باركولي اشتريت بولو 99

[معاذ الشرباصى]

استاذ إسلام

شكرا لك على الرد وشوف ياعم:
قعدة موتور استعمال خارج اصلي: 300 جنية (من صلاح الدين)
سير كاتينة جديد: 70 جنية
رولمان بلي سير كتينة: 175 (جديد استيراد الماني)
مراية جنب يمين جديدة تايواني : 120 جنية

الميكانيكي خد مصنعية 100 جنية علشان تركيب سير الكاتينة وقاعدة الموتور!!!
انا حاسس انة كتير ولا اية؟؟؟

يا ريت يا استاذ اسلام اقابلك يوم لو يناسبك ونروح لهريسة سوا اصل اخوك مييييييح في العربيات واهو بردة تعرفني على الناس هناك علشان ميشتغلونيش!

لو ممكن تبعتلي نمرة تليفونك واكلمك ونتفق.

وشكرا

goodwave

Ahmed Bassuny

هى اسعار قطع الغيار تقريبا زى هنا فى القاهرة

و مصنعية الميكانيكى مش غالية, علشان اى شغل فى الموتور بيبقى غالى شوية

[goodwave]

شكرا على التعليق يا استاذ معاذ

goodwave

[Islam_galal]

لاخى (احمد بسيوني) good wave

أعتذر للتأخير بسبب ظروف شغلي بادخل فترات قصيرة غير منتظمه
الحقيقه انا مش خبير قوي في البولو لان بقالها معايا 6 شهور فقط علشان كده في أول رد قلتلك اخونا معاذ يفيدك اكتر لانها معاه من و هي زيرو
و للأسف انا كل علاقتي بهريسه هي مرة واحدة اللي حكيت لك عليها
طبعا انا يشرفني معرفتك و المحمول 0123608241
بس للأسف الموبايل اتسرق فالخط حاليا مش دايما شغال (لما المدام بتسمحلي اخد تليفونها فقط :lol: )
الوضع ده مؤقت ان شاء الله
لو تحب نروح سوا شوف امتي (هو مواعيده من 10 ص الي 9 م) عدا الاحد (معلش انا مسافر من 19/7 الي 23 /7 ان شاء الله)
بس الاسعار اللي انت قولتها معقولة جدا يا ريت تقوللي فين و اسأل عليه يمكن يكون كويس
انا سمعت ان فيه واحد في محطة مصر (بيقولوا اسمه هريسة برضه بس سمعت انه مش قد كده) و واحد تاني ناحيه ميامي بس ماعرفش عنه حاجة

[goodwave]

الاخ الاستاذ اسلام

شكرا على ردك الوافي وياعم لو عاوز تليفون زيادة فانا تليفوني تحت امرك :lol:
انا طلعلي مشكلة جديدة في العربية وهي الاسكترا ودة نظرا للشوارع المدغدغة عندنا في العجمي!
المهم انا رحت "للدكتور" هريسة وقالي نكشف ونشوف!

خلى كام واحد من صبيانة يفكوها وبصراحة كانوا بيعاملوا العربية معاملة زبالة لا تليق بشهرة المكان! المهم هما يشتغلوا وبعدين ينادوا الدكتور هريسة يبص بس من غير لمس ويقولك اية و بكام!؟

المهم بعد ساعتين انتظار فكوا الاسكترا وقالي دي ماتنفعش ومتركبة غلط والعربية متقفلة من تحت بماسامير بلدي وهكذا ولازم اشتري اسكترا جديدة (استعمال) بس قالي كدة كدة مش حتلاقي في اسكندرية!

الخلاصة لهف 25 جنية في المشوار الاهبل دة (حل السكترا و قال ماتنفعش وركبها)
كمان قالي لو حنحشيها 100 جنية ولو تركيب 80 جنية!

المهم مشيت من عندة محبط علشان قالي مش حتلاقي اسكترا استعمال وعلشان دفعت 25 جنية على فشوش مع ان في حداد عفشة عندي في العجمي كشف على الاسكترا من غير مايحلها وقالي نفس الكلام من غير ما ياخد ولا مليم!!! بس انا استاهل جريت ورا الصيت بتاع هرييييييسة!!!!

المهم نزلت الفراهدة وصلاح الدين وابو الدردار ولقيت اسكتر استعمال ب 700 جنية بس قلت ادور كمان. لقيت واحدة تانية "استيراد الماني جديدة" ودة طبعا غش تجاري ب 1250 جنية . وبالصدفة داخل اسال على علامة البولو (اصلهم كسروها عند هريسة) لقيت اسكترا صيني كاملة بالدراعات بس من غير بيضات ب 330 جنية!!!!

بصيت عليها لقيتها خامة نضيفة وشكلها تقفيل محترم وكمان نفس المصنع منزل اسكترات للبورا والجيتا والباسات يبقى ماجيبهاش لية!!!

الحمد لله جبتها وركبتها عند صنايعي عندنا في العجمي والراجا فك القديم وركب الجديد وربط العفشة كلها ب 30 جنية وشغلة زي الفل! شفت بقى هريسة حرامي ازاي!؟

معلش طولت عليك بس كنت متغاظ من النصب وقلت لازم احذر الناس.

اخيرا وليس باخر شكرا على رقم الموبايل وان شاء اللة نكون على اتصال,

وشكرا

goodwave

[Omar M]

الأستاذ goodwave
اتضايقت جدا من اللى حصلك عند هريسة من معاملة سيئة للعربية و أخد منك فلوس وأحبطك وكمان كسرولك العلامة . طيب يا ريت لو حضرتك تعرف بديل كويس عن هريسة نعرفنا بيه و تبقى تقولنا السكترا عاملة معاك أية فى شوارعنا الجميلة :D
و شكرا

[goodwave]

الاستاذ عمر

والله الاسكترا لحد دلوقتي بقالها يومين وزي الفل والحمد للة بس طبعا تحتاج تجربة اكتر بس طبعا انت اكيد عارف ان اسبوعين تجربة في العجمي (بحالتة دلوقتي) تغني عن شهرين تجربة في البلد!

انا بتعامل مع ميكانيكي عادي في ابو يوسف ( بعد الهانوفيل ب 3 كم) وهو مش وحش!

اما بتاع العفشة واد صنايعي بجد وربنا يباركلة ودة قدام مدخل 6 اكتوبر (شاطئ النخيل) يعني لو تحب ممكن تيجي صحراوي وترجع صحراوي من غير ما تدخل منطقة الدمار الشامل خالص (قصدي العجمي)! وانا في الخدمة لو تحب اقابللك ونروح سوا.

نصيحة لوجه اللة

انا لاحظت فرق فظيييييع في الاسعار من محل لمحل وفية للحاجة الواحدة كذا نوع وكذا مستورد فمعلش اتعب شوية ولف ودور كتير قبل ما تشتري اي قطعة غيار واهو لو حتي 10-20 جنية فرق بيتك اولى بيهم؟

بالمناسبة ماتعرفش حد بيبيع علامات الفولكس بسعر حنين (مستعلمة)؟

وشكرا

Goodwave

[Omar M]

للأسف معرفش حد بيبيع علامة الفولكس استعمال , كلمة حنين صعب تتقال مع قطع غيار الفولكس لان قطع الغيار للأسف ناااار حتى االمستعملة

[Islam_galal]

اخي good wave
بصراحة موقف يضايق
ااسف علي التأخير في الرد
علي كل حال نبقي دايما علي اتصال يمكن نلاقي واحد احسن من الأخ كنافة قصدي قطايف
معلش رمضان كريم :lol:

[mohammed magdy]

معلش ياجماعة انا مقرأتش الموضوع ده غير دلوقتى بس ممكن اسال goodwave ايه المشكله الكانت بتقابلك عشان كده غيرت الاسكترا(طبعآ انا اسف مبروك على العربية)

[goodwave]

اسلام عليكم

الله يبارك فيك يا استاذ محمد مجدي!

اولا الدريكسيون كان فية بوش جامد وثانيا لما كنت بمشي في شوارع مكسرة كنت بحس بتخبيط ودردرة في الدواسات كإني لامس الارض!

على فكرة بسوءالي لبعض اصحاب البولو قالولي إنها من أشهر عيوبها موضوع الإسكترا!

[mohammed magdy]

بالنسبة للاسكتر بتاعت البور بكام يا استاذ good wave

[sayedmsm2]

انا سعيد جدا بتواجى معكم

[original]

علامة الفولكس اللى فى الشبكة فى اسكندرية ممكن تلاقيها عند الصعيدى اللى فى جمال عبد الناصر
أنا سألته قاللى 30 جنيه

[mohamed ibiza]

الف مبروك يا باشا تفوتها في عرق العافية :d انا بجيب كل حاجة من عند فولكس هاوس في شارع مراد و الراجل ممتاز بصراحة