بورا ولا باسات .. الاتنين 2001

[Ghost2]

السلام عليكم و رحمة الله و بركاته

الاخوة الاعزاء اعضاء قسم الفولكس

لي صديق مقبل على شراء سيارة و الميزانية حوالي 65 الي 70 الف جنيه بمصاريف نقل الملكية . الميزانية لا يمكن ان تزيد عن ذلك .. و هو في حيرة في الاختيار بين الرائعة بورا موديل 2001 اوتوماتيك و سيدة الطريق باسات 2001 مانيوال او اوتوماتيك و الارجح هو الاوتوماتيك

في حيز الميزانية هل يمكن ان يجد حالة جيدة خصوصا ان الاسعار على الانترنت اصبح بها مبالغة و لكن لا يوجد تنفيذ بهذه الاسعار

هل البورا ستكون اختيار جيد او الباسات و ارجو ذكر الاسباب و ايهما اكثر اعتمادية و ايهما معمر في قطع الغيار و ايهما اقل في المشاكل
و لكم فائق الشكر

[Ahmed Saad]

بص يا باشا الاتنين جامدين بس انا هكلمك على الباسات علشان معايا موديل 2000 أولا العربيه واسعه جدا من جوه وشنطتها مالهاش حل قطع غيارها رخيصة ومش غاليه وكتييره اووى استيراد ومعمره لأقصى درجه ممكن تتخيلها كفايه اني اقولك اني مغير طنابير فراملها الفبريكه السنه دي بس تكون القطع الاصليه اللي هيا هتبقى استيراد والجديد فيه منه كويس وفي مضروب بس المجمل كويس بس مشكله العربيه في حاجتين أولا فيها طقم مقصات أمامي عباره عن 8 شدادات 4 على كل عجله اتنين تحت واثنين فوق مشكلتهم بقى انهم غاليين شويه يعني الأصلي بتاعتها تخش في 4 آلاف جنيه لانها مقصات ألومنيوم مش حديد بس مقصات جامده وبتعيش جدا وتمنهم استيراد 1200ج في الحرفيين وفي منهم صيني ب 1300ج بس الأفضل يااصلي ياستيراد وتاني حاجه فيها صيانتها رخمه شويتين يعني عاوزه واحد فاهمها علشان مايعكش فيها
غير كده هي عربيه محترمة وركوبتها اريح وافخم من الفانتازيا انا بقولك كده علشان الفانتازيا مع عمي فبركب الاتنين ونصيحة اخويه من اخ خايف على مصلحتك لو عايز تركب باسات ماتسترخسش وأركب النضيفه حتى لو غاليه شويه من الاخر اركب النضيف يريحك اركب المتهان تهينك معاها ويارب أكون افدتك وفي انتظار رأي الأعضاء وملاك البورا لأخذ رأيهم وانت تقرر وربنا يوفقك للاصلح

[mohamedbook]

ارجح البورا لعده اشاياء
الميكانيكا والعفشة كلها في كذا موديل
يعني الجولف 4 الاودي 3 الاسكودا الاكتافيا a4 كلها واحد الميكانيكا والعفشة واحد مفيش اختلاف عشان كده هتكون ارخص في حاجتها
العربية شببي اوي وشيك بس عبها انها ديقة من جوة شوية للي قاعد وري اذا كنت طويل ورجعت الكرسي
الاختلاف في العربيات دي في الشكل الخارجي فقط اما كل حاجة واحده
اعتقد الباسات مختلفة في كله والله اعلم انا مجربتهاش بس بحس ان المكنة بتاعتها مختلفة عن مكنة البورا شفتها ابل كده بس اهم حاجة الحالة النضيفة وتكشف عليها كويس

[omaranes77]

الاتنين ممتاةىين والبورا ذي اكتافيا a4 بس الباسات اشيك وفخمة عنهم

[khaled_rafea]

بعد إذن صاحب الموضوع, بالنسبة للعربيات القديمة البورا و الباسات و الجولف 4, هل زيت الفتيس الأوتومتيك لازم يكون الزيت الالمانى ابو 500 جنيه زى الجيتا و الa5 و لا الموبيل 350 يمشى عادى ؟

[Ahmed Saad]

بعد إذن صاحب الموضوع, بالنسبة للعربيات القديمة البورا و الباسات و الجولف 4, هل زيت الفتيس الأوتومتيك لازم يكون الزيت الالمانى ابو 500 جنيه زى الجيتا و الa5 و لا الموبيل 350 يمشى عادى ؟

بص ياباشا الفولكس القديم الاتوماتيك ليه زيت مخصوص اللي هو الأبيض المصفر فيه منه أصلي وده اللتر ب275ج وبيتغير على 60000 كم وفيه منه ماركة اسمها فيبي ألماني اللتر ب90ج وبيتغير على 40000كم بس الموبيل ده معرفوش هما النوعين دول الأشهر بين كل الأنواع الأصلي والفيبي وماينفعش يحتحط زيت أحمر خالص تجيب فتيس على طول ويارب أكون افدتك

[mohamedbook]

بعد إذن صاحب الموضوع, بالنسبة للعربيات القديمة البورا و الباسات و الجولف 4, هل زيت الفتيس الأوتومتيك لازم يكون الزيت الالمانى ابو 500 جنيه زى الجيتا و الa5 و لا الموبيل 350 يمشى عادى ؟

انا معايا بورا 2002 لازم زيت كهربة والزيت سعرة كلاتالي اللتر الالماني الارجنال البيمشي 60 الف كيلوا سعرة 175 ج
واللتر االالماني الي بيمشي 30 الف كيلوا سعرة 130ج
والفتيس بياخد 4 لتر مع تغيير الفلتر الي هو تمنة لو الماني 150ج لو الماني اورجنل 350ج
اعتقد ان الزيت والفلتر هيخش في 1000ج لو الفلتر الماني عادي

[khaled_rafea]

جزاكم الله خيرا, يعنى كده البورا تختلف عن الجيتا لأنها مع واحد قريبى و لتر الزيت atf المانى ب 500 جنية و بتاخد 5 لتر, يعنى الغيار لوحده كل 40 الف كيلو يعمل 3000 جنيه بالفلتر تقريبا, طيب بالنسبة لاسعار قطع غيار البورا هل ارخص من الجيتا ولا غالية زيها برده ؟ ميرسى كتير لحضراتكم

[ahmed azaizy]

البـــــورا عربيه تحفه اقسم بالله
انا بغير عربيات كتير اوى .. يعنى ممكن العربيه تقعد معايا 4 شهور وابيعها عادى خالص
عمرى ما ندمت انى بعت عربيه غير لما بعت البورا !!
هقولك المميزات
ثبات مالوش حل على الطريق .. لحد 110 كأنك ماشى على 50 .. ولا تحس انك منتبه اوى للطريق ولا قلبك يتشد مع الطريق وكمان الاهم ان اللى راكبين معاك ممكن يحسوا انك ماشى 60 ومش عاوز تجرى !! .. وبعد الـ 110 معاك ثبات خرافى لحد 150 ومجربتش اكتر من كده بصراحه
العربيه عاليه ومش بتحك فى مطبات مهما كنت محمل
وجهه نظرى الصالون مش ضيق خالص
الشنطه واسعه جدااااااا
الموتور قوى بس مش فى البدايه
الفتيس الاوتو حلو ونقلاته سهله ومفيش نتشه
الشكل فخم من برا ومن جوا ومريح اوووووى

نيجى بقى للعيوب
العربيه ممكن يكون وزنها تقيل شويه وده انا بعتبره ميزه مش عيب .. لكن الطلعه الاولى بطيئه نسبيآ وبعد كده صاروخ
الفتيس الاوتو فى مشكله لما بتجيبه على r عشان ترجع ورا .. هتلاقى استجابه العربيه بعد ثانيه تقريبا
يعنى مش هترجع علطول حتى لو دوست بنزين للأخر غير بعد ثانيه (ودى مش مصيبه يعنى)

اهم حاجه تطمن على دوره التبريد عشان فى ناس اشتكت من السخونه بس الحمد لله محصلش معايا خالص
وتطمن على الفتيس على الجهاز عند هانى عصمت اللى فى جسر السويس عشان فاهمين كويس

وقطع غيارها موجوده كتير عشان نزلت معاقين فى بورسعيد
اى استفسار انا فى الخدمه

[Ghost2]

طيب بالنسبة للباسات اي موتور مفضل فيها .. يعني في 1600 و 1800 و 2000 سي سي .. ايهم مفضل في المانوال و الاوتوماتيك

[Ghost2]

رجالة الفولكس فين

[Ahmed Saad]

طيب بالنسبة للباسات اي موتور مفضل فيها .. يعني في 1600 و 1800 و 2000 سي سي .. ايهم مفضل في المانوال و الاوتوماتيك

بص يا سيدي ال1600 موتور حلو من ناحيه الأعطال يعني معمر بس عيبه انه مش بيقوم بالعربيه بتبقى تقيله اوى في الطلعه بس احسن موتور ليها ال1800 التربو بيدي 150حصان وبيتعمله tunning بيوصل 180حصان بس ببرنامج ال VCDS الأصلي والكابل الأصلي والموتور ده بيشتغل مع الفتيس المانيوال تمام بس الاتوماتيك بيشتغل مع الفتيس ال 5 غيارات الاستبترونيك ومش بيشتغل مع الفتيس الاتوماتيك العادي ال4غيار علشان الكنترولات وكمان الفتيس الاستبترونيك بتخرج سرعه الموتور ده صح بس الموتور ده عايز عناية شويه وحد بيفهم في المواتير التربو ودول قليلين شويه فيبقى قدامك حل من اتنين المكنه ال1800 العاديه ودي بتخرج 125حصان وبتشتغل مع الفتيس المانيوال والاتوماتيك ال 4 نقله العادي والمكنه ال2000 فيها نوعين واحده واحد كامه وتخرج 115 حصان ودي فكك منها لأن 1800 العاديه أقوى منها والتانيه ال2000 ال2 كامه بتخرج 130حصان ودي كويسه بس انا شايف من وجهه نظري المتواضعه ال 1800 العاديه دي أفضل مكنه تتعدل ليها العربيه لأن مفيهاش لعب كهربا ووجع قلب كتير وبتظبط مع فتيس ال1600 الاتوماتيك على طول من غير تغيير وطبعا كل المواتير اللي فاتت بيشتغل مع بنزين92بما فيهم الموتور التربو من واقع كتالوج السياره مش فتى وأي سؤال انا في الخدمه

[Ghost2]

طيب بالنسبة لسعر الباسات موديل 2000 او 2001 متوسط كام؟؟

[omaranes77]

طيب بالنسبة لسعر الباسات موديل 2000 او 2001 متوسط كام؟؟

65 ألي 75 وممكن اكتر حسب الحالة

[alzelafy]

الباسات طبعا اوسع و افخم لمراحل قطع غيارها فى المتناول متخافش خالص التسارع بتاعها انا لسه امبارح شادد مع سوبر اكشن و بصراحه من 10 ل 130 مع بعض بعد كدة عملت مفاجىء و عينك ما تشوف الا النور .... انتا عارف الباقى