتور