بعد جوله التوفيقيه وما وصل اليه حال قطع الغيار

[Ahmed Saad]

امبارح كنت في التوفيقيه علشان اجيب تيل فرامل لسيارتي الباسات موديل 2000 طبعا بسبب ان كل ماجيب تيل يصفر من اول ريمسا وحتي الاتي كله مضروب ويقولك اصلي وكله زي الزفت المهم نزلت التوفيقيه ولفيت عند كل بتوع الفولكس كله يطلعلي تيل في علبه شبه العلبه الاصليه ويقوللي ده الاصلي اقوله بكام يقولي 160 واللي يقولي 180 يعم طب اصلي ازاي واللي يطلعلي تيل صناعه انجليزي واللي صناعه فرنسي واللي مكتوب عليه Made in Garmany مش Germany يعني تخلف وكل الانواع تقفيل زباله تحس ان التيل مدهون اسود بروله دهان طبعا لاقيت انضف حاجه تيل ماركه توبران ممتاز وانا كنت مجربه قبل كده وكان ممتاز وماصفرش خالص وغيرته علي 15000كم معرفش ليه بس حسيت انه قرب يخلص بس بصراحه ممتاز وجبته ب180ج بس فعلا انا اتصدمت من قطع الغيار المغشوشه اللي غزت السوق ومستوي ردئ جدا جدا جدا فقولت اعمل الموضوع ده لتوعيه الناس وكله يخللي باله

[hossamalsadik]

ربنا يستر ياحمد والله
الواحد لما بيشوف المستوى المتدنى الى بيوصل ليه بعض التجار فى أستيراد قطع الغيار نفسه بتتسد
الله المستعان

[Ahmed Saad]

ربنا يستر ياحمد والله
الواحد لما بيشوف المستوى المتدنى الى بيوصل ليه بعض التجار فى أستيراد قطع الغيار نفسه بتتسد
الله المستعان

حسام باشا اخبارك ايه والله الواحد اتذهل نازل اجيب تيل الاقي أنواع والله من ردائتها خفت منظرها يوحي بأنه مع أول فرمله الطنبوره هتتكحت وتخلص في 1000كم من خشونه التيل ويقولو الأصلي فعلا حسبي الله ونعم الوكيل في اللي بيستورد الحاجات دي

[mo3tazanas]

ياراجل دة انا عاندى كوعة ماية اتكسرت لفيت لما ورمت كل واحد عاندة نوع شكل وكلة يقولى دة الاصلى لما قرفت

[Ahmed Saad]

ياراجل دة انا عاندى كوعة ماية اتكسرت لفيت لما ورمت كل واحد عاندة نوع شكل وكلة يقولى دة الاصلى لما قرفت

ماهي دي المشكله ان القطع كلها مضروبه وكله بيقول اصلي لا وايه في ناس غلبانه بتصدق وبتشتري لمجرد انه البائع قال اصلي

[Abo_Mazen]

ماهي دي المشكله ان القطع كلها مضروبه وكله بيقول اصلي لا وايه في ناس غلبانه بتصدق وبتشتري لمجرد انه البائع قال اصلي

أهو أنا بقى من الناس الغلابه اللي بتصدق البائع لما يقول أصلي ..طيب يعني أنا المفروض أعمل إيه طيب ..لما البائع بيقولي ده الأصلي ..أقوله لا .إنت كذاب ..هو أنا شفت الأصلي فين عشان أقول ده الأصلي ولا مش الأصلي غير من الشكل ..هي فعلا بقت حاجه تزهق ..ومن كتر الزهق ..الواحد ما بيصدق البائع يقول ده الأصلي يقوم واخد الحاجه ..عشان لما تخرب .نلاقي حد ندعي عليه ونقول منك لله يا فلان ..اللي هو البائع يعني ..وأدينا بنتعلم

[exelence]

بعد اذنكم يا جماعه بولو 98 اجيب سير كاتينه و سير تجميعه أصلى منين و يا ريت لوحد يعرف الاسعار و كمان لو هاجيب البلى كمان يعمل كام

[TOOLA]

الاصلى اسعاره معروفه، حاجه زى التيل مش هتقل عن ٤٠٠ ل ٥٠٠ لعربيات فولكس، الوحيد الكنت باخد منه وانا مغمض كان اشرف الشهابى بس ادفع باه.

فيه باه سلسله محلات لفولكس (فتح الباب) حاجتهم زفت و معاملتهم ازفت.

فيه واحد ورا السلاب فى مكرم عبيد حاجته كانت كويسه، بيتعامل معاه م/ ايمن بتاع العاشر

[ehab_mansour]

ماهو علشان كده انا مش راضي اغير طنابير عربيتي اللي فيها ريجه ... لأن مافيش تيل ينفع مع الطنابير الجديده ... كله مضروب
فمكبر دماغي و بشتري ارخص تيل يقابلني في السوق لأن كله صيني و مش هتصدق ان اخر تيل حطيته في عربيتي كان صيني و ارخص حاجه قابلتني ب 90 او 100 جنيها تقريبا و شغال زي الفل ولا بيصفر ولا فيه اي مشكلة ولا حتي فيه اي احساس بالريجه اللي في الطنابير

هعمل ايه ماهو لازم اتعايش مع واقعنا المزفت بهباب ده
ربنا المستعان

[SYD]

انا ليا قصص مع التيل المضروب دة
الحمدلله علي كل حال

تحياتي

[aymanabdelwhab]

انا بقي يا معلم لبست في حيطه ... روحت لمحل عندنا في دمياط وقولتله عايز تيل اصلي بتاع باسات 2000 المهم جبلي واحد ودي اول مره اغيره ... جابلي واحد من غير فيشه اولا وثانيا دفعت 300 جنيه وقالي اصلي وحلفانات وثالثا بقي مطلعش هو لاني الاصلي بتاعي بفيشه ... فل الفل يعني وركبته وسايبه لما يصفر بقي اغيره