تسخين سيارة جيتا اثناء فترة السفر

[mohamed.alu]

عندى مشكلة مع عربيتى (مش فى العربية دى فيا انا )

بطبيعة شغلى انا باسافر كتير 3 شهور مثلا وارجع اسبوع اسبوعين شهر بالكتير واسافر تانى فبعانى من عدم تدوير العربية وتسخينها.
يعنى انا مش عارف هل لو سيبتها 3 شهور من غير ما تدور هل يحصل حاجة للموتور مثلا زى الشنابر مثلا او الزيت ينشف ويطحن مثلا او البطارية تفصل والله ما عارف اعمل ايه وخايف على العربية وللاسف معنديش حد يسخنها وبتفضل مركونة فى الجراج وطبعا البواب انا ماقدرش اسيب معاه المفتاح
العربية جيتا 2010 ماشية 37 الف وللاسف مش بابقى عارف مصير الزيت يعنى المفروض امشى بيه 10000 بس العربية بتتركن فهل امشى برده 10000 ولا الصالحية اد ايه فى الموتور ؟؟؟؟؟

افيدونا ربنا يكرمكم

[muhmado_furp]

اعتقد ان المشكلة مش في الزيت لان كده كده اقصي صالحية للزيت داخل الموتور
انه يفضل ميزدش عن سنة حتي لو استخدام بسيط فالحل انه بعد سنه يتغير
الفكرة في البطارية والكاوتش
البطارية اعتقد ممكن تنام وبالنسبة للكاوتش فهل الفترة دي والعربية واقفة ممكن تخليه مش عدل
هل مفيش حد في الاسرة ينزل يدور العربية كل اسبوع مره لمده عشر دقائق

[mohamed.alu]

بالنسبه للكوتش انا باحطله نيتروجين فالنتيروجين كويس في حاله الركن ومش بيريح بمعدل كبير زى الهواء هو فعلا البطارية الخوف منها .... للاسف انا المدام مالهاش اى علاقة بالعربيات ولا من قريب ولا بعيد عاوز اقولك علشان تقعدها على كرسى السواق دى معجزة

[Mohamed_Ayman]

البطارية لو جافة بتقعد عادى ،

[hany63]

غير الزيت كل سنه
و المدام مشكوره تلف المفتاح في الكونتاكت مره في الاسبوع لمدة 5 دقايق و شكرا

[mohamed.alu]

طيب موضوع التدوير ده هانحاول نحله ان شاء الله .......... عندى كذا استفسار وكنت سمعت الكلام ده مش كذا واحد
لما العربية بتقعد فترة ما تدورش لما اجى ادورها ما ادورهاش على طول افتح الكونتكت مرة واقفل ومرة واقفل علشان الزيت يطلع فى الموتور وبعد كده ادور علشان الشنابر ما تتعبش فهل الكلام ده ؟؟؟ ياريت الناس اهل الخبرة تفيدنا
الحاجة التانية دلوقتى العربية مش بتدور كتير وبالتالى البطارية مفيش تعويض للشحن اللى بيتسرب نتيجة وقفة العربية والكمبيوتر شغال فيها وهى مقفولة فكنت عاوز اعرف المفروض البطارية المفروض تقعد اد ايه وتفصل مثلا ؟؟

شكرا يا جماعة ومتشكر على الردود والمساعدة