ال الار بى ام بيلعب

[windows9x]

روحت امبارح لهانى عصمت وشكوتى كانت ان الار بى ام بتاع العربيه بيكون واقف على ال 8 وبشكل متكرر كل دقيقه مثلا او دقيقه ونص ينزل لل 6 ويرجع تانى ولو شغلت التكييف ينزل لل 5 وساعات اقل وممكن العربيه تفصل لو مكبستش شويه بنزين

المهم كشف بالكمبيوتر وقاللى هنكشف على طرمبه البنزين، كشف المكيانيكى اللى هناك وقاللى زود بنزين، المهم قاللى الطرمبه كويسه

طب نضف بوابه، نضفنا بوابه .. وزى ما هى المشكله

طب غير حساس الحراره اللى على الماتور .. قلتلهم ليه؟ دا ايه علاقته بال ار بى ام، قالولى بيدى اشاره للكونترول عشان يتحكم فى كميه البنزين، اقتنعت وغيرته، بس برضه المشكله مازالت قائمه

غير بوابه طيب .. غيرنا بوابه بواحده استيراد وبرضه نفس المشكله، وكان كمان بدال البنزين تقيل .. فخليته يرجع البوابه القديمه

غلبوا فقالولى استنا المهندس هانى عصمت ييجى يبص عليها، بس انا كنت مستعجل فامشيت

انا متضايق جدا خصوصا ان العربيه بتفصل كتير وانا مشغل التكييف .. ومحتاج مساعدتكم

[hossamalsadik]

جرب كنترول تانى وكوده وجرب والموضوع مابيخدش وقت لو مازالت
عندك حساس الهوا او حساس الكرنك يتشيك عليهم

[windows9x]

بس الكونترول يونت هيكون حصل فيها ايه مثلا؟

[Ahmed Saad]

لما كشف سكان طلعوا أعطال ايه لانها ممكن تكون حساس ايدل أو ايرماس هما اللي يخلو ال rpm يلعب بالترتيب ايدل وبعدين ايرماس

[windows9x]

الجهاز مطلعش حاجه، لانه قاللى انا شايف كل حاجه كويسه وده الغريب!

ان الار بى ام كان فيه مشكله قدام عينيه بس الجهاز مش مطلع حاجه، ولما قلتله طب نغير حساس الايدل من غير البوابه قاللى البوابه بتتباع بالحساس كامله

[windows9x]

طيب ممكن يكون حساس كرنك او طرمبه بنزين؟

انا ساعات لما بلف الدركسيون على الاخر او اخد ملف جامد وطالع من الثبات على الاول، العربيه تفصل

[windows9x]

كملنا امبارح كالاتى:

1- غيرنا طرمبه بنزين (مفيش فرق)
2- غيرنا كونترول وكودناه (مفيش فرق)
3- غيرنا موبينه (ولا الهوا)
4- شك ان تقسيمه سلوك البوجيهات مش مظبوطه وشيك عليها
5- خرمنا خرم بعد الفرن عشان نعرف لو كان الشكمان مكتوم وهو اللى كاتم الموتور فبيفصل

وبرضه مفيش فايده .. قاللى الموتور ال 1400 ده عزمه ضعيف ويمكن الكومبريسور بتاع التكييف يكون قافش!

انا يأست خلاص.

[محمود السيد]

لاتياس من رحمة الله

[alzelafy]

جرب بوابه تانيه عند حد تانى الموضوع مش هيبعد عن كدا

[windows9x]

انا هجرب بوابه تانيه ان شاء الله

ممكن يكون بليه الكمبريسور تقيله مثلا؟

[windows9x]

فى واحد قاللى ان مادام الار بى ام بيلعب لما الماتور يسخن يبقى ممكن موبينه وواحد تانى قاللى ممكن خراطيم الفاكيوم

ايه خراطيم الفاكيوم وعلاقتها بالماتور؟

[i.ali]

فى واحد قاللى ان مادام الار بى ام بيلعب لما الماتور يسخن يبقى ممكن موبينه وواحد تانى قاللى ممكن خراطيم الفاكيوم

ايه خراطيم الفاكيوم وعلاقتها بالماتور؟

نفس المشكلة عندى ايه الحل

[windows9x]

لسه والله ماوصلت لحل، كسلت لانى مش من هواة التكييف اوى وعودت نفسى على لعب الا ار بى ام ده

أمانه انت لو وصلت لحاجه قوللى

[i.ali]

لسه والله ماوصلت لحل، كسلت لانى مش من هواة التكييف اوى وعودت نفسى على لعب الا ار بى ام ده

أمانه انت لو وصلت لحاجه قوللى

حاضر

[windows9x]

تعديل بسيط ممكن يغير مجرى الاحداث

الار بى ام بينزل لما مروحة الريداتير بتشتغل بس، يعنى لو انا سايب العربيه شغاله على السلانسيه هيبقى تمام، اول ما المروحه تشتغل الماتور يبرجل واحس ان ممكن يفصل، ولو داخل على مطب ولا مشغل التكييف وضغط فرامل مع التكييف والمروحه مثلا اشتغلت على السرعه التانيه الار بى ام ينزل خالص والعربيه تفصل

لازم اسند ببنزين والبنزين غلى :(

انا شاكك بالترتيب كده فى:

1- بوجيهات او سلوك البوجيهات
2- الدينامو
3- البطاريه
4- خراطيم الفكيوم
5- دينامو
6- بوابه

شاركونى رأيكم لان المشكله بقت مزمنه وبفكر ابيع العربيه بعيبها لواحد يجرى وراه