أخيرًا جبت بولو

[Islam_galal]

بالظبط يا باشا عدس
الاسم مكانش عايز ييجي في دماغي أبدا من امبارح

بس الشيخه بيقولوا أرخص في الاستعمال

[shankosi]

ألف مبروك اولا على العربية
ثانيا كنت عايز اعرف أشتريتها بكام وكام سي سي وكل حاجة لو سمحت
شكرا شكرا

وأنا كمان عايز أعرف التفاصيل دي وصرفت كام عند هريسة وغيرت إيه؟؟

[fast_car]

مبروك عليك و ربنا يبارك لك فيها . العربيات دى احسن من العربيات الفيرنا والهرس دة فعلا وعن تجربة بس تفضل ايدك فيها وتعمل معاها الصح وما تستخسرش وهتبقى تمام

[iBiZa]

بس ما فهمتش قصدك ايه بالأصلي؟

قصدى الاصلى بتاعتها مش اى طارة سبور و خلاص.

الي بتنزل هنا اجيب زيها جديد ولا الي بتنزل بره

متجبش زى اللى بتنزل هنا خالص لانها شوية و هتبتدى تتبهدل يبقى انت كدة معملتش حاجة. هات زى اللى بتنزل برة.

و 600 جنيه ديه جديده ؟

لأ, دية استيراد و على حد علمى مفيش منها جديد.

بخصوص الشبكه انا كلمت راجل 100 100 من القاهرة و قالي ممكن يجيبهالي على 350

هاتها, غالبا مش هتلاقى سعر اقل من كدة و السعر دة انا مسمعتهوش فى شبكة GTI اصلية.

[amreg]

@ islam galal
ان شاء الله اسأل في الاتنين

@shankosi
انا رديت على سؤال zizophone
و بالنسبة لهريسة انا مش عارف سعر كل حاجة لوحدها
هوا وراني الفاتورة بس مش فاكرها والله
الي عمله عموماً تغير زيوت و فلاتر و سير دينمو و سير تقسيمة و تربيط عفشة
و بصلي على الفرامل علشان انا قلتله يشيك عليها (طلعت سليمة الحمد لله و التيول لسه فيها كتير)
وغير بوجيهات
التكلفة 500 و هو اخد 100 جنيه مصنعية
كله 600 جنيه
هي أصلاً كانت صيانة 60000
بس كده

@ibiza
بصراحة مستغلي 600 جنيه في طارة :)
و استعمال كمان :)
لأني قدامي واحدة momo عاملة 250 وشكلها حلو جداً و خامة نضيفة قوي
غالبًا مش اوريجينال علشان السعر بس لو تقليد يبقى نضيف قوي قوي
كده كده حنزل أشوف الأصلي و اقرر بعدها
بالنسبة للشبكة ديه من عند GO الي في القاهرة في ألماظة
و الراجل ده محترم قوي و عنده حاجات تقيلة اوي و اوريجينال و أسعاره 100 100
مش عارف انت عارفه ولا لأ

[iBiZa]

لأ مش عارفة بصراحة و اكون شاكر ليك لو قلتلى عنوانة فين او رقم تليفونة, اهو الواحد يروح يتفرج و ياخد فكرة.

[elshrpeny]

انا مشترى جديد للسياره بولو وعايز اسال على شوية حاجات فممكن تساعدونى؟

السلام عليكم ورحمة الله وبركاته على اهل المنتدى الكرام
انا على فكره مشترك فى المنتدى من زمااااان وكمان من قراء مواضيعكوا بإنتظام بس مكنتش لسه من اصحاب السيارات عشان أكلم معاكوا فيها بس الحمد لله رب العالميين اشتريت واحده بولو 2001 .

وكان عندى شوية اساله مبدأيه أحب افتحها معاكوا كبدايه ليه فى المنتدى.
اولا: كنت عايز اعرف سعر مفتاح التدوير لان انا شاريها بمفتاح واحد وعايز اعرف لو حبيت اطلع عليه واحد منين وبكام؟

ثانياٌ:الساعه الى فى عداد ال rbm بيظبط منين وازاى؟

ثالثاٌ:لو انا حبيت اركب للعربيه ريموت للسنترلوك الى فيها ايه هو افضل و أحسن نوع واجيبه منين وفى حدود كام اذا مكنش حد عارف سعره بالظبط ؟

رابعاٌ:ولو حبيت برده اعملها زجاج كهرباء ايه برده اجود وافضل نوع وبكام وبيتباع فين؟

خامساٌ:هل فعلا ان لو انا حبيت اجيب جنوط ليها مبيكونش جامد زى الجنوط الاصليه الى بتيجى بيها بتاعة بلدها يعنى عشان انها بتكون الومنيوم ولا فى انواع مثلا بتبقى نظيفه وتمام بس بتبقى غاليه شويه يا ريت حد يكون فاهم فى موضوع الجنوط دا يفيدنى وأكون شاكر جدا.

وأخيرا::: نيجى لموضوع الكاسيت وما ادراكوا ما الكاسيت دا موال لوحده برده يا ريت الى فاهم فيهم هو طبعا وسامعاته يفيدنى فيه وأكون شاكر جدا.

وبالمناسبه انا من ساعه ما جبتها مودتهاش للميكانيكى يشيكلى عليها فايا ريت تفيدونى بخبراتكوا وتقولولى ايه المهم الى اكشف عليه او اغيره او اشتريه او اعمله عموما .

معلش يا جماعه انا طولت عليكوا فى اول مشاركه ليه فى المنتدى بس شكلى حصلى زى ما بيقولوا فضلت صايم صايم صايم وبعدين قومت داببها مره واحده ههههههههههههه


والسلام عليكم ورحمة الله وبركاته

[iBiZa]

انا على فكره مشترك فى المنتدى من زمااااان وكمان من قراء مواضيعكوا بإنتظام بس مكنتش لسه من اصحاب السيارات عشان أكلم معاكوا فيها بس الحمد لله رب العالميين اشتريت واحده بولو 2001 .

يا باشا الف مبروك.

وكان عندى شوية اساله مبدأيه أحب افتحها معاكوا كبدايه ليه فى المنتدى.
اولا: كنت عايز اعرف سعر مفتاح التدوير لان انا شاريها بمفتاح واحد وعايز اعرف لو حبيت اطلع عليه واحد منين وبكام؟

انا عربية اختى جت بمفتاح واحد, رحت عند عزب اللى فى شارع السودان ادام بنزينة موبيل و عملة فى 15 دقيقة و خد 100 جنية و ناس محترمة جدا.

ثانياٌ:الساعه الى فى عداد ال rbm بيظبط منين وازاى؟

الدايرة اللى على الشمال هتلاقي كانها مربوطة بمسامير سودة, هتلاقى اتنين من الاربعة اللى تحت مش مسامير ولاكن زراير صغيرة داخلة لجوة, اليمين بيزود الدقايق و الشمال بيزود الساعات.

باى حاجة رفيعة باة و ظبط.

ثالثاٌ:لو انا حبيت اركب للعربيه ريموت للسنترلوك الى فيها ايه هو افضل و أحسن نوع واجيبه منين وفى حدود كام اذا مكنش حد عارف سعره بالظبط ؟

اى حاجة مش فارقة.

رابعاٌ:ولو حبيت برده اعملها زجاج كهرباء ايه برده اجود وافضل نوع وبكام وبيتباع فين؟

موجود المكن الاصلى بتاعها استيراد بالفرش بتاعة و الزراير الاصلى فى حدود 1200 جنية. لو انت عايز اى حاجة تانية يبقى معرفش.

خامساٌ:هل فعلا ان لو انا حبيت اجيب جنوط ليها مبيكونش جامد زى الجنوط الاصليه الى بتيجى بيها بتاعة بلدها يعنى عشان انها بتكون الومنيوم ولا فى انواع مثلا بتبقى نظيفه وتمام بس بتبقى غاليه شويه يا ريت حد يكون فاهم فى موضوع الجنوط دا يفيدنى وأكون شاكر جدا.

انا ماليش فى موضوع الجنوط دة, بس نصيحة هات الاصلى بتاعها سواء 14 او 15 لانة بتاعها فا شكلة حلو عليها + خامتة اصلى.

وأخيرا::: نيجى لموضوع الكاسيت وما ادراكوا ما الكاسيت دا موال لوحده برده يا ريت الى فاهم فيهم هو طبعا وسامعاته يفيدنى فيه وأكون شاكر جدا.

انت عايز اية فية بالظبط ؟؟

و عموما راجع دة:

http://www.nilemotors.net/Nile/showpost.php?p=485869&postcount=4

وبالمناسبه انا من ساعه ما جبتها مودتهاش للميكانيكى يشيكلى عليها فايا ريت تفيدونى بخبراتكوا وتقولولى ايه المهم الى اكشف عليه او اغيره او اشتريه او اعمله عموما .

هى عاملة كام كيلو دلوقتى ؟؟

و راجع دة:

http://www.nilemotors.net/Nile/showthread.php?t=34761

معلش يا جماعه انا طولت عليكوا فى اول مشاركه ليه فى المنتدى بس شكلى حصلى زى ما بيقولوا فضلت صايم صايم صايم وبعدين قومت داببها مره واحده ههههههههههههه

تحت امرك يا باشا و شوف عندك اية تانى ...

[elshrpeny]

انا متشكر جدا يا ابيزا على معلوماتك المفيده دى والله بس فى حاجه عايز استفسر عليها المفتاح الى انت قولت انه بيتعمل ب 100 جنيه دا هيبقى هوا هوا الاصلى بالظبط يعنى اقدر افتح منه الابواب و الشنطه والتابلوه وكمان ادور بيه العربيه لان كنت سمعت ان فى مفتاح بيطلع ب50 او 60 جنيه يفتح الابواب والشنطه والتابلوه بس انما لو جيت ادور بيه العربيه قال إيه تبطل مدورش وكمان ممكن عشان عربية أختك موديل 99 على ما افتكر لأن تقريبا انت مره قولت كدا وجيبت الصوره بتاعة عربيتكوا انتوا الاتنين واقفين ورا بعض فعشان كدا مثلا يكون فى اختلاف بين الموديليين ال 99 و ال2000 او ال2001 فى موضوع المفاتيح دا لان المفتاح بتاعى تقريبا بشفرة كمبيوتر مش زى مثلا مفتاح الدايو لانوس مفتاح عادى مفيش فيه شفره ولا حاجه فيا ريت توضحلى النقطه دى .

وبالنسبه لريموت السنتر دا يا ابيزا سعره فى حدود كام؟


وبالنسبه للزجاج الكهرباء الى انت بتقول عليه اجيب الاستيراد الاصلى بتاعها مين اضمن واحد اقدر اجيب من عنده الموضوع دا إن شاء الله.


وبالنسبه للجنوط الاصلى بتاعتها الى انت بتقول عليها دى فى حدود كام برده ومين احسن واحد اجيبها من عنده ؟


بالنسبه لموضع الكاسيت انا قصدى اشترى واحد جديد يعنى لان بتاعها الاصلى الى جاى معاها دا طبعا مفيش فيه اكوليزر ولا هو بيشغل cd ولا اقدر اشغل اغانى بال usb وهكذا ففى واحد صاحبى كان جايب كاسيت بالمواصفات الى انا بقولك عليها دى نوعه pionner وبيقولى انه ب 1800 جنيه فهل دا احسن واحد ولا فى احسن ولا اجيب ال pionner القديم مش الحديث استعمال لانى كنت سمعت انه خرجه احسن من الحديث.

وبالنسبه للكيلوات الى عاملااها هيه انا جايبها وهيه عامله 83000 كيلو ورحت فولتها بنزيين وغيرتلها زيت موبلوان 3000 وصفرت عداد كيلوات الزيت عشان يحسب من اول ما حطتلها الزيت الجديد ايه بقى الخطوه الى بعد كدا؟
وعلى فكره الى انا شاريها منه كان قالى اما تيجى تمشى بيها تغيرلها سير كاتينه بس انا حاسس انها هتبقى عايزه كمان سير دينامو وتكييف لان التكييف مبيطلعش فريون سقوعيه يعنى ولا ممكن تكون عايزه تشحن فريون مش عارف بقى .


وبالنسبه بقى لفوانيس الشبوره الى هو على ما أعتقد فوانيس الزنون دا ولا ايه هل تنصحنى بأنى أركبه ولا لاء لانى كنت سمعت انه صينى وغالى وبيبوظ بسرعه ولو فى نوع نضيف وبيعمر ايه هو وبكام واجيبه من عند مين؟


وكمان من حق الزماره بتاعة الدريكسيون بتعلق دى من ايه من الدريكسيون نفسه ولا سلك ملمس عايز يظبط ولا ايه ؟

وكمان باب السواق بيفتح بصعوبه شويه عن بقية الابواب فهل دا طبيعى ولا محتاج تظبيط ؟


وفى حاجه كنت عايز فيها كمعلومه يعنى : هل انا كنت اجيب عربيه ابيزا 2000 افضل وكنت ريحت دماغى من حكاية الزجاج الكهرباء وريموت السنتر وكمان فوانيس الشبوره ولا انا كدا صح البولو 2001
لان انا اساسا كنت مصر على انى اجيب بولو على الرغم ان كمالياتها اقل بس كفايه انها فولكس وكمان شكلها ومتانتها .

فهل انا صح ولا غلط ؟


معلش هتعبك معايه شويه يا ابيزا بس تعمل ايه فى شغف وفضول الى لسه شارى عربيه بقى

وكنت عايز اعرف اسمك ايه بقى يا ابيزا؟


والسلام عليكم ورحمة الله وبركاته

[NaviGator_13]

مبروك يا باشا

[linuxsmile]

مبروك يا باشا
و يا ريت لو حد يعرف حد عندخ بولو 98 او 99 بالاسكندرية و تكون حالتها ممتازة

[iBiZa]

المفتاح الى انت قولت انه بيتعمل ب 100 جنيه دا هيبقى هوا هوا الاصلى بالظبط يعنى اقدر افتح منه الابواب و الشنطه والتابلوه وكمان ادور بيه العربيه.

الPolo من موديل 1998 نزلت فيها Immobilizer عشان موضوع شفرة المفتاح.
المفتاح اللى انت بتقول علية دة بيتعمل ازاى ؟؟
الراجل بياخد منك المفتاح و بيحطة على مكنة المفاتيح و يجيب الجديد و يشغلها و ينقل التعاريج (فى ناس بتقول عليها الخريطة) من القديم للجديد و بس كدة.
الراجل اللى بقولك علية دة بقى بيزود على كدة انة بيفك الImmobilizer من العربية و يوصلة عندة على الكمبيوتر و يعمل download للشفرة اللى علية لعندة و بيكتبها برقم شاسية العربية (عشان لو احتاجتها تانى ميفكش تانى) و بعد كدة يحط المفتاح الجديد على جهاز تانى واصل بالكمبيوتر و ينقل لة الشفرة.
انا جبت الراجل دة من هنا:http://www.nilemotors.net/Nile/showthread.php?t=22724 و عايز اقول لك انى رحت لمركز سعيد و عصام دة بردة بس قالى 200 جنية و تاخد ساعة بينما عزب قالى 100 جنية و ربع ساعة.
المفتاح هيعملك كل اللى انت عايزة و حتى مش هتعرف تفرقة من الاصلى فى الشكل من برة.

وبالنسبه لريموت السنتر دا يا ابيزا سعره فى حدود كام؟

انا الصراحة معرفش.
بس دة مش ريموت لوحدة, دية وحدة كاملة بتركب و مفيش منها اصلى فى مصر (على حسب ما اعرف) فا لو كدة ركب انزار و هو يعمل الموضوع دة.

وبالنسبه للزجاج الكهرباء الى انت بتقول عليه اجيب الاستيراد الاصلى بتاعها مين اضمن واحد اقدر اجيب من عنده الموضوع دا إن شاء الله.

انا جبت من عند بيومى فى الحرفيين و ممكن بردة تلاقى عند الشهاب فى الحرفيين و الاتنين حاجتهم نضيفة جدا.

وبالنسبه للجنوط الاصلى بتاعتها الى انت بتقول عليها دى فى حدود كام برده ومين احسن واحد اجيبها من عنده ؟

نفس الاتنين اللى فوق و اعتقد ان ال14 بيعمل من 900 ال 1500 و ال15 بيعمل من 1500 الى 2000 حسب الحالة.

بالنسبه لموضع الكاسيت

انت طبعا تجيب اى نوع مش فارقة, بس طبعا يفضل الBlaupunkt عشان هيركب على نفس الفيشة من غير ما اى حد يقص سلكة واحدة. و دة من مميزاتة انة نفس لون اضائة التابلوة فا مش هيبقى شاذ + ان الموديلات الجديدة فيها كل اللى بتقول علية.

بص على الBlaupunkt Hamburg MP68 فية كل اللى انت عايزة + انة بيشتغل Car Kit للموبايل عن طريق الBluetooth و سعرة كان فى حدود 1400 او 1500 (مش فاكر بالظبط) بالضمان المحلى عند مجدى كلاريون فى ميدان الحجاز فى مصر الجديدة.

وبالنسبه للكيلوات الى عاملااها هيه انا جايبها وهيه عامله 83000 كيلو ورحت فولتها بنزيين وغيرتلها زيت موبلوان 3000

دايما هات زيت Synthetic زى الSell Ultra او الMobil1 اللى بيعمل 10,000 كيلو و تغير الفلتر مع كل غيار زيت لان الخواص بتاعتة احسن و بتحتمل الحرارة و الاحتكاك عن الزيت العادى و بتطول عمر الموتور.

وصفرت عداد كيلوات الزيت عشان يحسب من اول ما حطتلها الزيت الجديد

دة مش عداد كيلوات الزيت, دة عداد الtrip, يعنى تقيس علية مسافة من حتة الى حتة تانية, تسفرة لما تفول عشان تعرف العربية استهلكت اد اية. انما غيار الزيت دايما يحسب على العداد الكبير يعنى انت غيرت دلوقتى على 83,000 يبقى الغيار اللى جاى مثلا على 86,000 و هكذا.

ايه بقى الخطوه الى بعد كدا؟

يا ريت فلتر هواء و بوجيهات و فلتر بنزين, هيفرقوا معاك جامد. و من ال100,000 امشى على الجدول مظبوط.

وعلى فكره الى انا شاريها منه كان قالى اما تيجى تمشى بيها تغيرلها سير كاتينه

المفروض لو كان عامل الService مظبوط يبقى السيور هتتغير عند ال100, اسالة مغير الحاجات دية امتى.

انا حاسس انها هتبقى عايزه كمان سير دينامو وتكييف لان التكييف مبيطلعش فريون سقوعيه يعنى ولا ممكن تكون عايزه تشحن فريون مش عارف بقى .

لا ملهاش علاقة بالسير, هو يا اما شغال يا اما مقطوع.
اكشف على الفريون و غالبا هتلاقية ناقص.
و معلومة بردة ليك, التكييف بتاعها ساقع جدا بس مشكلتة ان مروحة الكويل ضعيفة فا بياخد وقت. يعنى انت تحط ايدك قدام الهوايات هتلاقى ان ايدك بتلج بس لما تبعدها تحس بالهواء ضعيف.
انا فية ناس قالتلى غير مروحة الكويل او الكويل نفسة بواحد يابانى بس انا مش بحب العك فا راضى بية كدة.

وبالنسبه بقى لفوانيس الشبوره الى هو على ما أعتقد فوانيس الزنون دا ولا ايه هل تنصحنى بأنى أركبه ولا لاء لانى كنت سمعت انه صينى وغالى وبيبوظ بسرعه ولو فى نوع نضيف وبيعمر ايه هو وبكام واجيبه من عند مين؟

فوانيس الشبورة بتيجى من غير لمض اساسا و ممكن تركبلها لمض عادية H7 و لو انت عايز تجيب لمض زينون دية طبعا حاجة ترجعلك.

احسن حاجة بالنسبة للسعر حاليا هو الHID Plus و السعر مش فاكر بالظبط بس هتلاقى ناي كتير قالتة فى حتت هنا على الforum

وكمان من حق الزماره بتاعة الدريكسيون بتعلق دى من ايه من الدريكسيون نفسه ولا سلك ملمس عايز يظبط ولا ايه ؟

معرفش لانها محصلتليش, بس روح لكهربائى يبصلك عليها دية حاجة بسيطة.

وكمان باب السواق بيفتح بصعوبه شويه عن بقية الابواب فهل دا طبيعى ولا محتاج تظبيط ؟

لا كدة محتاج تظبيط لان عند كل الابواب بتفتح زى بعض.

وفى حاجه كنت عايز فيها كمعلومه يعنى : هل انا كنت اجيب عربيه ابيزا 2000 افضل وكنت ريحت دماغى من حكاية الزجاج الكهرباء وريموت السنتر وكمان فوانيس الشبوره ولا انا كدا صح البولو 2001
لان انا اساسا كنت مصر على انى اجيب بولو على الرغم ان كمالياتها اقل بس كفايه انها فولكس وكمان شكلها ومتانتها .

دية اذواق, و بعدين انا ركبت الIbiza 2000 من كام شهر و فضلت معايا شوية, بصراحة مستريحتش فيها. التابلوة و الصالون مش عاجبنى خالص و شكلها من قدام برضة مش عاجبنى (بقول اذواق تانى).

انا بحب الPolo دية بالزات و تابلوها مختلف عن اى عربية VW من حيث التصميم و لو على اد كماليات, ابقى هات براحتك اللى انت عايزة.

معلومة: دية اخر موديل Polo طلع من مصانع المانيا.
معلومة: حاجة الPolo استيراد و جديد اكتر من الIbiza اوى.

معلش هتعبك معايه شويه يا ابيزا بس تعمل ايه فى شغف وفضول الى لسه شارى عربيه بقى

انت بس شاور يا باشا

وكنت عايز اعرف اسمك ايه بقى يا ابيزا؟

اسمى عماد

[elshrpeny]

الله يبارك فيك يا wolfenstion

الله يبارك فيك يا linuxsmile

وعاشت الاسامى يا عماد و انا اسمى عمرو الشربينى .
ومتشكر جدا والله يا عماد على المعلومات دى وياريت مكنش اجهدتك معايه فى الرد ويا رب يجعله فى ميزان حسناتك إن شاء الله .

بس على فكره انا نسيت اقولك انى من دمياط فهل لو انا اتصلت باى واحد من الاتنين الى انت قولتلى عليهم دول من بتوع المفاتيح ممكن يجى دمياط او يدينى ميعاد يكون جاى فيه دمياط اقابله ولا هضطر اروحله انا ؟

وفى حاجه كنت نسيت اسالك عليها . بالنسبه لدراع رفع الزجاج عندى واحده فى الباب الخلفى الأوكره الدايره بتاعتها مش موجوده فهل الأوكره دى بتتباع اقدر اجيب واحده غيرها ولا الدراع كله ببعضه بيتباع اجيبه على بعضه وخلاص ؟


والسلام عليكم ورحمة الله وبركاته

[Michael_Lanos]

الف مبروك يا باشا
وتعالى بقه المقابله بيها
الناهرهده الجمعه 28 نوفمبر 2008
الساعه 3 م فى كارفور الاسكندريه
امام الطارق بتاع العربيات

[iBiZa]

وعاشت الاسامى يا عماد و انا اسمى عمرو الشربينى .

اهلا بيك يا عمرو معانا

متشكر جدا والله يا عماد على المعلومات دى وياريت مكنش اجهدتك معايه فى الرد ويا رب يجعله فى ميزان حسناتك إن شاء الله .

يا باشا مافيش اجهاد ولا حاجة و انا تحت امرك.

بس على فكره انا نسيت اقولك انى من دمياط فهل لو انا اتصلت باى واحد من الاتنين الى انت قولتلى عليهم دول من بتوع المفاتيح ممكن يجى دمياط او يدينى ميعاد يكون جاى فيه دمياط اقابله ولا هضطر اروحله انا ؟

معتقدش, بس جرب

وفى حاجه كنت نسيت اسالك عليها . بالنسبه لدراع رفع الزجاج عندى واحده فى الباب الخلفى الأوكره الدايره بتاعتها مش موجوده فهل الأوكره دى بتتباع اقدر اجيب واحده غيرها ولا الدراع كله ببعضه بيتباع اجيبه على بعضه وخلاص ؟

الدراع كلة يا باشا